އެމީހުންނަށް އަޝްރަފް ފެނުމުން އައިސް ކައިރިއަށް ހުއްޓުނެވެ. އަޝްރަފްއަށް ހުރީ އަނގައިންވެސް ބުނަން ނުކެރިފައެވެ.
"ކީއްވެ ތިދުވަނީ. ތި ގެއިން ހިޔަންޏެއް ފެނުނު ވާހަކަ އަޑު އެހިން" އެތަނުން މީހަކު ބުނެލިއެވެ.
އަޝްރަފްގެ ހަށިގަނޑު ހުރީ ފިނިވެފައެވެ. ކަރުތެރެ ހުރީ ހިކިފައެވެ. ހިތް އޮތީ ބާރަށް ތެޅިތެޅިއެވެ.
"ނުފެންނާނެ. އެއީ ހީވާ ހީވުމެއް. ކުރިންވެސް ތިހަކަލަ އިލްޒާމް އަހަރެންގެ ބޮލުގައި އެޅުނު" އަޝްރަފް ޖަވާބު ދިނީ ވަރަށް ކެރިގެންނެވެ.
"އެޚަބަރު ލިބިގެން މިއައީ. ދެން އޯކޭ" އެމީހުން އެނބުރިދަމުން ބުނެލިއެވެ.
އެމީހުން ދިއުމުން އަޝްރަފްއަށް ކޮންމެވެސް ވަރެއްގެ ހަމަޖެހުމެއް ލިބުނެވެ. އެމީހުން މަޑުކޮށްލާފައި، ފަހަތް ބަލާލިއެވެ.
އަޝްރަފް އޭނާގެ ގެއަށް އާދެވުމުން، ދޮރު ހުޅުވާލާފައި އެތެރެއަށް ވަދެ ދޮރު ލައްޕާލީއެވެ. އަދި ގޮސް އެނދުގައި އިށީނެވެ.
ޝާއިރާ ގޮވުމުން އަޝްރަފްއަށް ހޭލެވުނުއިރު، އޭނާގެ ހިތް އަދިވެސް ބާރަށް ތެޅެމުން ދިޔައެވެ.
"އަޝްރަފް! ކިހިނެއްވީ؟ ކީއްވެ ދުވާލު ތި ނިދަނީ؟" ޝާއިރާ ކަންބޮޑުވެފައި އަހާލިއެވެ.
އަޝްރަފް ދެލޯ ކުޑަކޮށްލާފައި ޝާއިރާއަށް ބަލާލިއެވެ. އޭނާގެ ބޮލުގައި ރިއްސާގޮތް ވެފައި، ހަށިގަނޑު ވަރުބަލިވެފައި ހުއްޓެވެ.
"ނުވޭ އެއްވެސް ކަމެއް. ހަމަ ވަރުބަލިވެގެން ނިދާލެވުނީ" އަޝްރަފް މަސައްކަތްކުރީ ހަމަޖެހިގެން ވާހަކަ ދައްކާށެވެ. އެހެންނަމަވެސް އޭނާގެ އަޑުގައި ހުރި ތުރުތުރު ޝާއިރާއަށް ފާހަގަވިއެވެ.
"ނޫން. އެހެނެއް ނޫން. ބިރުގަނެފަ ހުރިހެން ހީވަނީ. ކޮންމެވެސް ކަމެއް ވެއްޖެދޯ؟" ޝާއިރާ ދޫކޮށްލާކަށް ބޭނުމެއްނުވިއެވެ. އޭނާ އަޝްރަފްގެ ކައިރިއަށް ޖެހިލާފައި، އޭނާގެ އަތުގައި ހިފާލިއެވެ.
"ނޫން، އެއްވެސް ކަމެއް ނުވޭ. ހަމަ ބޮލަށް ތަންކޮޅެއް ބަރުވެގެން" އަޝްރަފް މަސައްކަތްކުރީ ވާހަކަ ބަދަލުކުރާށެވެ. އޭނާއަށް ޝާއިރާ ގާތު މިހާރު ވެގެން އުޅޭ ގޮތް ކިޔައިދޭން ކެރޭހެނެއް ހީއެއްނުވިއެވެ.
ޝާއިރާ ތެދުވެގެން ދިޔަ ނަމަވެސް، އޭނާގެ ނަޒަރު ހުއްޓިފައި ހުރީ އަޝްރަފްގެ މައްޗަށެވެ. އަޝްރަފްއަށް ވެގެން އުޅޭ ގޮތް ވަރަށް ސާފުކޮށް އެނގެއެވެ. ނަމަވެސް އަޝްރަފް އެކަމާ ދޮގުހެދުމުން، ބޮޑު މައްސަލައަކަށް ހެދުން ރަނގަޅު ނޫންކަމަށް ފެނުނެވެ. އެހެންކަމުން، އޭނާ ހިމޭނުން މަޑުކޮށްލީއެވެ.
އަޝްރަފް ތެދުވެ، ފާޚާނާއަށް ވަދެ މޫނު ދޮވެގެން އައިސް ސޯފާގައި އިށީނެވެ. އޭނާގެ މޫނުމަތިން އަދިވެސް ފެންނަނީ ވަރުބަލިކަމާއި ފިކުރެވެރިކަމެވެ. ޝާއިރާ އިނީ އޭނާއަށް ބަލަހައްޓައިގެންނެވެ.
"އަޝްރަފް، ކިހިނެއްވީ؟ ވަރަށް ނުތަނަވަސްކަމެއް ފެންނަނީ. އަހަރެންނާ ހިއްސާކޮށްލަން ބޭނުމެއްނޫންތަ؟" އޭނާ އަޝްރަފްގެ ކޮނޑުގައި މަޑުމަޑުން ފިރުމާލަމުން ބުނެލިއެވެ. ޝާއިރާ މަޑުމަޑުން ގޮސް އަޝްރަފްގެ ކައިރީގައި ސޯފާގައި އިށީނެވެ.
އަޝްރަފް ބޯހޫރާލަމުން، ފުން ނޭވާއެއް ލިއެވެ. އޭނާގެ އަޑުގައި ވަރުބަލިކަމުގެ އަސަރު ހުއްޓެވެ.
"ރަނގަޅު. އެކަމަކު ހަނދާން ބަހައްޓާތި، ކިތަންމެ ބޮޑު މައްސަލައެއް ނަމަވެސް، އަހަރެން އަބަދުވެސް ތި ހިތްދަތިކަން ބައިވެރިވެލަން ތައްޔާރަށް ހުންނާނަން" އަޝްރަފް އަދިވެސް ހަގީގަތް ފޮރުވަނީ ޝާއިރާއަށް އެނގެއެވެ.
އަޝްރަފް އިސްޖަހާލައިގެން އިނީ އެއްވެސް އެއްޗެއް ނުބުނެއެވެ. އޭނާގެ ހިމޭންކަމަކީ ޝާއިރާއަށް އިތުރަށް ހިތާމަ ގެނެސްދޭ ކަމެކެވެ.
އަޝްރަފް ހަމަޖެހިލަން ވަގުތު ދިނުމަށްފަހު، ޝާއިރާ މަޑުމަޑުން ތެދުވެގެން ދިޔައެވެ. ކަދުރުކޮޅަކާއި ފަނިކޮޅެއް ތައްޔާރުކޮށްލަމުން، އަޝްރަފްއަށް ގެނެސްދިނެވެ. އަޝްރަފް މަޑުމަޑުން ކައި ނިމި، ދެން އޭނާ ތެދުވެން ގޮސް އެނދުގައި އިށީނެވެ. ޝާއިރާވެސް އޭނާގެ ފަހަތުން ގޮސް އަޝްރަފްގެ ކައިރީގައި އެނދަށް އަރާ، އޭނާގެ ކޮނޑުގައި ބޯ އަޅާލައިގެން އިށީނެވެ. ޝާއިރާގެ ހިތް ބުނަމުންދިޔައީ، މިހާރު ނޫން ނަމަވެސް، ކޮންމެވެސް ދުވަހަކުން އަޝްރަފް ހުރިހާ ހަގީގަތެއް ހާމަކުރާނެ ކަމަށެވެ. އަދި އޭނާ އަބަދުވެސް އަޝްރަފްއަށް އެހީތެރިވާން ތައްޔާރަށް ހުންނާނެ ކަމަށެވެ.
އަނެއް ދުވަހުގެ ހެނދުނު، ޝާއިރާއަށް ހޭލެވުނުއިރު އަޝްރަފް އެނދުގައި ނެތެވެ. މަޑުމަޑުން ބަލާލިއިރު، އަޝްރަފް ހުރީ ކޮޓަރީގެ ކުޑަދޮރުކައިރީގައި ހިމޭނުން ކޮންމެވެސް އެއްޗަކާ މެދު ފުންކޮށް ވިސްނާށެވެ. ޝާއިރާ މަޑުމަޑުން ގޮސް އޭނާގެ ކައިރީގައި ހުއްޓިލިއެވެ. އަޝްރަފްގެ މޫނުމަތިން އަދިވެސް ފެންނަމުން ދިޔައީ ނުތަނަވަސްކަމެވެ. ދެލޮލުން ވަރުބަލިކަމާއި ނިދިނުލިބުމުގެ އަސަރު ހުއްޓެވެ.
"އަޝްރަފް، ސައި ތައްޔާރުކުރަންތަ؟" ޝާއިރާ މަޑުމަޑުން އަހާލިއެވެ.
"ނޫން ޝާއިރާ، އެހާ ބަނޑުހައިއެއް ނުވޭ" އަޝްރަފް ބުނެލިއެވެ.
"އެކަމަކު އަބަދުވެސް ކާންޖެހޭނެ އަޝްރަފް. ހިނގާ، މަޑުމަޑުން ކޮންމެވެސް އެއްޗެއް ކާލަމާ" ޝާއިރާ އަޝްރަފްގެ އަތުގައި ހިފެހެއްޓިއެވެ.
އަޝްރަފް ޝާއިރާގެ އެދުން ގަބޫލުކޮށް، ކާނާ މޭޒު ކައިރީގައި އިށީނެވެ. ނަމަވެސް އޭނާގެ ވިސްނުން ހުރީ އެހެން ކޮންމެވެސް ދުނިޔެއެއްގައެވެ. ޝާއިރާ އޭނާއަށް ކާނާ ތައްޔާރުކޮށްދިނެވެ.
= ނުނިމޭ =
