ދަރިން ރަނގަޅު ގޮތުގައި ތަރުބިއްޔަތު ކުރުމަށް މައިންބަފައިންނެކޭ އެއްފަދައިން މުދައްރިސުންގެ ޒިންމާވެސް ބޮޑެވެ. ދުވާލަކު 5 -7 ގަޑިއިރު ސްކޫލުގައި ކުދިން ވަގުތު ހޭދަކުރާއިރު ތަފާތު މިޒާޖުގެ ކުދިން ސްކޫލުގައި އުޅޭނެއެވެ. ކުލާހެއްގައި 22 -30 އާއި ދެމެދުގެ އަދަދަކަށް ކުދިން ތިބޭއިރު މުދައްރިސުންގެ ފަރާތުން ގިނަ ފަހަރަށް ފެންނަނީ ކެތްތެރިކަމެވެ. މުދައްރިސުންނަކީ ވެސް އާއިލާގެ ޒިންމާ ނަގަމުން ވަޒީފާ އަދާކުރާ ބައެކެވެ. އެހެންނަމަވެސް ގިނަވަގުތު ސްކޫލުގައި ކުދިންނަށް އުނގަންނައި ދިނުމަށް ވަގުތު ހޭދަކުރާއިރު މުދައްރިސުންނަށް ދިމާވާ ގޮންޖެހުންތަކަށް ބަލާލުންވެސް ރަނގަޅެވެ. އަދި އެ ގޮންޖެހުންތައް ހައްލު ކުރުމަށް ކުރެވެންހުރި މަސައްކަތެއް ކުރުން މުހިންމެވެ. ލޯބިވާ ދަރީންގެ ހައްގުގައެވެ. ޤައުމުގެ މުސްތަޤުބަލާއި މެދު ވިސްނުމަށްފަހުގައެވެ. މިއަދުގެ ޅަދަރީންނަކީ މާދަމާގެ ޤައުމުގެ ކުރިމަގު ކަމަށް ހެދޭނީ އެއިރުންނެވެ.
ކުދިންނާއި ގުޅުންހުރި ގޮންޖެހުންތައް
ކުދިންގެ ތެރޭގައި ތަފާތު މިޒާޖުގެ ކުދިން އުޅޭއިރު މީގެތެރޭގައި ޚާއްސަ އެހީތެރިކަމަށް ބޭނުންވާ ކުދިން ވެސް އުޅެއެވެ. އަދި ބޮޑެތި ބަލިތަކަށް ބޭސް ބޭނުންކުރަންޖެހި ބޭނުންވާ މިންވަރަށް ފިލާވަޅުތަކަށް ސަމާލުކަން ނުދެވޭ ކުދިންވެސް އުޅެއެވެ. މިފަދަ ތަފާތު ކުދިންނަށް ކޮންމެ ދުވަހަކު ކިޔަވައިދޭއިރު އެކުދިންނަށް އެ ފިލާވަޅު ރަނގަޅަށް އުނގަންނައި ދިނުމަށް މުދައްރިސުން ކުރަން ޖެހޭ މަސައްކަތް ގިނައެވެ. ބޭނުންވަނީ އެކި ކުދިންނާއި ގުޅުންހުރި ތަފާތު އުނގަންނައި ދިނުމުގެ ސްޓައިލެކެވެ. ވަކިވަކި ކުދިންވެސް ޝައުގުވެރިވާނެ ފަދަ ގޮތެކެވެ. ދަރިވަރުން ރަނގަޅަށް 'މޯޓިވޭޓް' ވާންޖެހެއެވެ. ކިޔަވާހިތް ކުރުވަންޖެހެއެވެ.
އަޚުލާގު
ދަރިވަރުންނަކީ އަޚުލާގު ރަނގަޅު ބަޔަކަށް ހަދަންޖެހެއެވެ. ސްކޫލުގެ ޤަވާއިދުތަކަށް ބޯލަބައި ކިޔަމަންތެރި ކުދިންނަށް ވާންޖެހެއެވެ. ސްކޫލު މާހައުލުގައި އެހެން ކުދިންނަށް ފުރައްސާރަ ނުކުރާ އެހީތެރިކަން ފޯރުކޮށްދޭ ކުދިންނަށް ވާންޖެހެއެވެ. ދަރިވަރުންގެ ގައިގައި މިފަދަ ސިފަތައް އަށަގަތުމަށް އެކުދިންނަށް ޚާއްސަ ސެޝަންތަކެއްވެސް ކުރިއަށް ގެންދެވިދާނެއެވެ. ހޭލުންތެރިކަން އުފެއްދުން މުހިންމެވެ. އަދި ރަނގަޅަށް ކުދިން އުޅޭ ނުއުޅޭ ގޮތް ސްކޫލު މާހައުލުގައި ބަލަންޖެހެއެވެ.
ވަގުތު މަދުވެ ސިލަބަސް ނިންމަންޖެހުން
ކޮވިޑަށްފަހު ރާއްޖޭގެ ސްކޫލުތަކުގެ ދިރާސީ އަހަރަށް އައި ބަދަލުތަކުގެ ސަބަބުން ދަރިވަރުންނާއި މުދައްރިސުންނަށް ދިމާވި ގޮންޖެހުން ބޮޑެވެ. މަދު ދުވަސްކޮޅެއްގެ ތެރޭގައި ސިލަބަސް ނިންމަންޖެހުމުން ދަރިވަރުން ކުރަންޖެހޭ މަސައްކަތް ވަރަށް ގިނައެވެ. އަދި މުދައްރިސުން އެދައްކާ ހިތްވަރަށްވެސް ސާބަހެވެ. އެކަމަކު ދަރިވަރުންގެ ޅަސިކުނޑިތަކަށް މާބުރަ ބޮޑުވުމުން މިޒާޖަށް އަންނަމުންދާ ބަދަލަށްވެސް ވިސްނަންޖެހެއެވެ. ކުރިން އެންމެ ކިޔަވާހިތްވާ ބައެއް މާއްދާތަކަށް ފޫހިވާ ކުދިންވެސް އުޅެއެވެ. އެއީ ގިނަ ދުވަސްދުވަހު ހަދަން ޖެހޭ ފިލާވަޅުތައް ގިނަވުމުންނެވެ. އަދި މުދައްރިސުންގެ ޑިމާންޑާއި އެއްވަރަށް ފިލާވަޅު ނުނިންމިއްޖެނަމަ ސްކޫލަށް ދާހިތްނުވާ ކުދިންވެސް އުޅެއެވެ. ސިލަބަސް ނިންމަންޖެހުނަސް ޅަސިކުނޑިތަކަށް 'ރެސްޓް' ދޭންވެސް ޖެހެއެވެ. މިއީވެސް ބޮޑު ގޮންޖެހުމެކެވެ.
ބެލެނިވެރިންގެ އެހީތެރިކަން
ހަމައެކަނި ކުދިން ސްކޫލަށް ފޮނުވުމުން ނިމުނީއެއް ނޫނެވެ. ކުއްޖާގެ ފިލާވަޅުތައް ރަނގަޅަށް ނިންމާތޯ އަދި ނުނިމޭނަމަ ސަބަބު ހޯދާ މުދައްރިސުންގެ އެހީތެރިކަން ހޯދަންޖެހެއެވެ. ބައެއްފަހަރަށް މިގޮތަށް ފިލާވަޅު ނުނިމި ތަކުރާރުވާނަމަ ސަމާލުވުމަށް އެދި ދަރިވަރާއި ވާހަކަދައްކާ މުދައްރިސުން އުޅެއެވެ. އަދި ބެލެނިވެރިންގެ ޒިންމާވެސް މިކަމުގައި ކުޑައެއް ނޫނެވެ. ވާގޮތެއް އޮޅުންފިލުވައި ދަރިފުޅަށް ފިލާވަޅު ނުނިންމޭ ސަބަބު ދެނެގަނެ އެކަމަށް ހައްލު ހޯދުން މުހިންމެވެ.
އެކަށީގެންވާ އުޖޫރައެއް ދިނުން
މުދައްރިސުންނަކީ ގިނަ ފަހަރަށް ހަފްތާ ބަންދުގައި ވެސް ވަޒީފާގެ ޒިންމާ އަދާކުރަންޖެހޭ ބައެކެވެ. އަހަރުގެ ބައެއް ދުވަސްތައް ޗުއްޓީ ލިބުނު ކަމުގައިވިޔަސް ސްކޫލު ހުޅުވިފައި ހުންނަ ދުވަސްވަރު ގިނަ ވަގުތު ހޭދަކުރަންޖެހެނީ ވަޒީފާގެ ޒިންމާގައެވެ. ކުރާ މަސައްކަތަށް އެކަށީގެންވާ އުޖޫރައެއް ލިބުން ވަރަށް މުހިންމެވެ. ދިވެހި ގިނަ އަދަދެއްގެ މުދައްރިސުން ބޭނުންވާއިރު މިދާއިރާއަށް ޝައުގުވެރިވާ މީހުން ހޯދުމަށް މުދައްރިސުންނަށް ދިމާވާ ގޮންޖެހުންތަކަށް ހައްލު ހޯދަން ޖެހެއެވެ.
މުދައްރިސުންގެ ބުރަ މަސައްކަތާއެކު ރަނގަޅު ނަތީޖާއެއް ދަރިވަރުންނަށް ލިބޭ ދުވަހަކީ ބެލެނިވެރިންނާއި މުދައްރިސުން އެންމެ އުފާވާ ދުވަހެވެ. އެންމެހާ މުދައްރިސުން ތިކުރައްވާ ބުރަ މަސައްކަތަށް އައްސަރިބަހާއި ސާބަހެވެ.
