ވަކި އާއިލާ އަކަށް ނުވަތަ ވަކި ގައުމަކަށް ނިސްބަތްވުމަކީ އެއްވެސް މީހެއްގެ އިހްތިޔާރުގައިވާ ކަމެއްނޫނެވެ. އެހެނީ މިކަންކަމަކީ އިލާހީ ޤާނޫނުން ކޮންމެ މީހަކަށްވެސް ކަނޑައެޅިފައިވާ ކަންކަމެވެ. އެހެންކަމުން ގައުމަކީ ވަކިބަޔަކަށް ހައްޤު ވާތަނަކަށް ނުވާނެއެވެ. ގައުމުގެ ކޮންމެ ފަރުދަކަށްވެސް ގައުމުގެ ހިއްސާ އޮންނަން ވާނެއެވެ. ހަމަ އެހެންމެ ގައުމު ދެކެ ލޯބި ވުމާއި ގައުމަށް ޤައްދާރު ނުވުމަކީ ކޮންމެ ރައްޔިތެއްގެ ވެސް އަޒްމު ކަމުގައި ވާން ވާނެއެވެ. ކޮންމެ މީހަކު ނިސްބަތްވާ ގައުމުން އެމީހަކަށް ހައްޤުވާ ލޯތްބާއި، އަޅާލުމާއި، ރައްކާތެރިކަމާއި، އިހްތިރާމު ލިބުމަކީ ހަމަ ކޮންމެ އިންސާނަކަށް ވެސް ލިބި ދޭންޖެހޭނެ ހައްޤެކެވެ. ގައުމުގައި ލިބެންހުރި އެންމެހާ ވަސީލަތްތަކަކީވެސް އެންމެހާ ރައްޔިތުންގެ ހައްޤު ކަމުގައިވީ ހިނދު ހަމަހަމަ ކަމާއި އެކު ބޭނުން ކުރުމާއި ހައްޤުވާ މިންވަރު ލިބުމަކީ ވަކިފަރުދަކަށް ވީތީ ތަފާތު ވެގެންވާނޭ ކަމެއްނޫނެވެ.
ގައުމެއްގެ ހަޤީޤީ ހިއްސާދާރުންނަކީ އެންމެހާ ރައްޔިތުންނެވެ. ހުރިހާ ބާރުތަކެއް ފެށިގެން އަންނަނީ އެންމެހާ ރައްޔިތުންގެ ކިބައިންނެވެ. ރައްޔިތުން ނުވާނަމަ ގައުމެއްނެތެވެ. ހަޤީޤީ މާނައިގައި ގައުމު ފުރިހަމަވަނީ ރައްޔިތުންގެ ތެރެއިންނެވެ. ވީމާ ގައުމަކަށް ނޭވާލާ ކޮންމެ ރައްޔިތަކީ އެގައުމެއް ދެމިއޮތުމުގެ އަސްލެވެ. ތިމާ އަކީ އާއިލާ ބޮޑު، ނުވަތަ މުދާ ގިނަ މީހަކަށް ވުމަކުން ގައުމުގައި ތިމާގެ ހިއްސާއެއް ބޮޑެއް ނުވާނެއެވެ. ހަމަ އެހެންމެ ތިމާ އަކީ މުދާ މަދު، އާއިލާ ކުޑަ މީހަކަސް ގައުމުގެ ހިއްސާ ހަންޏެއް ނުކުރެވޭނެ އެވެ. ހަމަ އެހެންމެ ގައުމުގެ ހިއްސާ އަކީ މީހަކު އަދާކުރާ ވަޒީފާ އަކުން ނުވަތަ ހާސިލްކުރި އިލްމަކުން ވިޔަސް ހަނި ނުވަތަ އިތުރު ކުރެވިދާނެ ކަމެއް ނޫނެވެ. މިފަދަ ކޮންމެ ކަމެއް މީހެއްގެ ކިބައިގައި އޮތަސް ނުވަތަ ހުއްޓަސް ގައުމުގެ ހިއްސާގެ ތަރާޒް ގެ ކަށި ވާންވާނީ ހަމަހަމަ އެވެ. ގައުމު ކުރިއަރުވަން ހަމަ ކޮންމެ ރައްޔިތަކުވެސް އެމީހެއްގެ ހަކަތަ ބޭނުން ކުރެއެވެ. ތަފާތު އެތަކެއް ގޮތަކުން ކޮންމެ މީހެއްވެސް އެމީހަކަށް ވީ އެންމެ މަތިވެރި ޤުރުބާނީ އެއް ދަނީ ގައުމަށްޓަކައި ވަމުންނެވެ.
ދުނިޔޭގެ އެހެނިހެން ގައުމު ތަކުގައިވެސް ފަރުދުންގެ ތެރޭގައި ތަފާތުތައް ގެންގުޅެއެވެ. މިހެން އޮންނަނީ އެބައެއްގެ ދީނާއި ވަންހަޔާއި އަދި އެހެނިހެން ގަބޫލު ކުރުން ތަކުގެ ސަބަބުންނެވެ. ނަމަވެސް އަޅުގަނޑުމެންގެ ދިވެހި ގައުމަކީ އެއްދީނަކާއި އެއްސަގާފަތެއް އޮތްތަނަކަށްވީއިރު ދިވެހިންގެ ހިތްތަކުގައި ޖަހަންވާނީ ހަމަހަމަ ކަމުގެ ވިންދު ކަން ގަބޫލު ކުރަމެވެ. ނަސްލީ، ދީނީ ތަފާތު ކުރުން ތަކަކީ ދިވެހިންގެ ތެރޭގައި އޮންނަން ކުފޫހަމަވާ ކަމެއް ކަމުގައި ނުދެކެމެވެ. މިފަދައިން ކަންކަން ހިނގާނީ ތިމާ ވެސް އެހެން މީހުންނަށް ހައްޤުތަކެއްވާ ކަމާއި ނާޖާއިޒް ގޮތުގައި އާރާއި ބާރުގެ ބޭނުން ކުރުން ދޫކޮށްލުމުންނެވެ. ކޮންމެ މީހަކީވެސް ހަމަ ތިމާފަދައިން އުފަލާއި، ހިތްހަމަޖެހުމާއި، ބޭނުން ވާނެ މީހެއްކަން ދަނެގެންނެވެ. އެހެން މީހުންނަށް ލިބެން ހުރި އުފާތަކާއި ފުރުސަތު ތަކަކީ އަނެކާގެ ހައްޤެއް ނޫންކަން ދަނެގެންނެވެ. ހައްޤަކީ ވަކިބައެއްގެ އަމިއްލަ މުދަލެއް ނޫނެވެ. ހަމަ ކޮންމެ މީހަކަށް ވެސް ހައްޤު ލިބިގެންވެއެވެ. އެހެންނަމަވެސް ގިނަ ބަޔަކަށް އޮޅުން ނުފިލާ އޮތްކަމަކީ ގައުމަކީ އެންމެގެ ވެސް ހައްޤެއްކަމެވެ.
ގައުމެއްގައި ލިބެންހުރި އެންމެހާ ވަސީލަތްތަކާއި، ހިދުމަތްތަށް ހަމަހަމަ ކުރުން ވާނީ އުނދަގޫ އަދި ގޮންޖެހުން ބޮޑު ކަމަކަށެވެ. އެހެނީ ހައްޤަކީ ފޮރުވިފައިވާ އެތަކެއް މާނައެއް އެކަމުގައި އެކުލެވިގެންވާ މައުނަވީ ކަމެކެވެ. އެކެއްގެ ހައްޤު ފެށޭ ހަމަޔަކީ އަނެކާގެ ހައްޤު ނިމޭހަމަ ކަމަށް ވެދާނެއެވެ. މިހެން ކަމުން ހައްޤުވާ ދެފަރާތުން ވެސް ވިސްނަންވާނީ ދެފަރާތަކީ ވެސް ހައްޤުވެރީން ކަމުގައެވެ. އިސްވެ ބަޔާން ކުރެވުނު ފަދައިން ވަކި ހައިސިއްޔަތެއް އޮތަތީ ހައްޤުވެރި ފަރާތް ހާއްސަ ކުރެވިގެން ނުވާނެއެވެ. ނަމަވެސް މިއީ މިހާރު ފެނިގެންދާ ވަރަށް އާންމު ބަލިކަށި ކަމެކެވެ. އެންމެހާ ރައްޔިތުންނަކީ ހަމަ އަޚުނާއި އުޚްތުންނެވެ. އާއިލާ ތައް އުފަލުން ދިރިއުޅޭ މަންޒަރު ފެނުމަކީ ހިތްތަކަށް ހަމަޖެހުން ގެނުވައިދޭނެ ކަމެކެވެ. ބަދަހި ގައުމީ ގުޅުންތަކެއް އުފެދިގެން ދިޔުމަކީ ގައުމަށް ލިބޭނެ އާރޯ ކަމެކެވެ. ދުނިޔޭގެ އެހެނިހެން ގައުމުތައް ފަދައިން ކުރިއެރުންތައް ހޯދުމަށް ދިވެހި ގައުމަށް ލިބޭނެ ބާރަކަށް ވާނެ ކަމެކެވެ. ގައުމެއް ކުރި އެރުވުމަށް ނުވަތަ ކަމެއް ހާސިލް ކުރުމަށް ބޭނުންވަނީ ވަރުބަލި ނުވާނެ ހިތްވަރެކެވެ. ލޮލު ފިޔަޖަހާލަން ބޭނުން ނުވާ ޝައުގުވެރި ކަމެކެވެ. މިއީ ހައްތާ ވެސް ގައުމު ކުރި އަރުވަން ނުވަތަ ބަދަހި މުޖްތަމައު އެއް ބިނާ ކުރުމަށް ބޭނުންވާނެ ބޭސްވެރި ކަމެވެ.
ގައުމުގެ ހައްޤުގައި ކޮންމެ މީހަކީވެސް އަނެކާގެ ހައްޤަށް އިހްތިރާމް ކުރާ ބަޔަކަށް ވަމާ ހިނގާށެވެ. އެންމެހާ އަފްރާދުންގެ ތެރޭގައި އެކުވެރިކަމާއި ބަދަހިކަން އާލާވާނެ ހުރިހާ ކަމެއް ފަރުދީ އަދި ގައުމީ ފެންވަރުގައި ކުރުމަށް އަތުކުރި އޮޅާލަމާތޯއެވެ. ދިވެހި މުޖްތަމައުގެ ފޭރާން ބައުވެ އުނު އޮރިޔާން ނިވާނުވާ ފަދަ ތަނަކަށް ވުމަކީ ޔަޤީނުންވެސް އެއްވެސް ދިވެހި ރައްޔިތަކު ހިތް އެދޭނެ ކަމެއް ނޫނެވެ. މިކަން ކަން ހާސިލްވާނީ ގައުމަކީ އެންމެންގެ ވެސް ހައްޤެއް ކަމުގައި ކޮންމެ ފަރުދަކުވެސް ދެކިގެންނެވެ.
