1- އެންމެން ވެސް ދަންނަ ފަދައިން މާމުޔަކީ ވަރަށް މީރު އެއްޗެކެވެ. މާމުއިގެ ވާހަކަ ކީރިތި ޤުރްއާނުގައި ބަޔާން ކުރައްވާފައި ވެއެވެ. މާމުއިގައި އިންސާނުންނަށް ޝިފާ ލައްވާފައި ވާކަން އަންގަވާފައިވެއެވެ. މާމުއި އުފެދެނީ ކިހިނެ ހެއްޔެވެ.
2- މިޒަމާނުގެ ސައިންސުގެ ހޯދުންތަކުން އެނގޭ ގޮތުގައި ވެސް މާމުޔަކީ ވަރަށް ފައިދާހުރި އެއްޗެކެވެ. އެއިން ހަށިގަނޑަށް ހަކަތަ ލިބެއެވެ. ފިންޏާއި އަރިދަފުހުން ސަލާމަތް ކޮށްދެއެވެ. ޚާއްޞަކޮށް މާމުޔަކީ ކުޑަކުދިންނަށް ވަރަށް ފައިދާހުރި އެއްޗެކެވެ. ހަށިގަނޑު ރަނގަޅަށް ބޮޑުކުރުމަށް ބޭނުންވާ ބައިތައް އެކުލެވިފައިވާ އެއްޗެކެވެ.
3- އިހުޒަމާނުގެ މީހުން ވެސް މާމުއިގެ ފައިދާތައް ދަނެއެވެ. މާމުއިކުޅަދުރު ގެންގުޅެއެވެ. ނަމަވެސް އެ ޒަމާނުގެ މީހުންނަކަށް މާމުއި އުފެދޭ ގޮތެއް ނޭނގެއެވެ. އޭރުގެ މީހުން ހީކުރަނީ މާމުއި އަންނަނީ ވައިގެ ތެރެއިން ކަމަށެވެ. އަދި މާމުއި އުފެއްދުމަށް އެހީވެދެނީ ތަރިތައް ކަމުގައެވެ. ޚާއްޞަ ތަރިއެއް އަރާ ދުވަސްވަރު މާމުއި ވަކިން ރަނގަޅުވާނޭ ކަމަށް ވެސް ބުނެއުޅެއެވެ.
4- ނަމަވެސް މި ޒަމާނުގައި އެންމެންނަށް ވެސް މާމުއި އުފެދެނީ މާމެލާމެލިންކަން ވަނީ އެނގިފައެވެ. މަލުގެ ކަރުގަނޑުގައި ހުންނަ، ފެނެއް ކަހަލަ ފޮނި ދިޔާ އެއްޗެއް (މަލުގެ ފޮނި) އެންމެންނަށް ވެސް ފެނެއެވެ. އޭގައި ގިނައިން ހުންނަނީ ގުދުރަތީ ގުލްކޯޒެވެ. މާމުއި ކުޅަދުރު އެ އެއްޗެހި ޖަމާކުރަނީއެވެ.
5- މާމުއިކުޅަނދުރު މާމަލުން ބޯ ފޮނި ދަނީ އެސޮރުގެ ބަނޑުތެރޭގައި އޮންނަ ޚާއްސަ ކޮތަޅަކަށެވެ. އެ ކޮތަޅަކީ ޤުދުރަތުން މާމުއި އުފެއްދެވުމަށްޓަކައި އޭތީގެ ބަނޑުގައި ލައްވާފައި އޮންނަ އެއްޗެކެވެ. ކުޅަނދުރު އެ އެއްޗެހި ހަތައަށް ޖަމާކުރަންދެން ހުންނަނީ މި ދެންނެވި ކޮތަޅުގައެވެ. މަލުގެ ފޮނި އެ ކޮތަޅުގައި ހުންނައިރު އެއަށް މަޑުމަޑުން ބަދަލެއް އާދެއެވެ. ކުޅަނދުރުގެ ގުލޭންޑް (ގޮށް ) ތަކުން ނިކުންނަ ދިޔައެއް ވެސް މަލުގެ ފޮންޏާ އެކުވަމުން ދެއެވެ. މި ގޮތަށް އާދައިގެ ހަކުރުން ގުލްކޯޒު އުފެދޭ ފަދައިން މަލުގެ ފޮންޏާއި ކުޅަނދުރުގެ ގޮށްތަކުން ނިކުންނަ ދިޔަޔާ އެކުވެގެން މާމުއި އުފެދެއެވެ.
6- މާމަލުގެ ފޮނި އެއްކުރުމުގައި އެހީވެދެނީ ކުޅަނދުރުގެ ހޮނޑެވެ. އެއީ ވަރަށް ނާޒުކު ވަރަށް އާދަޔާ ޚިލާފު ގުނަވަނެކެވެ. ޤުދުރަތުން އޭތީގެ ހޮނޑުގައި ކުޑަ " ސަމުސަލެއް " ކަހަލަ އެއްޗެއް ލައްވާފައިވެއެވެ. މަލުގެ ފޮނި ނަގަނީ އެއިންނެވެ. ކުޅަނދުރުގެ ދެ ބަނޑު ހުރެއެވެ. އެއީ މާމުއި ކޮތަޅު އޮންނަ ބަނޑާއި އޭތީގެ ހަށިގަނޑުގެ އެހެނިހެން ބައިތައް ހުންނަ ބަނޑެވެ. ކުޅަނދުރަށް އޭތި ބަނޑުހައިވުމުން ހިސާބަކަށް މާމުއި ފޮދެއް ބޭނުން ކުރެވޭނެ ގޮތް ވެސް ޤުދުރަތުން ތަނަވަސް ކޮށްދެއްވާފައިވެއެވެ. މާމުއި ތިއްކެއް އުފެއްދުމަށް އެތައް ސަތޭކަ މަލެއްގެ ފޮނި ބޯންޖެހެއެވެ. އެތައް މޭލެއްގެ ދަތުރު ކުރަންޖެހެއެވެ.
7- މާމުއި ކުޅަނދުރުގެ ހަތާގައި "ރަނިކަނބަލެއް" އިނދެއެވެ. އެހެން ކުޅަދުރުތަކަކީ " މަސައްކަތު މީހުން" ނެވެ. އޭގެ މަސައްކަތަކީ މާމަލުގެ ފޮނި ޖަމާކުރެމެވެ. "ރަނިކަމަނާ" އަރާމު ކުރައްވަނީއެވެ. މަސައްކަތަށް ފަރުވާ ބެހެއްޓުމާއި މަސައްކަތް ދެކެ ލޯބިވުމުގެ ފިލާވަޅު ލިބިގަތުމަށް އެންމެ ރަނގަޅު އެއް އުސްތާޒަކީ މާމުއި ކުޅަނދުރެވެ.
ސުވާލުތައް:
1- މާމުޔާ ބެހޭގޮތުން ކީރިތި ޤުރްއާނުގައި ބަޔާން ކުރައްވާފައި ވަނީ ކީކޭހެއްޔެވެ؟
2- އިހުޒަމާނުގެ މީހުން މާމުއި އުފެދޭކަމަށް ހީކުރާ ގޮތްތަކެއް ހުރެއެވެ. އޭގެތެރެއިން ދެ ގޮތެއް ލިޔެދޭށެވެ!
3- މާމުއި އުފެދެނީ ކިހިނެއް ހެއްޔެވެ؟ އޭގައި އެންމެ ގިނައީ ކޮން ބާވަތެއް ހެއްޔެވެ؟
4- މާމުއި އުފައްދަނީ ކޮންތާކު ހެއްޔެވެ؟
5- ކުޅަނދުރުގައި 2 ބަނޑު ހުރެއެވެ. އެއީ ކޮން ދެ ބަނޑެއް ހެއްޔެވެ؟
6- މާމުއި ކުޅަނދުރުގެ ހަތާގައި އިންނަ "ރަނިކަމަނާ" ކުރަނީ ކޮންކަމެއް ހެއްޔެވެ؟
7- މަސައްކަތަށް ފަރުވާ ބެހެއްޓުމާއި މަސައްކަތް ދެކެ ލޯބިވުމުގެ ފިލާވަޅު ލިބިގަތުމަށް އެންމެ ރަނގަޅު އެއް އުސްތާޒަކީ މާމުއި ކުޅަނދުރުކަމަށް އެބަ ބުނެއެވެ. އެ ބުނާ ބަހުގެ މާނައަކީ ކޮބައިހެއްޔެވެ؟
ދޭހަ ކިޔުމަށްފަހު ރަނގަޅު ޖަވާބުގައި ރަނގަޅުފާހަގަ ނުބައި ޖަވާބުގައި ނުބައިފާހަގަ ޖަހާށެވެ!
ހ. މާމުއިގެ ވާހަކަ ކީރިތި ޤުރްއާނުގައި އަންގަވާފައިވެއެވެ.
ށ. މާމުޔަކީ ކުޑަކުދިންނަށް ވަރަށް ފައިދާހުރި އެއްޗެއްކަން ސައިންސުވެރިން ބުނެއެވެ.
ނ. މަލުގެ ފޮނި ކޮތަޅުގައި ހުންނައިރު އެއަށް ބަދަލު އަންނަނީ މަދުމަދުންނެވެ.
ރ. ކުޅަދުރުގެ ހޮނޑު މާމަލުގެފޮނި އެއްކުރުމުގައި އެހީވެދެއެވެ.
ބ. މި ޒަމާނުގެ މީހުންނަށް މާމުއި އުފެދޭގޮތް އެނގެނީ ސައިންސުގެ ޒަރީއާއިންނެވެ.
ދޭހައިގައި ބޭނުންކޮށްފައިވާ ޙާލަތަށް ވިސްނައިގެން، ތިިރީގައި އެވާ ލަފުޒުތަކުގެ މާނަ ލިޔާށެވެ!
ހ- ޝިފާ (ޕެރެގްރާފު1) _______________________________________________
ށ- ގުލްކޯޒް (ޕެރެގްރާފު4) _________________________________________________
ނ- ދިޔަ (ޕެރެގްރާފު5) _________________________________________________
ރ- ހޮނޑު (ޕެރެގްރާފު6) _________________________________________________
ބ- ނާޒުކު (ޕެރެގްރާފު6) _________________________________________________
ޅ- ރަނިކަމަނާ (ޕެރެގްރާފު7) ________________________________________________
ނޯޓް: ޙުސްނާ ފަހްމީ (ހުސްނާ މިސް) އަކީ، ރާއްޖޭގެ ތަޢުލީމީ ދާއިރާގައި 42 އަހަރަށް ވުރެ ގިނަ ދުވަހު އިޚުލާޞްތެރި ޚިދުމަތްތަކެއް ކުރައްވާފައިވާ ކަނބަލެކެވެ. އަދި މެދުނުކެނޑި 37 އަހަރަށް ވުރެ ގިނަ ދުވަހު ދިވެހި ދައުލަތައް ޚިދުމަތްކުރައްވާފައި ވާތީ، ރައިސުލްޖުމްހޫރިއްޔާ ދެއްވާ ދައުލަތަށް ގިނަ ދުވަހު ޚިދުމަތް ކުރުމުގެ އިނާމު 2021 ވަނަ ލިބިވަޑައިގަތުމާއެކު 2023 ވަނަ އަހަރު ރެހެންދި އެވޯޑް ލިބިވަޑައިގެންފައިވެއެވެ. ހިތްވަރު ދިނުމުގެ ޤައުމީ އިނާމު ހުސްނާއަށް ލިބިވަޑައިގެންނެވީ 2025 ވަނަ އަހަރު އެވެ. ޙުސްނާ ފަހްމީ "އަރާކުރި" ސީރީސް ގެ ނަމުގައި ދިވެހިބަހުގެ ހަތަރު ހުނަރަށް އަމާޒުކުރައްވައިގެން ނާސަރީ ކުދިންނަށް ޚާއްޞަ ދިވެހިބަހުގެ އަކުރުތަކާއި ފިލިތަކާއި ސުކުންތައް ދަސްކޮށްދޭ ފޮތްތަކުން ފެށިގެން ޕްރައިމަރީ އަދި މެދުމަދަރުސީ ގްރޭޑްތަކުގެ ކުދިންނަށް ޚާއްޞަކޮށްގެން ޢިބްރަތްތެރި އަދި މަޖާ ކުރު ވާހަކަތަކާއި، މަސައްކަތު ފޮތްތަކާއި، ވާހަކަ ދޭހައާއި ކިޔުމުގެ ދޭހައިގެ ފޮތްތަކުގެ އިތުރުން އުފެއްދުންތެރި ލިޔުމުގެ ފޮތްތައް ހިމެނޭނޭހެން 40 ފޮތެއް މިހާތަނަށް ނެރެ އާންމުކުރައްވާފައިވެއެވެ.
