މާލެ، އެމްޕީއެލް ބަނދަރާއި ދިމާ ބޭރުން 14 މީހުންނާއެކު ކޮޅުވެއްޓިއެއް ބަންޑުންޖަހާލީ މިއަދު މެންދުރުފަހުގައެވެ. ފުލުހުން މައުލޫމާތުދިންގޮތުގައި މިހާދިސާގެ މައުލޫމާތު ރިޕޯޓްކޮށްފައިވަނީ 03:44 ހާއިރުގައެވެ.
އެމްއެންޑީއެފްއިން މައުލޫމާތު ދިންގޮތުގައި ކޮޅުވެއްޓި ބަންޑުންޖަހާލިއިރު އޭގެ ތެރޭގައި މީހަކު ހުރިކަމުގެ މައުލޫމާތު ލިބުމާއި ގުޅިގެން ކޯސްޓްގާޑުގެ ޑައިވަރުން ކުރި މަސައްކަތުން އެމީހާގެ ހަށިގަނޑު ވަނީ ހޯދާފައެވެ. މިހާދިސާގައި ނިޔާވެފައިވަނީ ބަންގްލަދޭޝް އަށް ނިސްބަތްވާ އުމުރުން 32 އަހަރުގެ މަސޫދު ހޮސެއިން އެވެ. މަސޫދަކީ 2022 ވަނަ އަހަރުގެ އޮކްޓޯބަރުން ފެށިގެން ލޭބަރާގެ މަގާމުގައި އެމްޕީއެލްގައި ވަޒީފާ އަދާކުރަމުން އައި މީހެކެވެ.
މިހާދިސާގައި އަނިޔާވެގެން 6 މީހަކު ވަނީ އައިޖީއެމްއެޗް އަށް ގެންގޮސްފައެވެ. އެއީ 2 ބިދޭސީންނާއި 4 ދިވެހީން ކަމަށް ފުލުހުންގެ މުއައްސަސާއިން ވަނީ މައުލޫމާތު ދީފައެވެ.
" މިހާދިސާގައި އަނިޔާވި ދިވެއްސަކަށް ވަނީ ބޮޑެތި އަނިޔާތަކެއް ލިބިފައި. މި މީހާގެ ހާލު ސީރިއަސް. އެއީ 25 އަހަރުގެ ފިރިހެނެއް". ފުލުހުންގެ މީޑިއާ އޮފިޝަލު މައުލޫމާތު ދީފައިވެއެވެ.
މިނިމުނު އޮކްޓޫބަރު މަހުގައިވެސް މާލެއިން ފުރައިގެން ދަތުރުކުރަމުންދިޔަ ކޮޅުވެއްޓިއެއް ބަންޑުންޖަލާއި އޭގައިން ދަތުރުކުރި 3 މީހަކު މަރުވެފައިވެއެވެ. އެއީ ދިވެއްސަކާއި 2 ބިދޭސީންނެވެ.
