ފަހަކަށް އައިސް "އިމޯޝަނަލް އިންޓެލިޖެންސް" މި ލަފުޒު ވަރަށް ގިނައިން އިވެއެވެ. މިއީ ހަމައެކަނި އިލްމެއް ނޫނެވެ. ދިރިއުޅުމުގައި ކާމިޔާބީ ހޯދުމަށް މިއީ ވަރަށް މުހިންމު ސިފައެކެވެ. ދިރިއުޅުމުގެ ކޮންމެ ކަމެއްގައިވެސް އަޅުގަނޑުމެންގެ ޖަޒުބާތުތަކަށް ބޮޑު ދައުރެއް އަދާކުރެއެވެ. އިމޯޝަނަލް އިންޓެލިޖެންސް އަކީ އަޅުގަނޑުމެންގެ ޖަޒުބާތުތައް ދެނެގަނެ، ރަނގަޅަށް ބޭނުންކުރުމުގެ ގާބިލިއްޔަތެވެ. މިއީ އަޅުގަނޑުމެންގެ ގުޅުންތައް ބަދަހިކޮށް، ގިނަ ގޮންޖެހުންތަކާ ކުރިމަތިލުމުގައި އެހީތެރިވެދޭނެ އަސާސީ ހުނަރެކެވެ.
އިމޯޝަނަލް އިންޓެލިޖެންސްގެ އެންމެ ފުރަތަމަ ފިޔަވަޅަކީ ޒާތީ ހޭލުންތެރިކަން އުފެއްދުމެވެ. މާނައަކީ، އަޅުގަނޑުމެންގެ އަމިއްލަ ޖަޒުބާތުތައް ދެނެގަތުމާއި، އެއަށް ކަނޑައެޅޭ އަސަރުތައް ފާހަގަކުރުމެވެ. މިސާލަކަށް، ދެރަވުން، އުފާވުން، ރުޅިއައުން، ނުވަތަ ކަންބޮޑުވުން ފަދަ ޖަޒުބާތުތައް އަޅުގަނޑުމެންނަށް އިހުސާސްވަނީ ކޮން ހާލަތެއްގައި ކަމާއި، އެއިން އަޅުގަނޑުމެންނަށް ކުރާ އަސަރުތައް ދެނެގަތުމެވެ. މި ހުނަރުގެ ސަބަބުން އަޅުގަނޑުމެންނަށް އަމިއްލަ ނަފްސު ދެނެގަނެ، ދިރިއުޅުމުގެ ނިންމުންތައް ނިންމުމުގައި އެހީތެރިވެދެއެވެ.
ޒާތީ ހޭލުންތެރިކަން އުފެދުމަށްފަހު ދެވަނަ މުހިންމު ކަމަކީ ޒާތީ ކޮންޓްރޯލެވެ. މާނައަކީ، އަޅުގަނޑުމެންގެ ޖަޒުބާތުތައް ރަނގަޅަށް މެނޭޖުކުރުމެވެ. ރުޅިއައިސްފައިވާ ވަގުތު ނުވަތަ ކަންބޮޑުވެފައިވާ ވަގުތު އަޅުގަނޑުމެންނަށް ރަނގަޅު ނިންމުންތައް ނުނެގިދާނެއެވެ. އިމޯޝަނަލް އިންޓެލިޖެންސްގެ އެހީގައި މިފަދަ ހާލަތްތަކުގައިވެސް ހަމަހިމޭންކަންމަތީގައި މަޑުމައިތިރިކަމާއިއެކު، ވިސްނައިގެން ގޮތްތައް ނިންމުމުގެ ގާބިލިއްޔަތު ލިބިދެއެވެ. މިއީ ހާސްކަން ކުޑަކުރުމަށާއި، ދިރިއުޅުމުގެ ބަދަލުތަކަށް އެޑެޕްޓްވުމަށް ވަރަށް މުހިންމު ހުނަރެކެވެ.
އަޅުގަނޑުމެންގެ ޖަޒުބާތުތައް ދެނެގަތުމުގެ އިތުރުން، އެހެން މީހުންގެ ޖަޒުބާތުތައް ދެނެގަތުމަކީވެސް އިމޯޝަނަލް އިންޓެލިޖެންސްގެ މުހިންމު ބަޔެކެވެ. މިއީ އެމްޕެތީ (empathy) އެވެ. އެމްޕެތީއަކީ އެހެން މީހުންގެ އިހުސާސްތައް ދެނެގަނެ، އެއަށް އިހުތިރާމުކޮށް، އެފަދަ ހާލަތްތަކުގައި އެމީހުންގެ ތެރެއަށް ވަދެ، އެހާލަތު އިހުސާސްކުރުމުގެ ގާބިލިއްޔަތެވެ. މި ހުނަރުގެ ސަބަބުން އަޅުގަނޑުމެންނަށް އެހެން މީހުންނާ މުޢާމަލާތްކުރުމުގައި ރަނގަޅު ގޮތްތައް އިޚްތިޔާރުކުރެވި، ގުޅުންތައް ބަދަހިކުރުމަށް އެހީތެރިވެދެއެވެ.
އިމޯޝަނަލް އިންޓެލިޖެންސްގެ އެންމެ މުހިންމު އެއް ބަޔަކީ ގުޅުންތައް ބެލެހެއްޓުމާއި، އެހެން މީހުންނާ ގުޅިގެން މަސައްކަތްކުރުމަށް ބޭނުންވާ އިޖްތިމާޢީ ހުނަރުތަކެވެ. މީގެ ތެރޭގައި އެކަށީގެންވާ ގޮތުގައި މުޢާމަލާތްކުރުން، ކޯޅުންތައް ހައްލުކުރުން، އެހެން މީހުންނަށް ނުފޫޒު ފޯރުވުން، އަދި ލީޑަރޝިޕް ހުނަރުތައް ހިމެނެއެވެ. މި ހުނަރުތަކުގެ ސަބަބުން މަސައްކަތުގެ މާޙައުލުތަކުގައިވެސް އަދި އަމިއްލަ ދިރިއުޅުމުގައިވެސް ބަދަހި ގުޅުންތައް ބިނާކުރުމަށް އެހީތެރިވެދެއެވެ.
އިމޯޝަނަލް އިންޓެލިޖެންސް ތަރައްގީކުރުމަށް ތިރީގައިވާ ކަންކަން ކުރެވިދާނެއެވެ.
- ޖަޒުބާތުތަކަށް އަހުލުވެރިވުން: ތިމާގެ ޖަޒުބާތުތައް ބަދަލުވަނީ ކިހިނެއްކަން ފާހަގަކުރުމަށް އާދަކުރުން.
- އެހެން މީހުންނަށް ސަމާލުކަންދިނުން: އެހެން މީހުން ވާހަކަ ދައްކާއިރު ނުވަތަ މުޢާމަލާތް ކުރާއިރު، އެމީހުންގެ ޖަޒުބާތީ ހާލަތު ދެނެގަތުމަށް މަސައްކަތްކުރުން.
- ހަމަހިމޭންވުން: ރުޅިއައިސްފައިވާ ނުވަތަ ހާސްވެފައިވާ ވަގުތު އެކަމަށް އަވަސްއަވަހަށް ރައްދު ދިނުމުގެ ބަދަލުގައި، ފުން ނޭވާއެއްލައި، ވިސްނައިގެން ގޮތް ނިންމުމަށް އާދަކުރުން.
- ގުޅުންތައް ބަދަހިކުރުން: އެހެން މީހުންނާއެކު އިތުރަށް ގުޅުން ބަދަހިކޮށް، އެމީހުންގެ ޝުޢޫރުތައް ދެނެގަތުމަށް މަސައްކަތްކުރުން.
ކުރުކޮށް ބުނާނަމަ، އިމޯޝަނަލް އިންޓެލިޖެންސްއަކީ ހަމައެކަނި ފޮތް ކިޔައިގެން ނުވަތަ މަޢުލޫމާތު ދަސްކޮށްގެން ލިބޭ އެއްޗެއް ނޫނެވެ. މިއީ ދިރިއުޅުމުގެ ތެރެއިން ޢަމަލީ ގޮތުން ތަރައްގީކުރަންޖެހޭ ހުނަރެކެވެ. މި ހުނަރުތައް ތަރައްގީކޮށްފިނަމަ، އަޅުގަނޑުމެންނަށް އަމިއްލަ ނަފްސު ރަނގަޅަށް ދެނެގަނެ، ގުޅުންތައް ބަދަހިކޮށް، ދިރިއުޅުމުގައި ކުރިމަތިވާ ގޮންޖެހުންތަކާ ކާމިޔާބުކަމާއެކު ކުރިމަތިލެވި، ބަދަހި އަދި ހަމަޖެހޭ ދިރިއުޅުމެއް އުޅުމަށް މަގުފަހިވާނެއެވެ.
އެޑިޓަރުގެ ނޯޓް: މިއީ ސޯޝަލް އިމޯޝަނަލް އިންޓެލިޖެންސް ކޯޗެއް އަދި ގައިޑަންސް އެންޑް ކައުންސެލަރ އެއްގެ ގޮތުގައި މަސައްކަތްކުރައްވާ ސަމާ އިބްރާހީމް ދީދީ "ޒީޓައިމްސް" އަށް ހަދިޔާ ކޮށްފައިވާ ލިޔުމެކެވެ. މި ލިޔުމުގެ ބޭނުމަކީ ކިޔުންތެރިންނަށް ދިރިއުޅުމުގެ ހުނަރުތަކާއި ހަރުދަނާ ބަދަހި ގުޅުންތަކެއް ދެމެހެއްޓުމަށް ކުރެވިދާނެ ކަންތައްތަކުގެ މަޢުލޫމާތު ހިއްސާކުރުމެވެ.
