"ނޫނެކޭ... ކަމެއް ނުވޭ" އަމީނާ މަޑުމަޑުން ބުނެލިއެވެ. ނަމަވެސް އޭނާގެ އަޑުގައި ހުރި ކަންބޮޑުވުމުގެ އަސަރު އަޝްރަފަށް ފާހަގަވިއެވެ.
"ކަމެއް ވެގެން އުޅޭކަން އަހަންނަށް އެނގޭ. މިހާރު ނުބުނަންޏާ، ފަހުންވެސް އަހަރެން އަޑުއަހާނަން. ބުނަން ބޭނުންވީމަ ބުނާތި" އަޝްރަފް އަމީނާގެ އަތުގައި ހިފާލަމުން ބުނެލިއެވެ.
އަޝްރަފްގެ މަޑުމައިތިރި ބަސްތަކުން އަމީނާއަށް ކޮންމެވެސް ވަރެއްގެ ހިތްހަމަޖެހުމެއް ލިބުނެވެ. ނަމަވެސް އޭނާގެ ބިރުވެރިކަން އަދިވެސް ފިލައިގެން ނުދެއެވެ. މިއަދު މިކަން އަޝްރަފްއާ ހިއްސާކުރަން ޖެހޭނެކަން އަމީނާއަށް އެނގެއެވެ. ރޭގަނޑުގެ ހިމޭންކަމުގައި، އެއްބަސްވުމުގެ ހަނދާންތައް އޭނާގެ ހިތުގައި ހިނގަމުން ދިޔައެވެ. ނޯޓުފޮތުގައިވާ ލިޔުންތަކަށް އޭނާ ބަލާލިއިރު، އެ ލިޔުންތަކުގެ ތެރޭގައި ސިއްރުތަކެއް ފޮރުވިފައިވާކަން އޭނާއަށް އިޙްސާސް ކުރެވުނެވެ. މި ސިއްރުތައް ހާމަވުމުން ދޮންއާދަނުގެ ހާލަތު ކިހިނެއްވާނެބާވައޭ އޭނާގެ ހިތަށް އަރަމުން ދިޔައެވެ.
ހަވީރުގެ ވަގުތެވެ. އާދަވެގެން އަޝްރަފް ކޮންމެ ހަވީރަކުވެސް މަސް ބާނަން ގޮސްފައި އަންނަނީ އިރުއޮއްސޭ ވަގުތާ ގާތްކޮށެވެ. އަމީނާ ނިންމީ އަޝްރަފް އައުމުން ސިއްރުން މި ވާހަކަތައް ދެއްކުމަށެވެ. އެނގިފައިވާ ގޮތުގައި އެ ފޮތުގައިވާ ލިޔުންތަކަކީ އާދައިގެ ލިޔުންތަކެއް ނޫނެވެ.
އިރުއޮއްސި، މުޅި ރަށް އަނދިރި ވިއެވެ. ރޭގަނޑު ދިޔައީ މުޅި ހިސާބުގަނޑު ހިމޭންކޮށްލަމުންނެވެ. އަމީނާ ހުރީ އަޝްރަފް އަންނަންދެން އިންތިޒާރުގައެވެ. ގޭގެ ދޮރު ހުޅުވާލި އަޑާއެކު އަމީނާ ސިހިފައި ބަލާލިއެވެ. އަޝްރަފް މަޑުމަޑުން ގޭތެރެއަށް ވަދެ ދޮރު ލައްޕާލިއެވެ.
"އައީތަ؟" އަމީނާގެ އަޑުގައި ހުރީ ބިރުވެރިކަމުގެ އަސަރެވެ.
"ކިހިނެއްވީ؟ މިހާރުވެސް ތި ހުރީ ވަރަށް ނުތަނަވަސްކޮށް. ކީއްވެ؟" އަޝްރަފް އަމީނާގެ ގާތަށް އައިސް އޭނާގެ ބޮލުގައި ފިރުމާލިއެވެ.
"އަޝްރަފް. ބުނަން ބޭނުންވާ ވާހަކައެއް. ވަރަށް ސިއްރުން ބުނަންޖެހޭ ވާހަކައެއް. އެކަކަށްވެސް ނޭނގޭނެ" އަމީނާ އަޝްރަފްގެ އަތުގައި ހިފާލަމުން ބުނެލިއެވެ.
"ކޮން ކަމެއް؟ ކީއްވެ ތިހާ ބިރުގަންނަނީ؟" އަޝްރަފް ހައިރާންވެފައި ބަލާލިއެވެ.
އަމީނާ ދޮންއާދަނުގެ ވާހަކަ އަޝްރަފްއަށް ކިޔައިދޭން ފެށިއެވެ. ޖިންނި އައުމުގެ ވާހަކައާއި، އެ ޖިންނި ދެއްކި ވާހަކަތަކާއި، ނޯޓުފޮތުގެ ވާހަކަ އޭނާ ކިޔައިދެމުން ދިޔައިރު، އަޝްރަފްގެ މޫނުމަތިން ފެންނަމުން ދިޔައީ ނުތަނަވަސްކަމެވެ. އަމީނާ އެވާހަކަ ކިޔައި ނިމުނުއިރު އަޝްރަފްގެ މޫނުވަނީ ރަތްވެފައެވެ.
"އަހަރެންނަށް ހީވޭ މިއީ ގޯސް ކަމެއްހެން. އެ ޖިންނި ތިކަމުން އެހީއެއް ނުވާނެ. ބޮޑު މައްސަލައަކަށް ވެދާނެ" އަޝްރަފް ކަންބޮޑުވެފައި ބުނެލިއެވެ.
"އެހެންނަމަވެސް، ދޮންއާދަނުގެ މަރުގެ ހަގީގަތް އިނގޭނީ މިކަން ކުރުމުންނޭ އެ ޖިންނި ބުނީ. އަހަރެންނަށް މިހާރު މިކަން ނުކޮށް ހުރެވޭނެ ގޮތެއް ނެތް" އަމީނާ ދެބަސްވިއެވެ.
"އެކަމަކު މި ފޮތުގައި ކޮންކަމެއް ތި ޖިންނި ލިޔެފައިވަނީ؟ މިކަމުގެ ނުރައްކަލެއް ވެސް އެބައޮތް. އެއްވެސް މީހަކަށް މިކަމުގެ ޚަބަރެއް ވެސް ނުދޭތި. ވަރަށް ސިއްރުން މިކަން ކުރަން ޖެހޭނީ" އަޝްރަފް ބުނެލިއެވެ. އޭނާގެ އަޑުގައި ހުރީ ސީރިއަސްކަމެވެ.
އެރޭ ދެމީހުން ނިންމީ ފޮތުގައިވާ ލިޔުންތައް ކިޔަން ފެށުމަށެވެ. އެހެންނަމަވެސް، އެ ފޮތް ހުޅުވާލުމަށް އަމީނާއަށް ހިތްވަރެއް ނުލިބުނެވެ. އެ ފޮތުން ނުކުންނާނެ ބިރުވެރިކަމަށް އޭނާ ވަނީ ބިރުގަނެފައެވެ.
"އަހަރެން މިހުރީ. ބިރުނުގަންނާތި. އާދޭ، އެކީގައި މިކަން ކުރަން" އަޝްރަފް އޭނާގެ ގާތުގައި އިށީނދެ އަމީނާގެ އަތުގައި ހިފާލިއެވެ.
އަމީނާ މަޑުމަޑުން ނޯޓުފޮތް ނަގައި، އެ ފޮތުގެ ފުރަތަމަ ގަޑު ނިއުޅާލިއެވެ. ފޮތުގެ އެތެރޭގައި ހުރީ އާދަޔާޚިލާފު އަކުރުތަކާއި ކުރެހުންތަކެވެ. އެއީ އަމީނާ މީގެ ކުރިން ދެކެފައިނުވާ ގޮތެއްގެ ލިޔުންތަކެވެ. ކުއްލިއަކަށް ފޮތުން ވަހެއް ދުވަން ފެށިއެވެ. އަމީނާ އަވަހަށް ނޭފަތުގައި އަތްއަޅާލިއެވެ. އަޝްރަފް ވެސް ހައިރާންވެފައި ފޮތަށް ބަލާލިއެވެ. އެ ވަހާއެކު ގޭތެރޭގެ އާދައިގެ ހިމޭންކަމަށް ބުރޫ އަރައިގެން ދިޔައެވެ. ދެމީހުންގެ ހިތްވެސް ތެޅެން ފެށިއެވެ. މި ދެމީހުންގެ ކުރިމަތީގައި އޮތް ބިރުވެރިކަމުގެ ހަގީގަތް އެވަގުތު އެނގެން ފަށައިފިއެވެ.
ފޮތުން ދުވަމުންދިޔަ ވަހުގެ ސަބަބުން ދެމީހުންގެ ނޭވާ ބެދެންފެށިއެވެ. ފޮތުގެ ފުރަތަމަ ގަޑުގައިވާ ލިޔުންތައް ކިޔަން އަމީނާ މަސައްކަތްކުރިއެވެ. އަޝްރަފް އަމީނާގެ ކައިރިއަށް ޖެހިލާފައި ފޮތަށް ބަލާލިއެވެ.
"މި ޖިންނި ފޮތް ދިނީ ކީއްވެކަމެއް އަހަރެންނަކަށް ނޭނގޭ. މިކަން އަހަރެންނަށް ނުކުރެވޭނެ" އަމީނާ ބިރުގެންފައިވާ ގޮތަކަށް އަޝްރަފްއަށް ބަލާލިއެވެ.
އެވަގުތު، ފޮތުގެ ސަފުހާތައް ކުއްލިއަކަށް އަމިއްލައަށް ބަދަލުވާން ފެށިއެވެ. ކޮންމެ ސަފުހާއަކާއެކު ގޭތެރޭގެ ހިމޭންކަމަށް ބަދަލު އަންނަން ފެށިއެވެ. މުޅި ގޭތެރެއަށް ފިނިކަމެއް ވެރިގެންފިއެވެ. ފާރުގައި ހަރުކޮށްފައި ހުރި ގަޑީގެ އަޑުވެސް އިވެން ފެށިއެވެ. ކޮންމެ ސިކުންތަކު ގަޑީގެ އަޑު ބާރުވެ ބާރުވަމުން ދިޔައެވެ. ދެމީހުންވެސް ބިރުން ތުރުތުރުއަޅަން ފެށިއެވެ.
ފޮތުގެ ސަފުހާއެއްގައި ހުރި ކުރެހުމަކަށް އަމީނާގެ ލޯ ހުއްޓުނެވެ. އެއީ ދޮންއާދަނާ އެއްގޮތް ސިފައެއްގެ މީހެއްގެ ކުރެހުމެކެވެ. އެ ކުރެހުމުގެ ދަށުގައި އާދަޔާ ޚިލާފު އަކުރުތަކުން ލިޔެފައިވާ ލިޔުންތަކެއް ހުއްޓެވެ. އަމީނާގެ ހިތް ބިރުން ތެޅިގަތެވެ.
"މިއީ ދޮންއާދަނު!" އަމީނާ ހަޅޭއްލަވައިގަތެވެ.
"އަޑު ގަދަނުކުރާތި! ކިހިނެއްވީ؟" އަޝްރަފް އަމީނާގެ އަނގައިގައި އަތްއަޅާލަމުން ބުނެލިއެވެ. އަޝްރަފް ހީވީ ވަރަށް ބިރުން ހުރިހެންނެވެ.
"މިއީ ދޮންއާދަނުގެ ސޫރަ. ނަމަވެސް ލޮލުން....... މީގެ މާނައަކީ ކޮބާ؟" އަމީނާގެ އަޑު ތުރުތުރުއަޅަމުން ދިޔައެވެ.
އެވަގުތު ކުއްލިއަކަށް ގޭގެ ހުރިހާ ދޮރުފޮތިތައް ވީދިގެންދިޔަ ކަހަލަ އަޑެއް އިވުނުވެ. ބިރުވެރި އަޑެއް މުޅި ގޭތެރެއަށް ފެތުރިއްޖެއެވެ. ދެމީހުންވެސް އެކަކު އަނެކަކަށް ބަލާލިއެވެ. ގޭތެރޭގައި ހުރި ތަކެތި އަމިއްލައަށް ތެޅެން ފެށިއެވެ. އުނދަގޫވާ ވަރަށް ވަސް ދުވަން ފެށިއެވެ.
"މި ފޮތް ލައްޕާ" އަޝްރަފް ގޮވައިލިއެވެ. ނަމަވެސް އަމީނާއަށް ފޮތް ލައްޕާލާކަށް ނުކެރުނެވެ. އޭނާގެ އަތްވަނީ ފޮތުގައި ތަތްލާފައެވެ. އަމީނާގެ ބިރުވެރިކަމާއެކު، އޭނާ ދެންވެސް ފޮތުގެ ސަފުހާތަކަށް ނަޒަރު ހުއްޓާލިއެވެ. ދޮންއާދަނުގެ ކުރެހުމުގެ ދަށުގައިވާ އަކުރުތައް ކުއްލިއަކަށް ދިއްލި، އަލިވާން ފެށިއެވެ. އަދި އެއަކުރުތައް ބަދަލުވެ، ދިވެހި ބަހުން ލިޔެފައިވާ ލިޔުމަކަށް ބަދަލުވިއެވެ.
އެ ލިޔުން ކިޔާލުމާއެކު އަމީނާގެ ހަށިގަނޑުން ދިލަ ހޫނެއް އަރަން ފެށިއެވެ. އަޝްރަފްވެސް އެ ލިޔުންތައް ކިޔާލިއެވެ. ދެމީހުންގެ ހަށިގަނޑު ހިނގުން ހުއްޓުނު ފަދައެވެ. މިއީ އެމީހުން ދެކެން ބޭނުންވި ހަގީގަތެއް ނޫނެވެ. ދޮންއާދަނުގެ ހާލަތަކީ ޖިންނިއެއްގެ އަޅަކަށް ވުމެވެ.
"އަޝްރަފް... އަހަރެންގެ އަތް ނައްޓާލަދީ" އަމީނާގެ އަޑު ރޮވިފައިވާ އަޑަކަށް ބަދަލުވިއެވެ. އެވަގުތު ގޭތެރޭގައި ހުރި ތަކެތި ތެޅުން އިތުރަށް ގަދަވެ، ބައެއް ތަކެތި ބިންމައްޗަށް ވެއްޓިއްޖެއެވެ. ތަށިތައް ތެޅުނު އަޑުފަށްގަނޑެއް ގޭތެރެއަށް ފެތުރިގެން ދިޔައެވެ. ބަދިގޭ ދޮރުގެ ތެރެއިން ބިރުވެރި ހުނުމެއް އިވެން ފެށިއެވެ. އެ ހުނުމުގެ އަޑު އިވުމުން ދެމީހުންގެ ހަށިގަނޑު ފިނިވެގެން ދިޔައެވެ.
"ފޮތް ލައްޕާށޭ ބުނީމެއްނު!" އަޝްރަފް ބިރުން ހުރެ ހަޅޭއްލަވައިގަތެވެ. ނަމަވެސް އަމީނާއަށް އޭނާގެ އަތް ތަންކޮޅެއްވެސް ހިއްލާލެވޭކަށް ނެތެވެ. ފޮތުގެ ސަފުހާތަކުގައިވާ އަކުރުތައް ދިއްލިފައި ހުރި ވަރަށް ބަލާލުމަށް އޭނާގެ ދެލޯ މަޖުބޫރުކުރެވިފައިވާ ކަހަލައެވެ. އަމީނާގެ ހިތުގައި ހީނުކުރާ ފަދަ ބިރުވެރިކަމެއް އުފެދެމުން ދިޔައެވެ.
"އެ... އެ ލިޔުމުގައި އެބައޮތް" އަމީނާ ވާހަކަ ދައްކަން އުޅުނު ނަމަވެސް، ފުރިހަމައަށް ނުކެރުނެވެ. އޭނާގެ ހަށިގަނޑު ބިރުން ތުރުތުރު އަޅަމުން ދިޔައެވެ.
ކުއްލިއަކަށް ފޮތް ހުޅުވާލި ސަފުހާގެ ކައިރިން ކަޅު ދުންގަނޑެއް ގަދަޔަށް އަރައިގަތެވެ. އެ ދުންގަނޑު މަޑުމަޑުން ބޮޑުވެ، އިންސާނެއްގެ ސޫރައަކަށް ބަދަލުވާން ފެށިއެވެ. ހީވީ ދޮންއާދަނުގެ ކުރެހުމުގައި ހުރި ޖިންނި ނުކުތް ކަހަލައެވެ. އެއީ އެއްވެސް ލޮލެއް ނެތް، އަނދިރި، ސޫރައެކެވެ. އެ ސޫރައިގެ ވަސް މުޅި ގޭތެރެއަށް ވަކިން ގަދަކޮށް ދުވަން ފެށިއެވެ. އަޝްރަފް އާއި އަމީނާގެ ހަށިގަނޑު ހިނގުން ހުއްޓުނު ފަދައެވެ. އެމީހުންގެ ދުލުން އެއްވެސް ބަހެއް ނުނިކުމެއެވެ.
"ތިޔަ ފޮތް ލައްޕާލަން ހިތްވަރު ނުލިބޭނެ" ބިރުވެރި އަޑެއް މުޅި ގޭތެރެއަށް ފެތުރިގެން ދިޔައެވެ.
"ދޮންއާދަނުގެ ހިތްދަތިކަން މިއަދު މި ވަނީ ތިޔަ ދެމީހުންނަށް ފެނިފަ. މި ފޮތް ހުޅުވާލި ދުވަހުން ފެށިގެން، ތިޔަ ދެމީހުންވެސް ވާނީ ދޮންއާދަނުގެ ކަހަލަ ޖިންނިއެއްގެ އަޅަކަށް" އެއީ މީހެއްގެ އަޑެއް ކަމަށް ހީވިޔަސް، އެއަށްވުރެ ހަރު އަޑެކެވެ.
އަމީނާގެ ދެލޯ ބޮޑުވެ، ދުއްވައިގަތެވެ. އަޝްރަފް ދުރަށް ޖެހެން މަސައްކަތް ކުރިނަމަވެސް، އޭނާގެ ފައި ބިންމަތީގައި ހަރުލާފައި ހުރި ކަހަލައެވެ. ދެން ކިހިނެއް ވާނެބާވައޭ އެމީހުންގެ ހިތަށް އަރަމުން ދިޔައެވެ.
= ނުނިމޭ =
