އެއީ ހަމައެކަނި އަޑެއް ނޫނެވެ. އެ އަޑާ އެކު މުޅި ގޭތެރޭގެ ހަމަހިމޭންކަން ގެއްލުނެވެ. ފޮތުން ނުކުތް ސޫރަ، މަޑުމަޑުން އެމީހުންނާ ދިމާއަށް އަންނަން ފެށިއެވެ. އަނދިރި ދުންގަނޑެއްގެ ސިފައިގައި ބިމުން މަތީގައި ދަތުރުކުރާ ކަހަލައެވެ. އެކަމުން ދެމީހުންގެ ހިތުގައިވާ ބިރުވެރިކަން އިތުރުވިއެވެ. އެތަނުން ސަލާމަތްވުމަށް އެދި ހަޅޭއްލަވައިގަތުމަށް މަސައްކަތްކުރި ނަމަވެސް، އެއްވެސް އަޑެއް ނުނުކުތެވެ.
އެވަގުތު، ފޮތުގެ ސަފުހާތަކުގައި ދިއްލިފައިވާ އަކުރުތަކުން، ފަނޑު ރަތްކުލައެއް ދައްކައިފިއެވެ. އެ ރަތްކުލަ ހީވީ މަޑުމަޑުން ގަދަވެ، ދެމީހުންގެ ހަށިގަނޑަށް ވަންނަން ފެށިހެންނެވެ. އެމީހުންގެ ނާރުތަކުގެ ތެރެއިން އެ އަކުރުތައް ދަތުރުކުރާ ކަހަލަ އިހުސާސެއް ކުރެވެން ފެށިއެވެ. ހިތަށް އަސަރުކޮށް، ސިކުނޑި ހުއްޓޭހެން ހީވިއެވެ. ދޮންއާދަނުގެ ހިތްދަތިކަން ފެނުމުގެ ބަދަލުގައި، އެހިތްދަތިކަން މިހާރު ދެމީހުންނަށް ކުރިމަތިވަނީއެވެ.
އެ ދުންގަނޑުގެ ސޫރަ، ދެމީހުންގެ ހަށިގަނޑުގެ މައްޗަށް ވެރިވެގަތެވެ. އެވަގުތު މުޅި ގޭތެރެއަށް ފެތުރިފައިވާ އަނދިރިކަން އިތުރަށް ގަދަވެ، ފޮތުގެ އަކުރުތައްވެސް ވަށައިގެން ހުރި ދިއްލުންތައްވެސް ނިވިގެން ދިޔައެވެ. ދެމީހުންގެ އަނގައިން ނިކުތް ހަޅޭކުގެ އަޑު، އެކުއެކީގައި އެ އަނދިރިކަމުގެ ތެރޭގައި ގެއްލިގެން ދިޔައެވެ. ދެން ފެނުނީ ހަމައެކަނި ބިމުގައި އޮތް ބިރުވެރި ފޮތެވެ. އޭގެ ސަފުހާތައް އަނދިރިވެ، އަކުރުތައް ފަނޑުވެފައި ހުއްޓެވެ. ހީވަނީ ދެ އިންސާނެއްގެ ދިރިހުރުން ނިމުމަކަށް ގެނެސް، އެ ފޮތުގެ ބާރު އިތުރުވެފައިވާ ހެންނެވެ. ފަތިސްނަމާދަށް ގޮވުމާއި އެކު އެސޫރަ ގެއްލި ހަމަހިމޭންކަން ވެރިވިއެވެ. ގޭތެރޭގައި އޮތް ފޮތް ނުފެންނާތީ އަމީނާ އާއި އަޝްރަފް ބިރުން ތުރުތުރުއަޅަމުން ދިޔައިރު، އެމީހުން ދިޔައީ ކުޑަދޮރުން ބޭރު ބަލާށެވެ. މުޅި ގޯތިތެރޭ އޮތީ ހަމަހިމޭންކަމެވެ. އެއްވެސް މީހެއްގެ ހިލަމެއް ނެތެވެ. ނަމަވެސް އަމީނާއަށް ސިއްސައިގެން ގޮސް ހަޅޭލަވައިގަނެވުނެވެ.
"އެހެރީ މީހެއް. އަންހެނެއް. އަންހެނެއް. ކީއްކުރާ މީހެއްބާ" އަމީނާ ހުރީ ވަރަށް ބިރުންނެވެ.
"ތިވާނީ މިރަށުގެ ކޮންމެވެސް މީހަކަށް. ހިނގާބަލަ ބަލާލަން" ކުޑަދޮރުން ބޭރުގައި، އެނބުރި ހުރި އަންހެނެއްގެ ހިޔަންޏެއް ފެނުމުން އަޝްރަފްވެސް ކުޑަހިނދުކޮޅަކަށް ސިއްސައިގެން ދިޔައެވެ.
އަޝްރަފް ބިރުންހުރެ ބޭރަށް ނިކުމެ އެމީހާ އާއި ދިމާލަށް ހިނގައިގަތެވެ. ހިތުގައި ހީނުކުރާ ބިރުވެރިކަމެއް އަށަގަނެފައި ހުރިއިރު، ފިޔަވަޅުތައް އަޅަމުންދިޔައީ މަޑުމަޑުންނެވެ. ވަރަށް ކައިރިއަށް ދެވުނުތަނާހެން އެއީ ސިއްތިކަން އެނގުނެވެ. ސިއްތީގެ މޫނުން ފެންނަމުން ދިޔައީ ނިކަމެތިކަމާއި އަސަރެވެ. އެހެންނަމަވެސް އެއީ ކީއްވެކަމެއް އަޝްރަފަށް ނޭނގެއެވެ.
"ސިއްތި! ކިހިނެއްވީ؟ ތިހެން ހުރި ސަބަބަކީ ކޮބާ؟" އަޝްރަފް އޭނާގެ ކައިރިއަށް ގޮސް، ބިރުން ހުރެ ސުވާލުކޮށްލިއެވެ.
ސިއްތީގެ މޫނުމަތިން ފެންނަމުން ދިޔަ ބިރުވެރިކަން އިތުރަށް ގަދަވެ، އޭނާގެ ލޮލުން ކަރުނަ ފައިބަން ފެށިއެވެ. އޭނާގެ އަނގައިން އެއްވެސް އަޑެއް ނުނިކުތެވެ. އެހެންނަމަވެސް، އޭނާ މަޑުމަޑުން އަތުން އެމީހުންގެ ގެއާއި ދިމާލަށް އިޝާރާތްކުރިއެވެ. އަޝްރަފް ސިއްތި ހުރިތަނުގައި ބަހައްޓާފައި އަވަހަށް ގޭތެރެއަށް ވަނެވެ. އަމީނާ އޭނާގެ އިންތިޒާރުގައި ހުރީ ބިރުން ތުރުތުރު އަޅަމުންނެވެ.
"ސިއްތި ކީއްކުރަނީ މިރޭގަނޑު ބޭރުގައި؟ އޭނާއަށް ކިހިނެއްވީ؟" އަމީނާ އަހާލިއެވެ.
"ނޭނގެއޭ އަމީނާ. އޭނާ އަހަންނަށް އެއްވެސް ޖަވާބެއް ނުދޭ. ހަމައެކަނި އަހަރެމެންގެ ގެއަށް އިޝާރާތްކުރީ" އަޝްރަފް ޖަވާބު ދިނެވެ.
ދެމީހުންވެސް އަނެއްކާވެސް ގޭތެރެއަށް ނަޒަރު ހިންގާލިއެވެ. އެވަގުތު، މުޅި ގޭތެރޭގައި ހަމަހިމޭންކަމެއް ވެރިވެފައިވާއިރު، ރޭ ދެމީހުންނަށް ދިމާވި ބިރުވެރި ހާދިސާގެ ހަނދާންތައް އައުވެގެން ދިޔައެވެ. ދެމީހުންނަށްވެސް އިހުސާސް ކުރެވުނީ، އޭގެ އަސަރު އަދިވެސް ގޭތެރޭގައި ހުރިކަމެވެ. ބިރުވެރި ފޮތް ފެންނަން ނެތުމުން، އެމީހުންގެ ބިރުވެރިކަން އިތުރުވިއެވެ. އެ ފޮތް ކޮބައިތޯ ނޭނގި، ބިރުވެރިކަމުން ފުރިގެން ދިޔައެވެ.
އަޝްރަފް އާއި އަމީނާ އެކަކު އަނެކަކަށް ބަލާލިއެވެ. އެ ދެމީހުންގެ ލޮލުންވެސް ފެންނަމުން ދިޔައީ ނިކަމެތިކަމެވެ.
"ފޮތް ކޮބާ؟" އަމީނާ މަޑުމަޑުން އަހާލިއެވެ.
"ނޭނގެއޭ އަމީނާ. ރޭގަނޑު އަހަރެމެންނަށް ފެނުނުތާނގައި ފޮތެއް ނެތް" އަޝްރަފް ޖަވާބު ދިނެވެ.
އެ ދެމީހުން މަޑުމަޑުން ފިޔަވަޅު އަޅަމުން ގޭތެރެއަށް ވަދެ، ކޮންމެ ކޮޓަރިއެއްވެސް ބަލަން ފެށިއެވެ. ކޮޓަރިތަކުގެ ދޮރުތައް ހުރީ ތަޅުނުލެވި، ބައެއް ދޮރުތައް ހުރީ ހުޅުވިފައެވެ. ގޮނޑިތައް އޮތީ ވެއްޓިފައެވެ. މުޅި ގޭތެރެއިންވެސް ބިރުވެރިކަމުގެ ވަހެއް ދުވަމުން ދިޔައެވެ.
ކުއްލިއަކަށް، އެމީހުންގެ ފަހަތުން ފިނި ވަޔެއް ޖެހި، ކޮންމެވެސް އެއްޗެއް ދުވެފައި ދިޔަހެން ހީވިއެވެ. އެ ދެމީހުންވެސް ސިހިފައި ފަހަތަށް އެނބުރި ބަލާލިއެވެ. އެހެންނަމަވެސް އެއްވެސް އެއްޗެއް ފެންނާކަށް ނެތެވެ.
"އަޝްރަފް... އެއީ ކޮން އެއްޗެއް؟" އަމީނާ ބިރުން ހުރެ އަޝްރަފްގެ އަތުގައި ހިފާ ބާރުކޮށްލިއެވެ.
"ނޭނގެއޭ އަމީނާ... އަހަރެންނަށްވެސް އެއްޗެއް ހިނގާލިހެން ހީވީ..." އަޝްރަފް ބުނަމުން ދިޔައިރު އޭނާގެ އަޑުވެސް ތުރުތުރު އަޅަމުން ދިޔައެވެ.
ދެމީހުން އެގޮތަށް ބިރުން ތިއްބާ، ގޭތެރެއިން ފާޑެއްގެ އަޑެއް އިވެން ފެށިއެވެ. އެއީ މީހަކު ލަސް ލަސްކޮށް ކުޑަދޮރުގައި ތަޅަމުންދާ އަޑެއް ކަހަލައެވެ. އެ އަޑު އަންނަނީ ކޮޓަރިއެއްގެ ތެރެއިން ކަމަށް ދެމީހުންނަށްވެސް އިހުސާސް ކުރެވުނެވެ.
އެ ދެމީހުންވެސް މަޑުމަޑުން އެ ކޮޓަރިއާ ދިމާލަށް ހިނގައިގަތެވެ. ދޮރު ކައިރިއަށް ދެވުނުތަނާހެން އަޑު ގަދަވެ، ކުޑަދޮރުގައި ތަޅާ އަޑާއެކު ދޮރުފަތް ތެޅޭ އަޑުވެސް އިވެން ފެށިއެވެ.
ކޮންމެވެސް އެއްޗެއް އެތެރޭގައި އެބައޮތް... ފޮތް..." އަޝްރަފް ފިނިވެފައި ހުރެ ބުނެލިއެވެ. އަޝްރަފް ހިތްވަރުކޮށްފައި ދޮރު ހުޅުވާލިއެވެ. އެތެރޭގައި މުޅި ތަން ހުރީ ފޮތްތައް ވީދިފައެވެ. ކުޑަދޮރުގެ ބިއްލޫރިގަނޑު ވަނީ ތެޅި ފުނޑުފުނޑުވެފައެވެ. އެއްވެސް މީހެއް ނުފެނުނަސް، މުޅި ކޮޓަރި ތެރެއިންވެސް ބިރުވެރި ވަހެއް ދުވަމުން ދިޔައެވެ. އަޝްރަފްގެ ލޮލަށް ފެނުނީ ކޮޓަރީގެ އެންމެ އަނދިރި ކަނުގައި ހުރި ގޮނޑި މަތީގައި އޮތް ގޮޅިޖެހި ފޮތެވެ.
އަޝްރަފް ފޮތާ ދިމާލަށް މަޑުމަޑުން ހިނގައިގަތެވެ. އެ ފޮތް އަތުލުމަށްފަހު، އެނބުރި ބޭރަށް ނުކުތުމަށް އޭނާ ނިންމިއެވެ. ފޮތާ ކައިރިވަމުން ދިޔަވަރަކަށް ގޭތެރޭގެ ފިނިކަން އިތުރުވެ، ނުފެންނަ ބާރަކުން އޭނާގެ ހިތަށް ބާރުކުރާހެން ހީވިއެވެ. ފޮތަށް އޭނާގެ އަތް ދިއްކޮށްލުމާއެކު، ކުއްލިއަކަށް ފޮތް ހުޅުވި، އެތެރެއިން އަނދިރި ދުމެއް ބޭރަށް ނިކުތެވެ. އެ ދުމުގެ ތެރެއިން އަޑެއް ބޭރުވިއެވެ. އެއީ މީހަކު ވޭނުގައި ހަޅޭއްލަވާ އަޑެއް ކަހަލައެވެ. އަމީނާ ހަޅޭއްލަވައިގަތެވެ. އަޝްރަފް ބިރުން ހުރެ ފޮތް ދޫކޮށްލިއެވެ.
"މިތަނުން ދާންވީ..." އަޝްރަފް އަމީނާގެ އަތުގައި ހިފައި ބާރުކޮށްލިއެވެ.
އެ ދެމީހުން އަވަސް އަވަހަށް ގޭގެ ދޮރާ ދިމާލަށް ދުއްވައިގަތެވެ. ގޭގެ ދޮރުހުރީ އަމިއްލައަށް ހުޅުވިފައެވެ. އެ ދެމީހުންނަށް ދިމާވެފައިވާ ބިރުވެރި ހާދިސާ ނިމުމަކަށް ނާންނަކަން އިހުސާސް ކުރެވުނެވެ. ގޭގެ ބޭރުގައި ސިއްތި އަދިވެސް ހުރިތޯ ބެލިއެވެ. ނަމަވެސް ސިއްތި އެތަނުގައި ނެތެވެ. ސިއްތި ކޮބައިކަމެއް، އަދި އޭނާއަށް ވީގޮތެއްވެސް ނޭނގެއެވެ. އެ ދެމީހުންވެސް ހިތްވަރުކޮށްފައި މަގުމައްޗަށް ނުކުތެވެ. އުއްމީދުކުރީ އެބިރުވެރި ފޮތާއި، އޭގެ އަސަރުން ދުރުވެވިދާނެ ކަމަށެވެ. ނަމަވެސް، އެކަން ވާނެކަމުގެ އެއްވެސް ޔަގީންކަމެއް އެމީހުންގެ ހިތަކު ނެތެވެ.
ސިއްތިއަށް ކިހިނެއްވީބާވައޭ އަޝްރަފް އާއި އަމީނާގެ ހިތަށް އެރިއެވެ. އެއީ ހަމައެކަނި ފޮތަކުން އުފެދޭ ބިރުވެރިކަމެއް ނޫންކަން، އެއަށްވުރެ ބޮޑު ކަމެއްކަން އެ ދެމީހުންނަށް އިހުސާސް ކުރެވެމުން ދިޔައެވެ.
"އަޝްރަފް... މިހާރު އަހަރެމެން ދާނީ ކޮންތާކަށް؟" އަމީނާގެ އަޑު ތުރުތުރު އަޅަމުން ދިޔައިރު، އޭނާގެ މޫނުމަތިން ފެންނަމުން ދިޔައީ އުއްމީދު ކެނޑިފައިވާ ކަމެވެ.
"ނޭނގެއޭ އަމީނާ... މިހާލަތުގައި އަހަރެމެންނަށް އެއްވެސް ތަނަކަށް ދާކަށް ނުކެރޭނެ... އަހަންނަށް ހީވަނީ އެ ފޮތުގެ އަސަރު އަދިވެސް އަހަރެމެންގެ ފަހަތުން އަންނަހެން..." އަޝްރަފް ޖަވާބު ދިނެވެ. އޭނާގެ އަޑުގައިވެސް ބިރުވެރިކަމާއި ހިތްދަތިކަން ވަރަށް ބޮޑަށް ފެންނަން ހުއްޓެވެ.
އެ ދެމީހުން މަޑުމަޑުން ހިނގަމުން ދިޔައީ، ވަށައިގެންވާ ހަމަހިމޭންކަމުގެ ތެރޭގައި ކޮންމެ ހިނދެއްގައިވެސް ކޮންމެވެސް އެއްޗެއް ދިމާވެދާނެ ކަމުގެ ބިރުގައެވެ. މަގުމަތީގައި ދިއްލާފައިވާ މަގުބައްތިތަކުގެ އަލިކަންވެސް އެމީހުންނަށް ފެންނަމުން ދިޔައީ ބިރުވެރި ހިޔަނިތަކެއްގެ ގޮތުގައެވެ. އެމީހުންގެ ކޮންމެ ފިޔަވަޅަކާއެކު، ހިތުގެ ތެޅުން އަވަސްވެ، ދިމާވި ހާދިސާ އަނެއްކާވެސް ތަކުރާރުވެދާނެކަމުގެ ބިރު ބޮޑުވަމުން ދިޔައެވެ.
ކުއްލިއަކަށް، ދުރުން މީހަކު ރޮމުންދިޔަ އަޑެއް އިވިގެން ދިޔައެވެ. އެއަޑާއެކު، އަމީނާ ސިހިފައި އަޝްރަފްގެ އަތުގައި ހިފާ ބާރުކޮށްލިއެވެ. އެ ދެމީހުންވެސް މަޑުކޮށްލިއެވެ. އެ އަޑު އަންނަނީ ކޮންތާކުންކަމެއް، އަދި އެއީ ކޮން ބާވަތެއްގެ އަޑެއްކަމެއްވެސް ދެމީހުންނަށް ނޭނގެއެވެ.
"އަޝްރަފް... އެއީ ކޮން އަޑެއް؟" އަމީނާ ބިރުން ހުރެ ސުވާލުކޮށްލިއެވެ.
"ނޭނގެ އަމީނާ... އަހަންނަށްވެސް އަޑެއް އިވުނު. ހީވަނީ ކޮންމެވެސް މީހަކު ރޮނީހެން" އަޝްރަފް ވަށައިގެންވާ މާހައުލަށް ނަޒަރު ހިންގާލިއެވެ. އެއްވެސް މީހެއް ނުފެނުނެވެ.
އެ ދެމީހުންގެ ހިތުގައި އުފެދުނު ބިރުވެރިކަމުން ހަޅޭއްލަވައިގަނެވުނެވެ. އެ ބިރުވެރި ފޮތުގެ އަސަރުން ދުވަހަކުވެސް ސަލާމަތްވެ ނުގަނެވޭނެކަން އިހުސާސް ކުރެވުނެވެ. އެމީހުންގެ ދިރިއުޅުން މިހާރުވަނީ އެ ފޮތާ ގުޅިފައިވާ ބިރުވެރި ކަމަކަށް ބަދަލުވެފައެވެ.
= ނުނިމޭ =
