ދިވެހިރާއްޖެއަށް 2 ކޮންޓެއިނަރުގެ ސިނގިރެޓް ވަގަށް އެތެރެކުރިކަން ފަޅާއަރައިގެން ހިފެހެއްޓީ މިދިޔަ އެޕްރީލް މަހުގައެވެ. މައުލޫމާތު ލިބޭގޮތުގައި މިއީ 40 ފޫޓުގެ 2 ކޮންޓެއިނަރުގައި ބަންދުކޮށްފައި ހުރި 1360 ކޭސް ސިނގިރެޓެވެ.
ކަސްޓަމްސްއިން ހިފެހެއްޓުމަށްފަހު މި 2 ކޮންޓެއިނަރު ބެހެއްޓީ ހުޅުމާލެ ބަނދަރުގައި މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ބެލުމުގެ ދަށުގައެވެ. އާންމުގޮތެއްގައި މިގޮތަށް ހިފަހައްޓާ ތަކެތި އޮންނަ އުސޫލުގެ ތެރެއިން ނައްތާލައެވެ. އެކަމަކު މި ސިނގިރެޓްތައް ނައްތާނުލާ ބަހައްޓާފައިވަނީ ތަހުގީގު ނިމެންދެންކަމަށް ވަނީ މައުލޫމާތު ލިބިފައެވެ.
ހުޅުމާލެ ބަނދަރު ހުންނަނީ ފިތުރޯނުމަގުގެ މީހުން ދިރިއުޅޭ ފުލެޓުތަކެއްގެ ކުރިމަތީގައެވެ. ޖެހިގެން އޮންނަނީ ޑްރައިވިން ލައިސަންސް ނެގުމަށް ގިނަ އަދަދެއްގެ މީހުން ސައިކަލު އަދި ކާރު ދުއްވަން ދަސްކުރާ ތަނެވެ. އަދި ހުޅުމާލޭގެ އެމްޕީއެލް އޮފީސްވެސް ހުންނަނީ މި ސަރަހައްދުގައެވެ.
ޑިއުޓީގެ ގޮތުގައި އެކަނިވެސް 100 މިލިއަން ރުފިޔާ ދައުލަތަށް ލިބޭނެކަމަށް ބެލެވޭ މި ސިނގިރެޓް ކޮންޓެއިނާތައް ރާއްޖެ އެތެރެކުރީ ކޮން ކުންފުންޏެއްކަން ކަސްޓަމްސް އަދި އެމްޕީއެލްއިން ވެސް ހާމަކޮށްފައި ނުވެއެވެ. އެހެންނަމަވެސް 2 ކޮންޓެއިނަރުގައި ހުރި ސިނގިރެޓް 'ވަގުކަލޭގެ' ވަގަށް ގެންގޮސްފައިވާކަން އެނގުނީ ރޭގެ ވަގުތެއްގައެވެ.
އެމްޕީއެލްއިން ވަނީ މިމައްސަލައިގައި މިއަދު މީޑިއާތަކަށް މެސެޖެއް ފޮނުވައިފައެވެ.
" ކަސްޓަމްސްއިން ހިފަހައްޓާފައިވާ 2 ކޮންޓެއިނަރުގައި ހުރި ދުންފަތުގެ ބާވަތްތައް އެމްޕީއެލްގެ ހުޅުމާލެ ޓާމިނަލްއިން ގެއްލިފައިވާ މައްސަލަ ފުލުހުން ގެންދަނީ ތަހުގީގު ކުރަމުން. މިމައްސަލައަކީ ތަހުގީގު މަރުހަލާގައިވާ މައްސަލައަކަށްވުމުން އިތުރު ތަފްސީލު މިވަގުތު ހިއްސާކުރެވެން ނެތް. އަދި މިމައްސަލައާއި ގުޅިގެން އެމްޕީއެލްގެ ކަމާއި ގުޅުންހުރި ޑިޕާޓްމަންޓުތަކުން ވެސް އެތެރޭގެ ތަހުގީގެއް ކުރިއަށް އެބަގެންދޭ". އެމްޕީއެލްއިން ހާމަކޮށްފައިވެއެވެ.
މިމައްސަލައިގެ ތަހުގީގު ނިމުމުން ތަހުގީގު ރިޕޯޓާއި އެއްގޮތަށް އެމްޕީއެލްއިން އަޅަންޖެހޭ އެންމެހާ ފިޔަވަޅުތައް ތަންފީޒުކުރާނެ ކަމުގެ ޔަގީންކަން އެމްޕީއެލްއިން ވަނީ ދީފައެވެ.
އެމްޕީއެލްއިން މުދާ ކްލިއަރކުރާނެ ވަކި ޕްރޮސެސް އެއް އޮވެއެވެ. އެއީ ބޭނުން މީހަކު ބަނދަރަށް ވަދެ ކޮންޓެއިނަރ އަމިއްލައަށް ހުޅުވައިގެން ކުރެވޭނެ ކަމެއް ނޫނެވެ. ސުވާލަކީ 2 ކޮންޓެއިނަރުގެ ސިނގިރެޓް 'ވަގުކަލޭގެ' ގެންދިޔައިރު ހަމަ ނޭގެނީބާއެވެ؟ ސީސީޓީވީ ކެމެރާ ކޮބާހެއްޔެވެ؟ ސެކިއުރިޓީންނާއި މުވައްޒަފުން ކޮބާހެއްޔެވެ؟ އެވަރުގެ ވައްކަމެއް ކުރެވޭކަމަށްވާނަމަ ކުރިއަށްއޮތްތަނުގައި ވިޔަފާރިވެރިން ރާއްޖެއަށް ގެންނަ މުދާ ބަނދަރުގައި ހުންނައިރު އަނބުރާ ލިބޭނެ ކަމުގެ ޔަގީންކަން ކޮބާހެއްޔެވެ؟
ތަހުގީގު މަރުހަލާގައިވާ އެތައް މިލިއަން ރުފިޔާގެ އަގުބޮޑު ސިނގިރެޓްތަކެއް ހުޅުމާލޭ ބަނދަރުގައި ހުއްޓާ ގެއްލުމުން ގިނަބަޔަކު ދަނީ ސޯޝަލް މީޑިއާގައިވެސް ކަންބޮޑުވުން ފާޅުކުރަމުންނެވެ. ވައްކަން އާންމުވެފައިވާ މިންވަރުންނެވެ. އަދި މިފަދަ ތަކެތި ރަނގަޅަށް ނުބެލެހެއްޓޭކަމުގެ ޝަކުވާ ކުރާ މީހުން މަދެއް ނޫނެވެ. މިއީ ގެއްލޭކަށް ކުޑަކުޑަ އެއްޗެއް ނޫނެވެ. މިދައްކަނީ 1360 ކޭހުގެ ސިނގިރެޓްގެ ވާހަކައެވެ.
ރާއްޖެ އެތެރެކުރާ މުދާ ވެރިފަރާތުން ގެންދަންދެން އަބަދުވެސް ބަހައްޓަނީ އެމްޕީއެލްގެ ބެލުމުގެ ދަށުގައެވެ. މިގޮތަށް ބަހައްޓާ މުދަލުގެ ތެރެއިން ނުގެންގޮސް ގިނަދުވަސްވާ މުދާ ނީލަން ކިޔާ އަދި ނައްތާލަންޖެހޭ މުދާ ނައްތާލުމުގެ މަރުހަލާގައި މަދުންނަމަވެސް ވަގަށް ގެންދާ ކަމުގެ އަޑުތައް މީގެކުރިން މަދުންނަމަވެސް ފެތުރިފައިވެއެވެ.
މިފަދަ މައްސަލަތައް އަވަސް އަދި ސީރިއަސް މައްސަލައެއްގެ ގޮތުގައި ބަލާ ފިޔަވަޅު އަޅަންޖެހޭ ފަރާތްތަކާއިމެދު އަވަހަށް ފިޔަވަޅު އަޅައި މިފަދަ ކަމެއް ތަކުރާރު ނުވާނެ ގޮތަކަށް ކަންކަން އިންތިޒާމު ކުރެވެންޖެހެއެވެ. މުއައްސަސާތަކަށް އިތުބާރު ލިބޭނީ އެއިރުންނެވެ.
