އަމީނާގެ މަންމަ ހުރީ ވަރަށް ބިރުގަނެފައެވެ. އަމީނާގެ ހާލަތު ދުވަހުން ދުވަހަށް ގޯސްވަމުން ދިޔައެވެ. ބައެއްފަހަރު އޭނާ ކޮޓަރިތެރޭގައި އެކަނި އިނދެފަ ބިރުވެރި އަޑަކުން ހަޅޭއްލަވަނީއެވެ.
"ނުފެނޭތަ؟ އޭތި މިތަނުގައި އެބައޮތް" އަމީނާގެ އަޑު ނުކުންނަނީ އޭނާއަށް ނިސްބަތްނުވާފަދަ ބަރުއަޑެކެވެ. އަމީނާގެ މަންމަގެ ހިތް ކުދިކުދިވިއެވެ. އަމީނާއަށް ކުރިމަތިވެފައިވާ ބިރުވެރިކަން އޭނާއަށް އެނގުނެވެ. އެއީ އޭނާ ކޮށްފައިވާ ކުށެއްގެ ސަބަބުން ދަރިފުޅަށް ކުރިމަތިވި ހިތާމަ ކަމަށް އޭނާ ގަބޫލުކުރިއެވެ.
ރަށުގެ އެކި ހިސާބުތަކުން މީހުން މަރުވާ ވާހަކަ ފެތުރި، މުޅި ރަށަށް ނުތަނަވަސްކަން ފެތުރިއްޖެއެވެ. އެންމެން ތިބީ އާދަޔާ ހިލާފު ކަންތައްތަކެއް ކުރިމަތިވެދާނެ ކަމަށް ބިރުގަނެފައެވެ. މި ހާލަތުގައި، އަމީނާގެ މަންމައަށް އިހުސާސް ކުރެވުނީ، އޭނާގެ ދަރިފުޅު ސަލާމަތްކުރުމަށްޓަކައި، ކުރިން ސިއްރުކޮށްފައި ހުރި ހުރިހާ ކަމެއް ރަށުގެ އިސްމީހުންނަށް ކިޔައިދޭންޖެހޭނެ ކަމެވެ. ނަމަވެސް އެކަމުގެ ސަބަބުން އޭނާއަށް ކުރިމަތިވެދާނެ ނަތީޖާއަށް ބިރުން އޭނާ ފަސްޖެހުނެވެ.
ސިއްތި ހަގީގަތް ހާމަކުރަން ކުރި މަސައްކަތުގެ ނަތީޖާ ފެންނަމުން ދިޔައެވެ. އޭނާގެ ބޭނުމަކީ ރަށުގެ އެންމެނަށް މި ބިރުވެރިކަމުން ސަލާމަތްވުމަށް އެހީތެރިވުމެވެ.
އަމީނާގެ މަންމަ އިސްމީހާގެ ގާތަށް ދިއުމަށް ނިންމި ނަމަވެސް، އޭނާގެ ހިތުގައި ބިރުވެރިކަމެއް ވެރިވެފައިވެއެވެ. އޭނާގެ އަތްފައި ތުރުތުރުލަމުން ދިޔައެވެ. އޭނާ ދެފަހަރެއްގެ މަތިން ދިއުމަށް މަސައްކަތްކޮށްފައިވެސް ފަސްޖެހުނެވެ. އޭނާގެ ނުބައި ޢަމަލުތަކުގެ ސަބަބުން އެތައް ބަޔަކު މަރުވެއްޖެކަން އޭނާއަށް އެނގުނެވެ. އެހެންކަމުން ރަށުގެ އިސް މީހުންނަށް އެނގިއްޖެނަމަ އޭނާއަށް ވާނެ ގޮތެއް ނޭނގެއެވެ.
ނަމަވެސް އިތުރަށް ގިނަ ވަގުތުތަކެއް އޭނާއަށް ނެތެވެ. މިހާލަތުގައިވެސް އޭނާ ނިންމީ ކޮންމެ ނަތީޖާއަކާ ކުރިމަތިލާންވެސް ތައްޔާރަށް ހުރުމަށެވެ. އެގޮތުން ހެނދުނު ވަގުތެއްގައި އޭނާ ރަށުގެ އިސް މީހާގެ ގެއަށް ދިޔައީ އޭނާގެ ހުރިހާ ސިއްރުތަކެއް ކިޔައި ދިނުމުގެ އަޒުމުގައެވެ. އަމީނާގެ މަންމަގެ ވާހަކަތަކުން ރަށުގެ އިސް މީހާގެ މޫނުމަތިން ފެނުނީ ހައިރާންކަމާއި، ބިރުވެރިކަމެވެ. އޭނާއަށް އެނގުނީ މިކަމުގެ އަސްލު ނުރައްކާތެރިކަމެވެ. އަދި ރަށަށް ކުރިމަތިވެފައިވާ ހާލަތުގެ ބޮޑުކަމެވެ.
ސިއްތި، މިހާލަތުގައިވެސް ހުރީ އެއްވެސް ބިރުވެރިކަމެއް ނެތި ސާބިތުކަމާއެކުއެވެ. އޭނާގެ ހިތުގައިވި ހިތްހަމަ ނުޖެހުމާއި، މި ހިޔަނި ނައްތާލުމުގެ އާދަޔާ ހިލާފު ހިތްވަރެއް އޭނާއަށް ލިބިފައިވާ ފަދައެވެ. މުޅި ރަށުގެ މީހުންގެ އުފާވެރިކަން ހޯދުމަށް ސިއްތި ވަނީ އަޒުމް ކަނޑައަޅާފައެވެ. އޭނާ ރަށުގެ އިސް މީހުންނާއި ބައްދަލުކޮށް، މި ހިޔަނި ނައްތާލުމަށް އޭނާގެ އެހީތެރިކަން ދިނެވެ. ސިއްތި ބުނިގޮތުގައި، މި ސިހުރު ނައްތާލެވޭނީ ވަރަށް ބޮޑު ޤުރުބާނީއެއް ވެގެންނެވެ. އެ ޤުރުބާނީއަށް އޭނާ ތައްޔާރަށް ހުއްޓެވެ.
ރަށުގެ އިސް މީހުންނާއި ސިއްތި ގުޅިގެން މި ހިޔަނި ނައްތާލުމުގެ މަސައްކަތް ފެށިއެވެ. ސިއްތި ބުނި ވާހަކަތަކުން އެނގުނީ، މި ސިހުރަކީ އޭގެ ޒާތުގައި ވަރަށް ބާރުގަދަ، އަދި ނައްތާލަން ދަތި އެއްޗެއް ކަމެވެ. މިހިޔަނި ފޮނުވާލެވޭނީ ހަވީރުގެ ވަގުތުގައި، ރަށުގެ އެންމެ އިހު ޒަމާނުގެ ފަޅުވެފައިވާ ގަބުރުސްތާނުގައި ކަމަށް ސިއްތި ބުންޏެވެ. އަދި އެ ހިޔަނި ނުކުންނައިރު އޭގެ ހަމަލާތަކުން ސަލާމަތްވުމަށް އޭގެ ބާރު ހިފެހެއްޓޭނެ މީހަކު އެތަނުގައި ހުންނަން ޖެހޭނެކަމަށް ސިއްތި ބުންޏެވެ.
މި ވާހަކަ އެނގުމުން ރަށުގެ މީހުން ތިބީ ބިރުގެންފައެވެ. މި ހާލަތުގައި ސިއްތި ހުށަހެޅީ އެ ބާރު ހިފެހެއްޓުމުގެ ޤުރުބާނީ އޭނާވާނެ ކަމަށެވެ. އެހެންނަމަވެސް އެއީ އޭނާގެ ފުރާނައަށް ނުރައްކާ ވެދާނެ ކަމެއްކަން އެންމެނަށްވެސް އެނގުނެވެ. އޭނާގެ ބޭނުމަކީ ރަށުގެ އެންމެނަށް މި ބިރުވެރިކަމުން ސަލާމަތްވުމަށް އެހީތެރިވުމެވެ. ސިއްތި މިކަމަށް ތައްޔާރުވީ އެއްވެސް ފަސްޖެހުމެއްނެތިއެވެ.
މުޅި ރަށު މީހުންނަށް އޭގެ ނުރައްކާ ފެތުރިދާނެކަން އެނގުނެވެ. މިވަގުތު އަމީނާގެ މަންމަގެ ހިތުގައި އުފެދުނީ ދަރިފުޅަށްޓަކައި ކުރެވުނު މޮޔަ ކަންތަކުގެ ސަބަބުން މުޅި ރަށަށް ކުރިމަތިވެދާނެ ބިރުވެރިކަމުގެ ހިތާމައެވެ. އަމީނާ މިހާލުގައި ވީ އޭނާގެ ސަބަބުންކަން އޭނާއަށް ވަރަށް ރަނގަޅަށް އެނގެއެވެ. މި ހިތާމައިގެ ތެރޭގައިވެސް އޭނާ ނިންމީ ސިއްތިއަށް އެހީތެރިވުމަށެވެ. އެހެން ނޫންނަމަ އޭނާގެ ދަރިފުޅު މަރުވެދާނެކަން އޭނާއަށް ޔަޤީންވިއެވެ.
ރަށުގެ އެކި ހިސާބުތަކަށް ވެރިވެފައިވާ އާދަޔާ ހިލާފު ބިރުވެރިކަމަށް ނިމުމެއް ގެނައުމަށްޓަކައި، ރަށުގެ އިސް މީހުންނާއި ސިއްތި މަސައްކަތް ފަށަން ކަނޑައެޅި ވަގުތު އައިސްޖެހުނެވެ. މިވަގުތު މުޅި ރަށުތެރެއަށް އާދަޔާ ހިލާފު ހިމޭންކަމެއް ވެރިވެގަތެވެ. އިރުއޮއްސި، މުޅި މާހައުލު އަނދިރިވެ، ޖެހިލަނީ ހިމޭން ރޯޅިއެކެވެ. ރަށުގެ އެންމެ ބިރުވެރިކަމާއި ފުރާނަ ސަލާމަތްނުވާނެކަމުގެ ބިރު އޮތް ގަބުރުސްތާނު ކައިރިއަށް ދިއުމަށް ސިއްތިއާއި އިސް މީހުން ތައްޔާރުވިއެވެ. އަމީނާގެ މަންމަވެސް އެމީހުންނާއެކު ދިޔައީ، އެކަން ނިމެންދެން ހިތްހަމަޖެހުމެއް ލިބިގަތުމުގެ އުންމީދުގައެވެ. ގަބުރުސްތާނުގެ ކައިރީގައި ހުރި ބޮޑު ދިގުގަސް ދޮށުގައި، އެމީހުންގެ މަސައްކަތް ފެށިއެވެ.
ސިއްތި، އޭނާގެ ހިތްވަރާއެކު، ގަސްގަހާގެހިތަކަށް އަރައިގަތް ކަޅު ދުމާއި ދިމާއަށް ކުރިއަށްޖެހި، އެ ދުމުގެ ތެރެއަށް ވަދެގަތެވެ. އެވަގުތު އެ ބިރުވެރި ހިޔަނި އޭނާގެ ހަށިގަނޑަށް ހަމަލާދޭން ފެށިއެވެ. ސިއްތި ހަޅޭއްލަވަން ފެށިއެވެ. އޭނާގެ އަޑާއެކު މުޅި ގަބުރުސްތާނު ތެރެއިން ބިރުވެރި އަޑުތަކެއް އިވެން ފެށިއެވެ. ގަސްގަހާގެހިތައް އަރައިގަތް ކަޅު ދުމާއެކު މުޅި ގަބުރުސްތާނު ތެރެއަށް ބިރުވެރި އަނދިރިކަމެއް ވެރިވިއެވެ. އަމީނާގެ މަންމަ އާއި އިސްމީހުން އަވަސް އަވަހަށް ކިޔަވަން ފެށިއެވެ. އެހެންނަމަވެސް ސިއްތީގެ ހާލަތު ދިޔައީ ގޯސްވަމުންނެވެ. ކުއްލިއަކަށް ވަރުގަދަ ވައިރޯޅިއެއް ޖެހެން ފެށިއެވެ. ގަސްގަހާގެހި ލެނބި، ބައެއް ގަސްގަހާގެހި ގަބުރުސްތާނުގެ މައްޗަށް ވެއްޓެން ފެށިއެވެ. އައި ވަރުގަދަ ވައިރޯޅިއަށްފަހު، މުޅި ގަބުރުސްތާނު ތެރެއަށް ހިމޭންކަމެއް ވެރިވިއެވެ. ކަޅު ދުން ނެތިދިޔައީއެވެ.
އިސްމީހުން އަވަސް އަވަހަށް ސިއްތި ހުރި ދިމާއަށް ބަލައިލިއިރު، ސިއްތި އޮތީ ބިންމައްޗަށް ވެއްޓިފައެވެ. އޭނާގެ ހަށިގަނޑުން ފެންނަމުންދިޔައީ އާދަޔާ ހިލާފު އަސަރުތަކެވެ. އަމީނާގެ މަންމަ ސިއްތީގެ ގާތަށް ދުވެފައިގޮސް، އޭނާގެ ހާލު ބަލައިލިއެވެ. ސިއްތި ނޭވާ ހުއްޓިފައި އޮތެވެ. އޭނާ މަރުވީއެވެ. ރަށުގެ މީހުންގެ ސަލާމަތަށްޓަކައި ސިއްތި ވަނީ އޭނާގެ ފުރާނަ ޤުރުބާންކޮށްފައެވެ.
އަމީނާގެ މަންމަގެ ހިތް ފަޅައިގެންދާހެން ހީވިއެވެ. އޭނާގެ ކުށުގެ ސަބަބުން، ސިއްތީގެ ފުރާނަ ގެއްލުނީއެވެ. މަންމަގެ ހިތުގައި ހިޔާލުތައް ފުނިޖެހެމުން ދިޔައީ، މިހުރިހާކަމެއްގެ އަސްލަކީ އޭނާ ކަމެވެ. ރަށުގެ އިސް މީހުން އަމީނާގެ މަންމަގެ ގާތަށް އައިސް، ސިއްތީގެ ހިތްވަރާއި ޤުރުބާނީގެ ވާހަކަ ދެއްކިއެވެ. އެ މީހުން ބުނީ، ސިއްތީގެ މި ޤުރުބާނީ އަކީ ރަށުގެ ހުރިހާ ރައްޔިތުންނަށްޓަކައި ކުރެވުނު މަތިވެރި ޤުރުބާނީއެއް ކަމަށެވެ.
ރަށުގެ ހުރިހާ މީހުންވެސް ތިބީ ސިއްތީގެ ހިތްވަރަށް ސާބަސްދީފައެވެ. އެވަރުގެ ހިތްވަރެއް ދެއްކޭނެ ދެވަނަ މީހަކު ނުހުންނާނެ ކަމަށް އެންމެން އެއްބަސްވެއެވެ. ނަމަވެސް، ސިއްތީގެ މި ޤުރުބާނީއާއެކު، ރަށުގެ މައްޗަށް ވެރިވެފައިވާ ބިރުވެރިކަން ފިލައިގެންދާނީ ކިހާ ދުވަހަކުންތޯ މީހުންގެ ހިތްތަކުގައި ސުވާލު އުފެދުނެވެ. ސިއްތީގެ ހަށިގަނޑު ގަބުރުސްތާނުގައި ވަޅުލެވުނު އިރު، އޭނާގެ މައްޗަށް މީހުން ހެޔޮ ދުޢާ ކުރިއެވެ.
ދުވަސްތައް ފާއިތުވަމުންދިޔައެވެ. ރަށުގެ މީހުން މަސައްކަތްކުރީ ހިތްވަރުލައިގެން ކުރިމަގާ ކުރިމަތިލާށެވެ. ނަމަވެސް ބައެއް ރޭރޭ ގަބުރުސްތާނު ތެރެއިން އިވޭ ހީނިކުރާ އަޑުތަކާއި، ކަޅު ހިޔަނިތަކުގެ ހިލަމުން މީހުންނަށް ދިޔައީ ބިރުވެރި މާޒީ ހަނދާންކޮށްލަދެމުންނެވެ. ނަމަވެސް، އޭނާގެ ފުރާނަ ދުނިޔެއަށް އަލްވަދާޢު ކީ ބިރުވެރި ހިޔަނި އެރަށުގެ އެންމެންގެ ހިތްތަކުން ފިލުވާލެވޭނެކަމަށް އެއްވެސް މީހަކަށް ހީއެއްނުކުރެވެއެވެ. އެ ހިޔަނިތަކުގެ ސަބަބުން ލިބުނު ގެއްލުމުގެ އަސަރު އަބަދުވެސް ރަށުގެ ހިތްތަކުގައި ބިންވަޅުނެގިފައި އޮތެވެ.
ކޮންމެ މީހެއްގެ ހިތުގައިވެސް އޮތީ ބިރުވެރިކަމުގެ ހިޔަންޏެކެވެ. ބައެއް ފަހަރު ރޭގަނޑުގެ ގަޑީގައި މަގުމަތިން ހިނގާފައި ދާއިރު، ނުފެންނަ ހިޔަނިތަކެއް ފަހަތުން އަންނަހެން ހީވެއެވެ. އަދި ބައެއް ގެތަކުގެ ގިފިލިތަކުންނާއި، ފަޅުވެފައިވާ ބިންތަކުން އަންނަ ބިރުވެރި އަޑުތައް، ރައްޔިތުންގެ ނިދި ނަގާލިއެވެ.
އެއްދުވަހަކު، ބޭރުރަށެއްގެ މީހަކު އެމީހުންގެ ގާތަށް އައިސް، އެރަށަށް ވެރިވެފައިވާ ބިރުވެރިކަން ނެތިކޮށްލެވޭނެ ގޮތެއް އެނގޭކަމަށް ބުންޏެވެ. ނަމަވެސް އެކަމަށް ބޮޑު ޤުރުބާނީއެއް ވާންޖެހޭ ކަމަށްވެސް އޭނާ އިތުރަށް ބުންޏެވެ. އެމީހުންގެ ހިތުގައި ސުވާލުތައް އުފެދުނެވެ. އެހެންނަމަވެސް، އެ ބިރުވެރިކަމުން ސަލާމަތްވުމަށްޓަކައި، ކޮންމެ ގުރުބާނީއެއް ވުމަށް އެންމެން ތިބީ ތައްޔާރުގައެވެ.
އެ ބޭރު މީހާ، ރަށު ތެރެއަށް ނަޒަރު ހިންގާލަމުން ބުންޏެވެ.
"ބިރުވެރިކަމުގެ އަސްލު،ހިޔަނި އުފެދުނު ތަނުން ނައްތާލުން. އެކަން ކުރަންޖެހޭނީ، އެ ހިޔަނި އުފެދުނު ރޭގެ ފަދަ ރެއެއްގަ" އެ ވާހަތަކުން ރައްޔިތުންގެ ހިތުގައި އާ އުންމީދެއް އުފެދުނެވެ.
ނަމަވެސް އެހާމެ ބޮޑު ބިރުވެރިކަމެއްވެސް އުފެދުނެވެ.
މިއީ އެއްވެސް އިންސާނެއްގެ ފުރާނައަށް ގެއްލުން ނުލިބޭނެ ކަމެއްކަން ރައްޔިތުންނަށް އެނގުމުން، އެމީހުންގެ ހިތަށް ހަމަޖެހުމެއް ލިބުނެވެ. ނަމަވެސް އެކަން ކުރުމަށްޓަކައި އެ ހިތްވަރު ކުރާނެ މީހަކު އެރަށުން ހޯދަންޖެހުނެވެ. ގިނަ ބަޔަކު ބިރުން ފަހަތަށް ޖެހުނެވެ. އެހެންނަމަވެސް، ރަށުގެ ޒުވާނުންގެ ތެރެއިން "އަބްދުﷲ" ކިޔާ ހިތްވަރުގަދަ ޒުވާނެއް ކުރިއަށް ނިކުމެ، އެކަން ކުރުމަށް ތައްޔާރުކަން ހާމަކުރިއެވެ. އަބްދުﷲގެ ހިތުގައި ބިރުވެރިކަމެއް ނެތީއެއް ނޫނެވެ. ނަމަވެސް، އޭނާގެ ރަށުގެ މީހުން ބިރުވެރިކަމުގެ ތެރޭގައި ދިރިއުޅޭތަން ބަލަން އޭނާއަށް ކެތެއް ނުވިއެވެ.
ބޭރު މީހާ، އަބްދުﷲއަށް ބިރުވެރި ހިޔަނި ނައްތާލުމަށް ބޭނުންވާ ތަކެއްޗާއި، ކުރަންޖެހޭ ކަންކަން ކިޔައިދިނެވެ. އެއީ ކުރީ ޒަމާނުގެ ކަޅު ކުލައިގެ ފޮތެއްގައި ލިޔެފައިވާ ބައެއް އަކުރުތަކެވެ. އަދި، ހިޔަނި ނައްތާލުމަށް ބޭނުންވާ ބައެއް ތަކެތި ހޯދައި، އެތަކެތި ގެނައުމަށްވެސް ބުންޏެވެ. އަބްދުﷲ އާއި، އެ ބޭރު މީހާ، ޢަމަލު ކުރަންވީ ދުވަހަށް ތައްޔާރުވިއެވެ.
= ނުނިމޭ =
