ދިވެހި ރާއްޖޭގެ އެކި ސަރަހައްދުގައި 2 ލައްކައަށްވުރެ ގިނަ ބިދޭސީ މަސައްކަތު މީހުން އުޅޭނެކަމަށް ބެލެވެއެވެ. ރާއްޖޭގައި އުޅޭ ބިދޭސީންގެ މައުލޫމާތު އެއްކުރުމަށް ކުރިއަށްގެންދިޔަ އޮޕަރޭޝަން ކުރަނގީގެ ދަށުން އެކަނިވެސް 174،000 އަށް ވުރެ ގިނަ ބިދޭސީންގެ މައުލޫމާތު އެއްކޮށްފައިވާކަމަށް ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާއިން ވަނީ ހާމަކޮށްފައެވެ.
ގިނަ އަދަދެއްގެ ބިދޭސީން އެކި ރަށްރަށުގައިވެސް އުޅޭއިރު އެންމެ ގިނަ އަދަކަށް ތޮއްޖެހިގެން އުޅޭ ބިދޭސީ މަސައްކަތު މީހުން ދިރިއުޅެނީ މާލެ ސިޓީގައެވެ. މީގެތެރޭގައި ޑިއުޓީ ބަހައިގެން ކުޑަކުޑަ ކޮޓަރިއެއްގައި ނިދައި އުޅޭ 15-20 ބިދޭސީން ވެސް އުޅޭއިރު ބިދޭސީން ރާއްޖެ ގެންނަ މީހުންގެ އިހުމާލު ވަރަށް ބޮޑުކަން ފާހަގަކުރެވެއެވެ.
ބިދޭސީންނާއި މެދު ވަރަށް ރަނގަޅަށް ޤަވާއިދާއި އެއްގޮތަށް އަމަލު ކުރާ ކުންފުނިތައް ހުރިކަމުގައިވިއަސް އިހުމާލުވާ މީހުން މަދެއް ނޫނެވެ. ފޮޓޯއިން އެފެންނަނީވެސް ބައެއް ބިދޭސީން އުޅެމުންދާ ހާލަތެވެ.
އިމާރާތްތައް ހަދަމުންދާއިރު ވަކިވަރަކަށް މަސައްކަތް ނިމޭއިރަށް އެތަނުގައި ބިދޭސީން ދިރިއުޅެން ފަށައެވެ. ކައްކާ ފެންވަރައި ނިދަނީވެސް އެތަނުގައެވެ. ވަރަށް ކައިރިން ބިދޭސީން މިގޮތަށް ދިރިއުޅޭ މަންޒަރު ފެނިފައިވާއިރު މިއީ އިންސާނުން ދިރިއުޅެން އެކަށީގެންވާ މާހައުލެއް ނޫނެވެ. ކޮންސްޓްރަކްޝަން ސައިޓެއްގައި ހިރަފުހާއި ކުންޏާއި ވެއްޔާއި ސިމެންތިއާއި ދަގަނޑުގެ ތެރޭގައި އެބިދޭސީން އެދިރިއުޅެނީ ކޮންފަދަ ހާލެއްގައި ހެއްޔެވެ.
އުމުރުން ދުވަސްވީ މައިންބަފައިންނާއި އާއިލާ ދޫކޮށް ގެ މޯގޭޖްކޮށް ލިބޭ ލާރިކޮޅު ޚަރަދުކޮށްގެން ގިނަ ފަހަރަށް ބިދޭސީން ރާއްޖެ އަންނަނީ ވަރަށް ފޮނި އުންމީދެއްގައެވެ. އާއިލާއަށް ތަނަވަސްކަން ހޯދައިދީ ދިރިއުޅުމުގެ ހާލަތު ރަނގަޅު ކުރުމަށެވެ. ރާއްޖެ އައުމަށްފަހު ކޮންމެ ހާލަކަށްވެސް ކެތްކުރަން މަޖުބޫރުވަނީ އެނބުރި ޤައުމަށް ގޮސްގެން ކުރެވޭނެ އިތުރުކަމެއް ނެތީމައެވެ. އަދި ގިނަފަހަރަށް އަނބުރާ ދެވޭނެ ގޮތެއްވެސް ނެތީމައެވެ.
ދުވާލު ހަތަރުދަމު ބުރަކޮށް މަސައްކަތްކޮށް ވެފައިވާ ވަރުބަލިކަމުގައި ރޭގަނޑުވެސް ހަމަނިދި ނުލިބި އުޅެން ޖެހޭ ބިދޭސީންގެ އަދަދު މަދެއް ނޫނެވެ. 'ޒީޓައިމްސް' އާއި ވާހަކަދެއްކި ބައެއް ބިދޭސީން ވަނީ އެމީހުންގެ ތަޖުރިބާ ހިއްސާކޮށްފައެވެ.
" ރަށްރަށުގައި ދިރިއުޅެން ވަރަށް ފަސޭހަ. މީހުން ނޫޅޭ ގެތައް ލިބޭ ފަސޭހައިން ދިރިއުޅެން. ޖާގަ ބޮޑު. އެކަމަކު ލިބޭ ފައިސާ މަދު. އެހެންވެ މާލޭގައި އުޅެން މަޖުބޫރުވަނީ".
ބުރަކޮށް މަސައްކަތްކުރިއަސް ހައްގުވާ މުސާރަވެސް ގަވާއިދުން ނުލިބޭކަމަށް ބުނާ ބިދޭސީންވެސް އުޅެއެވެ. މިފަދަ މައްސަލަތަކުގައި ރާއްޖެ ބިދޭސީމީހާ ގެނައި ކުންފުނީގެ މަސައްކަތް ހުއްޓާލާ އެހެން މަސައްކަތަކަށް ދިއުމުން ދިމާވާ މައްސަލަތައްވެސް ވަކި މަދެއް ނޫނެވެ. ގަވާއިދާއި ޚިލާފަށް އުޅޭ ބިދޭސީންގެ ތެރޭގައިވެސް މިގޮތަށް މުސާރަ ނުލިބި ކުރިން މަސައްކަތްކުރި ތަނުން ދުރަށްދިޔަ މީހުން މަދެއް ނޫނެވެ.
ދިވެހި ރާއްޖޭގެ އިޤްތިސާދު ކޮޅަށް ޖެހުމުގައި ބިދޭސީންގެ ހިއްސާ ވަރަށް ބޮޑެވެ. އެމީހުން މަސައްކަތް ނުކުރާ ދާއިރާއެއް މަދުވާނެއެވެ. ކުދި އަދި މެދުފަންތީގެ ވިޔަފާރިތައް ކުރިއަރައިގެން ދިއުމުގައިވެސް އެންމެ ބޮޑު ހިއްސާއެއްވާ އެއްބަޔަކީ ބިދޭސީންނެވެ.
ބިދޭސީންގެ ތެރޭގައި ކުށަށް އަރައިގަންނަ މީހުންވެސް އުޅޭއިރު ރަނގަޅަށް އުޅޭ މީހުންނާއިމެދު އަމަލުކުރަންވާނީ ރަނގަޅަށެވެ. ކުށެއް ކޮށްފިނަމަ އޮންނަ އުސޫލުން ގަވާއިދުގެ ތެރެއިން ދެވެން އޮތް އަދަބެއް ދޭންވީއެވެ. ޑީޕޯޓް ކުރަން ޖެހޭނަމަ އެއޮންނަ އުސޫލުން އެކަންވެސް ކުރަންވީއެވެ. އެކަމަކު އިންސާނިއްޔަތުކަން ހަނދާން ނައްތާލައިގެން ނުވާނެއެވެ. އެވެސް އަހަރެމެން ކަހަލަ އިންސާނުންކަން ދަނެ އެމީހުންނާއިމެދު ވެސް ރަހުމްކުރަން ޖެހެއެވެ. އަސާސީ ޚިދުމަތުން މަހުރޫމްކޮށްގެން ނުވާނެއެވެ.
