އޮންލައިން ވިޔަފާރިއަކީ އާންމުންގެ މެދުގައި އެންމެ މަޤުބޫލު ވިޔަފާރިއެވެ. ފަސޭހައިން ކޮންމެ ތަނެއްގައި ހުރެވެސް އަގުހެޔޮކޮށް ބޭނުންއެއްޗެއް ގަނެލެވެއެވެ. އެކަމަކު އޮންލައިން ވިޔަފާރި އަލަށް ފަށައިގެން ކުރިއަށްގެންދާ ފަރާތްތަކުން ވިސްނަންޖެހޭ ކަންތައްތައް އެބަހުއްޓެވެ. އެހެންނޫނީ ގިނަދުވަހު މާކެޓްގައި ފައިތިލަ ސާބިތުކުރުމަކީ ފަސޭހަކަމަކަށް ނުވާނެއެވެ.
ވިޔަފާރި ކުރިއަށްގެންދާނެ ގޮތުގެ 'ޕްލޭނެއް' ހެދުން
ވިޔަފާރި އޮންލައިންކޮށް ކުރިއަށްގެންދާނެ ގޮތުގެ ތަފްސީލު ޕްލޭނެއް ހަދާށެވެ. 'ޓާގެޓް އޯޑިއެންސް' ވެސް ނިންމަންވާނެއެވެ. ރަނގަޅު ޕްލޭނެއް ނެތްނަމަ ޑިމާންޑާއި އެއްވަރަށް ސަޕްލައި ކުރުން ދަތިވާނެއެވެ. އެހެންކަމަށްވާނަމަ ކަސްޓަމަރުންގެ އިތުބާރު ގެއްލޭނެއެވެ. އޮންލައިންކޮށް ވިޔަފާރި ކުރިއަށްގެންދާއިރު މާކެޓަށް އަންނަ ބަދަލުތަކަށްވެސް ރަނގަޅަށް ހޭނެން ވާނެއެވެ.
ޚިޔާރު ކުރެވެނީ ރަނގަޅު ޕްލެޓްފޯމެއްތަ؟
ރާއްޖޭގައި ވެސް އޮންލައިންކޮށް ވިޔަފާރި ކުރިއަށްގެންދެވިދާނެ ތަފާތު ޕްލެޓްފޯމްތައް އެބަހުއްޓެވެ. ކަސްޓަމަރުންނަށް ފަސޭހައިން މައުލޫމާތު ލިބެން ހުންނަ ޕްލެޓްފޯމަކަށް ވާންވާނެއެވެ. ރާއްޖޭގައި އާންމުންގެ މެދުގައި އެންމެ މަޤުބޫލުކަމަށް ފާހަގަވަނީ ފޭސްބުކް އަދި އިންސްޓަގްރާމްއެވެ. ބޭނުންކުރާ ފަރާތްތަކުން މާބޮޑު ޓެކްނިކަލް މައުލޫމާތުތަކެއް އެނގޭކަށް ނުޖެހެއެވެ. ކޮންމެ އުމުރެއްގެ މީހަކަށްވެސް ފަސޭހައިން ވަދެވެން ހުންނަކަން ފާހަގަކުރެވެއެވެ.
މޮބައިލް އަށް ޚާއްސަ ފީޗަރތައް ބޭނުންކުރުން؟
ވެބްސައިޓެއް މެދުވެރިކޮށް އޮންލައިންކޮށް ވިޔަފާރި ކުރިކަމުގައިވިއަސް މޮބައިލް ފޯނަށް ޚާއްސަ ފީޗަރތައް ބޭނުންކުރެވޭނެ ގޮތެއް ހެދުން މުހިންމެވެ. އެއީ ގިނަ މީހުން އޮންލައިންކޮށް އެއްޗެހި ގަންނަން ބޭނުންކުރަނީ ފޯނު ކަމުގައިވާތީއެވެ. ފޯނުން ވަދެ ބޭނުންއެއްޗެއް ޚިޔާރުކޮށް ފަސޭހައިން ފައިސާ ދެއްކޭނެ ގޮތެއް އިންތިޒާމް ކުރުން ރަނގަޅެވެ.
ކަސްޓަމަރުންނަށް ރަނގަޅު މައުލޫމާތު ދިނުން
މިސާލަކަށް ޕޭމެންޓް ޕޮލިސީގެ މައުލޫމާތު ފަސޭހައިން ޑައުންލޯޑު ކުރެވޭނެގޮތަކަށް ފެންނަން ހުރުން ރަނގަޅެވެ. ރަށްރަށަށް ޑެލިވަރީ ކޮށްދޭނަމަ އިތުރަށް ނަގާނެ ފައިސާގެ މިންވަރާއި މާލެސަރަހައްދުގެ ޑެލިވަރީ ގަޑިތަކުގެ މައުލޫމާތުފަދަ މުހިންމު ކަންތައްތަކަށް ވިސްނަންވާނެއެވެ. ބުނާ ވަގުތަކަށް ޑެލިވަރީ ކުރުން އެއީ ވަރަށް މުހިންމު ކަމެކެވެ.
ކަސްޓަމަރުން ދެކޭގޮތް ގަވާއިދުން ހޯދުން
އޮންލައިން ވިޔަފާރި ކުރިއަށްގެންދާއިރު ކަސްޓަމަރުންގެ އިތުބާރު ލިބުން ވަރަށް މުހިންމެވެ. އެހެންނޫނީ އޭގެ އަސަރު ކުރާނީ ވިޔަފާރިއަށެވެ. ލިބޭ 'ނެގެޓިވް ފީޑްބެކް' އިން އެތައްބައެއްގެ އިތުބާރު ގެއްލިދާނެތީއެވެ. ވިޔަފާރިއެއް ކުރިއަރައިގެން ދާނީ ކަސްޓަމަރުންގެ ފުރިހަމަ އެއްބާރުލުމާއެކުގައެވެ. ވިޔަފާރި ކުރިއަރުވަން އިތުރަށް ބޭނުންވާ ކަންތައްތައް ދަނެގަނެވޭނީވެސް އެ ކަސްޓަމަރުންގެ ވިސްނުން ރަނގަޅަށް އެނގިގެންނެވެ. އެހެންވުމުން ފީޑްބެކް ނުވަތަ ދެކޭގޮތް ރަނގަޅަށް ހޯދާ ހައްލުކުރަންވީ ކަންތައްތައް އިތުރަށް ހައްލުކުރާށެވެ. 'އޮޓޯ ރިޕްލައި'ގެ ބަދަލުގައި ކަސްޓަމަރުން ކުރާ ސުވާލުތަކަށް އެންމެ ފުރިހަމައަށް ޖަވާބު ދިނުމަށް އިސްކަންދޭށެވެ.
