އަމީނާގެ ހިތް ބާރަށް ތެޅެމުންދިޔައެވެ. ނިދަން ބޭނުންވިއަސް އޭނާއަށް ހަމަ ނިންޖެއް ނުލިބުނެވެ. އަނެއްކާވެސް އެ ޖިންނިއާ ބައްދަލުވާނެތީ އަމީނާ ކެތްމަދުވެފައި އޮތެވެ.
ޖެހިގެން އައިރޭ ވަގުތު ޖެހުމުން، އަމީނާ ތައްޔާރުވިއެވެ. ހިތަށް ބިރުވެރިކަމެއް ވެރިވެފައި ހުރި ނަމަވެސް، ދޮންއާދަނުގެ މައްސަލަ ހައްލުކުރުމުގެ އަޒުމު އަމީނާގެ ހިތުގައި އޮތެވެ. އެއްވެސް އަޑެއް ނީވުނަސް، ޖިންނި އަމީނާއާ އެކުގައި ވާކަން އޭނާއަށް އިޙްސާސް ކުރެވުނެވެ.
ދޮންއާދަނުގެ ގެއާ ދިމާއަށް އަމީނާ ހިނގައިގަތީ ވަރަށް ސިއްރުންނެވެ. މަގުތައް ވަރަށް އަނދިރިއެވެ. ވަރަށް މަދު އަލިކަމެއް ފިޔަވައި އެއްވެސް ދިމާއަކުން އަލިކަމެއް ނުފެނެއެވެ. ގަސްގަހާގެހިތަކުގެ ހިޔަނިތައް ހިމޭން ރޭގަނޑުގައި ބިރުވެރި މޫނުތަކެއްހެން ފެންނަމުންދިޔައެވެ. ވައިރޯޅި ޖެހޭ ކޮންމެ ފަހަރަކު ފިނިކަމެއް އޭނާގެ ހަށިގަނޑަށް ފެތުރިގެން ދެއެވެ.
ދޮންއާދަނުގެ ގެއާ ހަމަޔަށް އައިސް އަމީނާ ހުއްޓުނެވެ. ބޮޑެތި ގަސްތަކުން ވަށައިލެވިފައިވާ އެގޭގެ ބޭރު ފެންނަނީ ވެސް ހާދަ ބިރުވެރިކޮށެވެ. މީގެކުރިން އޭނާ އެތަނަށް ގިނަ ފަހަރު ގޮސްފައިވީ ނަމަވެސް، މިރޭ ފެންނަނީ މުޅިން ތަފާތު މަންޒަރެކެވެ. ދޮރުތަކާއި ދޮރުފޮތިތައް ބަންދުކޮށްފައިވެއެވެ.
ކުއްލިއަކަށް ގޭގެ ބިތްދޮށުން ފަނޑު އަލިކަމެއް ފެނިލިއެވެ. އެއީ ޖިންނި ދައްކައިދިން މަގުކަން އަމީނާއަށް އެނގުނެވެ. އަމީނާ ބިރުން ހުރެ ހިނގައިގަތީ އެ އަލިކަން ހުރި ދިމާއަށެވެ. އެތަނުން ފެނުނީ ހުޅުވިފައިވާ ކުޑަ ދޮރެކެވެ. ޖިންނި ވަޢުދުވީ ފަދައިން މަގުދައްކައިދިނީއެވެ.
ބިރުން ހުރެ އަމީނާ އެކުޑަދޮރުން އެތެރެއަށް ވަނެވެ. ގޭތެރެއަށް ވަނުމާއެކު، ހީވީ ވަރަށް ބޮޑު މަހާނަތަކެއް ހުރި ތަނަކަށް ވަދެވުނު ހެނެވެ. ކުނި ވަސް ފެތުރިފައިވެއެވެ. ކުޑަ ކުޑަ އަލިކަމެއް ނޫނިއްޔާ، އެތަނުގައި ހުރި އެއްވެސް އެއްޗެއް އޭނާއަށް ފާހަގައެއް ނުކުރެވުނެވެ. ޖިންނި އަބަދުވެސް އޭނާއާ އެކުގައިވާކަން އޭނާގެ ހިތް ބުނަމުންދިޔައެވެ.
އަމީނާ ހިނގައިގަތީ ދޮންއާދަނުގެ ކޮޓަރިއާ ދިމާއަށެވެ. ވަކި ހިސާބަކުން އަމީނާ އާއި އަޝްރަފްވެސް ބައިވެރިވިއެވެ. ކޮޓަރިއަށް ވަދެ އޭނާގެ ނޯޓުފޮތްތަކާއި ލިޔެކިޔުންތައް ހޯދަން ފެށިއެވެ. ކޮންމެ އެއްޗެއް ބަލައިލާ ކޮންމެ ފަހަރަކު އޭނާގެ ހިތް ބާރަށް ތެޅެމުންދިޔައެވެ. ކަބަޑެއްގެ ތެރެއިން އޭނާއަށް ފެނުނީ ވަރަށް ގިނަ ނޯޓުފޮތްތަކާއި ލިޔުންތަކެކެވެ. އޭގެ ތެރެއިން އެއް ނޯޓުފޮތެއް ހުޅުވާލުމާއެކު އޭނާގެ ހަށިގަނޑު ހީބިހި ނަގައިގެންދިޔައެވެ. އެ ފޮތުގައި ކުރެހިފައި ހުރީ އެއްވެސް މީހަކަށް ދެނެގަންނަން ނޭނގޭ ފަދަ ބިރުވެރި ރަމްޒުތަކެކެވެ.
"އެމީހުން ދުވަހަކުވެސް ނުދާނެ. އަހަރެންނަށް މިތަނުން ސަލާމަތް ނުވެވޭނެ" އަދި އޭގެ ތިރީގައި ކުޑަކޮށް ލިޔެފައިވެއެވެ.
އަމީނާގެ ދެލޯ ބޮޑުވެގެން ދިޔައެވެ. ދޮންއާދަނު މިވާހަކަތައް ލިޔެފައިވަނީ ކޮން ބަޔަކާ ދޭތެރޭގައިބާވައެވެ؟ އެއީ އިންސާނުން ނޫންކަން އޭނާއަށް އިޙްސާސް ކުރެވުނެވެ. މިއީ ޖިންނީންނާ ގުޅުންހުރި ކަމެއްބާވައެވެ؟ އޭނާގެ ބިރުވެރިކަން އިތުރުވިއެވެ. ނަމަވެސް، ހަގީގަތް ހޯދުމުގެ އަޒުމުގާ އޭނާގެ ހިތްވަރުކޮށް ކުރިއަށް ދިޔައެވެ. އޭނާ ނޯޓުފޮތް ނަގައިގެން އަވަހަށް އެތަނުން ނިކުތެވެ. ދިރިއުޅުމުގެ އެންމެ ބިރުވެރި ދަތުރުގެ ފެށުން މިއީ ކަމުގައި އޭނާ ހިތަށް އެރިއެވެ.
އަމީނާ ނޯޓުފޮތް ހިފައިގެން އަވަހަށް އެތަނުން ނިކުތީ ބިރުން ހުރެއެވެ. އޭނާގެ ހިތް ބާރަށް ތެޅެމުންދިޔަ ނަމަވެސް، ޖިންނީގެ އެހީތެރިކަން ލިބޭކަން ހަނދާންކޮށްލުމުން ހިތްވަރެއް ލިބުނެވެ. ގޭގެ ކުޑަދޮރުން ސިއްރުން މަގުމައްޗަށް ނިކުމެ އަވަހަށް ގޭދޮށަށް ހިނގައިގަތީ އަޝްރަފާ އެކުގައެވެ. ކޮންމެ އަޑެއް އިވޭ ކޮންމެ ފަހަރަކު ފަހަތް ބަލާލެވެއެވެ.
ގެއަށް އައިސް ވަނުމާއެކު އޭނާ ކޮޓަރިއަށް ވަދެ، ދޮންއާދަނުގެ ނޯޓުފޮތް މޭޒުމަތީގައި ބާއްވާލިއެވެ. ވަރަށް ބޮޑު ވަރުބަލިކަމެއް އިހްސާސްވިއެވެ. ނަމަވެސް ނިދާކަށް ނުކެރުނެވެ. ނޯޓުފޮތުގައި ހުރި ލިޔުންތައް އޭނާގެ ހިތާއި ސިކުނޑިއަށް ވަދެފައި ހުރީއެވެ. "އެމީހުން ދުވަހަކުވެސް ނުދާނެ. އަހަރެންނަށް މިތަނުން ސަލާމަތް ނުވެވޭނެ" މިލިޔުން ކިޔާ ކޮންމެ ފަހަރަކު ދޮންއާދަނުގެ ހާލަތާ މެދު އޭނާ ވިސްނަން ފެށިއެވެ.
ފަތިސް ވެލީއިރުވެސް އަމީނާ އޮތީ ނުނިދައެވެ. މޭޒުމަތީގައި އޮތް ނޯޓުފޮތަށް ބަލަހައްޓައިގެންނެވެ. ހެނދުނުގެ އަލިކަން ކޮޓަރިއަށް ވަނުމާއެކު، އޭނާ އަނެއްކާވެސް ނޯޓުފޮތް ހުޅުވާލިއެވެ. ކުރެހުންތަކާއި ލިޔުންތައް ދެނެގަނެވޭތޯ އޭނާ މަސައްކަތްކުރިއެވެ. ނަމަވެސް އޭނާއަށް އެއްވެސް އެއްޗެއް ދެނެގަންނަން ނޭނގުނެވެ. އަދި އެތަކެއްޗަކީ އާދައިގެ ކުރެހުންތަކެއް ނޫންކަން އޭނާއަށް ވަގުތުން އެނގުނެވެ.
" ހިތްވަރު ކުރޭ. މިހާރު ހަޤީޤަތާ ކައިރިވެއްޖެ" ކުއްލިއަކަށް ކޮޓަރީގެ ތެރެއަށް ފިނިކަމެއް ވަންކަމުގެ އިހުސާސްއެއްވިއެވެ. އަދި އޭނާގެ ކަންފަތުގައި އެ ޖިންނީގެ އަޑު ގުގުމާލިއެވެ.
"އެއީ ކޮން އެއްޗެއް؟ މާނައަކީ ކޮބައިތަ؟" އަމީނާ ސިހިގެންގޮސް އެނދުން ތެދުވެ ނޯޓުފޮތަށް އިޝާރާތް ކުރަމުން އަވަސް އަވަހަށް ސުވާލުކުރިއެވެ.
"މިއީ ވަރަށް ދުވަސްވީ، ވަރަށް ނުރައްކާތެރި ލިޔުންތަކެއް. މިއީ ޖިންނީންގެ ދުނިޔެއާ ގުޅުންހުރި ބާރުތަކެއް ބަންދުކުރަން ނުވަތަ އެބާރުތަކަށް ގޮވާލަން ބޭނުންކުރާ ލިޔުންތަކެއް. ދޮންއާދަނު މި ލިޔުންތައް ބޭނުންކުރީ ކޮންމެވެސް އެއްޗަކަށް ގޮވާލަން ނުވަތަ ކޮންމެވެސް އެއްޗެއްގެ ބާރުގެ ދަށުގައި ހުރެގެން ކަމަށް ބެލެވެނީ" ޖިންނި ލަސްލަހުން ވާހަކަ ދެއްކިއެވެ.
"ދޮންއާދަނު މަސައްކަތްކުރީ ކޮންމެވެސް ސިއްރެއް ހޯދަން ކަމަށް ބެލެވެނީ. އެކަމަކު އޭނާ ނޭނގި ހުރެ ވަރަށް ނުރައްކާތެރި ކަމެއްގެ ތެރެއަށް ވަދެފައި ހުރީ. އެ ލިޔުންތަކުގެ ތެރޭގައި އެކަން ބަޔާންކުރެވިފައި އެބަހުރި. އެމީހުން ދުވަހަކުވެސް ނުދާނެ. އަހަރެންނަށް މިތަނުން ސަލާމަތް ނުވެވޭނެ. މިލިޔުމުން އެނގޭ ގޮތުގައި އޭނާ ވަނީ މި ބާރުތަކުގެ ތެރޭގައި ބަންދުވެފައި. އެއީ ރޫހާނީ ގޮތުން ބަންދުވުމެއް" ޖިންނި ވިސްނައިދިނެވެ.
އަމީނާގެ ދުލުން ބަހެއް ނުނިކުތެވެ. އޭނާ ހުރީ ޝޮކެއްގައެވެ.
އަމީނާ ފުން ނޭވައެއް ލަމުން، ނޯޓުފޮތުގައި ހުރި ލިޔުންތަކުގެ ފަހަތުގައި އޮތް ސިއްރު ހޯދުމަށްޓަކައި އަމީނާ ފުން ނޭވައެއް ލަމުން، ނޯޓުފޮތުގައި އޮތް ލިޔުންތައް ބަލަމުން ދިޔައެވެ. ފޮތުގެ ކޮންމެ ސަފުހާއެއް ވަރަށް ސަމާލުކަމާއެކު ބަލަމުން ދިޔައެވެ. ކުރިން އޭނާއަށް ނުފެނުނު ކަންތައްތަކެއް ހުރެދާނެތީ އޭނާ ހުރީ ވަރަށް ސަމާލުވެފައެވެ. ވަގުތު ފާއިތުވަމުން ދިޔައިރުވެސް އޭނާއަށް އެއްވެސް އިތުރު މަޢުލޫމާތެއް ނުފެނުނެވެ. ނަމަވެސް އޭނާ ހިތްވަރު ދޫކޮށްނުލިއެވެ. ޖިންނި ބުނެފައިވާ ފަދައިން، ކޮންމެވެސް ސިއްރެއް އެ ފޮތުގައި އެބަ އޮތެވެ.
އަމީނާގެ ލޮލުގައި އެއް ސަފުހާއެއް އަޅައިގަތެވެ. އެއީ ކުރިންވެސް އޭނާ ބަލާފައިވާ ސަފުހާއެކެވެ. ނަމަވެސް، މިފަހަރު އޭނާއަށް އިޙްސާސްވީ އެސަފުހާގެ ކައިރިފަށުގެ ބޯކަމެވެ. އެތަނުގައި ފޮރުވާފައިވާ އެއްޗެއް ހުރިކަން އޭނާއަށް ޔަޤީންވިއެވެ. އަތުން ފިއްތާލިއިރު، އެތެރޭގައި ހަރު އެއްޗެއް ހުރިކަން އިޙްސާސްވިއެވެ. އޭނާ މަޑުމަޑުން އެ ސަފުހާގެ ކައިރިފަށުން ކަފަން ފެށިއެވެ. އަތުގައި އޮތް ކުޑަ ވަޅިއެއް ބޭނުންކޮށްގެން އޭނާ މަޑުމަޑުން އެސަފުހާގެ ދެމެދު ވަކިކޮށްލިއެވެ.
އެތެރެއިން ފެނުނީ ވަރަށް ކުޑަކުޑަ ކަރުދާސްކޮޅެކެވެ. އެ ކަރުދާސްކޮޅު ނެގުމާއެކު އޭނާގެ ހިތް ބާރަށް ތެޅިގަތެވެ. އެ ކަރުދާސްކޮޅުގައި ލިޔެފައި ހުރީ އެއްވެސް މީހަކަށް ނުވިސްނޭނެ ފަދަ އަކުރުތަކެކެވެ. ނަމަވެސް، އޭގެ ތެރެއިން އެއް އަކުރު އަމީނާއަށް ވަރަށް ބޮޑަށް ފާހަގަވިއެވެ.
ޖެހިގެން އައިރޭވެސް އަމީނާ ދިޔައީ ދޮންއާދަނުގެ ގެއަށެވެ. މިފަހަރު އަމީނާ އެކަންޏެވެ. އެއީ އިރުއޮއްސެން ގާތްވަމުން ދިޔަ ވަގުތެވެ. އަމީނާ މަޑުމަޑުން ގޮސް ގޯތިތެރެއަށް ވަނެވެ. އަމީނާ ހިނގަމުން ދިޔައީ ވަށައިގެން ބަލަމުންނެވެ. ކުއްލިއަކަށް ލޮލުގައި އަޅައިގަތީ ބޮޑު ވަޅެކެވެ. ދޮންއާދަނުގެ ގޭގެ ބޮޑު ގޯތިތެރޭގައި ހުރި ވަޅަކީ އެތަނުގެ އެންމެ ފިނި، އަނދިރި ދިމާލެވެ.
ގޯތިތެރޭގައި ހުރި ވަޅުގަނޑާ ދިމާއަށް އަމީނާ ހިނގައިގަތީ ވަރަށް މަޑުމަޑުންނެވެ. އެ ވަޅުގަނޑު ހުރީ ބޮޑެތި ގަސްތަކުން ވަށާލާފައެވެ. އެތަނަށް ދިޔަ ވަރަކަށް ފިނިކަން އިތުރުވަމުން ދިޔައެވެ. އަދި އާދަޔާޚިލާފު ވަސްތަކެއް ނިކުމެމުންދިޔަ ކަހަލައެވެ. އެއީ މަރުގެ ވަހާއި، ގަދީމީ ބާރުތަކުގެ ވަސްކަމަށް އޭނާގެ ހިތް ބުނަމުންދިޔައެވެ. ވަޅުގަނޑުގެ ކައިރިއަށް އައިސް ހުއްޓުނުއިރު އެތަނުން އަނދިރިކަމެއް ފިނިކަމަކާއެކު ނިކުމެމުންދިޔަ ކަހަލައެވެ. އަމީނާގެ ހިތް ބާރަށް ތެޅެން ފެށިއެވެ. އޭނާގެ ހަށިގަނޑު ބިރުން ގޮސް ހީކަރުވާލިއެވެ.
އަމީނާ ވަޅުގަނޑުގެ ތެރެއަށް ބެލިއެވެ. ފުން އަނދިރި ތަނެކެވެ. އެއްވެސް އަލިކަމެއް ނެތެވެ. އަދި އޭގެ އެންމެ ފުނެއް އޭނާގެ ލޮލަކަށް ނުފެނުނެވެ. ނަމަވެސް ކުއްލިއަކަށް ވަޅުގަނޑުގެ އެއްފަރާތުގައި ފާރުގައި ހުރި ތަނެއް އޭނާއަށް ފާހަގަވިއެވެ. އެއީ ވަރަށް ކުޑަ ދޮރެއްހެން ހީވާ ތަނެކެވެ. އޭނާ އަތްލިއެވެ. އެތަނުގައި ހުރީ ދޮންއާދަނުގެ ނޯޓުފޮތުގައި ކުރަހައިފައި ހުރި ބިރުވެރި މަންޒަރުތަކުން ފުރިފައިވާ ކަޅު ކުލައިގެ ފޮތިގަނޑެކެވެ. އެ ފޮތިގަނޑުގައި އަތްލުމާއެކު އޭނާގެ ހަށިގަނޑަށް ކަރަންޓް ޖެހުނު ކަހަލައެވެ.
"ދޮންއާދަނު މިފޮތިގަނޑު ބޭނުންކުރީ އެބާރުތަކުން ސަލާމަތްވުމަށް. ނަމަވެސް އެކަން ކާމިޔާބެއް ނުވި. މި ފޮތިގަނޑު ހިފައިގެން އަވަހަށް މިތަނުން ދާންވީ" އޭނާގެ ކަންފަތުގައި ޖިންނީގެ ހިމޭން އަޑު ގުގުމާލިއެވެ."
އަމީނާ ފޮތިގަނޑު ހިފައިގެން ވަޅުގަނޑުގެ ކައިރިން ދުރަށް ޖެހުނެވެ. އޭނާގެ ހިތުގައި ބިރު އޮތް ނަމަވެސް، މި ފޮތިގަނޑަކީ ދޮންއާދަނުގެ މަރުގެ ސިއްރު ހޯދުމަށް ލިބުނު އިތުރު ހެއްކެއްކަން އޭނާއަށް އެނގުނެވެ. މިހާރު ހަގީގަތް އިތުރަށް ސާފުވަމުންދާ ކަހަލައެވެ. މި ދަތުރުގެ ދެވަނަ މަރުހަލާ މިއީ ކަމުގައި އޭނާ ހިތަށް އެރިއެވެ. އަމީނާ އަވަހަށް ގޯތިތެރެއިން ނިކުމެ، ގެއާ ދިމާއަށް ހިނގައިގަތީ ބިރުވެރިކަމާއެކު އުއްމީދެއް އޮތް ހިތަކާއެކުގައެވެ.
ގެއަށް އައިސް ވަނުމާއެކު އަމީނާ އަވަހަށް ކޮޓަރިއަށް ވަދެ، ވަޅުގަނޑުން ނެގި ކަޅު ފޮތިގަނޑު މޭޒުމަތީގައި ބާއްވާލިއެވެ. ވަރަށް ބޮޑު ވަރުބަލިކަމެއް އިހްސާސްވިއެވެ. ނަމަވެސް ނިދާކަށް ނުކެރުނެވެ. އެ ފޮތިގަނޑުން ނިކުންނަ ފިނިކަމާއި، އޭގައި ހުރި ބިރުވެރި ކުރެހުންތަކަށް އޭނާ ބަލަހައްޓައިގެން ހުރީއެވެ. ދޮންއާދަނުގެ ނޯޓުފޮތުގައި ހުރި ކުރެހުންތަކަށްވުރެ މިއީ މާ ގަދަ، މާ ނުރައްކާތެރި އެއްޗެއްކަން އަމީނާއަށް ވަގުތުން އިހްސާސްވިއެވެ. ކޮންމެ ކުރެހުމަކުންވެސް ނުފެންނަ ބާރެއް ނިކުމެމުންދާހެން އަމީނާއަށް ހީވިއެވެ.
= ނުނިމޭ =
