އައިމިނަތު ނަތާޝާ ޤާސިމް އާއި އާދަމް އިހުސާންގެ 4 ދަރިންގެ ތެރެއިން 2 ވަނަ ދަރިފުޅު ފާތިމަތު ސާރާ އިހުސާން/ ކ.މާލެ އަށް ދިމާވެފައިވަނީ ވަރަށް ވެސް ހިތާމަވެރި ހާލަތެކެވެ. އުމުރުން އެންމެ 9 އަހަރުގެ ސާރާގެ އުމުރުން 1 އަހަރުން ފެށިގެން އުޅެން ޖެހިފައި މިވަނީ ހަމުގެ ވަރަށް ބޮޑު މައްސަލައަކާއެކުގައެވެ. ރަނގަޅަށް ހަމަނިދި ނުލިބެއެވެ. ހިރުވާވަރުން ސްކޫލަށްވެސް ނުފޮނުވެއެވެ.
ސާރާގެ ހަލަތާއި ގުޅޭ މައުލޫމާތު 'ޒީޓައިމްސް' އަށް ހިއްސާކުރީ އޭނާގެ މަންމަ އާމިނަތު ނަތާޝާ ޤާސިމް އެވެ.
އެކްޒީމާގެ ބަލީގެ ސަބަބުން ސާރާގެ މުޅި ހަންގަނޑުގެ ބޮޑުބައެއް އެވަނީ ހަލާކުވެފައެވެ. އެންމެ ކުޑައިރު މޫނުގައި ތަންކޮޅެއް ރަތްވެ ހަލާކުވެފައި ހުއްޓަސް އެއީ އެކްޒީމާކަމެއް ދެނެގަނެވިފައެއް ނުވެއެވެ.
" މޫނުގައި ތަންކޮޅެއް ރަތްވެ ހަލާކުވެފައި ހުރުމުން ޑޮކްޓަރަށް ދެއްކީ ސާރާ ކުޑައިރު. އެއިރު ޑޮކްޓަރު ބުނީ އެއީ މައްސަލައެއް ނޫންކަމަށް. އެއީ ކުޑަކުދިންނަށް ދިމާވާ އާންމުކަމެއް ކަމަށް. އުމުރުން 5 އަހަރު ވީތަނާ ސާރާގެ ގައިގެ އެކިތަންތަން މިހާބޮޑަށް ހަލާކުވާން ފެށީ. އެހާހިސާބުން ޑޮކްޓަރުން ބުނީ ހަމުގެ މައްސަލައެއް ކަމަށް".
ސާރާއަށް މިހާގިނަ ދުވަހު ރާއްޖެއިން ބޭސްކުރިރުވެސް އެކަށީގެންވާ ހައްލެއް ނުލިބޭތީ އަދި ރާއްޖެއިން ނުހެދޭ ޓެސްޓުތަކެއް ހުރުމުން ޑޮކްޓަރުގެ ލަފައާއެކު އިންޑިއާގެ ކޮޗިންއަށް ފަރުވާއަށް ދިއުމަށް އާއިލާއިން ނިންމީއެވެ.
" އަޅުގަނޑުމެންގެ މާލީހާލަތު ތަންނުދޭ އެހާގިނަ ދުވަހު ފަރުވާއަށް ރާއްޖެއިން ބޭރުގައި މަޑުކުރުމަށް. ޑޮކްޓަރުން އިރުޝާދު ދީފައިވާ އިންޖެކްޝަން ޖަހާތީ މަދުވެގެން 16 ދުވަހު މަޑުކުރަންޖެހޭ. އިންޖެކްޝަނަށް ޖުމްލަ 15000 ޑޮލަރު ހޭދަވޭ. އެއީ 6 މަސްދުވަހުގެ އިންޖެކްޝަނަށް. އާސަންދަ ކަވަރ ކުރަނީ އިންޖެކްޝަނަށް ހޭދަވާ ޚަރަދުގެ ދެބައިކުޅައެއްބައި. އަދި ހުރުމާއި ކެއުމާއި ޓްރާންސްޕޯޓަށް ބޮޑުއެއްޗެއް ހޭދަވާނެ. ދަރިފުޅުގެ ކިޔެވުމަށް އަސަރުކުރާތީ އިތުރަށް ފަރުވާއަށް ނުގޮސް މަޑުކުރެވެންވެސް ނެތް". ހިތްދަތިކަމާއެކު ސާރާގެ މަންމަ ކިޔައިދިނެވެ.
ކުޑަކުޑަ ސާރާވެސް ވަނީ ހަންގަނޑު ހަލާކުވުމުގެ ސަބަބުން ރޭގަނޑު ނުނިދޭ ކަމަށް ބުނެފައެވެ. ސާރާގެ ހިތްވަރުގަދައެވެ. އުންމީދު ކުރަނީ މިބަލިން ރަނގަޅުވާނެ ދުވަހަކަށެވެ. އާސަންދަ ލިބިފައިވީކަމުގައިވިއަސް ހަމުގެ ބަލިތަކަށް ދޭ ބައެއް ބޭސްތަކަކީ އާސަންދަ ކަވަރ ނުކުރާ ބޭސްތައް ކަމަށް އާއިލާއިން ވަނީ މައުލޫމާތުދީފައެވެ. ސާރާގެ އާއިލާއިން ފަރުވާއަށް ފުރުމަށް ހަމަޖެހިފައިވަނި އޮގަސްޓްމަހުގެ 8 ވަނަ ދުވަހުގައެވެ.
......................................
ނޯޓް: މިއީ ޒީޓައިމްސްއިން ގެނެސްދޭ މިފަދަ އެހީގެ 54 ވަނަ ރިޕޯޓެވެ. އިންސާނިއްޔަތަށްޓަކައި ކުރާ މިމަސައްކަތުގައި ކިޔުންތެރިން ދެއްވާ އެއްބާރުލުމަށް ޝުކުރު އަދާކުރަމެވެ. މިގޮތަށް ލިބޭ އެހީ ޖަމާވަނީ ބަލިމީހާގެ އެކައުންޓަށެވެ. މި ޢާއިލާ އަށް އެކަށީގެންވާ މިންވަރަށް އެހީ ލިބިފައިވާތީ، ކުރިން ހިމަނަައިފައިވާ އެކައުންޓުު ނަންބަރު ވާނީ އުނިކޮށްފައެވެ. ޝުކުރިއްޔާ!
ކިޔުންތެރިންގެ ހިޔާލު
އިޝްތިހާރު ކޮށްފައި ހުރޭ ޙިޖާމާޖަހައިގެންރަނގަޅު ވާކަމަށް. ބަލާލުން ރަނގަޅު ނޫންތޯ?
ކޮމެންޓްސް ބަންދުކުރެވިފައި