އުމުރުން 63 އަހަރުގެ ޒަމީރާ އަހުމަދު (ހުޅުމާލެ ހިޔާ) ދިރިއުޅުމަށް ބޮޑު ބަދަލެއް އައީ މީގެ 4 އަހަރެއްހާ ދުވަސް ކުރިން ސްޓްރޯކެއް ޖެހި އެއްފަޅި ވާގިނެތުމުންނެވެ. ޒަމީރާގެ ފިރިމީހާ އައްޑޫ ސިޓީ މަރަދޫފޭދޫ، އަހުމަދު ރަފީގު ވަނީ ވަރަށް އަސަރާއެކު ލޯބިވާ އަނބިމީހާގެ ހާލަތު 'ޒީޓައިމްސް' އާއި ހިއްސާކޮށްފައެވެ.
ދެމަފިރިން ޒުވާން ދުވަސްވަރުއްސުރެ ކައިވެނިކޮށްގެން އުޅޭއިރު ކައިވެންޏަށް މިވަނީ 44 އަހަރު ވެފައެވެ. އަނބިމީހާ ބަލިވި ދުވަހުވެސް އެންމެ ކައިރީގައި ލޯތްބާއެކު އެހީވާން ހުރީ ފިރިމީހާ އެވެ.
" 2021 ޑިސެންބަރ ހިސާބުގައި ސްޓްރޯކް ޖެހުނީ.. ފުރަތަމަ ގެންދިޔައީ އައިޖީއެމްއެޗަށް. އެއިރު މީހާ އޮތީ ކޯމާއެއްގައި. ޑޮކްޓަރުން ވިދާޅުވީ މިމީހާގެ ބޭނުން ގާތްގަނޑަކަށް ކެނޑިފައޭ މިއޮތީ. ދޭނެ ފަރުވާއެއް ނެތޭ އައިޖީއެމްއެޗުން. އޮޕަރޭޝަން ކުރުމުންވެސް ދެވޭނީ އިތުރު އަނިޔާއެއްކަމަށް. ދެން އަޅުގަނޑު ދިޔައީ ބަލިމީހާ ގޮވައިގެން އޭޑީކޭއަށް. އޭޑީކޭއިން ޑރ. ވިދާޅުވީ ﷲ އިރާދަކުރެއްވިއްޔާ ދުނިޔޭގައި ހުންނާނޭ. ވާހަކަދައްކާނޭ އޮޕަރޭޝަނަށްފަހު". ޒަމީރާގެ ހާލަތު ކިޔައިދެމުން ރަފީގު ބުނެފައިވެއެވެ.
އޭޑީކޭ ހޮސްޕިޓަލުގައި 3 ގަޑިއިރުގެ އޮޕަރޭޝަނެއް ކުރެވުނުއިރު އެޑްމިޓްކޮށްގެން 3 މަހާއި 18 ދުވަހު ޒަމީރާއަށް އެ ހޮސްޕިޓަލުން ފަރުވާ ދީފައިވާ ކަމަށް އާއިލާއިން ވަނީ މައުލޫމާތު ދީފައެވެ.
" އޭޑީކޭ އާއި ހަމައަށް ދިއުމަށް ވަރަށްގިނަ ވަގުތު ހޭދަވީ ސިކުނޑިއަށް ލޭ އެޅި އޮޕަރޭޝަން ނުކުރެވި. އެއްފަޅި ވާގިނެތުމަކީ އެކަށީގެންވާކަމެކޭ ޑޮކްޓަރުން އެއިރު ވިދާޅުވީ. ސިކުނޑިއަށް ލިބޭ ގެއްލުމަކީ ރިކަވަރ ކުރެވޭނެ ކަމެއް ނޫނޭ. ހޭއެރުމަށްވެސް 30 ވަރަކަށް ދުވަސްވެސް ނަގާފާނެ ކަމަށް ބުނި. އައިސީޔޫގައި ގިނަ ދުވަސްތަކެއްވަންދެން އޮތް".
އޭޑީކޭގެ ބިލު އެއިރު ދެއްކީ އާސަންދަ، އެންސްޕާ އަދި އިސްލާމިކް މިނިސްޓްރީއިންނާއި އެކިގޮތްގޮތަށް ލިބުނު އެހީއިން ކަމަށް ރަފީގު ވަނީ ބުނެފައެވެ. އެއަށްފަހު ދިރިއުޅުން ބަދަލުކުރީ އައްޑޫ ސިޓީ އަށެވެ.
" ކުރިން ދިރިއުޅުނީ ހުޅުމާލޭގައި. އެކަމަކު މީހާ ބަލިވީމަ ދެން ބަދަލުވާން ޖެހުނީ. މަޖުބޫރުވީ އައްޑޫކަހަލަ ތަނެއްގައި މަޑުކުރަން. އައްޑޫގައި ދިރިއުޅެނިކޮށް އޭއީއެޗް އަށް ދެއްކުމުން އޭޑީކޭއިން ދީފަ ހުރި އެއްބޭސް ހުއްޓާލަން ބުނީ. އެބޭސް ހުއްޓާލިތާ ހަފްތާއެއް ނުވަނީސް ފިޓެއް ޖެހުނީ. އަޅުގަނޑު ހީކުރީ އެދުވަހު ދެން މަރުވީކަމަށް. އަޅުގަނޑުގެ އަތްމައްޗަށް ނޭވާ ހުސްވީ. އެކި ގޮތްގޮތަށް މަސައްކަތްކުރަނިކޮށް ނޭވާލާންފެށީ. އަވަހަށް ހޮސްޕިޓަލަށް ގެންގޮސް އަޅުގަނޑު ދެންނެވިން ބޭސް ހުއްޓާލުމުގެ ސަބަބުންނޭ މިހެން ދިމާވީ". އަސަރާއެކު އަނބިމީހާގެ ހާލަތު ކިޔައިދެމުން ރަފީގު ބުންޏެވެ.
އިތުރު ފަރުވާ އަށް އިންޑިއާ އަށް ގޮސް ރާޖަގިރި ހޮސްޕިޓަލުން 15 ވަރަކަށް ދުވަހު ފަރުވާވެސް ހޯދައިފައިވެއެވެ.
" އެއްފަރާތުގައި ވާގިނެތަސް އަތްލީމަ އެނގޭ. ތަދު އެބަހުރި. ހިއްސު އެބަހުރި. އުންމީދީ ވާހަކަތަކެއް ޑޮކްޓަރުން ވިދާޅުވަނީ. ފަރުވާ ހުއްޓާނުލާ ކުރިއަށް ގެންދިއުމަށް".
ޒަމީރާ މިވަނީ އަނެއްކާވެސް ބޮޑު އޮޕަރޭޝަނެއް ކުރަންޖެހިފައެވެ. އައްޑޫ އެކުއެޓޯރިއަލް ހޮސްޕިޓަލުން ދީފައިވާ ލިޔުމުގައި ލަފާދީފައި ވަނީ މި އޮޕަރޭޝަން ކުރުމަށް ރާއްޖެއިން ބޭރަށް ދިއުމަށެވެ. އެހެންނަމަވެސް މިއީ ރާއްޖެއިން ކުރެވޭ އޮޕަރޭޝަނެއް ކަމަށް ބުނެ ބަލިމީހާ އަށް އާސަންދަ ލިބޭ ގޮތެއް ނުވާކަމަށް އާއިލާއިން ވަނީ މައުލޫމާތު ދީފައެވެ.
" ކާއެތިކޮޅު އެޅީމަ ކޮށިއަރައިގެން މީހާ ހުއްޓޭގޮތް ވަނީ. ސަމުސަލުން ކުޑަކޮށް ދިޔާކޮށްގެން މިދެނީވެސް. ފެންފޮދު އެޅީމަ ވެސް ހޮޅިއަކުން އެއްޗެއް ފައިބައިގެން ދާއަޑު އިވެނީ ބަނޑުތެރެއަށް، ވަރަށް ބިރުވެރި އަޑެއް އަންނަނީ.. ކަންބޮޑުވޭ އަޅުގަނޑު. އައްޑޫ ހޮސްޕިޓަލަށް ދެއްކީމަ ސީޓީއާއި ޓެސްޓް ހަދާފަ ބުނީ ވާގޮތް. އެއްފަޅި ވާގިނެތުމުގެ ސަބަބުން އެފަޅީގެ މަސްގަނޑުތައް ބަލިކަށިވެ އެފަޅިން މީހާގެ ބަނޑުގެ އެތެރޭގައި ހުންނަ ގޮހޮރާއި ގުނަވަންތަކަށް އަސަރުކޮށް އެވޭނޭ އެއަޅަނީ މީހާއަށް". ރަފީގު ކިޔައިދިނެވެ.
ދެމަފިރިންގެ 5 ކުދިން ތިބޭއިރު ޚާއްސަ އެހީއަށް ބޭނުންވާ 1 ކުއްޖަކު މިދެމަފިރިންގެ ހުރެއެވެ. އެކުއްޖާގެ އުމުރުން 30 އަހަރުވިއަސް ކުރިން މަންމަ ބަލަމުން އައި ކުއްޖަކަށްވުމުން މަންމަ އެހާ ބަލިވުމުން އޭގެ އަސަރު ކޮށްފައިވާކަމަށް ވަނީ ބުނެފައެވެ.
" ވަރަށް ހާލުގައި ބަލިމީހާ މިއުޅެނީ.. ވަރަށް ހިތާމައިގައި ހޭދަކުރަމުން މިދަނީ.. ބުނަންވެސް ދަތިވާކަހަލަ އިހުސާސްތަކެއް. ދޭތެރެއަކުން އެޑްމިޓްކޮށްފައި.. އެކަހަލަ ގޮތަކަށް. ވީހާއަވަހަކަށް އޮޕަރޭޝަން ކުރުމަށް އިންޑިއާ އަށް ދާން ބޭނުމީ".
އިންޑިއާގެ ރާޖަގިރި ހޮސްޕިޓަލުން ދީފައިވާ ލިޔުމުގައިވާގޮތުން ކުރަންޖެހޭ އޮޕަރޭޝަނަށް 3060 ޑޮލަރު އިންވެސްޓިގޭޝަނަށް 400 ޑޮލަރު ހޭދަވާނެ ކަމަށް ލަފާކޮށްފައިވެއެވެ. އެއީވެސް ދިވެހި ރުފިޔާއިން ބަލާނަމަ ބައިލައްކައަށްވުރެ ގިނަ ރުފިޔާއެވެ. ވީލްޗެއަރގައި ގެންދާ ބަލިމީހަކަށް ވުމުން ޓިކެޓާއި އިތުރު ޚަރަދުތަކަށް ބޮޑު ހޭދައެއް ކުރަންޖެހޭތީ ރަފީގު އެދެނީ އާންމުން އެހީ ފޯރުކޮށްދިނުމަށެވެ.
މި ރިޕޯޓުގައި ހިމަނާފައި މިވަނީ ޒަމީރާގެ ފިރިމީހާ ރަފީގުގެ އެކައުންޓު ނަންބަރެވެ. އެއީ ޒަމީރާ އަކީ މިހާތަނަށް އެކައުންޓެއް ހުޅުވާފައިވާ މީހެއް ނޫންކަމަށް ވަނީ ބުނެފައެވެ. ބަލިމީހާގެ ހާލަތު ހުރި ގޮތުން އިތުރު އެކައުންޓެއް ހުޅުވެން ނެތުމުން ސަރުކާރުން ދޭ ޚާއްސައެހީއަށް ބޭނުންވާ މީހުންގެ ރުފިޔާވެސް ޖަމާވަނީ އޭނާގެ އެކައުންޓަށް ކަމަށް ވަނީ ބުނެފައެވެ.
ނޯޓް: މިއީ އާންމުންގެ އެހީތެރިކަމާއެކު 'ޒީޓައިމްސް' އިން ބޭސްފަރުވާއަށް އެހީވެދޭ 60 ވަނަ އާއިލާއެވެ. އިންސާނިއްޔަތަށްޓަކައި ކުރާ މިމަސައްކަތުގައި ކިޔުންތެރިން ދެއްވާ އެއްބާރުލުމަށް ޝުކުރު އަދާކުރަމެވެ. މިގޮތަށް ލިބޭ އެހީ ޖަމާވާނީ ބަލިމީހާގެ އެކައުންޓަށެވެ. މި ޢާއިލާ އަށް އެހީ ލިބިފައިވާތީ، ކުރިން ހިމަނަައިފައިވާ އެކައުންޓުު ނަންބަރު ވާނީ އުނިކޮށްފައެވެ. ޝުކުރިއްޔާ!
