ހަނގުރާމައިގެ ސަބަބުން ދިވެހިރާއްޖެއަށް ކުރިމަތިވެދާނެ ދަތިތަކަށް ތައްޔާރުވުމުގެ ގޮތުން ކުރިޔާލާ ފިޔަވަޅު އަޅަންވެއްޖެކަން ސަރުކާރުގެ ސަމާލުކަމަށް ގެނައުމަށް ކުއްލި މައްސަލައެއް ރައްޔިތުންގެ މަޖިލީހުގެ މިއަދުގެ ޖަލްސާ އަށް ވަނީ ހުށަހަޅައިފައެވެ. މިމައްސަލަ މަޖިލީހަށް ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް އެވެ.
" އިސްރާއީލާއި އެމެރިކާއިން އީރާނަށް ދިން ހަމަލާތަކުގެ ރައްދުގައި އީރާނުން ހަމަލާތައް ދޭން ފަށައި މެދުއިރުމަތީގައި ހަނގުރާމައެއް ހިނގަމުންދާ ހިނދު އަދި އެ ހަނގުރާމަ އެ ސަރަހައްދުގެ އިތުރު ޤައުމުތަކަށް ފެތުރި އެތަކެއް ދުވަސްތަކަކަށް ދިގުދެމިގެން ދިއުމުގެ ފުރުސަތު އޮތް ހިނދު، އަދި ހަނގުރާމައިގެ ސަބަބުން ވައިގެ ދަތުރުފަތުރަށް ބުރޫއެރުމުގެ ސަބަބުން އެންމެ ފުރަތަމަ އަސަރު ކުރާ ސިނާއަތަކީ ޓޫރިޒަމް ކަމަށްވީހިނދު މިކަމުގެ ނަތީޖާއެއްގެ ގޮތުން ރާއްޖެއަށް ޓޫރިސްޓުން އައުން މަދުވެ ދައުލަތުގެ އާމްދަނީ ދަށްވުމާއި ބޭރު ފައިސާ ލިބުން ނުހަނު ބޮޑަށް ދަށްވުން ފަދަ ދަތިހާލަތެއް ދިވެހިރާއްޖެއަށް ކުރިމަތިވުމަކީ ނުހަނު އެކަށީގެންވާކަމެއް ކަމަށްވީހިނދު، އަސާސީ ޚިދުމަތްތަކަށް ބޭނުންވާ ތެލާއި ގޭސް ފަދަ ތަކެތި މެދުނުކެނޑި އެތެރެ ކުރެވޭނެކަން ކަށަވަރުކުރުމާއެކު ބޭހާއި ކާޑުގެ ބާވަތްތަކާއި އަދި ތުއްތުކުދިންގެ ކާނާ ފަދަ ކޮންމެހެން ބޭނުންވާތަކެތި ހުސްނުވެ ރައްޔިތުންނަށް ލިބެން ހުންނާނެހެން ކަށަވަރު ކުރުމަށްޓަކައި ފިޔަވަޅުއެޅުމަކީ ސަރުކާރުގެ މައްޗަށް ލާޒިމު ކަމެއް" މީކާއީލް ހުށަހެޅުއްވި ކުއްލި މައްސަލައިގައި ބަޔާންކޮށްފައިވެއެވެ.
އަދި އިސްވެ ދެންނެވުނު ތަކެތީގެ ސްޓޮކް އެކަށީގެންވާ މިންވަރަށް ހުރިތޯ ނުވަތަ ނޫންތޯ ސަރުކާރުން ރައްޔިތުންނަށް އަންގަވަންވާނެ ކަމަށް ދެކެވަޑައިގަންނަވާ ކަމަށްވެސް މި ކުއްލި މައްސަލައިގައި ފާހަގަކުރައްވައިފައި ވެއެވެ.
މި ޖޫންމަހުގެ 13 ވަނަ ދުވަހު އިސްރާއީލުން އިސްވެ އީރާނަށް ދިން ހަމަލާތަކުގެ ބަދަލުގައި އީރާނުން އިސްރާއީލަށް އަންނަނީ ހަމަލާތައް ދެމުންނެވެ. އަދި އެމެރިކާގެ ބައިވެރިވުން އޮވެ އީރާނުގެ ނިއުކްލިއަރ މަރުކަޒުތަކަށް ދިން ހަމަލާތަކުގެ ބަދަލުގައި ގަތަރުގައި ހުންނަ އެމެރިކާގެ އަސްކަރީ ވައިގެ މަރުކަޒަށް އީރާނުން ދިން ހަމަލާތަކުގެ ސަބަބުން ގަތަރު، ޔޫއޭއީ، ކުވެއިތުގެ ވައިގެ ސަރަހައްދު ރޭ ބަންދު ކުރުމުން ފުލައިޓްތައް ކެންސަލްވުމުން ރާއްޖެއަށް އަންނަ ފަތުރުވެރިންގެ އަދަދު މަދުވާނެ ކަމަށް ބެލެވެއެވެ.
ފޮރިން މިނިސްޓަރ އަބްދުﷲ ޚަލީލު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ މެދުއިރުމަތީގެ މަސްރަހު ހޫނުވެފައިވާ މި ދަނޑިވަޅުގައި އެ ސަރަހައްދުގެ ޤައުމުތަކުގައި ދިރިއުޅޭ ދިވެހީންގެ ހާލަތު މިނިސްޓްރީން އަދި މިޝަންތަކުން ވަރަށްގާތުން ބަލަމުން އަންނަ ކަމަށެވެ.
" މިވަގުތު މިސަރަހައްދުގެ ބައެއް ޤައުމުތަކުގެ ވައިގެ ސަރަހައްދު ބަންދުކޮށްފައިވުމާއެކު މި ޤައުމުތަކުގައި ދިރިއުޅުއްވާ އަދި މިވަގުތު ޒިޔާރަތް ކުރައްވަމުން ގެންދަވާ ދިވެހި ރައްޔިތުން މިކަމަށް ޚާއްސަ ސަމާލުކަމެއް ދެއްވާ އެ ޤައުމުތަކުގެ ސަރުކާރުން ދެއްވާ އިރުޝާދާއި އެއްގޮތަށް އަމަލުކުރުމަށް އިލްތިމާސް ކުރަން". މިނިސްޓަރ ޚަލީލު
މެދުއިރުމަތީގައި ހިންގަމުން އަންނަ ހަމަނުޖެހުމުގެ ސަބަބުން ރާއްޖޭގެ އިޤްތިސާދަށް ކުރާނެ އަސަރު ބަލަމުން އަންނަ ކަމަށް ފިނޭންސް މިނިސްޓަރ ޒަމީރު ވެސް ވަނީ ވިދާޅުވެފައެވެ.
