މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ ބިލު މިނިވަން މުއައްސަސާތަކުގެ ކޮމިޓީއިން ދިރާސާކޮށް ނިންމީ މިއަދު ބޭއްވި ކޮމިޓީ ބައްދަލުވުމުގައެވެ.
ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރު ހުށަހެޅުއްވި މި ބިލު ދައުރުން ބޭރުން ބޭއްވި ރައްޔިތުންގެ މަޖިލީހުގެ ޖަލްސާގައި މިރޭ ފާސްކުރީ ބިލާއި ދެކޮޅަށް ބައެއް ނޫސްވެރިންނާއި އެމްޑީޕީގެ މެންބަރުންނާއި އާންމުންގެ ތެރެއިން ބަޔަކު އަޑުއުފުލަމުން ދަނިކޮށެވެ. ސަރުކާރަށް ނިސްބަތްވާ މެންބަރުން ވަނީ މިބިލަކީ ކޮންމެހެން މުހިންމު ބިލެއްގެ ގޮތުގައި ފާހަގަކޮށްފައެވެ.
މީޑިއާ ބިލު ރައްޔިތުންގެ މަޖިލީހަށް ހުށަހެޅިއިރު ނޫސްވެރިންގެ ހުރި ކަންބޮޑުވުންތަކަށް އެޓާނީ ޖެނެރަލް އޮފީހުން ވަނީ ބައެއް އިސްލާހުތައް ހުށަހަޅާފައެވެ. މިގޮތުން ކޮމިޓީ މަރުހަލާގައި ގެނެސްފައިވާ މައިގަނޑު ބައެއް ބަދަލުތައް:
1 ކޮމިޝަން އެކުލެވިގެންވަނީ ތިރީގައި ބަޔާންކޮށްފައިވާ މެންބަރުންގެ މައްޗަށް:
- ރައްޔިތުންގެ މަޖިލީހުން ކަނޑައަޅާ 3 މެންބަރުން
- މީޑިއާތަކުން އިންތިޚާބުކުރާ 4 މެންބަރުން
2 ރައްޔިތުންގެ މަޖިލީހުން މެންބަރުން ކަނޑައެޅުން
މި ޤާނޫނުގެ 17 ވަނަ މާއްދާގެ (ހ) ގެ ދަށުން ރައްޔިތުންގެ މަޖިލީހުން ކޮމިޝަނަށް މެންބަރުން ކަނޑައެޅުމުގައި އަމަލުކުރަންވާނީ ކޮމިޝަނުގެ މެންބަރުކަމަށް ކުރިމަތިލުމަށް އާންމުކޮށް އިއުލާންކުރުމަށްފަހު ރައްޔިތުންގެ މަޖިލީހުގެ ޤަވާއިދުގައި ބަޔާންކޮށްފައިވާ ގޮތުގެ މަތިންނެވެ.
ފުރަތަމަ ފަހަރަށް މެންބަރުން އައްޔަން ކުރުމަށްޓަކައި މި ޤާނޫނަށް އަމަލުކުރަން ފަށާ ތާރީޚުން ފެށިގެން 15 ދުވަހުގެ ތެރޭގައި ރައްޔިތުންގެ މަޖިލީހުން އިއުލާން ކުރަންވާނެއެވެ.
3 ކޮމިޝަނުގެ ރައީސާއި ނައިބު ރައީސް އައްޔަންކުރުމާއި ވަކިކުރުން
ކޮމިޝަނުގެ މެންބަރުންގެ ތެރެއިން ކޮމިޝަނުގެ ރައީސް އައްޔަންކޮށް ވަކިކުރާނީ ރައްޔިތުންގެ މަޖިލީހުންނެވެ.
ކޮމިޝަނުގެ ނައިބު ރައީސް އައްޔަންކުރާނީ ކޮމިޝަނުގެ މެންބަރުންގެ ތެރެއިން، ކޮމިޝަނުގެ މެންބަރުންގެ މެދުގައި ނަގާ ސިއްރު ވޯޓަކުންނެވެ. ކޮމިޝަނުގެ ނައިބުރައީސް އެމަގާމުން ވަކިވާނީ ކޮމިޝަނުގެ ނައިބު ރައީސް އެމަޤާމުން ވަކިކުރުމަށް ކޮމިޝަނުގެ މެންބަރުންގެ ތެރެއިން 4 މެންބަރަކު ކޮމިޝަނުގެ ޖަލްސާއަކަށް ހުށަހަޅައި އެ ޖަލްސާއަށް ހާޟިރުވެ ވޯޓުގައި ބައިވެރިވާ މެންބަރުންގެ އަޣުލަބިއްޔަތުން ފާސްކުރުމުންނެވެ.
4 އާންމު މަސްލަހަތާގުޅޭ މައްސަލަތަކުގައި މައުލޫމާތު ހާމަކުރުމުގެ މިންގަނޑު
- މައްސަލައިގެ ހަގީގަތާއި އެ ހަގީގަތުގެ މައްޗަށް ބިނާކޮށް މީހަކު ފާޅުކުރާ އެމީހެއްގެ އަމިއްލަ ޚިޔާލާ ދެ ކަންތައް ތަފާތުކޮށް އެނގޭގޮތަށް ފާހަގަކުރުން
- މައްސަލައިގެ މައުލޫމާތު ހާމަކުރުމުގައި އާންމުންނަށް ހަގީގަތް އޮޅޭގޮތަށް ނުވަތަ މައްސަލައިގެ ވަކި ކަމެއް އޮޅޭގޮތަށް ނުވަތަ މައްސަލައާގުޅޭ ބައެއް މައުލޫމާތު ހިފެހެއްޓޭގޮތަށް މައުލޫމާތު ހާމަނުކުރުން
- މައްސަލައިގެ ހަގީގަތް ހާމަކުރާއިރު އެއީ ތެދު މައުލޫމާތުކަމަށް ނުބެލެވޭ ގޮތަށް ނުވަތަ ހަގީގަތުގެ ސައްހަކަމާމެދު ޝައްކު އުފެދޭގޮތަކަށް ނުވަތަ ހަގީގަތް ތެދެއް ކަމަށް ބެލެވޭ ކަމެއް ހާމަކޮށްދެވޭގޮތުން ތެދަށް ވުރެ ބޮޑަށް ދޮގުކަމަށް ބެލެވޭގޮތަށް މައުލޫމާތު ހާމަނުކުރުން
5 މައްސަލަ ބަލާ ކޮމިޓީ
މައްސަލަ ބަލާ ކޮމިޓީއަށް ކޮމިޝަނުގެ މެންބަރުން ނޫން މީހުން އައްޔަންކުރުމުގެ އިޚްތިޔާރު ކޮމިޝަނަށް ލިބިގެންވެއެވެ.
6 މައްސަލަ ބެލުމުގައި ނަގަހައްޓަންޖެހޭ އުސޫލުތައް:
ނޫސްވެރިކަމުގެ މިނިވަންކަމާއި ޚިޔާލު ފާޅުކުރުމުގެ މިނިވަންކަން ޤާނޫނުއަސާސީއާއި ޤާނޫނުތަކުން ލިބިދޭ އެންމެ ފުޅާ ދާއިރާއެއްގައި ލިބިދިނުން
އާންމުންނަށް މައުލޫމާތު އެނގުމުގެ ހައްގާއި އަމިއްލަ ފަރުދުންގެ މިނިވަންކަމުގެ ހައްގު ވީ އެންމެ މަތީ ދަރަޖައަކަށް ހަމަހަމަކުރުން، ނުވަތަ ހަމަހަމަކުރުމަށް މަސައްކަތްކުރުން
މައްސަލަ ބެލުމުގައި އިންސާފުވެރިވުމާއި ތަޢައްސުބުން އެއްކިބާވުމާއި ޑިއު ޕްރޮސެސްގެ އުސޫލުތައް ނެގެހެއްޓުން
ކޮމިޓީއިން ގެނައި އިސްލާހުތަކުގެ އިތުރަށް މަޖިލީސް ތަޅުމުގައި ވެސް ވަނީ ބައެއް އިސްލާހުތައް ބިލަށް ގެނެސްފައެވެ.
މީޑިއާ ރެގިއުލޭޓް ކުރާ ބިލު މަޖިލީހަށް ހުށަހެޅިއިރު އޮތްގޮތުން ވަކިވަކި ނޫސްވެރިން 5000 ރުފިޔާ އާއި 25000 ރުފިޔާ އާއި ދެމެދުގެ އަދަދަކުން ޖޫރިމަނާ ކުރެވޭނެއެވެ. އެހެންނަމަވެސް މަޖިލީހުން ބިލު މިއަދު ފާސްކުރިއިރު ވަނީ މި މާއްދާ އުނިކޮށްފައެވެ.
މަޖިލީހުގެ ޖަލްސާގައި މިބިލު ފާސްކުރީ 60 މެންބަރުން ފެންނަކަމަށް ވޯޓު ދީގެންނެވެ. އެމްޑީޕީގެ ބައެއް މެންބަރުން ބިލާއި ދެކޮޅަށް އަޑުއުފުލަމުން ދަނިކޮށް ނަން އިއްވާ ވަނީ ބޭރުކޮށްފައެވެ. އެހެންވުމުން ތަޅުމުގައި ތިއްބެވި މެންބަރުންގެ ތެރެއިން ބިލާ ދެކޮޅަށް ވޯޓު ދެއްވީ 1 މެންބަރުންނެވެ.
