ސަމާސާ ވާހަކަތަކުގައި ދުވަމުން ދަނިކޮށް އަނބު ގަހެއް ކައިރީ ޒުވާން ތިން އަންހެން ކުދިން ތިއްބެވެ. ދިގު ދަނޑިއަކުން އަނބު ބިންނަމުން ވަށިގަނޑަކަށް އަޅަމުން ދިޔައެވެ. އެކުދިންގެ އުފާވެރިކަމާއި މިނިވަންކަން ރަށުގެ އުފާވެރި ދިރިއުޅުން ހާމަކޮށްދެއެވެ. ދޭތެރެ ދޭތެރެއިން ޖަހާލާ ހިނިގަނޑުގެ އަޑު އެމީހުންނާ ހަމައަށްވެސް ފޯރަން ފަށައިފިއެވެ. 

އަޔާނާއި އެއް ހަމައެއްގައި ދުވަމުންދިޔަ ޒަމީރުގެ ދުވެލި މަޑުވެއްޖެއެވެ. މި އުފާވެރި މަންޒަރުން ބަލަމުން އޭނާ މަޑުމަޑުން ދުވަމުން ދިޔައެވެ. އޭނާގެ މޫނު ވަގުތު ކޮޅަކަށްވެސް އެކުދިންނާ ދުރަކަށް ނުދެއެވެ. ކުއްލިއަކަށް މަގުގެ އަރިމަތީ އޮތް ގާގަނޑެއްގައި ޒަމީރު އަޅައިގަތެވެ. ނުވިސްނާ ހުރުމުން އޭނާ ވެއްޓި އަނގަވަތަށް ޖެހިއްޖެއެވެ. ފަހަތުން އެއްޗެއް ވެއްޓުނުއަޑަށް އަޔާން ފަހަތް ބަލާލިއެވެ. އޭރުވެސް ޒަމީރު ހުރީ އެކުދިންނަށް ބަލާށެވެ. އެކުދިން ޒަމީރު ވެއްޓުމުން ހެނީއެވެ.

"ތިހާވަރަށް ވެއްޓެންޏާ ގޮޅަ ރިހަ ކެވޭނީ ކިހިނެއް؟" އަޔާން ޒަމީރު އަތުގައި ހިފާ ނެގިއެވެ. 

Advertisement

މޫސުން ރީތި ހިތްގައިމު ދުވަހެކެވެ. ގަމު ސްކޫލުގައި ޕްރައިމަރީ ކުދިންނަށް ޚާއްސަކޮށްފައި އޮތް އަލިފާން ނިންވަން ދަސްކޮށްދޭ ސެޝަންގައި އަޔާން ބައިވެރިވިއެވެ. އަލިފާން ނިއްވާނެ ގޮތުގެ ޕްރެޓިކަލް ޝެޝަންގައި އޭނާގެވެސް ރޯލެއް އޮތެވެ. ސެޝަން އޮތީ ސްކޫލުގެ ގޯތިތެރެކަމަށްވުމުން ކުދިން ބައިތިއްބާފައި ތިބީ ބޭރަށް ގޮނޑިތައް ނެރެގެންނެވެ. ކުދިން ތިބި ދިމާ ފަހަތުގައި ކޮންމެވެސް ވަރަކަށް އަވިދީފައިވެއެވެ. ހުރިހާކުދިންނާއި މުދައްރިސުން ވަށައިގެން ތިއްބެވެ. މާދުރު ނޫން ހިސާބެއްގައި އެމްބިއުލެންސްވެސް ބާއްވާފައި އޮތެވެ. ވަރަށް ފާޑުވެރިކަމާއިއެކު އޭނާ ދިޔައީ އަލިފާން ނިއްވާނެ ގޮތްތައް ކިޔައިދެމުންނެވެ. އޭނާ ދައްކަމުން ދިޔައީ ކެއްކުމުގެ ތެރޭގައި ދިމާވާ އަލިފާނުގެ ބައެއް ހާދިސާތަކެވެ. އެގޮތުން ކައްކަމުންދާއިރު ތެޔޮހުރި ތަވާއެއްގައި އަލިފާން ހިފައިފިނަމަ ހަދަންވީގޮތެވެ. 

"ވީހާވެސް އަވަހަކަށް ތުވާއްޔެއް ނުވަތަ ފޮތިގަނޑެއް ތެންމާލާފަ ތަވާމަތީ އަޅާނީ." އަޔާން މަންޒަރު ދައްކަމުން ބުންޏެވެ.  

 އޭރު ތަންކޮޅެއް ދުރުން އެދިމާއަށް އަންނަ އަންހެން ކުއްޖާ އަޔާނަށް ފެނުނެވެ. ކަންފަތާއި ކޮނޑުގެ ދޭތެރެގައި ފޯނު ބަހައްޓައިގެން ވާހަކަދައްކަމުން އެއްއަތުން ދަބަސް ހިފަހައްޓައިގެން އަނެއް އަތުން ކަރުދާސްތަކެއް ބަލަމުން ބާރުބާރަށް ހިނގަމުން އެދިމާއަށް އަންނަ އަންހެންކުއްޖާ ފެނުމުން އަޔާންގެ ހިތް އަވަސްވިއެވެ. އެއީ އެއާޕޯޓުން ފެނުނު ރީތި ކުއްޖާއެވެ. އެކުއްޖާ އައިސް އަރާ ހަމަކުރުމުން އަޔާންގެ ޝައުގުވެރިކަން އެހެން ދިމާއަކަށް ނުދެއެވެ.

އެކުއްޖާއަށް އާދެވުނީ ޕްރޮގްރާމް ފަށާ އިރުކޮޅެއް ވީފަހުންނެވެ. އެހެންކަމުން އޭނާ އިށީންނާނެ ގޮނޑިއެއް ނެތެވެ. ގިނައިރު ކޮޅަށް ހުންނަން ޖެހުމުގެ ސަބަބުން ވާ އުނދަގޫތައް އޭނާގެ މޫނުމަތިން ފެންނަން ހުއްޓެވެ. ނަމަވެސް އެނބުރި ދާނެ ހިތްވަރެއް އޭނާގެ ނެތެވެ. އެންމެންވެސް ވަރަށް ސީރިއަސް ކަމާއެކު އަޔާން ދައްކަމުންދިޔަ މަންޒަރުތަކަށް ބަލަމުން ދިޔައެވެ. އަޔާންގެ އަޑު ފިޔަވާ އިތުރު އަޑެއް ނީވެއެވެ. މުޅިތަނަށް ވެރިވެފައިވަނީ ހިމޭންކަމާއި ކިޔަމަންތެރިކަމެވެ.

ކުއްލިއަކަށް ވަރަށް ބާރަށް އެއްޗެއް ވެއްޓި ބިމުގައި ޖެހުނު އަޑު އިވުނެވެ. ސިއްސައިގެންގޮސް އެންމެންނަށް އެދިމާއަށް ބަލާލެވުނެވެ. ކުޑަކުދިންތައް ހަޅޭއްލަވައިގަތެވެ.

"ރާނިޔާ މިސް." މަންހާއަށް ބާރަކަށް ބުނެވުނެވެ.

އަޔާން ދުވެފައި އެދިމާއަށް ދިޔައެވެ. ރާނިޔާއަށް ވީގޮތެއް ބެލުމަށް އޭނާ އަވަހަށް ހަރަކާތްތެރި ވިއެވެ. މޫނުވަތަށް ބިންމައްޗަށް ޖެހިފައި އޮތް ރާނިޔާ ކޮނޑުގައި ހިފާ އުޑުތިލަމައްޗަށް ވާގޮތަށް ބަދަލުކޮށްލިއެވެ. އިސްތަށިގަނޑުން ފޮރުވެފައިވާ މޫނު ރަނގަޅު ކޮށްލިއެވެ. ދެން ރާނިޔާގެ އަތުކުރީގައި ހިފަހައްޓާލާ ވިންދު ޗެކްކޮށްލިއެވެ. އަވަސް އަވަހަށް ނޭފަތުން ނޭވާ އާދޭތޯ ޗެކްކޮށްލިއެވެ.

"އެންބިއުލެންސް..." އަޔާން ބާރަށް ގޮވާލިއެވެ.

އަޔާން ރާނިޔާ އުފުލާލިއެވެ. އަތްދަނޑިމައްޗަށް ލައިގެން ދުވެފައި ކަހަލަ ގޮތަކަށް އެންބިއުލެންސާ ދިމާއަށް ދިޔައެވެ. އެންބިއުލެންސަށް އެރުމަށް ސިފައިންގެ އެހީތެރިކަން ލިބުނެވެ. އިސާހިތަކު އެންބިއުލަންސް ދުއްވާލިއެވެ. އެންބިއުލެންސް ތެރޭގައި އަޔާން ރާނިޔާއަށް ފަސްޓްއެއިޑްގެ ޚިދުމަތް ދިނެވެ. ދިހަ މިނިޓެއްހާއިރު ތެރޭ ރާނިޔާ ހޮސްޕިޓަލަށް ގެންދެވުނެވެ. ހޮސްޕިޓަލުގެ އަވަސް ޚިދުމަތް ފެށުނެވެ.

އަޔާން ބޭރުގައި މަޑުކޮށްގެން ހުއްޓެވެ. އޭނާވަނީ ހާސްވެފައެވެ. މި ނޫނަސް އޭނާއަށް މިކަހަލަ ކިތަންމެ ކަމެއް ވަނީ ދިމާވެފައެވެ. ނަމަވެސް މިއަދު އޭނާއަށް މި ދިމާވާ އާދަޔާ ޚިލާފް އިހުސާސްތަކުން ނުތަނަވަސްކަން އިތުރު ވެފައިވެއެވެ.

"ހާސްވާންޖެހޭ އެއްވެސްކަމެއް ނެތް. މާބޮޑަށް ވަރުދެރަވެފައި ހުރުމުން އަނބުރައިގަތީ. ހަކުރުވެސް އަދި ލޭވެސް ހުރީ ތަންކޮޅެއް ދަށްވެފައި" ޑޮކްޓަރ އަޔާނަށް ބުންޏެވެ.

އަޔާން އަވަހަށް ރާނިޔާ ގާތަށް ދިޔައެވެ. އޭނާ ރާނިޔާ އޮތް އެނދު ކައިރީ ހުރި ގޮނޑިގައި އިށީނެވެ. އަދި އެ ރީތި މޫނަށް ބަލާލިއެވެ. އޭނާގެ ހިތް ހަމްދަރުދީއިން ބަންޑުންވިކަހަލައެވެ.

"ރާނިޔާ.... އެހީތެރިއަކަށް ގުޅަންވީ ކޮންފަރާތަކަށް." ބުނާނެ އެއްޗެއް ނޭނގުމުން އޭނާ އަވަހަށް ބުންޏެވެ.

"އެހީތެރިއެއް ނަޔަސް ރަނގަޅުވާނެ." ރާނިޔާ މަޑުމަޑުން ބުންޏެވެ.

"ކީއްވެ؟ ކޮންމެވެސް މީހަކަށް އަންގާލަންވާނެ." އަޔާން އޯގާތެރިކަމާއެކު ބުންޏެވެ.

"ބަލި މަންމައެއް ފިޔަވާ އަޅުގަނޑުގެ އެއްވެސް މީހެއް ނެތް. މިހެން މިދިމާވީވެސް ރޭގައި މަންމަ އެޑްމިޓްކުރުމުން ނުނިދާ ހުރުމުން." ރާނިޔާގެ ލޮލުން ކަރުނަ ހިލުނީ ކީއްވެގެންކަމެއް އޭނާއަކަށް ނޭނގުނެވެ. އަޔާނުގެ އޯގާތެރިކަމުން އޭނާއަށް ފުން އަސަރެއް ކުރީކަމަށް ވެދާނެއެވެ. ނޫނީ ދުވަހަކުވެސް މީހަކު މިގޮތަށް އަމަލުކޮށްފައި ނުވާތީ ނޭނގޭ ޖަޒުބާތުތަކެއް އުފެދުނީއެވެ.

"ވަރަށް ބޮޑަށް ސޮރީ. އަހަރެން ރާނިޔާގާތު މަޑުކޮށްލަފާނަން." އަޔާން ބޭނުންވީ ރާނިޔާއަށް އެހީތެރިވެދޭށެވެ. އެ ރީތި ކުއްޖާގާތު ހޭދަވާ ކޮންމެ ސިކުންތަކީވެސް އޭނާގެ ނަފްސަށް ލިބޭ އާދަޔާ ޚިލާފު އުފަލެކެވެ.  އެންމެ ވަގުތުކޮޅަކަށްވެސް އޭނާ މިތަނުން ދުރަށް ދާކަށް ބޭނުމެއް ނޫނެވެ.

"ސަރ. އާޖެންޓް." ޒަމީރު އައިސް ނަންގަތެވެ. އަޔާން ރާނިޔާއަށް ބަލާލިއެވެ. އަދި އެބަ އަންނަމޭ ބުނާގޮތަކަށް އިޝާރާތް ކޮށްލުމަށް ފަހު ޒަމީރު ފަހަތުން ނިކުތެވެ.

އަޔާން ޒަމީރާއެކު ދެންތިބި ދެ އޮފިސަރުންނާއެކު މަޝްވަރާ ކުރެވުނީ ސްކޫލުގައި ހިނގައިދިޔަ ހާދިސާގެ ސަބަބުން ޝެޝަންގެ ކުރިއަށް ހުރި ޕްރޮގްރާމް ތަކާއި ގުޅޭގޮތުންނެވެ. އަދި ހަވީރު ކުރިއަށް ގެންދިއުމަށް ރާވާފައިވާ މޫދުގެ ހަރަކާތާއި ގުޅޭ ގޮތުންނެވެ. އަޔާން ދެތިން ފޯނުކޯލެއް ކުރުމަށްފަހު ބައެއްކަންކަން އިންތިޒާމުކޮށްލިއެވެ. އަދި ރާނިޔާގެ ގާތަށް ދިޔުމަށް އަވަސްވެ ގަތެވެ.

"ރާނިޔާ ގެއަށް ހިނގައްޖެ." ނަރުސް ކުއްޖާ ބުންޏެވެ.

މި ލިބުނު ވަގުތުކޮޅު މިހާއަވަހަށް ނިމިދާނެކަމަކަށް އޭނާ ހިއެއް ނުކުރެއެވެ. ފާޑެއްގެ މާޔޫސްކަމެއް އޭނާގެ ހިތަށް ވެރިވިއެވެ. ކުއްލިއަކަށް އޭނާގެ ލޮލުގައި އަޅައިގަތީ ރާނިޔާގެ އެނދުގައި އޮތް ފައިލެކެވެ. އޭނާ ފައިލު ނަގާ ބަލާލިއެވެ. ސްޓްރޯކެއް ޖެހިގެން ވާގިނެތިފައިވާ ރާނިޔާގެ މަންމަގެ ލިޔުންތައް އޭނާ ބެލިއެވެ. ފަހަރަކުގަނޑެއް ވަކިވަކިން ކިޔެވެ. އެންމެ ފަހުން ފައިލު ހިފައިގެން ނިކުތެވެ.

ނުނިމޭ.