ޣައްޒާ އަށް އެހީ ފޯރުކޮށްދިނުމަށް އެކި ޤައުމުތަކުގެ މީހުން ހިމެނޭ ގޮތަށް ދަތުރުކުރަމުންދާ "ގްލޯބަލް ސްމޫދު ފްލޮޓީލާ" ގެ ބައެއް އުޅަނދުތަކަށް އިޒްރޭލުން ހުރަސް އެޅުމުން ވެސް ޖެހިލުމެއް ނެތި ޣައްޒާ އަށް ދިއުމަށް ބައެއް އުޅަނދުތައް ދަނީ ދަތުރުކުރަމުންނެވެ.
45 އުޅަނދު ހިމެނޭ ފޮލޮޓީލާގެ މި ދަތުރުގައި ފަލަސްޠީނުގެ ހައްގުގައި ވަކާލާތު ކުރާ އެކްޓިވިސްޓުންނާއި އެހީ ފޯރުކޮށްދޭން މަސައްކަތްކުރާ މީހުންގެ އިތުރުން އެކި ޤައުމުތަކުގެ ސިޔާސީ މީހުންނާއި ޤާނޫނީ ވަކީލުންވެސް ހިމެނެއެވެ.
500 ވަރަކަށް މީހުން މި އުޅަނދުތަކުގައި ދަތުރު ކުރަމުން އަންނައިރު އިޒްރޭލުން ވަނީ ބައެއް އުޅަނދުތަކަށް އަރައި މީހުން ރަހީނު ކޮށްފައެވެ. އެކަމަކު ހުރިހާ އުޅަނދެއް ހުއްޓުވުމުގައި އިޒްރޭލަށް އަދި ކާމިޔާބުވެފައެއް ނުވެއެވެ. ނުހުއްޓި ދަތުރު ކުރާ އުޅަނދުތަކަށް ކުރިއަށް އޮތް މަދުގަޑިއިރުގެތެރޭ ޣައްޒާގެ އައްސޭރިއާއި ކައިރިއަށް ދެވޭނެ ކަމަށް މައުލޫމާތު ލިބެއެވެ.
" ޣައްޒާ އާއި ދިމާއަށް 30 ބޯޓެއް ދަނީ ދުއްވަމުން. 13 އުޅަނދެއް އިޒްރޭލުން ހުއްޓުވިއިރު 200 ވަރަކަށް މީހުން އެ އުޅަނދުތަކުގައި ތިބޭނެ ކަމަށް ބެލެވޭ. ހިތްވަރަކަށް ބަދަލެއް ނާދޭ. އަމާޒަށް ވާސިލުވުމަށް ދަނީ މަސައްކަތް ކުރަމުން". ފްލޮޓީލާގެ ފަރާތުން މައުލޫމާތު ދީފައިވެއެވެ.
އިޒްރޭލުން ބަންދުކޮށްފައިވާ ސަރަހައްދަށް ވަނުމުން ކަމަށް ބުނެ ބައެއް އުޅަނދުތައް އިޒްރޭލުން ހުއްޓުވިއަސް ފްލޮޓީލާގެ ދަތުރުގެ ބައިވެރިން ބުނަމުން ދަނީ އިޒްރޭލުން ޣައްޒާގެ ކަނޑުގެ ސަރަހައްދު ބަންދުކުރީ ބައިނަލް އަޤްވާމީ މިންގަނޑުތަކާއި ޤާނޫނުތަކާއި ޚިލާފަށް ކަމަށެވެ.
ފްލޮޓީލާގެ މިދަތުރުގައި ދިވެއްސެއްކަމުގައިވާ އިބްރާހީމް ޝާޒް ވެސް ދަނީ ބައިވެރިވަމުންނެވެ.
