އެ ހަމަޖެހުން ލިބުމާއެކު، އަޝްރަފްގެ ހިނގުން އަވަސްކޮށްލިއެވެ. ގެއާ ހަމައަށް ވީހާވެސް އަވަހަށް ދެވޭތޯ އޭނާ ދުވަންފެށިއެވެ. މަގުގެ ދެފަރާތުގައި ހުރި ގަސްގަހުގެ ތެރެއިން، ކުރިން ނުއިވޭފަދަ ބިރުވެރި އަޑެއް ކަންފަތުގައި ޖެހުނެވެ. އެއީ ވައިގެ އަޑެއް ނޫނެވެ. އެއްވެސް ދިރޭ އެއްޗެއްގެ އަޑެއްވެސް ނޫނެވެ. ކޮންމެވެސް އެއްޗެއްގެ ބަރު ފިޔަވަޅުގެ އަޑެއް ހެން ހީވިއެވެ.
އަޝްރަފް ފަހަތް ބަލާލިއެވެ. އަނދިރިކަމުގެ ތެރެއިން، ގަސްތަކުގެ ހިޔަލުގެ ދަށުން، ފަހަތުން ކޮންމެވެސް އެއްޗެއް އަންނަކަމުގެ އިހްސާސް އޭނާއަށް ކުރެވުނެވެ. އެއީ އިންސާނެއް ނޫންކަން އޭނާއަށް ކަށަވަރުވިއެވެ. އޭނާގެ ދުވެލި އިތުރަށް އަވަސްކޮށްލަމުން ދިޔައިރު، އެ އަޑުތައް އޭނާއާ ކައިރިވަމުން ދިޔަ ކަހަލައެވެ.
އަޝްރަފްގެ ފަހަތުން އިވޭ ފިޔަވަޅުގެ އަޑުތައް ހީވަނީ ގަސްގަހާ ގެހީގެ ތެރެއިން ނިކުމެ، އޭނާއާ ވީހާވެސް ކައިރިވާން މަސައްކަތް ކުރާހެންނެވެ. ހަށިގަނޑުން ހަކަތަ ހުސްވަމުން ދިޔަ ނަމަވެސް، މަރުގެ ބިރުން އޭނާ ދުވެއެވެ. ގެއާ ހަމައަށް ދެވޭތޯ ދުވަމުން ދަނިކޮށް، އޭނާގެ ކަންފަތުގައި ކުއްލިއަކަށް ބިރުވެރި ހީނލުމެއް އިވެންފެށިއެވެ. އެއަޑާއެކު އޭނާގެ ހިތް ހީވީ ހުއްޓިގެންދިޔަހެންނެވެ. އެއީ އޭނާގެ ފަހަތުގައި ހުރި އެއްޗެއްގެ އަޑެވެ. އޭނާގެ ފަހަތުގައިވާ އަނދިރިކަމުގެ ތެރެއިން އެއްޗެއް އައިސް އޭނާގެ ކޮނޑުގައި ހިފާލި އިހުސާސުވިއެވެ. އޭނާގެ ހުރިހާ ބާރަކާއެކު ކުރިއަށް ދުއްވައިގަތެވެ. ނަމަވެސް، މަޑުކޮށްލަންވީ ވަގުތު ޖެހިއްޖެކަން އޭނާއަށް އެނގުނެވެ. އޭނާގެ ފަހަތުން އެއަންނަ އެއްޗަކީ ކޮބައިކަން އެނގުމުން، މަރުވެދާނެ ކަމަށް އޭނާގެ ހިތަށް އެރިއެވެ. އޭނާ ލޯމަރާލިއެވެ. ކުރިއަށް ހިނގާނެ ކަމަކަށް އޭނާ ތައްޔާރުވެފައި ހުރީ މަރުގެ ބިރުގަންނަ ހާދިސާއަކަށެވެ. ނަމަވެސް، ކޮނޑުގައި ހިފާލި އެތީގެ ފިނި އިހުސާސް ތަކަކާއި އެކު ދެން އިވުނީ އަޝްރަފްގެ ކަންފަތް ކައިރިން ބިރުވެރި ބީރައްޓެހި އަޑަކުން ކިޔާލި ވައްތަރުގެ ބަސްތަކެކެވެ.
އަޝްރަފްގެ ހަށިގަނޑު މުޅިން ހުއްޓިއްޖެއެވެ. ދެ ލޯ މަރައިގެން ހުރެ، އޭނާއަށް ކުރެވެމުން ދިޔައީ ވަރަށް ބިރުވެރި އިހުސާސްތަކެކެވެ. އެންމެ ފަހުން އޭނާ ލޯ ހުޅުވާލިއިރު، އޭނާގެ ކުރިމަތީގައި ހުރި އެތި ފެނުމުން، އަޝްރަފް ބިރުން މަރުނުވީ ކިރިޔާއެވެ. އެއީ އިންސާނެއްގެ ސިފައެއް ނޫނެވެ. ހިމަ، ދިގު އިނގިލިތަކުން އަޝްރަފްގެ ކޮނޑުގައި ބާރަށް ހިފާލާފައި ހުއްޓެވެ.
އަޝްރަފްގެ އަނގައިން އަޑެއް ނުނިކުތެވެ. އެއްވެސް ބަހެއް ބުނުމަށް އޭނާއަށް ކުޅަދާނައެއް ނޫނެވެ. މުޅި ހަށިގަނޑު ހީވަނީ ހަރުވެފައި ހުރިހެންނެވެ. އެ ބިރުވެރި އެތީގެ ރަތްކުލައިގެ ކަޅިތަކަށް ބަލަހައްޓައިގެން ހުރި އިރު، އަޝްރަފްއަށް ހީވީ މަރުގެ ވަގުތު ޖެހުނު ހެންނެވެ. އަޝްރަފް ބިރުން ހުރެ އަތްފައި ފިނިވެ، މުޅި ހަށިގަނޑު ތުރުތުރުއަޅަމުން ދިޔައެވެ. އެ އެތި ދެވަނަ ފަހަރަށް އޭނާގެ ކައިރިއަށް ޖެހިލަމުން، އެނޫން ހީނލުމަކުން ހީނލިއެވެ.
ކޮންމެވެސް ގޮތަކުން އެތަނުން ސަލާމަތްވެވޭތޯ އޭނާ ހުރިހާ ބާރެއް ލާފައި ދުއްވައިގަތެވެ. ފަހަތް ނުބަލާ، ހީނލުމުގެ އަޑު ދުރުވަމުން ދިޔައިރުވެސް އޭނާގެ ހިތް ތެޅެމުން ދިޔައީ ވަރަށް ބާރަށެވެ. ގެއާ ހަމައަށް ދެވޭތޯ އަޝްރަފް ދުވަމުން ދިޔައިރު، ހީވަނީ އެ އެތި ފަހަތުން އަދިވެސް އަންނަހެންނެވެ. ހުރިހާ ހަކަތައެއް ހުސްވެ، ލޯބޮޑުވެ، ނޭވާލާންވެސް ދަތިވިއެވެ. ދުވެފައިގޮސް ގެއަށް ވަދެ ދޮރު ލައްޕާލީ ވަރަށް ބާރަށެވެ. ބިރުވެރި ހީނލުމުގެ އަޑު މުޅިން ކެނޑިގެން ދިޔައިރުވެސް، އަޝްރަފަށް ހަމަޖެހުމެއް ނުލިބުނެވެ.
ގެއަށް ވަނުމަށްފަހު، ދޮރު ލައްޕާލިނަމަވެސް، އަޝްރަފްގެ ހިތް ތެޅެމުން ދިޔައީ ބާރަށެވެ. މުޅި ހަށިގަނޑު ހީވީ ވަރުބަލިވެ، ވެއްޓިދާނެހެންނެވެ. ފާރުގައި ލެނގިލައިގެން ދެލޯ ބޮޑުވެފައި ހުއްޓެވެ. ބޭރުގައި ހުރި ބިރުވެރި އެތީގެ ހީނލުމުގެ އަޑު ކެނޑިފައިވީނަމަވެސް، އަޝްރަފްގެ ކަންފަތުގައި އެއަޑު އަދިވެސް ގުގުމަމުން ދިޔަ ކަހަލައެވެ. އަޝްރަފްއަށް ހީވީ ކޮންމެވެސް ގޮތަކުން އެ އެތި ފަހަތުން ގެއަށް ވަދެފައިވާ ހެންނެވެ. ކޮންމެ ވަގުތަކުވެސް އޭނާގެ ފަހަތުން ކޮނޑުގައި ހިފާލަފާނެ ކަމުގެ ބިރު އޭނާގެ ހިތުގައި އޮތެވެ.
ރޭގަނޑު މުޅިން އަނދިރިވެފައިވާއިރު، ގޭތެރެއިން އިވޭ ކުދިކުދި އަޑުތަކަށްވެސް އޭނާ ސަމާލުކަން ދެމުން ދިޔައެވެ. ފުރާޅުމަތީގައި ދުއްވައިގަންނަ ދޫންޏެއްގެ އަޑުވެސް އޭނާއަށް އިވުނީ ބަރު ފިޔަވަޅުގެ އަޑެއްގެ ގޮތުގައެވެ. ކުދިކުދި ހިމަހިމަ ހިޔަނިތައް ފެންނަން ފެށުމުން، އަޝްރަފްގެ މޭތެޅުން އިތުރަށް އަވަސްވިއެވެ. ހިތްވަރުކޮށްލާފައި ދިޔައީ ގޭގެ ހުރިހާ ދޮރުތަކާއި ދޮރޯށިތައް ރަނގަޅަށް ބަންދުކޮށް، ތަޅުލެވިފައިތޯ ބަލައިލުމަށެވެ. އެނދުގައި އޮށޯތްއިރުވެސް، އަޝްރަފްއަށް ނިންޖެއް ނުލިބުނެވެ. ދެލޮލުން ކަރުނަ ފޭބި ނަމަވެސް، އެކަނި އޮވެ ރޮމުން ދިޔައީ، އެ ރޭ އޭނާއަށް ކުރިމަތިވި ބިރުވެރިކަމުގެ ސަބަބުންނެވެ.
އެހެން ހަފްތާތައް ފާއިތުވެގެން ދިޔައިރުވެސް އަޝްރަފްގެ ދިރިއުޅުމަށް ބޮޑު ބަދަލުތަކެއް އަންނަމުން ދިޔައެވެ. ނިދި ނުލިބޭތީ ކޮންމެ ދުވަހަކުވެސް ހީވަނީ ވަރުބަލިވެފައި ހުރިހެންނެވެ. މީހުންނާ ވާހަކަ ދެއްކުންވެސް މަދުކުރިއެވެ. ކޮންމެ ކަމެއްގައިވެސް ބިރުވެރިކަމެއް ފެންނަން ހުރި ކަހަލައެވެ. އެންމެ އާދައިގެ އަޑެއްވެސް އޭނާއަށް އިވެނީ ބިރުވެރި އަޑެއްގެ ގޮތުގައެވެ. މަގުތަކުގެ އަނދިރި ހިޔަނިތަކުންވެސް އެ ރޭ ފެނުނު އެތީގެ ސިފަ ފެންނަމުން ދިޔަ ކަހަލައެވެ.
މިކަމާއި އަޝްރަފްގެ އަންހެނުންވެސް ދިޔައީ ވަރަށް ފިކުރުބޮޑުވެ މިކަމުން އަރައިގަނެވޭތޯ މަސައްކަތް ކުރަމުން ދިޔައެވެ. އަޝްރަފްގެ މޫނުމަތިން ފެންނަމުން ދިޔަ ހިތާމަޔާއި ބިރުގެ ސަބަބުން ހިތަށް ބޮޑު ހާސްކަމެއް ވެރިވެފައި ހުއްޓެވެ. ކޮންމެ ރެއަކުވެސް އަޝްރަފް ހޭލަނީ ބިރުވެރި ހަޅޭއްލެވުމަކާއެކުގައެވެ.
ނަމަވެސް، ރޭގަނޑުގެ ވަގުތު ޖެހުމުން، ބިރުވެރިކަން އަލުން އާދެއެވެ. ކޮންމެ ރެއަކުވެސް އަޝްރަފް ދެކޭ ހުވަފެންތައް އިތުރަށް ބިރުވެރިވެ، ގެތެރެއިން އިވޭ އަޑުތައްވެސް އިތުރުވާން ފެށިއެވެ. އަދިވެސް، ފަހަތުގައި އެއްޗެއް ވައިރޯޅިއެއްހެން އުޅޭކަމުގެ ކުރެވެއެވެ.
ދަންވަރުގެ ވަގުތެވެ. އަޝްރަފްއަށް ހޭލެވުނީ ކައިރީގައި މީހަކު އުޅޭކަމަށެވެ. މަޑުމަޑުން ދެލޯ ހުޅުވައިލިއެވެ. ކުރިމަތީގައި ހުރީ ޒުވާން އަންހެނެކެވެ.
އަޝްރަފްގެ ހިތް ބާރަށް ތެޅެން ފެށިއެވެ. އޭނާއަށް ހީވީ ހުވަފެނެއް ފެންނަހެންނެވެ. ނަމަވެސް، ކުރިމަތީގައި ހުރި އަންހެންކުއްޖާގެ ދެލޮލުން ފެންނަމުން ދިޔަ ރަތްކުލަ އޭނާގެ ހަނދާނަށް ގެނެސްދިނީ އެރޭ ފެނުނު ބިރުވެރި މަންޒަރެވެ. އެ އަންހެންކުއްޖާގެ މޫނުމަތިން ފެންނަމުން ދިޔައީ ބީރައްޓެހި ހިނިތުންވުމެކެވެ. އަންހެންކުއްޖާ ހުރީ އެއްވެސް ހަރަކާތެއް ނުކޮށެވެ. ކޮޓަރީގެ އަނދިރިކަމުގެ ތެރެއިން އޭނާގެ ހިމަ، ދިގު އިނގިލިތައް އަޝްރަފްއާ ދިމާލަށް ދިއްކޮށްލިއެވެ. އަޝްރަފްގެ ހަށިގަނޑުގެ ހިނގުން ހުއްޓި، އަނގައިން އެއްވެސް އަޑެއް ނުނިކުތެވެ. ބޭނުންވީ ހަޅޭއްލަވަން ނަމަވެސް، އަޑެއް ނުނިކުތެވެ. އަނގަ ހުޅުވިފައި ހުރި ނަމަވެސް، އެއްވެސް އަޑެއް ނުނިކުތުމުން،އިތުރަށް ބިރުގަތެވެ.
އެ އަންހެންކުއްޖާ މަޑުމަޑުން އަޝްރަފްގެ އެނދު ކައިރިއަށް ޖެހިލިއެވެ. ފިޔަވަޅުގެ އަޑެއްވެސް އިވޭނެ ގޮތެއް ނުވިއެވެ. އެއީ ހީވަނީ ވައިރޯޅިއެއްހެން އައިސްފައިވާ އެއްޗެއްހެންނެވެ. އަޝްރަފްގެ މޫނުމަތިން ބިރުވެރިކަން ފެނުމުން، އެ އަންހެންކުއްޖާގެ ހިނިތުންވުން އިތުރަށް ފުޅާވެ، އެއީ އިންސާނެއްގެ ހިނިތުންވުމެއް ނޫންކަން ކަށަވަރުވިއެވެ. އޭނާގެ ދިގު އިނގިލިތަކުން އަޝްރަފްގެ ކޮނޑުގައި ހިފާލިއެވެ. އަޝްރަފްގެ ހިތް ހީވީ ހަށިގަނޑުން ނިކުމެގެން ދާން އުޅޭހެންނެވެ. ހިތުގެ ތެޅުން މުޅި ގޭތެރެއަށް އިވެން އުޅޭހެން ހީވިއެވެ.
އަންހެންކުއްޖާގެ އަނގަ މަޑުމަޑުން ހުޅުވި، އެތެރެއިން ފެނުނު ދިގު، ކޮޅުތޫނު ދަތްތަކުން އަޝްރަފް މަރުވެދާން އުޅޭހެން ހީވިއެވެ. އެ ދަތްތަކުގެ ތެރެއިން ނިކުތީ ބިރުވެރި، ބީރައްޓެހި އަޑެކެވެ.
"ކަލޭ ދުވަހަކުވެސް ސަލާމަތެއް ނުވާނެ..." އެ އަޑާއެކު އަޝްރަފްގެ ހަށިގަނޑު ތުރުތުރުއަޅަން ފެށިއެވެ. ދެލޯ ބޮޑުވެ، ހާސްކަމާއެކު އެނދުން ތެދުވާން މަސައްކަތްކުރިއެވެ. ނަމަވެސް، އެއަންހެންކުއްޖާގެ އަތުގެ ހަރަކާތްކުރެވޭ ގޮތެއް ނުވިއެވެ.
އެ ވަގުތު ކޮޓަރީގެ ދޮރުހުޅުވައިލި އަޑަށް އެ އަންހެންކުއްޖާ ބަލައިލީ ބިރުވެރި ބެލުމެކެވެ. އަޝްރަފްގެ އަންހެނުން އައިސް ކޮޓަރިއަށް ވަންނަ މަންޒަރު ފެނި، އަޝްރަފްގެ ދެލޮލުން ކަރުނަ ފޭބިއެވެ. ނަމަވެސް އެއަންހެންކުއްޖާ ކުއްލިއަކަށް ވައިރޯޅިއެއްހެން ގެއްލިއްޖެއެވެ.
"ކިހިނެއްވީ؟ އަޑު އިވިގެން މިއައީ" މިހެން ބުނެ އަޝްރަފްގެ މޫނަށް ބަލައިލިއެވެ. އަޝްރަފް އަންހެނުންގެ ކޮނޑުގައި ބާރަށް ހިފާލަމުން ރޮމުން ދިޔައެވެ.
"އެއީ އެއި.. އެ އައިސްފި...އަހަރެން މަރުވެދާނެ" އަޝްރަފް ރޯންފެށިއެވެ.
އެވަގުތު އިޙްސާސްވީ ކޮޓަރީގެ ތެރެއިން ފިނި ވައިރޯޅިއެއް ހިނގައިލިކަމެވެ. އެއީ ހަމައެކަނި އަޝްރަފް ދެކެމުންދާ ހުވަފެނެއް ނޫންކަމެވެ. ދެމަފިރިންގެ ހިތުގައި ބިރުވެރިކަމުގެ ހުޅުގަނޑެއް ރޯވެއްޖެއެވެ. އެ ރޭ ދެމަފިރިންނަށްވެސް ނިންޖެއް ނުލިބުނެވެ.
= ނުނިމޭ =
