ޖީީލުު ނުވަތަ އިނގިރޭސި ބަހުން ބުނާނަމަ "ޖެނެރޭޝަން" އަކީ ވިހި އަހަރުދުވަހުގެ މުއްދަތެއް ކަމަށް ބޮސްޓަން ޔުނިވާސިޓީގެ ޕްރޮފެސަރ، ސޯޝިއޮލޮޖީ ޑިޕާޓުމަންޓުގެ ޗެއަރ، ގޯލްޑަން އިޔަރގެ ލިޔުންތެރިޔާ ޑެބޮރާ ކާރ ވިދާޅުވެފައިވެއެވެ. ޖީލުތަކުގެ މާނަކުރެވެނީ އެމީހުންގެ ދިރިއުޅުމުގައި ތަޖިރިބާކުރާ މުހިންމު ހާދިސާތަކާއި އެވަގުތެއްގައި އެމީހުންގެ ދިރިއުޅުން ބިނާވާގޮތެވެ. އެގޮތުން އެއްދުވަސްވަރެއްގައި ދުނިޔެއަށް އުފަންވާ އެއްއުމުރު ފުރައިގެ މީހުންނެވެ. އާންމުކޮށް ޖީލުތައް ބައިކުރާއިރު އަަށްް ބަޔަކަށް ބެހިގެންދެއެވެ. އެއީ ގްރޭޓެސްޓް ޖެނެރޭޝަން/ ޖީއައި ޖެނެރޭޝަން، ސައިލެންޓް ޖެނެރޭޝަން، ބޭބީބޫމް ޖެނެރޭޝަން، ޖެނެރޭޝަން އެކްސް، މިލިނިއަލްސް/ ޖެނެރޭޝަން ވައި، ޖެނެރޭޝަން ޒެޑް/ ޖެން ޒީ/ އައިޖެން، ޖެނެރޭޝަން އަލްފާ، ޖެނެރޭޝަން ބީޓާ އެެވެެ.
މިއިން ކޮންމެ ޖީލަކީވެސް އެބައެއްގެ ދުވަސްވަރު ޚާއްސަ ކަންކަމާއި އެބައެއްގެ އަމިއްލަވަންތަކަން އުފަންވެފައިވާ އަދި ހާދިސާ ހިނގާފައިވާ ދުވަސްވަރެކެވެ. އެގޮތުން މިއިން ކޮންމެ ޖީލަކަށް ނިސްބަތްވާ މީހަކީވެސް އެހެންޖީލުތަކުގެ މީހުންނާ ތަފާތު ތަޖުރިބާކޮށްފައިވާ އަދި ކުރަމުންދާ މީހުންނެވެ.
ގްރޭޓެސްޓް ޖެނެރޭޝަން/ ޖީއައި ޖެނެރޭޝަން
މިއީ 1901 އާއި 1927 އާއި ދެމެދު އުފަންވެފައިވާ މީހުންނެވެ. މިއީ ދެވަނަ ބޮޑުހަނގުރާމައަށްފަހު ކުރިމަތިވި އެކިއެކި ކަންކަމާ ކުރިމަތިލި މީހުންގެ ޖީލެވެ. އެގޮތުން އެމީހުންގެ ގުރުބާނީ އާއި، ގައުމީ ލޯބީގެ ސަބަބުން މަޝްހޫރުވެފައިވާ ޖީލުގެ މީހުންނެވެ.
ސައިލެންޓް ޖެނެރޭޝަން
މިއީ 1928 އާއި 1945 އާއި ދެމެދު އުފަންވެފައިވާ މީހުންނެވެ. މި މީހުންނަކީ ދެވަނަ ބޮޑުހަނގުރާމައިގެ ސަބަބުން ކުރިމަތިވި އިގްތިސާދީ ދަތިތަކާއި ކުރިމަތިލި މީހުންނެވެ. މިދުވަސްވަރަކީ މަދަނީ ހައްގުތަކާއި މިފަދަ ހަރަކާތްތައް ފެށިގެންއައި ދުވަސްވަރެވެ. އެގޮތުން މާތިން ލޫތަރ، ކިންގް ޖޫނިއަރ ފަދަ ބޭފުޅުންނަކީ މިޖީލަށް ނިސްބަތްވާ މީހުންނެވެ.
ބޭބީބޫމް ޖެނެރޭޝަން
މިއީ 1946 އާއި 1964 އާއި ދެމެދުގައި އުފަންވެފައިވާ ޖީލުކަމުގައިވާ ބޭބީބޫމަރސްއާ ބެހޭގޮތުން ބުނެފައިވަނީ މިއީ އެހެން ޖީލުތަކަށްވުރެ ގިނައިން އެ މީހުންގެ ސަގާފީ ވިސްނުންތަކުގެ ސަބަބުން އެ މީހުންނަށް އެންމެ ކަމުނުދާ ވަޒީފާތަކުގައި ވެސް ދެމިތިބޭ ބައެއްކަމަށެވެ. މި ޖީލުގެ މީހުން ބާރާއި އިޚްތިޔާރަށް އިޙްތިރާމްކޮށް، ދަރަޖަވެރި ލީޑަރޝިޕަށް ތާއީދުކުރެއެވެ. މި މީހުން ގަބޫލުކުރާގޮތުގައި މިއަދުގެ ދުނިޔެއަކީ އަނިޔާވެރިތަނެކެވެ.
ޖެނެރޭޝަން އެކްސް
މިއީ 1965 އާއި 1980 އާއި ދެމެދު އުފަންވެފައިވާ ޖީލުގެ މީހުންނެވެ. މި ޖެނެރޭޝަން އަށް "ލެޗްކީ" ޖެނެރޭޝަންވެސް ކިޔައި އުޅެއެވެ. ވަޒީފާ އަދާކުރާ މައިންބަފައިންނާއެކު ގޭގޭގައި ތިބެގެން ބޮޑުވި ދަރިންގެ ފުރަތަމަ ޖީލެވެ. މިޖީލުގެ މީހުން ފާހަގަކުރެވެނީ މިނިވަން އަދި އަމިއްލައަށް ދިރިއުޅޭ ޖީލެއް ގޮތުގައެވެ. މިއީ ވަޒީފާއާއި ދިރިއުޅުމުގެ ހަމަހަމަކަމަށް އެންމެ އިސްކަމެއްދޭ ޖީލެވެ. މި މީހުން މަސައްކަތްކުރަން ބޭނުންވަނީ ހަރުދަނާ ރަނގަޅު އޮފީސްތަކުގައެވެ. މި މީހުން ގަބޫލުކުރާ ގޮތުގައި މި މީހުންނަކީ ވަރަށް ބުރަކޮށް މަސައްކަތްކުރާ، ގަވާއިދުތަކާއި އުސޫލުތަކާއި ނިޒާމުތަކަށް ތަބާވާ ބައެއްގެ ގޮތުގައެވެ. ދުނިޔޭގައި ޓެކްނޮލޮޖީގެ ކުރިއެރުމާއި ވަސީލަތާއި ހުނަރުތައް ކުރިއަރައި އިތުރުވެ ގޮސްފައިވަނީ މިޖީލުން ފެށިގެންކަމަށްވެއެވެ.
މިލިނިއަލްސް/ ޖެނެރޭޝަން ވައި
މިއީ 1981 އާއި 1996 ދެމެދު އުފަންވެފައިވާ ޖީލުގެ މީހުންނެވެ. މި މީހުންގެ އިޖުތިމާޢީ ހޭލުންތެރިކަމާއި ފުޅާ ދާއިރާއެއްގެ ވިސްނުމުގެ ސަބަބުން އިޖްތިމާއީގޮތުން ވިސްނުން ހުޅުވިފައިވާ ބައެކެވެ. މި މީހުންނަކީ ސޯޝަލް މީޑިއާއިން ތަފާތު ސަގާފަތްތަކާއި ދިރިއުޅުމުގެ ކަންކަން ފެނިފައިވާ ބައެކެވެ. އިންޓަނެޓާއި މޯބައިލް ފޯނާއެކުގައި ނޫނީ އެއްވެސްކަމެއް ނުކުރެވޭނެކަން ގަބޫލުކުރި ޖީލުގެ މީހުންނަކީ މިމީހުންނެވެ.
ޖެނެރޭޝަން ޒެޑް/ ޖެން ޒީ / އައިޖެން
މިއީ 1997 އާއި 2010 ދެމެދު އުފަންވެފައިވާ މީހުންނެވެ. ޑިޖިޓަލް ޒަމާނެއްގައި އަވަސް ސްޕީޑާއި، ސްކޭލާއި ސްކޯޕްގައި ހިނގަމުންދާ ދުނިޔެއަކަށް ދިރިއުޅުން ހޭނިފައިވާ މީހުންނެވެ. މިއީ އަބަދުވެސް ކުރިއަރާ ތަރައްޤީވަމުން އަންނަ ވަސީލަތްތަކާއި ޓެކްނޮލޮޖީ ބޭނުންކުރުމަށް އާދަވެފައިވާ ބައެކެވެ. މި މީހުންނަކީ ހަރުކަށި އުސޫލުތަކާއި ނިޒާމުތައް ބަލައިގަންނަން އެހާ ފަސޭހަބައެއް ނޫނެވެ. އެހެން ޖީލުތަކުގެ މީހުންނާ ޚިލާފަށް މި ޖީލުގެ މީހުންގެ ސުވާލުތައް ގިނަ ވާނެއެވެ. މި ޖީލުގެ މީހުން ކުރާ ކޮންމެ ކަމެއްގައި މާނައެއް އޮންނަން ޖެހޭކަމަށް ގަބޫލުކުރެއެވެ. އަދި ހައިރާކީއަކާ ނުލައި ލީޑަރޝިޕް އެކްސަސައިޒްކުރަން ބޭނުންވެއެވެ. މި މީހުން ގަބޫލުކުރާގޮތުގައި މި މީހުންނަށް ބޭނުންވާވަރަށް ކޮންމެ ކަމެއްގެ ވެސް ފުރިހަމަ މަޢުލޫމާތާއި އެ މީހުންގެ ހިތްތަކުގައި އުފެދޭ ސުވާލުތަކަށް ޖަވާބު ލިބެންވާނެއެވެ.
ޖެނެރޭޝަން އަލްފާ
މި މީހުންނަކީ 2010 އާއި 2024 އާއިދެމެދު އުފަންވެފައިވާ މީހުންނެވެ. މިއީ 21 ވަނަ ގަރުނުގައި އުފަންވެފައިވާ ޖީލެވެ. މި ޖީލުގެ ކުދިންނަކީ ކޮވިޑް-19 ގެ އަސަރު ވަރަށްބޮޑަށް ކޮށްފައިވާ، ކުޑައިރުއްސުރެން ޓެކްނޮލޮޖީއަށް ހުށަހެޅިފައިވާ ބައެކެވެ.
ޖެނެރޭޝަން ބީޓާ
މި ޖީލަށް ނިސްބަތްވާ ކުދިންނަކީ 2025 އިން ފެށިގެން 2039 އާއި ދެމެދު އުފަންވާ ކުދިންނެވެ.
މައުލޫމާތު: ޕޭރެންޓްސް
