ރާއްޖޭގެ މަޝްހޫރު ދެފަންނާނުން ކަމުގައިވާ މުހައްމަދު އަބްދުލްޣަނީ އަދި މަރްޔަމް އަޝްފާގެ ހުރި ހަމައެކަނި ދަރިފުޅު ކަމުގައިވާ 17 އަހަރުގެ ޔޫސުފް އަލްސަން މުހައްމަދު ނިޔާވީ ރޭ މާލޭގައި ހިނގި ނުރައްކާތެރި އެކްސިޑެންޓުގައި ލިބުނު ޒަޚަމްތަކުންނެވެ.
އަލްސަން އަކީ ތޭރަވާ އާއި އަޝްފާ ވަރަށް ލޯބިން ބަލަމުން އައި އެދެމީހުންގެ ފުރާނަ ފަދަ ލޯބިވާ ދަރިފުޅެވެ. ތަފާތު އިންޓަވިއުތަކުންނާއި ސޯޝަލް މީޑިއާގައި އަޝްފާ ހިއްސާކޮށްފައިވާ ޕޯސްޓުތަކުންވެސް އެ ދަރިފުޅަށްޓަކައި އެ މަންމަގެ ހިތުގައި އޮތް ލޯބި ވަރަށް ފުރިހަމައަށް ފެންނަން އެބަހުއްޓެވެ.
އަލްސަންގެ 16 ވަނަ އުފަންދުވަހާއި ދިމާކޮށް އަޝްފާ ކުރި ޕޯސްޓުގައިވެސް އަލްސަން ސިފަކޮށްފައިވަނީ ލިބުނު އެންމެ ބޮޑު ނިޢުމަތުގެ ގޮތުގައެވެ.
އަލްސަންގެ ޖަނާޒާ ކުރިއަށްގެންދިޔައީ މިއަދުގެ އަސްރު ނަމާދަށްފަހު އާސަހަރާގައެވެ. މޫނުބެލުމަށާއި ކަށުނަމާދަށް ގިނަ އަދަދެއްގެ ބަޔަކު ދިޔައިރު އެންމެންގެ ލޯ ވަނީ ފެންކަޅިވެފައެވެ. އަލްސަންގެ މަންމައާއި ބައްޕަގެ އިތުރުން އާއިލާއާއި ގާތް ރައްޓެހިންނަށް ކޮށްފައިވާ އަސަރު ބަޔާންކުރަން ދައްޗެވެ. ހިފެހެއްޓުމެއް ނެތި ކަރުނަތައް ފައިބަމުންދިޔައިރު މި ހިތްދަތިކަމުން އެ އާއިލާ އާއި ރައްޓެހިން އަރައިގަންނަން ވަގުތު ނަގާނެއެވެ. މިއީ އަލްސަންގެ މަންމަ އާއި ބައްޕައަށް ލިބުނު ފޫނުބެއްދޭނެ ފަދަ ހިތްދަތިކަމެކެވެ. ދެލޮލުގެ ނޫރު ފަދަ ދަރިފުޅުގެ ކުއްލި ވަކިވުމާއެކު ލިބުނީ ބޮޑު ޝޮކެކެވެ. ރެއިން ފެށިގެން ސޯޝަލް މީޑިއާގައި ގިނަ އަދަދެއްގެ ބަޔަކު ވަނީ މިހިތްދަތި މަރުގެ ވާހަކަ ހިއްސާކޮށްފައެވެ. ގިނަބަޔަކަށް ފުން ހިތާމައެއް ވަނީ ލިބިފައެވެ.
މި ހިތާމަވެރި އެކްސިޑެންޓް ހިނގީ ޖުލައި 13 ވީ އާދީއްތަ ދުވަހުގެ ރޭ 8:17 ހާއިރު މާލޭ ބޮޑުތަކުރުފާނުމަގު ބަސްޓާމިނަލް ކައިރީގައެވެ. އަލްސަން ދުއްވަންއިން ސައިކަލު ގޮސް ޖެހުނީ ދުވަމުން އައިސް ކަފިހިހުރަހުން މަގު ހުރަސްކުރި 40 އަހަރުގެ މީހާގެ ގައިގައެވެ. އެއަށްފަހު ސައިކަލު ކޮންޓްރޯލުނުވެ ގޮސް ޖެހުނީ ދަތުރު ކުރަމުންއައި ޕިކަޕެއްގައެވެ. އަލްސަން އާއި ސައިކަލު ފަހަތުގައި އިން 16 އަހަރުގެ އެކުވެރިޔާ ވިއްސައިގެން ގޮސް ޕިކަޕްގައި ޖެހި އެއްކުއްޖަކު ޕިކަޕް ދަށަށް ވާގޮތަށް އޮތްއިރު މުޅި އެސަރަހައްދުގައި ގިނަ އަދަދެއްގެ ލޭ ހުރި މަންޒަރު ފެނުނެވެ. މި އެކްސިޑެންޓު ހިނގިތާ މާގިނައިރެއް ނުވަނީސް އަލްސަން ނިޔާވިއިރު، 40 އަހަރުގެ މީހާއަށް ވެސް ވަނީ ސީރިއަސް އަނިޔާތަކެއް ލިބިފައެވެ. މި އެކްސިޑެންޓުގައި އަނިޔާ ލިބުނު 2 މީހުންނަށް ހޮސްޕިޓަލުގައި ދަނީ ފަރުވާދެމުންނެވެ.
ހުރި ހަމައެކަނި ދަރިފުޅު ޅައުމުރުގައި ވަކިވުމަކީ ކޮންމެ މަންމައަކާއި ބައްޕައަކަށްވެސް ލިބޭނެ އެންމެ ބޮޑު ހިތްދަތިކަމެވެ. އަލްސަންގެ މަންމަ އާއި ބައްޕަ އަދި އާއިލާއަށް ކެތްތެރިކަން މިންވަރު ކުރައްވާށިއެވެ. އަލްސަންގެ ފުރާނައަށް ސުވަރުގޭގެ މަތިވެރި ނިޢުމަތް މިންވަރު ކުރައްވާށިއެވެ. އާމީން!
