ޏ. ފުވައްމުލަކު މުހައްމަދު އަމްޖަދު އަދި ޔުމްނު މޫސާ އަށް އަލަތު ދަރިފުޅު ޔަޒްދާން މުހައްމަދު ލިބުނީ މިއަހަރު ޖޫންމަހުގެ 15 ވަނަ ދުވަހުގައެވެ.
'ޒީޓައިމްސް' އަށް ޔުމްނު ވަނީ ހުރި ހަމައެކަނި ދަރިފުޅުގެ ބަލިހާލަތު ހިއްސާކޮށްފައެވެ. ދަރިފުޅު އުފަންވީއިރު އިންފެކްޝަން ހެދުމުގެ އިތުރުން 'ޕްލެޓްލެޓް' ދަށްވުމުން އެމަޖެންސީކޮށް މާލެ ގެނެސް އާސަންދައިގެ ދަށުން އިތުރު ފަރުވާއަށް ފޮނުވާލީ އިންޑިއާ އަށެވެ.
އިންޑިއާގެ 'އެސްޓަރ މެޑިސިޓީ'އިން ފަރުވާ ހޯދަމުން އަންނައިރު ޔަޒްދާންގެ އުމުރުން 6 މަސްވުމުން ބޯންމެރޯ ޓްރާންސްޕްލާންޓް ހަދަންޖެހޭ ކަމަށް އާއިލާއިން ވަނީ މައުލޫމާތު ދީފައެވެ.
" އިންޑިއާގައި މިތިބީ ޖޫންމަހުން ފެށިގެން. ބޭބީގެ ބައްޔަކީ ރާއްޖެއިން ފަރުވާދެވެން ނެތް ބައްޔެއް. އެއީ 'ވިސްކޮޓް އަލްޑްރިޗް ސިންޑްރަމް'. 'ޖީސިކްސްޕީޑީ' ދަށްވުމުންނާއި ބޯންމެރޯ ހެދުމުގެ ކުރިން ދޭންޖެހޭ ފަރުވާތައް ދެމުން މިދަނީ".
ފެނަކައިގައި ވަޒީފާ އަދާކުރާ ދެމަފިރިންގެ އުންމީދާއި ގުޅިފައިވާ މި ލޯބި ދަރިފުޅުގެ ހާލަތު ހުރިގޮތުން ބައެއް ފަހަރަށް ހޮސްޕިޓަލުގައި ފަރުވާދޭއިރު އެހެން މީހުންނާއި ވަކިން އެކަނި ކޮޓަރިއެއްގައި އެޑްމިޓް ކުރަންޖެހެއެވެ.
" އިންޑިއާގައި ގިނަ ދުވަހު މަޑުކުރަންޖެހޭތީ ބޭބީއަށް 6 މަސްވުމުން ދެން ޖެހޭނީ މުސާރަ ނުލިބޭ ގޮތަށް ޗުއްޓީ ނަގަން. އެޑްމިޓްކޮށްގެން ފަރުވާދޭއިރު ބައެއްފަހަރަށް ބޭބީ ވަކި ކޮޓަރިއެއްގައި ބާއްވަންޖެހެނީ ފަސޭހައިން އިންފެކްޝަން އުފެދި ފުރާނައަށް ނުރައްކާވުމުގެ ފުރުސަތު އޮތީމަ. އާސަންދަ ލިބެނީ ޝެއާޑް ރޫމަށް. އެހެންވުމުން އަމިއްލައަށް ބޮޑު ޚަރަދެއް ކުރަންޖެހޭ. ބޯންމެރޯއަށްފަހު ވެސް ބޭބީ ޖެހޭނެ ހޮސްޕިޓަލުގެ ވަކި ކޮޓަރިއެއްގައި 1 މަސްދުވަހު ބާއްވައިގެން ފަރުވާ ފުރިހަމަކުރުމަށް. ބޯންމެރޯއަށްފަހު ލަފާކުރެވޭގޮތުގައި މަދުވެގެން އިތުރު 3-4 މަސްދުވަސްވަރު އިންޑިއާގައި މަޑުކުރަންޖެހޭތީ އާންމުންގެ ދީލަތި އެހީއަށް އެދެނީ".
ޔަޒްދާންގެ ދިފާޢީ ނިޒާމު ބަލިކަށިވުމުގެ އިތުރަށް ކޮންމެ މަހަކު 'އައިވީއައިޖީ' ދޭންޖެހޭ ކަމަށާއި، ގިނަފަހަރަށް އުޅެންޖެހެނީ ހޮސްޕިޓަލުގައި އެޑްމިޓްކޮށްގެން ކަމަށް ޔުމްނު ވަނީ މައުލޫމާތު ދީފައެވެ.
" އަޅުގަނޑުމެން މިއުޅެނީ ހޮސްޕިޓަލު ކައިރިން އެޕާޓްމަންޓެއް ކުއްޔަށް ހިފައިގެން. ބޭބީގެ ހާލަތު ގޯސްވާއިރު އެޑްމިޓްކޮށްފަ ކުޑަކޮށް ރަނގަޅުވީމަ ގެއަށް ގެންދަނީ. މިގޮތަށް ބޯންމެރޯ ޓްރާންސްޕްލާންޓް ހެދެންދެން އަދި ބޭބީގެ ހާލަތު ރަނގަޅުވަންދެން މަޑުކުރަން މިޖެހެނީ އިންޑިއާގައި".
ނޯޓް: މިއީ އާންމުންގެ އެހީތެރިކަމާއެކު 'ޒީޓައިމްސް' އިން ބޭސްފަރުވާއަށް އެހީވެދޭ 58 ވަނަ އާއިލާއެވެ. އިންސާނިއްޔަތަށްޓަކައި ކުރާ މިމަސައްކަތުގައި ކިޔުންތެރިން ދެއްވާ އެއްބާރުލުމަށް ޝުކުރު އަދާކުރަމެވެ. މިގޮތަށް ލިބޭ އެހީ ޖަމާވާނީ ބަލިމީހާގެ އެކައުންޓަށެވެ. މި ޢާއިލާ އަށް އެހީ ލިބިފައިވާތީ، ކުރިން ހިމަނަައިފައިވާ އެކައުންޓުު ނަންބަރު ވާނީ އުނިކޮށްފައެވެ. ޝުކުރިއްޔާ!
