ކަނޑު ދަތުރު ކުރާއިރު މޫސުމަށް ޚާއްސަ ސަމާލުކަމެއް ދިނުން ވަރަށް މުހިންމެވެ. މުޅި ރާއްޖެ އަށް މެޓް އޮފީހުން ވަނީ ހުދު ސަމާލު ނެރެފައެވެ. މިއަދު މެންދުރުފަހު 2 އިން މިރޭ 8 ޖެހުމާއި ހަމައަށް ހުދު ސަމާލު ނެރެފައިވާއިރު ބޯކޮށް ވާރޭވެހި ވިލާގަނޑުގައި ގަޑިއަކު 45 މޭލަށް ވައިގަދަވެ ކަނޑުތައް ގަދަވާނެކަމަށް މެޓް އޮފީހުން ވަނީ ލަފާކޮށްފައެވެ.
މާލެއާއި ބައެއް ރަށްރަށަށްވެސް ދަނީ އުދައަރަމުންނެވެ. ރާޅުގެ އުސްމިން 7-4 ފޫޓުވަރު ވާނެކަމަށް ބެލެވެއެވެ. މޫދުކައިރީގައި ދިރިއުޅޭ ގެތަކަށް ފެން ނުވަންނާނެހެން ވެލިބަސްތާޖެހުން ފަދަ ކަންތައްތަކަށް ސަމާލުވާން ޖެހެއެވެ.
މިދުވަސްވަރަކީ ސްކޫލު ބަންދު ދުވަސްވަރަށްވުމުން ގިނަ އަދަދެއްގެ މީހުން ދަނީ ޗުއްޓީއަށް އެކި ރަށްރަށަށް ދަތުރު ކުރަމުންނެވެ. މިގޮތަށް ދަތުރު ކުރާއިރު މޫސުން ލަފާކުރާ ގޮތުގެ އެންމެފަހުގެ މައުލޫމާތު ހޯދުން ވަރަށް މުހިންމެވެ. ހުޅަނގު މޫސުމުގެ މިވިއްސާރައިގައި މޫސުމަށް ވަރަށް ބޮޑަށް ސަމާލުކަންދޭންޖެހެއެވެ.
