"ގްލޯރިއަސް ޑޭ ބައި އެފް އެންޑް އެފް" ފޭސްބުކް އަދި އިންސްޓަގްރާމް ޕޭޖް ބަލާލުމުން ފެންނަނީ ޕާޓީތަކާއި ހަފްލާތަކަށް ރީތި ޑެކަރޭޝަންތަކެއް ތައްޔާރު ކޮށްފައިވާ މަންޒަރެވެ. މި ބުރަ މަސައްކަތުގެ ފަހަތުގައި ވަނީ ދެމަފިރިންގެ ލޯތްބެވެ.
އައިމިނަތު ފިއޯނާ އާއި ހަސަން ފަރުހާނު ޕާޓީ ޑެކަރޭޝަންގެ މަސައްކަތް ފެށިގޮތްވެސް ތަފާތެވެ.
" ހުރިހާ އޮކޭޝަންއަކަށް. ބްރައިޑަލް ޝަވަރ އެންގޭޖްމަންޓް އަދި ކައިވެނި ޕާޓީއާއި އުފަންދުވަހުގެ ޕާޓީތައް ޑެކަރޭޓް ކޮށްދެން. މިމަސައްކަތް ފެށީ 2017 ވަނަ އަހަރު. 2 މީހުން ކައިވެނި ކުރިއިރު ބޭއްވި ޚާއްސަ ޕްރައިވެޓް ފަންކްޝަނަށް އަމިއްލައަށް ޑެކަރޭޓް ކުރީ. ދެމީހުންގެ ޝައުގުވެރިކަން ހުރި މަސައްކަތެއްވީމަ ހިތަށްއެރީ އަމިއްލައަށޭ ކުރާނީ".
ދެމީހުންގެ ކައިވެނި ޕާޓީއިން ފެށި މިމަސައްކަތް ފުޅާކޮށް މާލެ ސަރަހައްދުގެ އިތުރުން ރަށްރަށުގެ ޕާޓީތަކަށްވެސް ދަނީ ޚިދުމަތް ފޯރުކޮށްދެމުންނެވެ. ފިއޯނާ ބުނިގޮތުގައި ރަށްރަށަށް ދަތުރުކޮށް ޑެކަރޭޝަންގެ ޚިދުމަތް ދޭއިރު ކުރެވެނީ ވަރަށް ތަފާތު ތަޖުރިބާތަކެކެވެ. މަސައްކަތް ބުރަވިއަސް ދެމަފިރިން މިމަސައްކަތް ކުރަނީ ވަރަށް ޝައުގުވެރިކަމާއެކުގައެވެ.
" މިއީ އާމްދަނީ ހޯދަންވެސް ރަނގަޅު މަސައްކަތެއް. އެކަމަކު އަޅުގަނޑުމެން ކުރަނީ ވަރަށް ތަފާތުކޮށް. އާންމުކޮށް ޕާޓީ ޑެކަރޭޝަންއަށް ބޮޑު އަގެއް ކިޔާ. މިއީ ވަރަށް ބުރަ މަސައްކަތެއް. ވަރަށް ވަގުތު ހޭދަވޭ. އަޅުގަނޑުމެން ބޭނުންވަނީ ކައިވެނި ޕާޓީ އާދައިގެ ގޮތަކަށް ބާއްވާ މީހުންނަށްވެސް ފަސޭހައިން ދެއްކޭނެ އަގެއްގައި ޑެކަރޭޓްކުރަން. ގިނަ މީހުން އަހާނެ ޕޭޖަށް މެސެޖުކޮށްފަ ކޮބައިތޯ ޕެކޭޖްތަކަކީ. އަޅުގަނޑުމެން ބުނަނީ އެމީހުން ބޭނުންވާގޮތަށް ކަސްޓަމައިޒް ކޮށްފަ ޕެކޭޖްތަކެކޭ ދެނީ އެމީހުންގެ ބަޖެޓަށް ފިޓްކޮށްފައި".
ފިއޯނާގެ ދެމަފިރިންގެ ޚާއްސަ ކަމަކީ ކަސްޓަމަރުން ބޭނުންވާ ގޮތަށް ހެޔޮއަގެއްގައި ހިތްހަމަޖެހޭ ރީތި ޑެކަރޭޝަންތަކެއް ފޯރުކޮށްދިނުމެވެ.
" ވަރަށްގިނަ މީހުން ބަލައިގަނޭ. އެންމެންނަށް އެހާބޮޑު ހޭދައެއް ނުކުރެވިދާނެ. ވިޔަފާރިއަކަށްވުރެ ބޮޑަށް ދެމީހުން ވަރަށް ކުރާހިތުން އެހެން މީހުންނަށް ކަމެއް ކޮށްދިނުމުގެ ބޭނުމުގައި ކުރާ މަސައްކަތެއް މިއީ".
ފިއޯނާ މިމަސައްކަތް ކުރަނީ އެއާލައިން އިންޑަސްޓްރީގައި ވަޒީފާ އަދާކުރަމުންނެވެ. އަދި ފިރިމީހާއަކީވެސް ދޫނި ވިއްކުމުގެ ވިޔަފާރި ކުރަމުން އަންނަ މީހެކެވެ. ކޭކު އެޅުމުގެ ވިޔަފާރިވެސް ކުރިން ކުރިއަށްގެންދިޔަ ފިއޯނާމެން ޕާޓީ ޑެކަރޭޝަންގެ ވިޔަފާރި މިވަނީ މުޅި ރާއްޖެއަށް ފުޅާކޮށްފައެވެ.
" ވަރަށް ބޮޑު ޕާޓީ ޑެކަރޭޝަނެއްވެއްޖިއްޔާ ގޭގައި މަސައްކަތް ފަށަން ހަފްތާއެއް ކުރިން. ފުލްޓައިމް 2 މުވައްޒަފުންނާއި ޕާޓްޓައިމް 3 މުވައްޒަފުން އެބައުޅޭ މިމަސައްކަތުގައި އެހީތެރިވެދިނުމަށް. އެހެންވެ ފިއު މިމަސައްކަތަށް ހޭދަކުރާ ވަގުތު ކުރިއަށްވުރެ ކުޑަތަންކޮޅެއް މަދުކޮށްގެން މިއުޅެނީ. އެކަމަކު ދެމަފިރިން އުފަލާއެކު ކުރާ މަސައްކަތެއް މިއީ".
މި ދެމަފިރިން ކޮންމެ އިވެންޓެއްވެސް ކުރިއަށްގެންދަނީ އަމިއްލަ އިވެންޓެއްގެ ގޮތުގައި ދެކިގެންނެވެ. އެންމެ އިސްކަމެއް ދެނީ އިވެންޓް އެންމެ ފުރިހަމަ ކުރުމަށެވެ.
" އަޅުގަނޑުމެން ހުރިހާ ވަގުތެއް ހުސްކުރަނީ ކޮންމެ އިވެންޓެއްވެސް ކަސްޓަމަރުން ބޭނުންވާ ފެންވަރަށް އެންމެ ފުރިހަމައަށް ޑެކަރޭޓް ކުރުމަށް. މިއީ ވަރަށް ޝައުގުވެރިކަމާއެކު ކުރާހިތުން ކުރާ މަސައްކަތެއް. މިމަސައްކަތް އިތުރަށް ފުޅާކުރުމަށް އަޅުގަނޑުމެން ވިސްނަނީ ޕާޓީ ތަކެތި ކުއްޔަށް ދޫކުރާނެ ފިހާރައެއް ހުޅުވަން. އެއީ މިފަދަ ތަކެތި މާލެއިން ހޯދުމަކީ އެހާފަސޭހަ ކަމަކަށް ނުވާތީ. އަޅުގަނޑުމެން ވެސް ބޭނުންވާތަކެތި ގެންނަނީ ޗައިނާއިން".
"ގްލޯރިއަސް ޑޭ ބައި އެފް އެންޑް އެފް" އިން ބުކިންގ ހައްދާނަމަ ޕޭޖަށް މެސެޖު ކުރެވިދާނެ އެވެ. ނޫނީ ނަންބަރަށް މެސެޖު ކުރެވިދާނެއެވެ. ދެމަފިރިންގެ ބުރަ މަސައްކަތް ވަރަށް ފުރިހަމައެވެ. އެދެނީ އިތުރަށް ކާމިޔާބީ ލިބުމެވެ.
