މުޙައްރަމް މަހުގެ ދިހަވަނަ ދުވަހަކީ ނުވަތަ ޢާޝޫރާ ދުވަހަކީ ހެޔޮކަމާއި ޒިކުރާތަކާއި ފިލާވަޅުތަކުން ފުރިގެންވާ ދުވަހެކެވެ. ޢާޝޫރާ ދުވަހަކީ ފިރުޢައުނުގެ ކިބައިން މޫސާގެފާނު ސަލާމަތްކުރައްވައި ފިރުޢައުނާއި އޭނާގެ ލަޝްކަރު މާތްﷲ ޢަރަޤު ކުރެއްވި ދުވަހެވެ. ބަނީ އިސްރާއީލު ބާގައިގެ މީހުން ސިއްރިޔާތުގައި މިސްރުން ނުކުތުމުން ފިރުޢައުނު އޭނާގެ ލަޝްކަރީން އެއްކޮށް މޫސާގެފާނާއި އެކަލޭގެފާނުގެ ޤައުމު މުޅިން ނައްތާލުމަށްޓަކައި ނުކުތެވެ. މޫސާގެފާނުގެ ޤައުމުގެ މީހުންނަށް ފިރުޢައުނުގެ ބިޔަ ލަޝްކަރު ފެނުމުން އެބައިމީހުން މޫސާގެފާނަށް ދެންނެވިއެވެ.
މާނައީ: "ހަމަކަށަވަރުން އެއުރެން ތިމަންމެން އަތުލައިގަންނާނެތެވެ". އެހިނދު ވަރަށް އިތުބާރާއި ޔަޤީންކަމާއި އެކު މޫސާގެފާނު ވިދާޅުވިއެވެ. މާނައީ "ހަމަހިލާ އެހެންނަކުން ނުވާނެއެވެ. ހަމަކަށަވަރުން ތިމަންގެ ވެރިރަސްކަލާނގެ ތިމަންނައާއެކު ވޮޑިގެންވެއެވެ. އެކަލާނގެ ތިމަންނާއަށް މަގުދައްކަވާނެތެވެ".
ފިރުޢައުނުގެ ލަޝްކަރު ބަނީ އިސްރާއީލު ބާގައިގެ މީހުންނާއި ވަރަށް ކައިރިވުމުން މާތް ﷲ މޫސާގެފާނަށް އެކަލޭގެފާނުގެ އަސާކޮޅުން ކަނޑުގައި ޖެއްސެވުމަށް ވަހީކުރެއްވިއެވެ. އެހިނދު އެކަލޭގެފާނުގެ އަސާކޮޅުން ކަނޑުގައި ޖެއްސެވުމުން ކަނޑުގެ މެދުން މަގުތަކެއް އުފެދުނެވެ.
މާތްﷲ ވަހީކުރައްވައިފައިވެއެވެ. މާނައީ: "ދެން އެކަނޑު އިރައިގެން ހިނގައްޖެއެވެ. އެއިން ކޮންމެ ބައެއް ބޮޑު ފަރުބަދައެއް ފަދައިން ވިއެވެ.". މާތް ﷲ ކަނޑު ހިއްކަވައިދެއްވުމުން ބަނީއިސްރާއީލު ބާގައިގެ ބާރަ ޤަބީލާގެ މީހުން އެއިން ކޮންމެ ބަޔަކަށް ޚާއްސަކުރެވިގެންވާ މަގުން ކަނޑު ހުރަސްކޮށް ދިޔައެވެ. ފިރުޢައުނާއި އޭނާގެ ލަޝްކަރު ބަނީ އިސްރާއީލު ބާގައިގެ މީހުންގެ ފަހަތުން ދިޔައެވެ. ނަމަވެސް އެމަގުތަކަށް ފިރުޢައުނުގެ ލަޝްކަރު ވަދެ ނިމުމުން އެ ކަނޑު ކުރީން އޮތް ގޮތަށް މާތް ﷲ ބަދަލުކުރެއްވިއެވެ.
މާތްﷲ ވަހީކުރައްވައިފައިވެއެވެ. މާނައީ: "ތިމަން ރަސްކަލާނގެ އަނެއްބައިމީހުން (ފިރުޢައުނާއި އޭނާގެ ޤައުމުގެ މީހުން) އެތަނަށް ކައިރި ކުރެއްވީމެވެ. އަދި ތިމަންރަސްކަލާނގެ މޫސާގެފާނާއި އެކަލޭގެފާނުގެ އަރިހުގައިވާ މީހުންގެ އެންމެން ސަލާމަތްކުރެއްވީމެވެ. ދެން ތިމަންރަސްކަލާނގެ އެހެންމީހުން (އެބަހީ ކާފިރުން) ޣަރަޤު ކުރެއްވީމެވެ.
މިފަދަ ހާދިސާތަކުގައި ގިނަގުނަ ޢިބުރަތްތަކާއި ދަރުސްތައް ވެއެވެ. މީގެ އެންމެ މުހިންމު ފިލާވަޅަކީ ﷲ ސުބުހާނަހޫ ވަތަޢާލާ އެކަލާނގެ ނަބިއްޔުންނާއި އެކަލާނގެއަށް އީމާންވާ މީސްތަކުން ބޮޑެތި މުސީބާތްތަކުން ސަލާމަތްކުރައްވާ ގޮތް އެނގި އީމާންކަން ހަރުދަނާކުރުމަށް މަސައްކަތްކުރުމުގެ ފިލާވަޅެވެ.
ފިރުޢައުނު ޣަރަޤު ކުރެއްވި ހާދިސާއިން އެނގެނީ މާތް ﷲ އަށް ކާފިރުވެ ދުނިޔެ ފަސާދަކުރަން އުޅޭ މީހުންނަށް ގަދަފަދަ ޢަޒާބުން ޢަޒާބުދެއްވައި ނެތިކުރައްވާނެކަމެވެ. އެމީހުންނަށް އެކަމުގައި ކާމިޔާބެއް ނުލިބޭނޭކަމެވެ. އަދި އަހަރެމެން ފަސާދަޔާ ދެކޮޅަށް ތެދުވާންޖެހޭނޭ ކަމެވެ. ހަމައެހެންމެ މާތްﷲ އަށް އީމާންވާ މީހުންނަށް ދުނިޔޭގައިވެސް ޢިއްޒަތާއި ޝަރަފާއި ޤަދަރު ދެއްވާނޭކަމެވެ.
