ގދ. ގައްދޫ ކޯޒީރައުންޑް ޒަކަރިއްޔާ މުހައްމަދު ގެއްލިގެން ހޯދަމުން ދަނީ ޖުލައިމަހުގެ 10 ވީ ބުރާސްފަތި ދުވަހުން ފެށިގެންނެވެ. އެދުވަހުގެ ހެނދުނު 10:30 ހާއިރު ގދ. ގަމުން ޑިންގީއެއްގައި ގައްދޫ އަށް އައުމަށް ފުރިފަހުން ވީގޮތެއް ނޭނގި ޒަކަރިއްޔާ ގެއްލުނުއިރު ލައިގެން ހުރީ ކަޅުކުލައިގެ ސޯޓަކާއި ނޫކުލައިގެ ޓީޝާޓެކެވެ.
އުމުރުން 79 އަހަރުގެ ޒަކަރިއްޔާ ހޯދުމުގެ މަސައްކަތް ގައްދޫ ކައުންސިލާއި، މެރިން ޕޮލިސް އާއި ކޯސްޓްގާރޑުގެ ސިފައިންނާއި، މަސްވެރިންނާއި ޒުވާނުން އަދި ގައްދޫ ރައްޔިތުން ގުޅިގެން އަންނަނީ ކުރަމުންނެވެ.
ގައްދޫ ކައުންސިލުން މައުލޫމާތު ދިންގޮތުގައި ޒަކަރިއްޔާ ހޯދުމަށް ކުރަމުން އަންނަ މަސައްކަތުގެ ތެރެއިން މިއަދު ހެނދުނު ކޯސްޓްގާޑުގެ ސިފައިން ޑައިވް ކުރިއިރު ފުލުހުންނާއި ގައްދޫގެ ޒުވާނުން ހިމެނޭގޮތަށް 29 މީހުންގެ ޓީމެއްވެސް ދިޔައީ އެސަރަހައްދު މޫދު ބަލަމުންނެވެ.
" ސްނޯކްލިން އަށް ގޮސް ހޯދަމުންދިޔަ ޓީމަށް މިއަަދު ހެނދުނު 9:30 ހާއިރު ކަނޑުގެ 10 މީޓަރު އަޑިން ޑިންގީ ފެނުނީ. ޒަކަރިއްޔާ އަދި ނުފެނޭ". ކައުންސިލުން މައުލޫމާތު ދިނެވެ.
ޑިންގީ ފެނުނުއިރު ޑިންގީއިން ބައެއް ބައިތައްހުރީ ނެއްޓިފައެވެ.
ޒަކަރިއްޔާ ގެއްލުނު ކަމުގެ ރިޕޯޓް ލިބިގެން ހޯދުމުގެ މަސައްކަތް މެރިން ޕޮލިސްއިން ފެށީ ބުރާސްފަތި ދުވަހުގެ ހަވީރު 5:30 ހާއިރުގައެވެ. ގައްދޫގެ ގޮނޑުދޮށާއި ވަށައިގެންވާ ކަނޑުގެ ބޮޑު ސަރަހައްދެއް އެއްކޮށް ވަނީ ބަލައިފައެވެ.
ޒަކަރިއްޔާ އާއި ގުޅޭ އެއްވެސް މައުލޫމާތެއް ލިބިއްޖެނަމަ 7211233 އަދި 7791755 އަށް ގުޅުމަށް ގައްދޫ ކައުންސިލުން ވަނީ އެދިފައެވެ.
