ބުކްޝޮޕަކަށް ވަދެ ދިވެހި ބަހުގެ ފޮތްތައް ބަލަން ފަށައިފިނަމަ 'އަރާކުރި ސީރީޒް' ގެ ގިނަ އަދަދެއްގެ ފޮތްތައް ފެންނަން ހުންނާނެއެވެ. މަޝްހޫރު އަރާކުރި ސީރީޒްގެ މުސައްނިފަކީ މާލެސިޓީ/މާފަންނު އަފްޒާ ހުސްނާ ފަހުމީ އެވެ.
އަޅުގަނޑާއި އެންމެ ފުރަތަމަ ހުސްނާ ބައްދަލުވީ 2023 ވަނަ އަހަރު ބޭއްވި ރެހެންދި އެވޯޑް ހަފްލާގެ ތެރެއިންނެވެ. އަޅުގަނޑުމެން 2 މީހުންނަށްވެސް ރެހެންދި އެވޯޑް ލިބުނީ އެއް ހަފްލާއަކުން ކަމަށްވާތީއެވެ. އެދުވަހުން ފެށިގެންވެސް ހުސްނާގެ ޕްރޮފައިލް ލިޔުމަކީ ދެކެމުން އައި ހުވަފެނެކެވެ. ސަބަބަކީ ދިވެހި ބަހަށް ހުސްނާގެ ހިތުގައި އޮތް ފަނޑުވުމެއް ނެތް ލޯތްބެވެ. ކޮށްދެއްވި އަގުހުރި ޚިދުމަތެވެ.
ދިވެހި ބަހުން ފޮތް ލިޔެ އެކުލަވައިލުމާއި ޝާއިޢުކުރުމުގެ ރޮނގުން މިއަހަރު ހިތްވަރު ދިނުމުގެ ޤައުމީ އިނާމު ލިބިވަޑައިގެންނެވި ހުސްނާ ފަހުމީ ދިވެހި ބަހަށް ޚިދުމަތް ކުރައްވާތާ 42 އަހަރު ވެއްޖެއެވެ. މެދުނުކެނޑި 37 އަހަރަށް ވުރެ ގިނަ ދުވަހު ދިވެހި ދައުލަތަށް ޚިދުމަތް ކޮށްދެއްވާފައިވާތީ ރައީސުލްޖުމްހޫރިއްޔާ ދެއްވާ ދައުލަތަށް ގިނަ ދުވަހު ޚިދުމަތް ކުރުމުގެ އިނާމު 2021 ވަނަ އަހަރު ވަނީ ލިބިވަޑައިގެންފައެވެ.
ވަޒީފާގެ ތަޖުރިބާ
އުމުރުން އެންމެ 16 އަހަރުގައި 1978 ވަނަ އަހަރު ސަރުކާރުގައި ވަޒީފާ އަދާކުރައްވަން ފެއްޓެވި ހުސްނާ އެންމެ ފުރަތަމަ އަދާކުރެއްވި ވަޒީފާއަކީ ނާސިރިއްޔާ މޮންޓެސޫރީ ސްކޫލުގެ ކާތިބާއެއްގެ މަގާމެވެ. އެއަށްފަހު ޖަމާލުއްދީން ސްކޫލާއި، ދަރުމަވަންތަ ސުކޫލުގެ މުދައްރިސެއްގެ ގޮތުގައި މަސައްކަތް ކުރެއްވިއެވެ.
ސަރުކާރުގެ ވަޒީފާއިން ރިޓަޔަރ ކުރެއްވިއިރު ހުންނެވީ ކަލާފާނު ސުކޫލްގެ ލީޑިންގ ޓީޗަރެއްގެ މަޤާމުގައެވެ. ތަޢުލީމީ ރޮނގުން ހުސްނާ ވަނީ މާސްޓަރ އޮފް ދިވެހި ލޭންގްވެޖް އެންޑް ކަލްޗަރ، ޕޯސްޓްގްރޭޖުއޭޓް ޑިޕްލޮމާ އިން ޓީޗިންގ، ބެޗްލަރ އޮފް އާރޓްސް- ދިވެހި ލޭންގްވެޖްގެ އިތުރުން ޑިޕްލޮމާ އޮފް ޓީޗިންގ ހާސިލުކުރައްވާފައެވެ.
އަރާކުރި ސީރީޒްގެ 46 ފޮތް
އަރާކުރި" ސީރީސްއަކީ ދިވެހިބަހުގެ ހަތަރު ހުނަރަށް އަމާޒުކޮށްގެން ނާސަރީ ކުދިންނަށް ޚާއްސަ އަކުރު ދަސްކުރާ ފޮތްތަކުން ފެށިގެން ޕްރައިމަރީ އަދި މެދުމަދަރުސީ ގްރޭޑްތަކުގެ ކުދިންނަށް ޚާއްސަކޮށްގެން ނެރެމުންދާ ސީރީސްއެކެވެ. ކުޑަކުދިން ޝައުގުވެރިވާ ގޮތަށް ކުރެހުމާއި ލިޔުން ހިމެނޭ މި ސީރީސްގައި މަޖާ، ޢިބްރަތްތެރި ވާހަކަތަކާއި މަސައްކަތު ފޮތްތަކާއި، ކިޔުމުގެ ދޭހައިގެ ފޮތްތަކާއި، އަދި އުފެއްދުންތެރި ލިޔުމުގެ ފޮތްތައް ހިމެނެއެވެ. މި ސީރީސްގެ 46 ވަނަ ފޮތަކީ ނޮވެމްބަރ 3 ގެ ހާދިސާގެ މައުލޫމާތު ކުޑަކުދިންނަށް އޮޅުންފިލުވައިދިނުމަށް ފަސޭހަވާނެ ގޮތަކަށް ގެނެސްދެއްވާފައިވާ ފޮތެކެވެ. އަރާކުރި ސީރީސްގެ ފޮތްތަކަކީ ފަންސާހަށްވުރެ ގިނަ ސަފުހާ ހިމެނިފައިވާ ފޮތްތަކެކެވެ. އަދި ނެރުމަށް ތައްޔާރުވެފައިވާ މި ސީރީސްގެ 47 ވަނަ ފޮތް "ދިވެހީންގެ ވަޠަން" މި ފޮތަކީ ދިވެހި ޤައުމިއްޔަތާ ވަރަށް ބޮޑަށް ގުޅުންހުރި ރާއްޖޭގެ ވަރަށް ގިނަ މައުލޫމާތު އެއް ފޮތަކުން ލިބިގެންދާނެ ތިންސަތޭކަ ވަރަކަށް ސަފުހާގެ ބޮޑު ފޮތެކެވެ.
އަރާކުރި ސީރީސްގެ ފޮތްތަކުގެ ތެރޭގައި ތުއްތު ކުދިންނަށް ދިވެހިބަހުގެ އަކުރުތަކުގެ ބައްޓަން ދަސްކޮށްދިނުމާއެކު، ފިލިތަކާއި ސުކުންތައް ކިޔަން ދަސްކޮށްދިނުމަށްޓަކައި ތައްޔާރު ކުރައްވާފައިވާ ފޮތްތައް ހިމެނެއެވެ. މި ފޮތްތަކުގައި ދިވެހިބަސް ދަސްކުރަން ޝައުޤުވެރިވާނެފަދަ ގޮތަކަށް އަކުރާއި ފިއްޔާއި ސުކުންތައް ހިމަނުއްވާފައި ވެއެވެ. މި ފޮތްތަކުގެ ގިނަ ފަރިތަކުރުންތަކުގެ ޖަވާބުތައް ވެސް ހިމަނުއްވާފައިވެއެވެ. މި ފޮތްތަކަކީ އާންމުންގެ މެދުގައި ވަރަށް ބޮޑު މަޤުބޫލުކަމެއް ލިބެމުންދާ ފޮތްތަކެއްކަން ފާހަގަކޮށްލެވެއެވެ.
ހިލޭސާބަހަށް އަގުހުރި މަސައްކަތްތަކެއް
ފޮތް ލިޔުއްވުމުގެ އިތުރުން ހުސްނާ ގެންދަވަނީ އަދަބީ ރޮނގުން ހިލޭ ސާބަހަށް އެކިއެކި ސްކޫލުތަކަށް މަސައްކަތް ކޮށްދެއްވަމުންނެވެ. ޚާއްސަކޮށް ދިވެހި ބަހުން ލިޔަންކިޔަން ދަސްކޮށްދިނުމުގެ ޕްރޮގްރާމްތައް "އަރާކުރި" ސީރީޒްގެ ފޮތްތައް ބޭނުންކުރައްވައިގެން ދަނީ ހިންގަވަމުންނެވެ. ގިނަ އަދަދެއްގެ ފޮތް ވަނީ ރާއްޖޭގެ އެކި ސަރަހައްދުތަކުގެ ސްކޫލުތަކަށް ހަދިޔާވެސް ކުރައްވާފައެވެ. މީގެ އިތުރުން ބައެއް އޮންލައިން ނޫސްތަކަށްވެސް ލިޔުއްވަމުން ގެންދަވާ ހުސްނާ އަކީ 'ޒީޓައިމްސް' އަށް ވެސް މައުލޫމާތުން މުއްސަނދިވެފައިވާ ބޭނުންތެރި ލިޔުންތައް ހަދިޔާކުރައްވަމުން ގެންދަވާ ޚިދުމަތްތެރިއެކެވެ.
ސަރުކާރުގެ ވަޒީފާއިން ރިޓަޔަރ ކުރެއްވުމަށްފަހުވެސް ދެމިހުންނެވީ މުޖުތަމަޢަށް ފައިދާހުރި ދިވެހި ބަހުގެ ޚިދުމަތްތެރިއެއްގެ ގޮތުގައެވެ. އަދަބީ ރޮނގުންނާއި އިޖުތިމާޢީ ރޮނގުން ކޮށްދެއްވަމުން ގެންދަވާ މަސައްކަތްތައް ފަނޑުވުމެއް ނެތެވެ. ހުސްނާގެ ނަން ދިވެހި އަދަބީ އުޑުގައި ދަނީ ފިޔަޖަހަމުންނެވެ. އެދެނީ އަބަދުވެސް ކާމިޔާބީ މިންވަރު ކުރެއްވުމެވެ.
