2008 ވަނަ އަހަރު ޙާމިދު ރަޝީދު އާއި ޝަހީމާ ނަޢީމް ޒަވާޖީ ހަޔާތެއް ފެށީ ވަރަށް ލޯބިން ދިރިއުޅުމަށެވެ. އެ ދެމަފިރިން ދެކެމުން އައި ހުވަފެނުގައި ހަގީގީ ކުލަ ޖެހި ފުރަތަމަ ދަރިފުޅު ލިބުނީ 2010 ވަނަ އަހަރުގަ އެވެ. އެ ލޯބި އަންހެން ދަރިފުޅާއެކު އާއިލާއަށް ލިބުނީ ބަޔާންކުރަން ދަތި އުފާވެރިކަމެކެވެ. މި އުފާވެރި ދުވަސްތައް ގުނަމުންދާތާ 3 ވަނަ އަހަރު މި އާއިލާ އަށް ލިބުނީ އިތުރު މެންބަރަކު ލިބެން އުޅޭ ކަމުގެ އުފާވެރި ޚަބަރެވެ.
ފުރަތަމަ ދަރިފުޅަކީ އަންހެން ކުއްޖަަކަށްވާއިރު ދެވަނަ ދަރިފުޅަކީ ފިރިހެން ކުއްޖެއްކަން އެނގުމުން ލިބުނު އުފާވެރިކަން ވަކިން ބޮޑެވެ. ދުވަސްތައް ހޭދަވެ ވިހާ ދުވަސް ކައިރިވިއިރުވެސް ލިބެން އުޅޭ ދަރިފުޅުގެ ހާލަތެއް ނޭނގެއެވެ. ދަރިފުޅު އުފަންވުމާއެކު އާއިލާއަށް ކުރެވުނީ ބަޔާންކުރަން ދަތި އިހުސާސްތަކެކެވެ. އެ ދަރިފުޅު ފެނުނު ކޮންމެ މީހަކު ވެސް ހިތަށް ފުން އަސަރުތަކެއް ކުރާނެއެވެ. ތުއްތު ދަރިފުޅުގެ ބޯ އާދަޔާޚިލާފަށް ބޮޑުވެފަ ހުރިއިރު، ލޯ ހުރީ ހުންނަންޖެހޭ ވަރަށްވުރެ ބޭރަށް ނުކުމެފައެވެ. މޫނުގެ ކަށިތައް އެތެރެއަށް ވަދެފަކަހަލަ ގޮތަކަށް ހުރިއިރު އަތާއި ފައިގެ އިނގިލިތައް ހުރީ ތައްލަވާފައެވެ.
އާއިލާއަށް ލިބުނު ހިތްދަތިކަމާއެކު ވެސް ފެނުނީ ހިތްވަރާއެކު މި ތުއްތު ދަރިފުޅު (އާނިސް)ގެ ހައްގުގައި ދެވެން އޮތް އެންމެ ރަނގަޅު ފަރުވާ ދިނުމުގައި ދުވަސްތައް ހޭދަކުރަމުންދާތަނެވެ. އާނިސްގެ ކުޑައަށް ވެސް މި އާއިލާއަށް ވަނީ އިތުރު އަންހެން ދަރިއަކު ލިބިފައެވެ.
އާނިސް އުފަންވިތާ 9 އަހަރު ވީއިރު އިންޑިއާ އާއި ބެންކޮކުން ތަކުރާރުކޮށް ވަނީ ފަރުވާ ހޯދާފައެވެ. އާންމުންގެ އެހީތެރިކަމާއެކު މިހާތަނަށް 11 އޮޕަރޭޝަން ވަނީ ކޮށްފައެވެ. ކުރިއަށް އޮތީ ބޮޑު އޮޕަރޭޝަނެކެވެ. އާނިސް ވެސް ދަނީ ދިރިއުޅުމުގައި ދިމާވަމުންދާ ގޮންޖެހުންތަކާ ފުރިހަމައަށް ކުރިމަތިލަމުންނެވެ. އެއީ ހިތްވަރުގަދަ ކުއްޖެކެވެ. ބޭނުންވަނީ ތިޔަ ކިޔުންތެރިންގެ ދީލަތީ އެހީއެއް މި އާއިލާއަށް ފޯރުކޮށްދިނުމެވެ.
ނޯޓް: މިއީ ޒީޓައިމްސް އިން ގެނެސްދިން މިފަދަ އެހީގެ 21 ވަނަ ރިޕޯޓެވެ. އިންސާނިއްޔަތަށްޓަކައި ކުރާ މިމަސައްކަތުގައި ކިޔުންތެރިން ދެއްވާ އެއްބާރުލުމަށް ޝުކުރު އަދާކުރަމެވެ. މިގޮތަށް ލިބޭ އެހީ ޖަމާވާނީ ބަލިމީހާގެ އެކައުންޓަށެވެ. މި ޢާއިލާ އަށް އެކަށީގެންވާ މިންވަރަށް އެހީ ލިބިފައިވާތީ، މިރިޕޯޓުގައި ކުރިން ހިމަނަައިފައިވާ ފޯން ނަންބަރާއި އެކައުންޓު ނަންބަރު ވާނީ އުނިކޮށްފައެވެ. ޝުކުރިއްޔާ!
އިތުރު މައުލޫމާތު ވީޑިއޯ އިން ބައްލަވާލައްވާ:
