މިއަދުގެ ހާލަތަށް އަހަރެމެން ވިސްނާއިރު އެންމެ ގިނައިން ފެންނަ އެއް ކަމަކީ މީހުންގެ އަބުރަށް އަރައިގަތުމެވެ. ﷲ ސުބުހާނަހޫ ވަތަޢާލާ ވަނީ އިންސާނާ އެންމެހައި މަޚުލޫޤުންގެ މައްޗަށް މާތްކުރައްވައި ޤަދަރު އުފުއްލަވައި ޙުރުމަތްތެރި ބަޔަކުކަމުގައި ލައްވައިފައެވެ. މާތް ނަބިއްޔާ ﷺ ޙައްޖަތުލްވަދާޢުގެ ޚުޠުބާގައި ހަދީޘްކުރައްވައިފައިވާ ބަސްފުޅެއްގެ މާނައިގައިވެއެވެ. " ހަމަކަށަވަރުން ތިޔަބައިމީހުންގެ ލެޔާއި މުދަލާއި އަބުރަކީ ހުރުމަތްތެރިވެގެންވާ އެއްޗެކެވެ. މިއަދު (އެބަހީ އަރަފާތް ދުވަސް) ޙުރުމަތްތެރިވެވީ ފަދައިންނެވެ. މިމައްސަރު (އެބަހީ ޛުލްޙިއްޖާ މަސް) ހުރުމަތްތެރިވީ ފަދައިންނެވެ. މި (އެބަހީ މައްކާ) ހުރުމަތްތެރިވީ ފަދައިންނެވެ". މާތް ނަބިއްޔާ އިންސާނާގެ އަބުރުގެ ހުރުމަތްތެރިކަން ގުޅުވައިލައްވައިފައި އެވަނީ ލެޔާއި މުދަލަށެވެ. އެހެނީ ހައްޤަކާ ނުލައި މީހަކު މަރައިލުން ޙަރާމްވާ ފަދައިން އަދި މީހެއްގެ މުދާ އަތުލައިގަތުން ހަރާމްވާ ފަދައިން އަބުރަށް އަރައިގަތުމަކީ ވެސް ހަރާމްކަމެކެވެ.
މިއަދުގެ މުޖުތަމަޢުގައި އެންމެ އާއްމުވަމުންދާ އެއް ފާފައަކީ މީހުންގެ އަބުރަށް އަރައިގަތުމެވެ. ތެދެއް ދޮގެއް ބެލުމެއް ނެތި އެމީހަކަށް އަޑުއިވުނު ނުވަތަ ފެނުނު ކޮންމެ ވާހަކައެއް ފަތުރަނީ އެއިން ނިކުންނާނޭ ނަތީޖާއަކަށް އެންމެ ފަހަރަކުވެސް ވިސްނައިލުމެއް ނެތިއެވެ.
މީހެއްގެ އަބުރު ކަތިލައި މުޅަމަސްކައި ފަޟީހަތްކޮށް ދޮގު ވާހަކަތައް ފަތުރާއިރު އެއްވެސް އެއްޗެއް ތިބާގެ ހިތަށް ނާރަނީހެއްޔެވެ؟ މިކަމުގެ ބިރުވެރިކަމުގެ ވާހަކަތައް ތިބާއާ ހަމައަށް ނުފޯރަނީހެއްޔެވެ؟ ނަބިއްޔާ އެކަމުގައި ހުރި ނުރައްކާތެރިކަން ބަޔާންކޮށްދެއްވައި އިންޒާރު ކުރެއްވިކަން ނޭނގެނީހެއްޔެވެ؟ ކަނުލައި އަޑުއަހާށެވެ!
މާތް ނަބިއްޔާ ﷺ ހަދީޘް ކުރައްވައިފައިވެއެވެ. މާނައީ: "މުއުމިނަކާ ބެހޭ ގޮތުން ތެދު ނޫން އެއްޗެއް ބުނި މީހަކު އެމީހަކު އެބުނި އެއްޗަކުން ރުޖޫޢަނުވެ ހުރެ މަރުވެއްޖެނަމަ މާތް ﷲ އެމީހަކު ނަރަކައިގެ އަހުލުވެރީންގެ ގައިން ނުކުންނަ ފާދިޔައިގައި ވަޒަންވެރިކުރުވާ ހުއްޓެވެ".
ޒިންމާދާރުކަމެއް ނެތި ދުލުން ނުވަތަ ގަލަމުން ފަތުރާ ދޮގު ވާހަކައެއްގެ ސަބަބުން އެތައް ބައެއްގެ ދިރިއުޅުން ހަލާކުވެ އާއިލާތައް ރޫޅި މުޖުތަމަޢު ބައިބައިވުމުގެ ސަބަބަކަށް އެކަންތައް ވެއެވެ.
