މެންދަމުން އަލިވެ، މަގުތައް ހަމަހިމޭންވެފައި ވިއަސް، އަޝްރަފްއަށް އެކަހަލަ ގޮތަކަށް މަގުމަތީގައި މަޑުކުރާކަށްވެސް ހިތްވަރެއް ނުލިބުނެވެ. އެހެން ކަމުން، ހިނގާފައިގޮސް ޝައުފާންގެ ގެއަށް ދާން އޭނާ ނިންމިއެވެ. ޝައުފާންއަށް ގުޅަން އަތުގައި ފޯނެއްވެސް ނެތެވެ. ގޭތެރޭގައި ހުރި ބިރުވެރިކަމާއެކު ފޯނު ނެގޭނެ ފުރުޞަތެއްވެސް ނުލިބުނެވެ.
ޝައުފާންގެ ގޭގެ ދޮރުމަތީގައި ހުރެ، އަޝްރަފް ދޮރުގައި ޓަކިޖަހަން ފެށިއެވެ. އަތްތިލައިގައި ރިހުން އިހުސާސް ކުރެވެން ފެށިއިރުވެސް، ޓަކިޖެހުން ހުއްޓާނުލިއެވެ. ގިނައިރުތަކެއް ވޭތުވެދިޔަ ފަހުން ޝައުފާން ދޮރު ހުޅުވިއެވެ. ޝައުފާންގެ ދެލޯ ބޮޑުވެގެން ދިޔައީ އަޝްރަފްގެ މޫނުމަތިން ފެނުނު ހާސްކަމާއި ބިރުވެރިކަން ފެނިފައެވެ.
"އަޝްރަފް! ކިހިނެއްވީ؟ މި މެންދަމު މިހެން ގަޑިއެއްގައި؟" ޝައުފާން ކަންބޮޑުވެފައި އަހާލިއެވެ.
"އަހަރެން ގެއަކަށް ނުދާނަން. ބިރުވެރި. ވަރަށް ބިރުވެރި" އަޝްރަފް ބުނެލިއެވެ.
ޝައުފާން، އަޝްރަފް ގޭތެރެއަށް ވައްދާ، ފެންތައްޓެއް ދިނެވެ. އަޝްރަފް ފެންތަށި ބޮއެ، ކުޑަކޮށް ހަމައަކަށް އެޅުނުހެން ހީވިއެވެ. އެއަށްފަހު ޝައުފާންއަށް ކަންތައްތައް ވީގޮތް ކިޔައިދިނެވެ. ކެވެލީގެ ވާހަކަ ކިޔައިދިނުމުން ޝައުފާންވެސް ހައިރާންވިއެވެ.
"އަޝްރަފް... ތިކަހަލަ ކަންކަން އެއްވެސް އިރެއްގައި ހަޤީޤަތަކަށް ނުވާނެ. އެއީ ހަމައެކަނި ވަސްވާސްތަކެއް ކަމުގައި ވާނީ. އަންހެނުން ނިޔާވުމާ ގުޅިގެން ތިހާ ހިތާމަވެރިކަމެއްގައި އުޅޭއިރު، އެކަހަލަ ވަސްވާސްތައް އައުމަކީ އެކަށީގެންވާ ކަމެއް" ޝައުފާން ހިތްވަރު ދެމުން ބުންޏެވެ.
ނަމަވެސް އަޝްރަފްއަށް ޝައުފާންގެ ވާހަކަ ޤަބޫލެއް ނުކުރެވުނެވެ. އޭނާގެ ހިތަށް އެރީ އެއީ އޭނާގެ އަނބިމީހާގެ ރޫހު ކަމަށެވެ. އަޝްރަފް އެރޭ ޝައުފާންގެ ގޭގައި ހުއްޓަސް، އޭނާގެ ހިތް ހަމައަކަށް ނޭޅުނެވެ. އޭނާގެ ނިދިވެސް ވަނީ ފިލާފައެވެ. ދެލޯ ތަންމިނަށް ހުޅުވިފައި ހުރިއިރު، ކަންފަތުގައި އަނބިމީހާގެ އަޑު ގުގުމާލާހެން އަބަދުވެސް ހީވެއެވެ. ޝައުފާންއަށްވެސް އަޝްރަފްގެ މި ހާލަތު ފެނިފައި ވަރަށް ދެރަވިއެވެ.
އަޝްރަފް ގެއަށް ދިޔައީ ޖެހިގެން އައި ދުވަހު އިރުއޮއްސުނު ފަހުންނެވެ. އަޝްރަފް އެނދުގައި އޮތީ ނިދި ނައިސް ގެންނެވެ. ބޭރުގައި ވިއްސާރަވަމުންދާ އަޑާއި، ގަދަ ވަޔާއެކު ދޮރުތަކާއި ދިމާލަށް ޖެހޭ އަޑުތައް ނިދި ނައުމަށް މަގުފަހި ކުރަމުންދިޔައެވެ. ކޮޓަރީގެ ކުޑަދޮރުން ފެންނަނީ ކަޅުކަންގަދަ އަނދިރިއެވެ. އެކަނިވެރިކަމާއި ފިނިކަން އޭނާގެ ހިތަށް ވަނަގަންނަމުންދިޔަ ހެންނެވެ. ލޯ މަރާލަން މަސައްކަތްކުރިއެވެ. ނަމަވެސް އެއީ ކާމިޔާބު ކަމެއް ނޫނެވެ. ކޮންމެވެސް ނޭނގޭ އެއްޗެއް ކޮޓަރީގައި ވާހެން ހީވިއެވެ. އެއީ ހަމަ އެކަނި ހިތަށް އަރާ ވަސްވާސްތަކެއް ހެއްޔެވެ؟
ދެމި އޮތް ހަމަހިމޭންކަމުގެ ތެރެއިން ކުއްލިއަކަށް މަޑުމަޑު އަޑެއް ކަންފަތުގައި ޖެހުނެވެ. އެ އަޑު ފުރަތަމަ އިވުނީ ވަރަށް ދުރުންނެވެ. އެއީ ކޮންމެވެސް މީހަކު އޭނާގެ ނަން ކިޔައި ގޮވާލި އަޑެކެވެ. "އަޝްރަފް..." އެއީ ވަރަށް މަޑުމައިތިރި އަޑެކެވެ. ނަމަވެސް އެ އަޑުގައި ބިރުވެރިކަމެއް ވިއެވެ.
އަޝްރަފްގެ ހަށިގަނޑު ކޮންޓްރޯލެއް ނުވިއެވެ. އޭނާއަށް ވީގޮތެއް ނޭނގެއެވެ. މުޅި ގައިން ހީބިހި ނަގައިގެން ދިޔައެވެ. ކޮންމެވެސް ނޭނގޭ ބާރެއް ދިރިއުޅުމުގެ ތެރެއަށް ވަދެ، ނިންޖާއި ހިތްހަމަޖެހުން ވަގަށް ނަގާފާނެ ކަމުގެ ބިރު ވަށާލިއެވެ. އެކަމާ ދެކޮޅު ހަދަންވީ ކިހިނެއް ކަމެއް ނޭނގެއެވެ. ފެންނަމުންދާ ކަންކަމަކީ ހަމަ އެކަނި ހިތަށް އަރާ ވަސްވާސްތަކެއް ނޫންކަން މިހާރު ކަށަވަރުވެއްޖެއެވެ. އެކަމަކު، މިއީ ކޮން ކަމެއްކަން ހޯދަން ނޭނގުނެވެ. ދިރިއުޅުން މިހާރު ވެފައިވަނީ ބިރުވެރި ހުވަފެނަކަށެވެ.
އަޝްރަފް ތެދުވެ އެނދުން ފޭބިއެވެ. އަނދިރިކަމުގެ ތެރެއިން ފަނޑު ހިޔަންޏެއް ފެންނަން ހުއްޓެވެ. އެއީ އަންހެން ކުއްޖެއްގެ ހިޔަންޏެވެ. މަޑުމަޑުން އެ ހިޔަނި އަޝްރަފް އާއި ގާތްވަމުން ދިޔައެވެ. އޭނާގެ ނޭވާ އަވަސްވެ، ހިތުގެ ތެޅުން އަވަސްވިއެވެ. ބިރުން ހަޅޭއްލަވަން އުޅުމުން އަޑު ނުނިކުތެވެ. އޭނާގެ ދުލުން ބުނަން އުޅުނު އެއްޗެއް ނުބުނެވުނެވެ. އެ އަންހެން ކުއްޖާގެ މޫނު ފަނޑުކޮށް ފެނުނު ނަމަވެސް، އެއީ ވަރަށް ރަނގަޅަށް އެނގޭ މޫނެއްކަން އިހުސާސް ކުރެވުނެވެ.
"އަހަރެން ވަރަށް ލޯބިވޭ އަޝްރަފް ދެކެ" އެ އަންހެން ކުއްޖާ އަޝްރަފް އާއި ގާތްވެލިއެވެ. އެ އަޑުގައި ޒަމާނުއްސުރެ ހިތުގައި ބާއްވައިގެން އުޅުނު ލޯތްބެއް ނޫން، ކޮންމެވެސް ބިރުވެރި އެދުމެއް ވިއެވެ.
އަންހެން ކުއްޖާ އަޝްރަފްގެ ކޮނޑުގައި ހިފާލިއިރު، އެއީ އާދައިގެ އިންސާނެއްގެ އަތެއް ނޫންކަން އަޝްރަފްގެ ހިތަށް އެރިއެވެ. އެ އަތުން އިހުސާސްވީ ގަނޑުފެން ފަދަ ފިނިކަމެކެވެ. އެ ފިނިކަން ހީވީ ހަށިގަނޑުގެ އެތެރެއަށް ވަދެގެން ދިޔަ ހެންނެވެ. އެ އަންހެން ކުއްޖާގެ މޫނު އަޝްރަފްގެ މޫނާއި ވަރަށް ކައިރިކޮއްލިއެވެ.
"އަޝްރަފް، ހަނދާން އެބަހުރިތަ؟" އެ އަޑު ކޮންމެވެސް ވަރަކަށް ވަނީ ބަދަލުވެފައެވެ. އެއީ ކުރިން އިވުނު މަޑުމައިތިރި އަޑެއް ނޫނެވެ. ބިރުވެރިކަމެއް ވަނީ އިތުރުވެފައެވެ.
އަޝްރަފްގެ ހިތް ތެޅެމުން ދިޔައީ ބާރަށެވެ. މިއީ ދިރިއުޅުމުގެ އެންމެ ބިރުވެރި ވަގުތުކަން އޭނާއަށް އިހުސާސް ކުރެވުނެވެ. މިފަދަ އެއްވެސް އަންހެން ކުއްޖެއް އޭނާގެ ދިރިއުޅުމުގައި ނުފެނެއެވެ. ނަމަވެސް، އެ މޫނު އޭނާއަށް ވަރަށް ރަނގަޅަށް އެނގޭހެން ހީވަނީ ކީއްވެ ހެއްޔެވެ؟ އެ އަންހެން ކުއްޖާގެ އިނގިލިތައް އަޝްރަފްގެ ކަރުގައި ވަށާލިއެވެ. ނޭވާލާން އުނދަގޫވިއެވެ.
"ޝާއިރާ...؟" އަޝްރަފްގެ ދުލުން މަޑުމަޑުން ބުނެވުނެވެ.
އެނަން ކިޔުމާއެކު އެ އަންހެން ކުއްޖާގެ މޫނަށް އަނދިރިކަމެއް ވެރިވިއެވެ. ދެލޯ ރަތްވެ، އަލިފާންކަނި ބުރައިގެންދާ ހެންނެވެ. "އާނ! އަހަންނަކީ ޝާއިރާ!" އޭނާ ހަޅޭއްލަވައިގަތެވެ.
"އަހަރެން ހަނދާން ނެތުނީތަ" އެ އަންހެން ކުއްޖާ ބުނެލިއެވެ.
އެއީ އަޝްރަފް ހަނދާންނައްތާލަން މަސައްކަތްކުރަމުންދިޔަ ހަނދާނެކެވެ. މީގެ އަހަރުތަކެއް ކުރިން އޭނާ ލޯބިވީ ކުއްޖާއެވެ. ޝާއިރާ އޭނާ ގެއްލިގެން ދިޔަ ދުވަހުން ފެށިގެން އަޝްރަފްގެ ދިރިއުޅުމަށް ހަމަޖެހުމެއް ނާދެއެވެ. ނަމަވެސް މިއަދު މިފެންނަނީ ޝާއިރާ ހެއްޔެވެ؟ މަރުވެފައިވާ މީހަކު އެނބުރި އަންނަނީ ކިހިނެއް ހެއްޔެވެ؟ އަޝްރަފްގެ ސިކުނޑީގައި ސުވާލުތައް އެއްވެއްޖެއެވެ. "ތިއައީ ކޮންތާކުން؟ ތި ކީއްކުރަނީ؟" އަޝްރަފް ބިރުން ހުރެ ސުވާލުކުރިއެވެ.
"އަހަރެން އައީ އަޝްރަފްގެ ފުރާނަ ނަގަން!" ޝާއިރާ އަޝްރަފްގެ ކަރުގައި ހިފާލައިގެން ހުރި އަތް ބާރުކޮށްލިއެވެ.
"އަޝްރަފް އަހަރެންނަށް ދިން ހިތްދަތިކަމުގެ ބަދަލު ހިފަން!" އޭނާގެ އަޑު ރުޅިވެރިކަން ގަދަވެފައިވެއެވެ.
އޭނާއަށް ކޮށްފައިވާ ކުށުގެ ބަދަލު ހިފަން ޝާއިރާ އަތުވެދާނެ ހެއްޔެވެ؟ މިހުރިހާ ދުވަހު އޭނާ އުޅެމުންދިޔަ ބިރުވެރި ހުވަފެނަކީ ޝާއިރާ ހެއްޔެވެ؟
"ޝާއިރާ... އަހަރެން ކީއްކުރަންވީ؟" އަޝްރަފްގެ ކަރުގައި އޮތް ޝާއިރާގެ އަތް ތަންފުކެއް ދޫކޮށްލުމުން، އޭނާއަށް ނޭވާލެވޭތޯ މަސައްކަތްކުރިއެވެ.
""އަޝްރަފްގެ ފުރާނަ ދޭންވީ!" ޝާއިރާ ހިނިގަނޑެއް ޖަހާލިއެވެ.
އެއީ ހިތް ފަޅައިގެން ދާފަދަ ބިރުވެރި ހިނިގަނޑެކެވެ. ކޮޓަރީގެ އެނދުމަތީގައި އޮތް ބާލީހެއް ވައިގެ ތެރެއަށް އުފުލިގެން އައިސް، އަޝްރަފްގެ މޫނުމަތީގައި ބާއްވަން ދިޔައެވެ. އަޝްރަފްގެ ބާރުތައް ދޫވެ، ދެލޯ ބޮޑުވެ، ހަޅޭއްލަވަން މަސައްކަތްކުރިއެވެ. ނަމަވެސް އަޑު ބޭރަށް ނުނިކުތެވެ. ދިރިއުޅުން މިހާރު ހަމަ ނިމެނީ ހެއްޔެވެ؟
"ދެންވެސް އަހަރެންގެ ލޯބި ގަބޫލުކޮއްބަލަ. ތި ހުރިހާ ކަމަކުން ސަލާމަތްވާނެ އެއިރުން" ޝާއިރާގެ އަޑުގައި ވަނީ މަޑުމައިތިރިކަމެވެ.
ޝާއިރާގެ ތުންފަތަށް ހިނިތުންވުމެއް ވެރިވިއެވެ. އެ ހިނިތުންވުމުގައި ވަނީ އަޝްރަފްގެ ހާލަތާއި އެއްގޮތް ނޫން ބިރުވެރި ހަމަޖެހުމެކެވެ. އޭނާގެ ދެލޮލުން ފެންނަމުން ދިޔައީ ހިމޭންކަމެކެވެ. މަޑުމަޑުން އަޝްރަފްގެ ގާތަށް ޖެހިލަމުން ޝާއިރާ އަޝްރަފްގެ ބިރުގެންފައިވާ މޫނުމަތީގައި މަޑުމަޑުން ފިރުމާލިއެވެ. އަޝްރަފްގެ ދެލޯ ބޮޑުވެފައިވިއިރު، އެ ދެލޮލުން ކޮންމެވެސް ނޭނގޭ އެއްޗެއް ދެކެ ބިރުގަންނަ ކަހަލަ ގޮތަކަށް ބަލަހައްޓައިގެން ހުއްޓެވެ.
"ދެން މިހުރިހާ ކަމަކުން ސަލާމަތްވާނެ... ތި ދެކެވުނު ބިރުވެރިކަން މިހާރު ނިމިއްޖެ" ޝާއިރާ ދެވަނަ ފަހަރަށް މަޑުމަޑުން ބުނެލިއެވެ. އެކަމަކު އޭނާގެ ބަސްތަކުން ހަމަޖެހުމުގެ ބަދަލުގައި އިތުރު ބިރުވެރިކަމެއް ދޭހަވާ ކަހަލައެވެ. ކޮޓަރި ތެރޭގައި ހަމަހިމޭންކަން ވެރިވެފައިވީ ނަމަވެސް، ޝާއިރާގެ ދެލޮލުން ފެންނަމުން ދިޔަ އަނދިރިކަމުގެ ސަބަބުން، ހިތުގެ ތެޅުން އަވަސްވާ ކަހަލައެވެ. ވައިގެ ތެރޭގައި އެނބުރެމުން ގޮސް އެނދުމައްޗަށް ވެއްޓުނު ބާލީހަކީ ހަމައެކަނި ބާލީހެއް ނޫނެވެ.
ޝާއިރާ އަޝްރަފްއާއި ދުރަށް ޖެހިލަމުން ކޮޓަރީގެ ދޮރާ ދިމާއަށް ހިނގައިގަތެވެ. އޭނާގެ ހަރަކާތްތަކުގައި ހުރީ އާދައިގެ އިންސާނެއްގެ ގޮތަކަށް ނޫނެވެ. ކޮންމެވެސް ޒަމާންތަކެއް ވަންދެން ހަދައިލި ކަމަކަށްފަހު ދުރުވާ ކަހަލަ ހިތްހަމަޖެހުމެއް އޭނާގެ މޫނުމަތިން ފެނުނެވެ. ދޮރު ހުޅުވާލުމާއެކު، ބޭރުން އަނދިރިކަމާއި ފިނިކަން ކޮޓަރިއަށް ވަދެގެން އައެވެ. އެވަގުތު ކޮޓަރީގެ އެނދުމަތީގައި އޮތް އަޝްރަފްގެ ހަށިގަނޑުން ކުއްލިއަކަށް ލުޔެއް ލިބުނެވެ.
ޝާއިރާ ފަހަތް ބަލާނުލާ ދޮރުން ނުކުމެއްޖެއެވެ. އެކަމަކު އޭނާ ނުކުތް ތަނުން ފެންނަން ހުރީ ހަމައެކަނި އަނދިރިކަން ނޫނެވެ. އެތަނުން ފެންނަން ހުރީ ކަޅުކަންގަދަ ދުންގަނޑެކެވެ. އެ ދުންގަނޑު ހީވަނީ އަޝްރަފްގެ ފަހު ނޭވާއާއެކު ކޮޓަރިން ބޭރުވި ފަދައެވެ. ޝާއިރާގެ ފިޔަވަޅުތަކުގެ އަޑު މަޑުމަޑުން ދުރުވެ، އެންމެ ފަހުން މުޅިން ވެސް ނެތިގެން ހިނގައްޖެއެވެ. ކޮޓަރީގައި ހުރީ ހަމައެކަނި އަޝްރަފް އާއި، އޭނާގެ މޫނުމަތިން ފެންނަމުންދިޔަ ބިރުވެރިކަމުގެ ނިޝާންތަކެވެ.
= ނުނިމޭ =
