ކޮންމެ އަހަރަކުވެސް 25 ނޮވެމްބަރ 2025 އިން ފެށިގެން 16 ދުވަހަށް ކުރިއަށް ގެންދާ، ވަކި ޖިންސަކަށް ވީތީ އަންހެނުން އަދި އަންހެން ކުދިންނަށް ކުރާ އަނިޔާއާއި ދެކޮޅަށް މިއަހަރުވެސް މަމްސް އެއިޑް ޖަމިއްޔާ އިން ވަނީ ވަރަށް ހާއްސަ ހަރަކާތް ތަކެއް ރާވާފައެވެ. މި އަހަރުގެ ޝިއާރަކީ ޑިޖިޓަލް ވައެލަންސް ނުވަތަ އިންޓަނެޓް އަދި ޓެކްނޮލޮޖީގެ ޒަރީއާއިން ލިބޭ އަނިޔާއާއި ދެކޮޅަށް މަސައްކަތް ކުރުމެވެ.
މި އަހަރު މަމްސް އެއިޑްއިން ރާވާފައިވާ ހަރަކާތްތަކުގެ ތެރޭގައި:
28 ނޮވެމްބަރ 2025 ވާ ހުކުރު ދުވަހުގެ ރޭ، ސްޓްރޯންގް ވުމެން، ސޭފް ވުމެން ސެލްފް ޑިފެންސް ވޯކްޝޮޕް: މި ވޯކްޝޮޕް ކުރިއަށް ގެންދަނީ، ޕޮލިސް، އެމް އެން ޑީ އެފް، ވެލްނަސް ކްލަބް އަދި އެސޯސިއޭޝަން ފޯ ވިމަން އެމްޕަވަމަންޓް އާއި ގުޅިގެންނެވެ.
ބައިވެރިވުން ހިލޭ، ހަމަ އެކަނި އަންހެނުންނަށް ހާއްސަކޮށްގެން ބޭއްވޭ މި ވޯކްޝޮޕްގެ ބޭނުމަކީ އަންހެނުންނަށް އަދި އަންހެން ކުދިންނަށް ދިމާވާ ތަފާތު އަނިޔާކަށް ހޭލުންތެރި ކުރުވުމާއި، އެ އަނިޔާއިން ރައްކާތެރިވުމަށް ކުރެވިދާނެ ކަންތައްތައް ކިޔާދިނުމެވެ. ވެލްނަސް ކްލަބްގައި ހުކުރު ދުވަހު ރޭގަނޑު 8 ޖަހާއިރު ފެށުމަށް ހަމަޖެހިފައިވާ މި ވޯކްޝޮޕްއަށް އާންމުންގެ ތާޢީދު ވަރަށް ބޮޑަށް ލިބޭކަން މަމްސް އެއިޑްއިން ފާހަގަ ކުރެއެވެ. އަދި ބުރާސްފަތި ދުވަހުގެ ރޭގަނޑު 8 އާއި ހަމައަށް ރަޖިސްޓްރީ ވުމަށް ވަނީ ހުޅުވާލާފައެވެ.
7 ޑިސެމްބަރ 2025، ވާ އާދިއްތަ ދުވަހުގެ ރޭގަނޑު ކުއިޒް ނައިޓްއެއް ބޭއްވުމަށް ވަނީ ހަމަޖެހިފަ. މި ކުއިޒް ނައިޓްގެ ބޭނުމަކީ މަޖާ މާހައުލެއްގައި ވާދަވެރި ބައިވެރިވުމަކުން ޓީމްތަކެއް ހަދައި އަންހެނުންނަށް ދިމާވާ ތަފާތު އަނިޔާތަކަށް ހޭލުންތެރި ކުރުމެވެ. މި އިވެންޓަކީ ދެ ޖިންސުގެ މީހުންނަށް ހުޅުވާލެވިގެން، 4 މީހުންގެ ޓީމްއަކުން، ޓީމްއަކަށް 200 ރުފިޔާގެ ފީއެއް ނަގައިގެން ކުރިއަށް ގެންދިއުމަށް ހަމަޖެހިފައިވާ އިވެންޓެކެވެ. ވަނަ ތަކަށް ހޮވޭ 3 ޓީމްތަކަށް ވަރަށް އަގުހުރި އިނާމުތައް ވަނީ ހަމަޖެހިފައެވެ. މި ކުއިޒް އަށް ރެޖިސްޓްރީ ވުމަށް މި އަންނަ ހަފްތާ ތެރޭގައި ހުޅުވާލެވޭނެ ކަމަށް މަމްސް އެއިޑް އިން މަޢުލޫމާތު ދެއެވެ. މި ކުއިޒް ނައިޓްވެސް މަމްސް އެއިޑްއިން ބޭއްވުމަށް ހަމަޖެހިފައިވަނީ އެސޯސިއޭޝަން ފޯ ވިމަން އެމްޕަވަމަންޓް، ޝީ، އެޗްއާރްސީއެމްއާއި ގުޅިގެންނެވެ.
އަންހެނުންނަށް ކުރާ އަނިޔާއާއި ގުޅިގެން، ރައްކާތެރިވެވޭނެ ގޮތްތަކާއި، އަނިޔާ އަކީ ކޮބާ ކަމާއި އަދި ރާއްޖޭގައި ލިބޭނެ އެހީތަކަށް އަލި އަޅުވާލައިގެން އޮންލައިން ވެބިނާރ އެއް ބޭއްވުމަށް ވެސް ވަނީ ހަމަޖެހިފައެވެ.
މި އިވެންޓްތަކުގެ އިތުރަށް ވެސް މަމްސް އެއިޑްގެ ސޯޝަލް މީޑިއާ ޕްލެޓްފޯމް ތަކުގައި ހޭލުންތެރި ކުރުމުގެ ކެމްޕެއިންއެއް ކުރިއަށް ދާނެއެވެ. އަންހެނުންނާއި އަންހެން ކުދިންނަށް ލިބެމުންދާ ކޮންމެ އަނިޔާއަކީ ވެސް މުޖުތަމަޢުގެ ހުރިހާ މީހުންގެ އިސްނެގުމާއެކު، ގުޅިގެން ރަނގަޅު ކުރުމަށް މަސައްކަތް ކުރަންޖެހިފައިވާ ބޮޑު މައްސަލައެކެވެ. މިއީ އެންމެންގެ ޒިންމާއެއްގެ ގޮތުގައި ދެކެންޖެހެއެވެ.
