ޢަބްދުﷲގެ ހިތުގައި ބިރުވެރިކަން ކެނޑިގެން ދިޔައީ އޭނާގެ ކިބައިގައި އުފެދުނު ހިތްވަރަކުންނެވެ. އެކަނިމާއެކަނި ނަމަވެސް، މި ރަށަށް ވެރިވެފައިވާ މި ބިރުވެރިކަމުން ސަލާމަތްވުމަށް އޭނާ މަސައްކަތް ކުރަންޖެހޭނެކަން އޭނާއަށް އިޙްސާސް ކުރެވުނެވެ. މި ކަމާ ގުޅޭގޮތުން މައުލޫމާތު ހޯދަން އޭނާ ފެށީ ރަށުގެ އެންމެ އުމުރުން ދޮށީ މީހުންނާއެވެ. އޭގެތެރެއިން އެންމެ އެންމެ ފުރަތަމަ ދިޔައީ ފާތިމަ ދައިތަގެ ގާތަށެވެ. ފާތިމަ ދައިތައަކީ، ރަށުގެ މީހުންގެ ތެރޭގައި އެންމެ ދުވަސްވީ ކަންތައްތަކާއި ރަށުގެ ތާރީޚު އެންމެ ރަނގަޅަށް ދަންނަ މީހާއެވެ.
ފާތިމަދައިތަގެ ގެއަށް ޢަބްދުﷲ ވަދެގެންދިޔައިރު، ގެއިން އައީ ވަރަށް އާދަޔާ ޚިލާފު ވަހެކެވެ. އެއީ ހިތްހަމަޖައްސައިނުލެވޭފަދަ ވަހެކެވެ. ދައިތަ އިނީ ކުޑަކޮޓަރިއެއްގެ ތެރޭގައި ގަދަޔަށް ކިޔަވާށެވެ.
"ދައިތާ! ކިހިނެއްވީ؟ ކީއްވެ ތި ކީރިތިކުރަނީ؟" ޢަބްދުﷲ ދެލޯ ބޮޑުކޮށްލަމުން ދައިތަޔަށް ގޮވާލިއެވެ.
"ޢަބްދުﷲ، ދަރިފުޅާ! މިއީ ހަމަ ބިރުވެރި ހުވަފެނެއްކަމަށް ވެއްޖިއްޔާ ކިހާ ރަނގަޅުވީސްތަ؟" ފާތިމަދައިތަގެ އަޑު ތުރުތުރުލަމުން ދިޔައެވެ. ދައިތަގެ ވާހަކަތަކުން ޢަބްދުﷲގެ ހިތަށް ބިރުވެރިކަމުގެ އިތުރު އަސަރެއް ފޯރިއެވެ.
"ދައިތާ، ކަންތައްތައް ހިނގަމުންދާގޮތުން އަހަރެން ދެރަވޭ. މި ރަށަށް ވެރިވެފައިވާ މި ބިރުވެރިކަމަކީ ކޯޗެއްކަން ދައިތަ އަށް އެނގޭނެއެއްނު؟" ޢަބްދުﷲ އުއްމީދާއެކު ދައިތަގެ މޫނަށް ބަލާލިއެވެ.
ފާތިމަދައިތަ މަޑުމަޑުން ނޭވައެއް ލިއެވެ. އެއީ ވަރުގަދަ ސިއްރުތަކެއް އެނގޭ މީހެއްގެ ނޭވާއެވެ.
"ދަރިފުޅާ... މި ބިރުވެރިކަން ފެށިގެން އައިސްފައިވަނީ ވަރަށް ކުރިއްސުރެ ރަށުގައި ވަޅުލެވިފައިވާ ކަމަކުން" ދައިތަ ވާހަކަ ދައްކަމުންދިޔައިރު، ޢަބްދުﷲ އަށް ހީވީ އޭނާގެ ކަންފަތް ކައިރިން އެ ރޫޙުގެ އަޑު އިވޭހެންނެވެ.
"އަހަރެމެންގެ ރަށަކީ ކުރިން ވަރަށް އަމާން، ޞުލްޙަވެރި ރަށެއް. އެކަމަކު އެއްދުވަހަކު ބޭރުން އައި ބަޔަކު ރަށުގެ މީހުންގެ ކަންކަމުގެ ތެރެއަށް ވަދެ، އެމީހުންގެ ނުބައިކަން ރަށުތެރޭގައި ފެތުރިގެން ދިޔަ" ފާތިމަދައިތަގެ އަޑަށް ބިރުވެރިކަމެއް ވެރިވެގަތެވެ.
"އެމީހުން ރަށުން ފައްސާލުމަށް މީހުން މަސައްކަތްކުރި ނަމަވެސް، އެމީހުންގެ ނުބައިކަން ރަށުން ފިލައިގެން ނުދިޔަ. އެ ނުބައިކަން، ރަށުގެ ވަކިތަނެއްގައި ވަޅުލެވިފައިވާ ކަމަށްވެސް ބުނެވެއެވެ." ޢަބްދުﷲ އަށް ހީވީ މި ވާހަކަތައް އިވުމުން އޭނާގެ ހަށިގަނޑުން ދިލަހޫނެއް އެރިހެންނެވެ.
"ވަޅުލެވިފައި؟ ކޮންކަހަލަ ކަމެއް؟" ޢަބްދުﷲ ސުވާލުކުރިއެވެ.
"އެ ނުބައިކަން ވަޅުލެވިފައިވަނީ ޖިންނިއެއްގެ ރޫޙު. ވަރަށް ނުރައްކާތެރި، ޤަދީމީ ޖިންނިއެއް" ފާތިމަދައިތަ ހިތްދަތިކަމާއެކު ދެލޯ މަރާލަމުން ދެން އޮތް ވާހަކަ ކިޔައިދޭން ފެށިއެވެ.
"އެ ރޫޙު މިހާރު ހޭލައްވައިފިކަން އެނގެނީ މި ރަށަށް ދިމާވެފައިވާ ކަންތައްތަކުން. އެ ރޫޙު ހޭލައްވައިފިނަމަ، މުޅި ރަށް ނެތިކޮށްލާނެކަމަށް ބުނެވޭ" މި ވާހަކައިން ޢަބްދުﷲގެ ގައިން ހީބިހި ނަގައިގަތެވެ. ފާތިމަދައިތަގެ އަޑު ނިކަން ބިރުވެރިއެވެ.
"އެކަމަކު... އެ ރޫޙު ނައްތާލެވޭނެ ގޮތެއްވެސް އެބައޮތް" ދައިތަގެ މި ވާހަކައިން ޢަބްދުﷲ އަށް ހިތްވަރެއް ލިބުނެވެ. އޭނާގެ ހިތުގައި އުއްމީދުގެ ހުޅުކޮޅެއް ދިއްލިގެން ދިޔައެވެ.
"ކޮން ގޮތެއް؟" ޢަބްދުﷲ އަހާލިއެވެ.
ފާތިމަދައިތަ އިނގިލި ދިއްކޮށްލީ އޭނާގެ ކޮޓަރީގެ އެންމެ އެތެރޭގައި ހުރި ފޮށިގަނޑަކަށެވެ. "އެ ފޮށިގަނޑުގެ ތެރޭގައި ޤަދީމީ ފޮތެއް އެބައޮތް. އެ ފޮތުގައި އެ ރޫޙު ހުއްޓުވުމަށް ކުރަންޖެހޭ ކަންތައްތައް ލިޔެފައިވޭ. އެކަމަކު އެ ފޮތް ކިޔަންޖެހޭނީ ހިތްވަރުގަދަ، ތެދުވެރި މީހެއް. އެއްވެސް ބިރެއް ނެތި މިކަމަށް ކުރިމަތިލެވޭންޖެހޭނެ" ޢަބްދުﷲ އަށް ވިސްނުނީ، ދައިތަ މި ބުނަނީ އޭނާގެ ވާހަކަކަމެވެ.
މި ބުރަ މަސްއޫލިއްޔަތު އޭނާގެ ކޮނޑުގައި އެޅުނުކަމުގެ އިޙްސާސް ކުރެވުނެވެ. އޭނާ ފޮށިގަނޑު ކައިރިއަށް ދިޔައިރުވެސް ޖިންނީގެ ނުބައި ރޫޙުގެ އަސަރު އޭނާއަށް ކުރަމުންދިޔައެވެ. އެ ފޮށިގަނޑު ހުޅުވަން ހިތްވަރު ކުރިއެވެ.
ހެނދުނުގެ ފިނިކަން ފިލައި، އިރުގެ ރަން ރިހި ދޯދިތައް ރަށުގެ ގަސްތަކުގެ ތެރެއިން ބިންމައްޗަށް ވެރިވާން ފަށައިފިއެވެ. ރަށުގެ މީހުން ދުވާލުގެ މަސައްކަތްތަކަށް ތައްޔާރުވަމުން ދިޔައިރު، ހިމޭންކަން ވެރިވެފައިވާ މާހައުލެއް އޮތީއެވެ. ނަމަވެސް އެ ހިމޭންކަން ދިޔައީ ސިއްސައިގެންދާފަދަ ޚަބަރަކުންނެވެ. ރަށުގެ އުތުރު ކޮޅުގައި، ގޮނޑުދޮށާ ކައިރިން މީހަކު މަރުވެގެން ލައްގާފައިވާ ކަމުގެ ވާހަކައެވެ. މި ޚަބަރު، ވައިރޯޅިއަކަށްވުރެ ބާރަށް ރަށުތެރެއަށް ފެތުރިގެން ދިޔައީ ކުޑަ ވަގުތުކޮޅެއްގެ ތެރޭގައެވެ. ކޮންމެ މީހެއްގެ އަނަގައިން އެއް ވާހަކަ ކިޔަމުން ދިޔައެވެ. މިއީ ހަމަ އެ ނުބައި ރޫޙުގެ ފަހު ޢަމަލު ކަމުގައެވެ. އެ ރޫޙު އެތައް ދުވަހު ރަށު މީހުންނަށް ދެމުން އައި ބިރުވެރިކަމުގެ ނިމުން ކަމުގައެވެ.
އެކަމަކު، ޢަބްދުﷲ އާއި ފާތިމަދައިތަގެ ހިތުގައި ބޮޑު ސުވާލެއް އުފެދުނެވެ. އެ ދެމީހުންގެ ހިތުގައި އޮތީ ބިރުވެރި ވަސްވާހެކެވެ. ރަށު މީހުން ހީކުރި ގޮތަށް މިއީ ހަމަ އެ ނުބައި ރޫޙުގެ ފަހު ޢަމަލުތޯއެވެ؟ ނުވަތަ އެ ރޫޙު ނެތިކޮއްލުމަށް އެ ދެމީހުން ކުރި މަސައްކަތުގެ ނަތީޖާއެއްގެ ގޮތުން، އެއަށްވުރެ ނުރައްކާތެރި އެހެން ކަމެއް ހިނގިފައި އޮތީތޯއެވެ؟ އެމީހުންގެ ހިތަށް އެރީ އެހެން ޚިޔާލެކެވެ. ބައެއްފަހަރު ނުބައި އެއްޗެއް ނައްތާލުމަށް ކުރާ މަސައްކަތުގެ ސަބަބުން، ކުރިއަށްވުރެ ނުރައްކާތެރި އެހެން އެއްޗެއް އުފެދިދާނެއެވެ.
އެ ދެމީހުންގެ ހިތުގައި ބިރުވެރިކަން އަށަގަތް ނަމަވެސް، ޙަޤީޤަތް ހޯދުމުގެ އަޒުމު އެ ދެމީހުންގެ ހިތުގައި އޮތެވެ. ޢަބްދުﷲ އާއި ފާތިމަދައިތަ ނިންމީ، މަރުވެފައި އޮތް މީހާގެ ހަށިގަނޑު ބަލާލުމަށް ދިޔުމަށެވެ. އެއީ އެ މަރުގެ ފަހަތުގައިވާ ސިއްރު ހޯދުމަށްޓަކައެވެ. އެ މީހުން ދިޔައިރު، ގޮނޑުދޮށާއި ކައިރީގައި މީހުން އެއްވެފައިވާތީ ފެނުނެވެ. އެއީ ހަމަ އެ ރޫޙުގެ ފަހު ޢަމަލު ކަމަށް ހީކުރެވިފައިވާތީ، މީސްތަކުންގެ މޫނުމަތިން ފެންނަމުން ދިޔައީ ބިރުވެރިކަމެވެ.
ހަށިގަނޑު އޮތީ ވަރަށް ނުބައި ޙާލަތެއްގައެވެ. މޫނުމަތިން ފެންނަން ހުރީ ލޭތަކާއި، ހަށިގަނޑުގެ ބައެއް ތަންތަން ފަޅައިގެން ގޮސްފައި ހުއްޓެވެ. މަރުވެފައިވާ މީހާގެ ކަނާތު އަތުގެ ފަލަމަސްގަނޑުގައި، އާދަޔާ ޚިލާފު ޢަލާމާތެއް ފެނުނެވެ. އެ ޢަލާމާތަކީ، އެ ރޫޙު ނައްތާލުމަށް ޢަބްދުﷲ އާއި ފާތިމަދައިތަ ބޭނުންކުރި "ސިއްރު ފިލާ" ގައި ކުރަހާފައިވާ ޢަލާމާތާ ވަރަށް އެއްގޮތް އެއްޗެކެވެ. މިކަމުގެ ސަބަބުން އެ ދެމީހުންގެ ހިތަށް ވަރަށް ބޮޑު ސިހުމެއް ލިބުނެވެ.
"ފާތިމަދައިތާ! މިއީ ހަމަ އެ ރޫޙުގެ ޢަމަލެއް ނޫން!" ޢަބްދުﷲގެ އަޑުގައި އޮތީ ބިރުވެރިކަމެވެ. "އަހަރެމެންނަށް މި ވެގެން އުޅެނީ ކޮންކަމެއްތޯ؟" ފާތިމަދައިތަގެ މޫނުމަތިން ފެންނަމުން ދިޔައީ ވަރަށް ބޮޑު ހައިރާންކަމާއި ބިރުވެރިކަމެވެ.
އެ ދެމީހުން ދުރަށް ޖެހިލިއެވެ. އެ މީހުންނަށް އިޙުސާސް ކުރެވުނު ގޮތުގައި، އެ މީހުން ކުރި މަސައްކަތުގެ ސަބަބުން، ކުރިއަށްވުރެ ނުރައްކާތެރި އެއްޗެއް ދޫކޮށްލެވިފައި ވަނީއެވެ. ރަށުގެ މީސްތަކުން އެ ހީކުރާ ގޮތެއް ނޫންކަން އެ ދެމީހުންނަށް ވަރަށް ސާފުކޮށް އެނގިއްޖެއެވެ. އެ ރޫޙު ނައްތާލަން ކުރި މަސައްކަތުގެ ސަބަބުން، އޭގެ ހިތްހަމަނުޖެހުމާއި، ބަދަލު ހިފުމުގެ ރޫޙު ވަނީ އައު މަގަކުން ފެށިފައިކަން އެ ދެމީހުންނަށް އިޙުސާސް ކުރެވުނެވެ. މިހާރުގެ ޙާލަތަކީ ކުރިއަށްވުރެ ބޮޑު ނުރައްކަލެކެވެ. މި ހިސާބުން އެ ދެމީހުންގެ ހިތްތައް ބިރުވެރިކަމުން ފުރިގެން ދިޔައެވެ. އެމީހުންގެ މަޤްސަދަކަށްވީ ހަޤީޤަތް ހޯދައި، މި ބިރުވެރިކަން ނިމުމަކަށް ގެނައުމެވެ. އެކަމަކު އެ ދެމީހުންނަށްވެސް އެނގިފައި ނެތީ، މި ބިރުވެރި މަސައްކަތް ނިމޭނެ ތަނެއް ނުވަތަ އެއަށްވުރެ ބޮޑު ނުރައްކަލެއް ކުރިމަތިވެދާނެ ކަމެވެ.
އެމީހާގެ ކަށުކަމާކެމީގެ ކަންތައް ނިންމާލާފައި އެމީހުންނަށް ގެއަށް އާދެވުނީ ހަވީރުވީ ފަހުންނެވެ. ޢަބްދުﷲ ވެސް ފެންވަރައިގެން ގޮސް ކޮޓަރީގައި އޮތީ ވަރުބަލިވެފައިވާތީއެވެ. ނަމަވެސް އިޝާއަށް ގޮވިތަނާހެން މީހަކު އައިސް ގޮވާލިއަޑަށް ޢަބްދުﷲ ބޭރަށް ނިކުތެވެ. އެމީހާ ހުރީ ވަރަށް ބިރުގެންފައެވެ. އަނެއްކާ މީހަކު މަރުވެގެން ލައްގައިފިޔޯ އެމީހާ ބުނެލިއެވެ.
ރޭގަނޑުގެ އަނދިރިކަމުގެ ތެރެއިން ގަސްތަކުގެ ހިޔަނިތައް ފެންނަމުން ދިޔައިރު، ކޮންމެ ފިޔަވަޅަކާއެކުވެސް އެ ބިރުވެރިކަން އިތުރުވަމުން ދިޔައެވެ. ގޮނޑުދޮށާ ކައިރިއަށް ދެވުނުއިރު މީހުން އެއްވެފައިވާތީ ފެނުނެވެ. އެމީހުންގެ މޫނުމަތިން ފެންނަމުން ދިޔައީ ފުން ހިތާމައާއި، އެއަށްވުރެ ބޮޑު ބިރުވެރިކަމެވެ.
ފުރަތަމަ މަރުވި މީހާގެ ހަށިގަނޑު ފެނުނު ހާލަތަށްވުރެވެސް ނުބައި ހާލަތެއްގައި ދެވަނަ މީހާގެ ހަށިގަނޑު އޮތެވެ. މުޅި ހަށިގަނޑުވަނީ ލެއިން ތަތްތެޅިފައެވެ. އަދި އަތްފައިގެ ބައެއް ތަންތަން ފަޅައިގެންގޮސްފައި ހުއްޓެވެ. ފުރަތަމަ މަރުވި މީހާގެ އަތުން ފެނުނު ޢަލާމާތާ އެއްގޮތް ޢަލާމާތެއް މިފަހަރުވެސް މަރުވެފައިވާ މީހާގެ ކަނާތުގެ ފައިގެ ފަލަމަސްގަނޑުން ފެނުނެވެ. މިކަން ފެނުމާއެކު ޢަބްދުﷲ އަށް އިޙްސާސްވީ އޭނާގެ މުޅި ހަށިގަނޑަށް ކަރަންޓުގެ ޝޮކެއް ލިބުނުފަދަ ގޮތަކަށެވެ.
"އަހަރެމެން ކުރި މަސައްކަތުގެ ސަބަބުން، ހަމަ އެ ރޫޙު ނުވަތަ އެއަށްވުރެ ނުރައްކާތެރި އެހެން އެއްޗެއް ދޫކޮށްލެވިއްޖެ" ފާތިމަދައިތަގެ ދުލުން ބޭރުވީ މަޑުމަޑު އަޑެކެވެ.
ޢަބްދުﷲގެ ހިތް ބިރުން ފިނިވެގެން ދިޔައެވެ. އެމީހުން ހީކުރި ގޮތަކީ ރޫޙު ނައްތާލެވުނީ ކަމަށެވެ. ނަމަވެސް އަދި ކުރިއަށްވުރެ ނުރައްކާތެރި ގޮތަކަށް އެ ރޫޙު އެބަ ހަރަކާތްތެރިވެއެވެ. ނުވަތަ، އެ ރޫޙު އޭގެ ބާރުގެ ފެށުމެއްގެ ގޮތުގައި އެހެން އެއްޗެއް ދޫކޮށްލީއެވެ.
"ފާތިމަދައިތާ، އަހަރެމެންނަށް ޖެހޭނީ އަވަހަށް އެ ސިއްރު ފިލާ ބަލަން. މިކަމުގެ ހައްލެއް އެ ފިލާގައި ހުރެދާނެ" ޢަބްދުﷲ ބުނުމުން ފާތިމަދައިތަ ބޯޖަހާލިއެވެ.
އެ ދެމީހުންގެ ހިތުގައި ބިރުވެރިކަން އަށަގަނެފައިވީ ނަމަވެސް، ރަށުގެ ސަލާމަތަށްޓަކައި ޙަޤީޤަތް ހޯދައި، މި ބިރުވެރިކަން ނިމުމަކަށް ގެނައުމަށް އެ ދެމީހުން އަޒުމު ކަނޑައެޅިއެވެ. އެ ދެމީހުންނަށް އިޙްސާސް ކުރެވުނު ގޮތުގައި، އެމީހުން މިހާރު ހުރީ އާދަޔާ ޚިލާފު ބިރުވެރި މަސައްކަތެއްގެ ފެށުމުގައެވެ. މި މަސައްކަތް ކިހާ ދުވަހަކަށް ކުރިއަށް ދާނެކަމެއް ނުވަތަ މީގެ ނިމުމަކަށް އަންނާނީ ކިހިނެއް ކަމެއް ނޭނގެއެވެ.
= ނުނިމޭ =
