އުރީދޫ ނޭޝަން އިން ބޭއްވި އިންޓަރ އޮފީސް އީސްޕޯޓްސް ޗެމްޕިއަންޝިޕް 2025ގެ މޮބައިލް ލެޖެންޑް: ބޭންގް ބޭންގް (އެމްއެލްބީބީ) މުބާރާތުން މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އަށް ވަނީ އެއްވަނަ ލިބިފައެވެ.
މިއީ އިންޓަރ އޮފީސް އީސްޕޯޓްސް ޗެމްޕިއަންޝިޕް ބޭއްވި ދެވަނަ ފަހަރެވެ. މި މުބާރާތުގެ މަގުސަދަކީ ރާއްޖޭގެ އެކި ކަންކޮޅުތަކުގެ އޮފީސް ޓީމުތައް އެއްތަނަކަށް އެއްވެ އީސްޕޯޓްސްގެ މައިދާނުގައި އޮފީސްތަކުގެ ޓީމުތަކާއި ކުޅުންތެރިން ބައިވެރިކުރުމުގެ ފުރުސަތު ދިނުމެވެ.
ފަސް ކުންފުންޏަކުން ނުވަ ޓީމު ބައިވެރިވި އެމްއެލްބީބީ މުބާރާތުގެ އެއްވަނަ އެމްއޭސީއެލް އިން ހޯދީ ފަސް ކުންފުންޏަކާ ވާދަކުރުމަށްފަހުއެވެ.
އެމްއޭސީއެލްއަކީ އެންމެ ގިނަ މުވައްޒަފުން މަސައްކަތްކުރާ އެއް ކުންފުނި ކަމަށްވާއިރު ކުންފުނިތަކުގެ މެދުގައި އެކުވެރިކަން އުފެއްދުމަށް ބާއްވާ މުބާރާތްތަކުގައި މުވައްޒަފުން ބައިވެރިވެ ވާދަކޮށް ރަންވަނަތައް ހޯދުމަކީ ކުންފުނިން އަބަދުވެސް ހިތްވަރުދޭނެ ކަމެއްކަމަށް އެމްއޭސީއެލްއިން ވަނީ މައުލޫމާތު ދީފައެވެ.
އުރީދޫ ނޭޝަންއިން މިމަހުގެ 7 ވަނަ ދުވަހުން ފެށިގެން 15 ވަނަ ދުވަހުގެ ނިޔަލަށް ކުރިއަށް ގެންދިޔަ އިންޓަރ އޮފީސް އީސްޕޯޓްސް ޗެމްޕިއަންޝިޕް 2025 ކާމިޔާބުކަމާއެކު ނިންމާލިއިރު މިފަހަރުގެ މުބާރާތުގައި ފާހަގަކޮށްލެވޭ ވަރުގެ ބައިވެރިވުމެއް ވަނީ ފެނިފައެވެ. އީއޭއެފްސީ ގައި 20 ކުންފުންޏަކުން 47 ކުޅުންތެރިން ބައިވެރިވިއިރު، އެމްއެލްބީބީ: 5 ކުންފުންޏަކުން 9 ޓީމް (63 ކުޅުންތެރިން) އަދި ޕަބްޖީ މޮބައިލް: 9 ކުންފުންޏަކުން 11 ޓީމު (52 ކުޅުންތެރިން) ވަނީ ބައިވެރިވެފައެވެ. މިމުބާރާތުގައި ފާހަގަކުރެވޭ ބޮޑު ކާމިޔާބީއެއް މޯލްޑިވްސް ކަސްޓަމްސް ސާވިސްއިން ވެސް ވަނީ ހޯދާފައެވެ.
ޕަބްޖީ މޮބައިލްގެ ވަނަވެރިން
🥇 ޔުނައިޓެޑް ބީއެމްއެލް އެސްޑީއެމްޒެޑް – 5،000 ރުފިޔާ
🥈 އެމްޓީސީސީ – 3،000 ރުފިޔާ
🥉 މޯލްޑިވްސް ކަސްޓަމްސް ސާވިސް – 2،000 ރުފިޔާ
މޮބައިލް ލެޖެންޑްސް: ބޭންގް ބޭންގް (އެމްއެލްބީބީ)
🥇 މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) - 5،000 ރުފިޔާ
🥈 މޯލްޑިވްސް ކަސްޓަމްސް ސާވިސް - 3،000 ރުފިޔާ
🥉 ބޭންކް އޮފް މޯލްޑިވްސް (ޔުނައިޓެޑް ބީއެމްއެލް) - 2،000 ރުފިޔާ
އީއޭއެފްސީ
🥇 ޖަނާން މުހައްމަދު - މޯލްޑިވްސް ކަސްޓަމްސް ސާވިސް - 5،000 ރުފިޔާ
🥈 މާހިލް މުހައްމަދު - ޕްރިހާބް ޕްރައިވެޓް ލިމިޓެޑް - 3،000 ރުފިޔާ
🥉 ހުސެއިން ޔައީޝް – ހިވިން އިންވެސްޓްމަންޓްސް - 2،000 ރުފިޔާ
