އަޝްރަފްގެ ދެލޯ ބޮޑުވެފައި، އެމަންޒަރު ބަލަން ހުރިއިރު އޭނާގެ ހިތް ހުއްޓިދާނެހެން ހީވިއެވެ. އަޝްރަފްގެ ހަށިގަނޑު ހަރަކާތެއް ނުކުރެވުނެވެ. އެއީ ނުހަނު ބިރުވެރި ވަގުތުކޮޅެކެވެ. އަންހެނުން ބިންމައްޗަށް ވެއްޓި، ނޭވާ ލަމުންދިޔައީ އުނދަގުލުންނެވެ. އަޝްރަފްގެ ހިތުގައި ހިނގީ އިންތިހާއަށް ބޮޑު ހާސްކަމެކެވެ. އެވަގުތު އެ ހިޔަނި މަޑުމަޑުން އަޝްރަފްގެ ގާތަށް އައިސް، މޫނަށް ބަލައިލިއެވެ. ކުރިން ފެނުނު ކުޑަ އަންހެންކުއްޖާގެ ބިރުވެރި އަނގަ ހުޅުވިފައި، އެތެރެއިން ދިގު، ކޮޅުތޫނު ދަތްތައް ފެންނަމުން ދިޔައިރު، އަޝްރަފްގެ ދެލޮލުން ކަރުނަ ފޭބިއެވެ. އޭނާއަށް އެއްވެސް ކަމެއް ނުކުރެވުނެވެ. ހީވީ އެ ހިޔަންޏަށް އަޝްރަފްގެ ހިތުގެ ތެޅުންވެސް އިވޭހެންނެވެ.
އަޝްރަފްގެ ހިތް ހީވީ އަތްތިލައިގެ ތެރޭގައި ތެޅިތެޅި އޮތް ކުޑަ ދޫންޏެއްހެންނެވެ. ކުއްލިއަކަށް އެ ހިޔަނި އަނެއްކާވެސް ވައިރޯޅިއެއްހެން ގެއްލިއްޖެއެވެ. ހިޔަނި ގެއްލުމާއެކު އަޝްރަފްގެ ހަށިގަނޑަށް ހަރަކާތްކުރެވޭވަރުވިއެވެ. އަވަސް އަވަހަށް ގޮސް އަނބިމީހާގެ ގާތުގައި އިށީނދެ، ކަރުގައި އަތުން ފިރުމާލިއެވެ. ނޭވާ ލަމުންދިޔައީ އުނދަގުލުންނެވެ. އަޝްރަފްގެ ހިތުގައި ބިރުވެރިކަމުގެ އާ ރާޅެއް އުފެދުނެވެ. އެ ބިރުވެރި ހިޔަނި އަދިވެސް އެމީހުން ދޫކޮށްނުލާކަން އޭނާއަށް ޔަގީންވިއެވެ. ނޭވާލާން އުނދަގޫވަމުން ދިޔަ މަންޒަރު އަޝްރަފްގެ އަނބިމީހާގެ މޫނުމަތިން ފެންނަމުން ދިޔައެވެ. އެންމެފަހުން ފަހުގެ ނޭވާ ދޫކޮއްލީ އަޝްރަފްގެ މޫނަށް ބަލަހައްޓައިގެން އޮވެއެވެ.
އަޝްރަފްގެ މުޅި ދުނިޔެ އެވަގުތު އަނދިރިވެ، ބަނަވެގެން ދިޔަ ކަހަލައެވެ. ހަށިގަނޑު ތުރުތުރުއަޅަން ފަށައިފިއެވެ. އަނބިމީހާގެ މޫނުމަތީގައި ފިރުމާލަމުން، އެ ފިނިވެފައިވާ ހަށިގަނޑަށް ބަލަހައްޓައިގެން އޭނާއަށް އިނދެވުނެވެ. އެ ދުވަހާ ހަމައަށް އެ ދެމީހުން ދެކެމުން އައި އުފާވެރި ދިރިއުޅުމުގެ ހަނދާންތައް އޭނާގެ ސިކުނޑީގައި ބުރުޖަހަމުން ދިޔައެވެ. އެކަމަކު މިހާރު އެ ހުރިހާ އުފާވެރިކަމެއް ވަނީ ބިރުވެރި ހުވަފެނަކަށް ބަދަލުވެފައެވެ.
އަޝްރަފްގެ ހިތުގެ ތެޅުން ގަދަވެފައި ހުރިއިރު، ކުއްލިއަކަށް އެ ހިޔަނި ވަރަށް ބާރަށް އައިސް ހުއްޓުނެވެ. އެ ހިޔަނި އަޝްރަފްގެ ކަރުގައި ހިފައި، މައްޗަށް އުފުލާލިއެވެ. ނޭވާލާން ވަރަށް އުނދަގޫވިއެވެ. ދެފައި ބިމުން މައްޗަށް އަރާ، ހަށިގަނޑު ތެޅެން ފެށިއެވެ. އެއީ ނިމުން ޔަގީންވިއެވެ. ދިރިއުޅުން މި ބިރުވެރި ވަގުތުގައި ނިމިގެން ދާނެ ކަމަށް ހީވިއެވެ. އަޝްރަފްގެ ހަށިގަނޑު ބަލިވެ، ދެލޯ މަރާލެވުނެވެ. އޭނާއަށް އިތުރަށް ހަނދާނެއް ނެތެވެ.
އަޝްރަފްގެ ދެލޯ މަރާލެވުނުތާ ވީ ކިހާއިރެއް ކަމެއް ނޭނގެއެވެ. ހޭވެރިކަން ވީއިރު އިހުސާސްވީ ހަށިގަނޑުގައި ހުރި ހުރިހާ ބާރެއް ދޫވެފައިވާ ކަމެވެ. ދެލޯ ހުޅުވާލުމަށް މަސައްކަތް ކުރިނަމަވެސް އެކަން ކާމިޔާބު ނުވިއެވެ. ފަހުގެ ހަނދާނަކީ އެ ބިރުވެރި ހިޔަނި ކަރުގައި ހިފާ މައްޗަށް އުފުލާލި ހަނދާނެވެ. އެ ހަނދާންތަކުން ހިތަށް ބިރުވެރިކަމެއް ވެރިވެގަތެވެ.
ދެލޯ ހުޅުވާލަން ކުރި މަސައްކަތްތަކަށްފަހު އެންމެ ފަހުން އަޝްރަފްއަށް ކާމިޔާބުވިއެވެ. މޫނުމަތީގައި އަދިވެސް ހުރީ ކަރުނައިގެ އަސަރުތަކެވެ. އެކަމަކު މިހާރު ކަރުނައެއް ނުފައިބައެވެ.
އަޝްރަފްގެ އަނބިމީހާ އޮތް ތަނަށް ނަޒަރު ހިންގާލިއެވެ. އެކަމަކު އެއްވެސް މީހެއް ފެންނާކަށް ނެތެވެ. ބިރުން ހަށިގަނޑު ތުރުތުރުއަޅަން ފެށިއެވެ. އަނބިމީހާ ކޮބައިތޯ ހިތާ ސުވާލުކުރިއެވެ. ކުއްލިއަކަށް، އެމީހުންގެ ކައިވެނީގެ ކުރިން ނަގާފައިވާ ފޮޓޯއެއް ފާރުގައި އެލުވާފައި ހުރި މަންޒަރު ފެނުނެވެ. އެ ފޮޓޯގައި ހުރި އަނބިމީހާގެ މޫނުމަތިން ފެންނަމުން ދިޔައީ ބިރުވެރި ހިނިތުންވުމެކެވެ. ހިތް ހީވީ ބޭރަށް ނުކުމެދާނެހެންނެވެ. އެހިނދު ގޭގެ ދޮރުމަތިން ވަރަށް މަޑުމަޑުން ކޮންމެވެސް އެއްޗެއް ހިނގާލި އަޑު އިވިއްޖެއެވެ. އަޝްރަފްގެ ހިތުގައި ބިރުވެރިކަން އަލުން އުފެދި، އޭނާގެ ދެލޯ ބޮޑުވެގެން ދިޔައެވެ.
ހެނދުނު ވީތަނާހެން ރަށުގެ ގިނަމީހުން އެގޭ ދޮށަށް ވަނީ އެއްވެފައެވެ. އަޝްރަފްގެ އަންހެނުންގެ މަރުގެ ޚަބަރު ލިބުމުންނެވެ. އެންމެންވެސް އަވަސްވެގަތީ އެ ފުރާނަ ނެތް މަސްގަނޑު ވަޅުލުމަށެވެ. ގިނަ އިރު ބޭއްވުމުގެ ބަދަލުގައެވެ. މަރުވީ ކިހިނެއް ކަމެއް އެއްވެސް މީހަކަށް އެނގިފައެއް ނެތެވެ. އަދި އޭނާގެ ފިރިމީހާ އަޝްރަފްވެސް އޮތީ ބުނާނެ އެއްޗެއް ނޭނގި ހިމޭންވެފައެވެ.
އަޝްރަފް އޭނާގެ އަނބިމީހާ ވަޅުލުމަށްފަހު ގޭތެރެއަށް ވަންއިރު، މުޅިތަން އޮތީ ބިރުވެރި ހިމޭންކަމެއްގެ ތެރޭގައެވެ. ކޮޓަރީގެ ދޮރު ހުޅުވާލުމާއެކު ނަޒަރު ހުއްޓުނީ، އެރޭ ހިތް ބޭރަށް ނުކުމެދާނެހެން ހީވި ފޮޓޯއަށެވެ. ފޮޓޯގައި ހުރި އަޝްރަފްގެ އަނބިމީހާގެ މޫނުމަތިން އަދިވެސް ފެންނަމުން ދިޔައީ ބިރުވެރި ހިނިތުންވުމެކެވެ. އެ ފޮޓޯއަށް ބަލަހައްޓައިގެން ހުއްޓާ، އެރޭ ގޭގެ ދޮރުމަތިން އިވުނު އަޑު އަޝްރަފްގެ ކަންފަތުގައި ގުގުމާލިއެވެ. ކުއްލިއަކަށް، އެނދުކައިރީގައި ހުރި ފޮށިގަނޑެއްގެ ތެރެއިން ވަރަށް މަޑުމަޑުން ކޮންމެވެސް އެއްޗެއް ވެއްޓުނު އަޑު އިވިއްޖެއެވެ.
އަޝްރަފް ބިރުން ގައިން ހީބިހި ނަގައިފިއެވެ. މަޑުމަޑުން ގޮސް ފޮށިގަނޑަށް ބަލާލިއެވެ. ކުއްލިއަކަށް އަޝްރަފްގެ ހަނދާންތަކަށް ތޫނު ރިހުމަކާއެކު އެރޭގެ މަންޒަރުތައް ސިފަވެގެން އަންނަން ފެށިއެވެ. އަނބިމީހާ އެނދުގައި އޮވެ، ބިރުވެރި ހިނިތުންވުމަކުން ހިނިތުންވެލި މަންޒަރެވެ.
އިރު އޮއްސުމާއިއެކު އަޝްރަފަށް ނިދުނެވެ. މުޅިރޭ އަޝްރަފް އޮތީ ނިދިފައެވެ. ނިދިފައި އޮއްވައި ހޭލެވުނީބާވައޭ އަޝްރަފްގެ ހިތަށް އެރިއެވެ. އެވަގުތު އަނބިމީހާގެ ފޮޓޯއިން އަނެއްކާވެސް ބިރުވެރި ހިނިތުންވުމެއް ފެންނަން ފެށިއެވެ. އެ ފޮޓޯއިން އަޝްރަފްއަށް ހީވީ އަނބިމީހާ ބުނަނީ އޭނާއަށް ހެދި ގޮތަކީ އޭނާ އަމިއްލައަށް ކޮށްފައިވާ ކަމެއް ކަމަށެވެ. ބިރުން އަޝްރަފްގެ ދެލޯ ބޮޑުވެ، ދެލޮލުން ފައިބަމުން އަންނަ ކަރުނަތަކުން ތެމިގެން ދިޔައެވެ. ވަޅި ހިފައިގެން ގޮސް އަޝްރަފް ކުރިމަތީގައި ހުރި ފޮޓޯ ހަލާކު ކޮއްލިއެވެ.
ފޮޓޯ ހަލާކު ކޮށްލުމާއެކު އަޝްރަފްގެ އަތުން ވަޅި ވެއްޓުނެވެ. ބިރުން ފުރިފައިވާއިރު އަޝްރަފްގެ ދެލޯ ހުއްޓިފައި ހުރީ ހަލާކުވެފައިވާ ފޮޓޯގެ ކުދިކުދިއެތިކޮޅުތަކަށެވެ. ކުއްލިއަކަށް ކޮޓަރީގެ އެތެރެއަށް ފިނި ރޯޅިއެއް ވެރިގެން ދިޔައެވެ. ދޮރުތަކާއި ދޮރޯށި ލައްޕާފައި ހުރި އިރުވެސް މިހެން ވުމުން އިތުރަށް ބިރުގަތެވެ. މަޑުމަޑުން އަޝްރަފްގެ ނަން ކިޔާލި އަޑެއް ކަންފަތުގައި ގުގުމާލިއެވެ. އެއީ އަނބިމީހާގެ އަޑެވެ. އަޝްރަފް މަޑުމަޑުން ފަސްއެނބުރި ބަލާލިއެވެ. ފާރުގައި ހުރި ބޮޑު މޭޒެއްގެ މަތީގައި ހުރި ލޯގަނޑުން ފެނުނު ސޫރައިގައި، ވަރަށް މަޑުމަޑުން އަނބިމީހާގެ މޫނު ފެންނަން ފެށީ ބިރުވެރި ހިނިތުންވުމެއްގައެވެ.
ދެލޯ ކުޑަކޮށްލުމަށްފަހު އަނެއްކާވެސް ލޯގަނޑަށް ބަލާލިއެވެ. އެކަމަކު ހިނދުކޮޅަކަށް ފެނުނު މަންޒަރު ހަނދާނުން ފޮހެލާކަށް ނުކުޅެދުނެވެ. ކޮޓަރި ތެރޭގައި ހިމޭންކަން ވެރިވެ، ވަޔާވެސް ގުޅިފައިވާ ފިނިކަން އަޝްރަފްގެ ހަށިގަނޑުގައި ހިނގާލި ކަހަލައެވެ. އޭނާ ބިރުން ތެޅިގަނެ، ގޭތެރެއަށް ނަޒަރު ހިންގާލިއެވެ. ކޮންމެ ތަނަކުންވެސް ފެންނަމުންދިޔައީ އަނބިމީހާގެ ހަނދާންތަކެވެ. އެންމެ އާދައިގެ ގޮތަކަށް ނަން ކިޔާލި އަޑުވެސް ހިތުގައި ބިރުވެރިކަން އަށަގަންނުވަމުންދިޔައެވެ. އަޝްރަފްއަށް ހީވީ އަނބިމީހާ އޭނާގެ ކައިރީގައި ހުރިހެންނެވެ. ހީވީ ކޮންމެ ހިނދެއްގައިވެސް އަޝްރަފްގެ ކައިރިއަށް އައިސް ހުއްޓިދާނެހެންނެވެ. އެ ބިރުވެރި ހިނިތުންވުމާއެކުގައެވެ.
އަޝްރަފްއަށް އިހުސާސް ކުރެވުނު ބިރުވެރިކަމާއެކު ދޮރުފަތާ ދިމާލަށް މަޑުމަޑުން ހިނގައިގަތެވެ. އަޝްރަފް ބޭނުންވީ އެތަނުން އަވަހަށް ނުކުމެގެން ދާށެވެ. ގޭގެ ދޮރުހުޅުވާލުމާއެކު، އަޝްރަފްގެ ހިތް ކުއްލިއަކަށް ތެޅިގަނެ، ދެލޯ ބޮޑުވެގެން ދިޔައެވެ. ދޮރުކައިރީގައި ހުރި ކުޑަ މޭޒެއްގެ މަތީގައި އޮތީ އަނބިމީހާގެ ކަރުގައި އަޅުވާފައި އޮތް ކަހަލަ ކެވެލި ކޮޅެކެވެ. ހީވީ އަނބިމީހާގެ ރޫހު އެގެއިން ނުނިކުމެ، އަޝްރަފްއަށް ގޯނާކުރަމުންދަނީ ކަމަށެވެ. އަޝްރަފް އަތުގެ ނުފުށުން ނިތްކުރިމަތީގައި ހުރި ދާ ފޮހެލިއެވެ. އަނެއްކާވެސް ކަންފަތުގައި އޭނާގެ ނަން ކިޔާލި އަޑު ގުގުމާލިއެވެ. އޭނާގެ ހިތް ހީވީ ބޭރަށް ނުކުމެދާނެހެންނެވެ. އަޝްރަފްއަށް ފެނުނު އެއްވެސް ތަނަކަށް ނުބަލާ، ގޭގެ ދޮރުން ބޭރަށް ނުކުމެ ދުއްވައިގަތެވެ.
= ނުނިމޭ =
