މިއީ ބ. ކެންދޫ އަށް 'ޒީޓައިމްސް' އިން ކުރި ދަތުރުގައި ނަގާފައިވާ ވީޑިއޯ އިންޓަވިއުއެކެވެ. އެ ރަށު ފާޠިމަތު ޢަބްދުލްޤައްޔޫމް އާއި ޢުމައިރު މުސްޠަފާ އަށް ލިބުނު 3 ކުދިންގެ ތެރެއިން ދޮށީދަރިފުޅާއި ހަގު ދަރިފުޅަކީ ޚާއްސަ އެހީއަށް ބޭނުންވާ 2 ކުދިންނެވެ. ދޮށީ ދަރިފުޅު ޔޫސުފް ޔަޝްޢަލް ބިން ޢުމައިރު އަށް 12 އަހަރު ވީއިރުވެސް ލޮލަށް ފެންނަކަމެއް ޔަގީނެއް ނޫނެވެ. އަދި ވާހަކަ ނުދެއްކި ނުތެދުވެވި، ނުހިނގޭއިރު އަމިއްލައަށް އެއްވެސް ކަމެއް ނުކުރެވެއެވެ. ކުޑަދަރިފުޅު ޔޫން ޢުމައިރު މުސްޠަފާ އަށް 1 އަހަރުވީއިރު އެދަރިފުޅަކީވެސް ބަލިކުއްޖެކެވެ. ކުޑަދަރިފުޅުގެ ބޮލުގެ އޮޕަރޭޝަން އަށް ރާއްޖެއިން ބޭރަށް ދިއުމަށް މި އާއިލާއަށް އެހީތެރިކަން ބޭނުންވެއެވެ.
ނޯޓް: މިއީ ޒީޓައިމްސް އިން އެހީ ފޯރުކޮށްދޭ 42 ވަނަ އާއިލާއެވެ. އިންސާނިއްޔަތަށްޓަކައި ކުރާ މިމަސައްކަތުގައި ކިޔުންތެރިން ދެއްވާ އެއްބާރުލުމަށް ޝުކުރު އަދާކުރަމެވެ. މިގޮތަށް ލިބޭ އެހީ ޖަމާވާނީ ބަލިމީހާގެ އެކައުންޓަށެވެ. މި ޢާއިލާ އަށް އެހީ ލިބިފައިވާތީ، މިލިޔުމުގައި ކުރިން ހިމަނަައިފައިވާ ފޯން ނަންބަރާއި އެކައުންޓު ނަންބަރު ވާނީ އުނިކޮށްފައެވެ. އެހީ ފޯރުކޮށްދިން ފަރާތްތަކަށް އާއިލާއިން ވަނީ ޝުކުރު އަދާކޮށްފައެވެ.
