ދިރިއުޅުމުގައި އަޅުގަނޑުމެން އެންމެންނަށްވެސް ހިތްހަމަނުޖެހޭ ކަންތައްތަކާ ކުރިމަތިލާން ޖެހެއެވެ. މިފަދަ ދަތި ވަގުތުތަކުގައި އަމިއްލަ ނަފްސު ބަލަހައްޓައި، އެކަމުން އަރައިގަތުމަކީ ވަރަށް މުހިންމު ކަމެކެވެ. މި މަޒުމޫނުގައި އަޅުގަނޑު ހިއްސާކޮށްލާނީ ހިތްހަމަނުޖެހޭ ކަންކަމުން އަރައިގަތުމަށް ބޭނުންކުރެވިދާނެ 5 'ޓިޕްސް' އެވެ.
- ނޭވާލުމުގެ ތަމްރީނުތައް:
ހިތްހަމަނުޖެހޭ ހާލަތެއް ދިމާވުމުން، ފުން ނޭވާއެއް ލުމަކީ ވަރަށް މުހިންމު ކަމެކެވެ. މިގޮތުން 4-7-8 ނޭވާލުމުގެ ތަމްރީނަކީ ވަރަށް ފައިދާހުރި ގޮތެކެވެ. 4 ސިކުންތު ވަންދެން ނޭވާ ނެގުމަށްފަހު، 7 ސިކުންތު ވަންދެން ނޭވާ ހިފެހެއްޓުމަށްފަހު، 8 ސިކުންތު ވަންދެން ނޭވާ ދޫކޮށްލާށެވެ. މިގޮތަށް ތަކުރާރުކޮށް ކުރުމުން ހިތުގެ ވިންދު މަޑުވެ، ހަމަޖެހުމެއް ލިބިގެންދާނެއެވެ.
- ޝުކުރުވެރިވުން:
ހިތްހަމަނުޖެހޭ ކަމެއް ދިމާވުމުން، އަޅުގަނޑުމެންގެ ސަމާލުކަން ދެވެނީ ނުރަނގަޅު ކަންތައްތަކަށެވެ. ނަމަވެސް، މި ވަގުތުގައިވެސް ޝުކުރުވެރިވާން ޖެހޭ ކަންތައްތަކެއް ހުންނާނެއެވެ. އެހެންކަމުން، ކޮންމެ ދުވަހަކު ޝުކުރުވެރިވާ 3 ކަމެއް ލިޔެ ބެލެހެއްޓުމަކީ ވަރަށް މުހިންމު ކަމެކެވެ. މިކަމުން ހިތުގައި އުފާވެރިކަން އުފެދި، ދިމާވެފައިވާ ދަތި ހާލަތުން އަރައިގަތުމަށް ފަސޭހަވެގެންދާނެއެވެ.
- ވާހަކަދެއްކުން:
ހިތްހަމަނުޖެހޭ ކަމެއް ދިމާވުމުން، އެކަމާ ބެހޭގޮތުން އިތުބާރުހުރި މީހަކާ ވާހަކަދެއްކުމަކީ ވަރަށް މުހިންމު ކަމެކެވެ. މިއީ ރަހުމަތްތެރިއެއް، ޢާއިލާގެ މެންބަރެއް ނުވަތަ ޕްރޮފެޝަނަލް ކައުންސެލަރެއް ކަމުގައި ވިޔަސް، ވާހަކަދެއްކުމުން ހިތުގެ ބުރަ ލުއިވެ، އާ ހައްލުތަކެއް ފެނިގެން ހިނގައިދާނެއެވެ.
- ވަގުތީގޮތުން ސަމާލުކަން އެހެން ކަމަކަށް ބަދަލުކުރުން:
ހިތްހަމަނުޖެހޭ ކަމެއްގައި ގިނަ ވަގުތު ހޭދަކުރުމަކީ ބުއްދިވެރި ކަމެއް ނޫނެވެ. އެހެންކަމުން، ވަގުތީގޮތުން ނަމަވެސް އެހެން ކަމަކަށް ސަމާލުކަން ދިނުމަކީ މުހިންމު ކަމެކެވެ. މިސާލަކަށް ކުޅިވަރެއް ކުޅުން، ފޮތެއް ކިޔުން ނުވަތަ ރަހުމަތްތެރިންނާއެކު ވަގުތު ހޭދަކުރުން ފަދަ ކަންކަމުން ހިތަށް ހަމަޖެހުމެއް ލިބި، އަލުން އާރޯކަމާއެކު އެ މައްސަލައަށް ހައްލެއް ހޯދުމަށް މަސައްކަތް ކުރެވިދާނެއެވެ.
- ދުޢާކުރުން:
އިސްލާމްދީނުގައި ދަތި ވަގުތުތަކުގައި ﷲ އަށް ދުޢާކުރުމަށް ވަރަށް ބޮޑަށް އަހައްމިއްޔަތުކަން ދެއްވާފައިވެއެވެ. ހިތްހަމަނުޖެހޭ ކަމެއް ދިމާވުމުން، އިޚްލާޞްތެރިކަމާއެކު ﷲ އަށް ދުޢާކުރުމަކީ ހިތަށް ހަމަޖެހުމާއި ހިތްވަރު ލިބިގަތުމުގެ އެންމެ ރަނގަޅު ގޮތެވެ. މީގެ އިތުރުން ޤުރުއާން ކިޔެވުމާއި ޛިކުރު ކުރުމަކީވެސް ހިތަށް ހަމަޖެހުން ގެނެސްދޭނެ ކަންކަމެވެ.
މަތީގައި ބަޔާންކުރެވުނު 5 ޓިޕްސްއަކީ ހިތްހަމަނުޖެހޭ ކަންކަމުން އަރައިގަތުމަށް އެހީތެރިވެދޭނެ ގޮތްތަކެވެ. ނަމަވެސް، ކޮންމެ މީހަކަށްވެސް އެންމެ ރަނގަޅަށް މަސައްކަތްކުރާނެ ގޮތްތައް ތަފާތުވެދާނެއެވެ. އެހެންކަމުން، އަމިއްލައަށް އެންމެ ރަނގަޅަށް މަސައްކަތްކުރާ ގޮތްތައް ދެނެގަނެ، އެގޮތްތައް ޢަމަލީގޮތުން ތަޖުރިބާކުރުމަކީ މުހިންމު ކަމެކެވެ.
ހަނދާން ބަހައްޓަންވީ އެއް ކަމަކީ، ހިތްހަމަނުޖެހުމަކީ ވަގުތީ އިހުސާސެއްކަމެވެ. ކެތްތެރިކަމާއެކު މަސައްކަތް ކުރުމުން، ގިނަ ފަހަރު އެކަމުން އަރައިގަނެވޭނެއެވެ. ނަމަވެސް، ދިގު މުއްދަތަކަށް ހިތްހަމަނުޖެހުން ދެމިގެންދާނަމަ، ގައިޑަންސް ކައުންސެލަރ، ސައިކޮލޮޖިސްޓެއް ނުވަތަ ނަފްސާނީ ޑޮކްޓަރެއްގެ އެހީތެރިކަން ހޯދުމަކީ އެންމެ ރަނގަޅު ގޮތް ކަމުގައި ވެދާނެއެވެ.
ނިންމާލުމުގެ ގޮތުން ދަންނަވާނީ، ދިރިއުޅުމުގައި ހިތްހަމަނުޖެހޭ ކަންކަން ދިމާވުމަކީ އާދައިގެ ކަމެކެވެ. ނަމަވެސް، މި ކަންކަމާ ކުރިމަތިލާ ގޮތާއި، އެކަމުން އަރައިގަންނަ ގޮތަކީ އަޅުގަނޑުމެންގެ އަމިއްލަ އިޚްތިޔާރުގައިވާ ކަމެކެވެ. މަތީގައި ބަޔާންކުރެވުނު ޓިޕްސްތައް ބޭނުންކޮށްގެން، ކެތްތެރިކަމާއި ހިކުމަތްތެރިކަމާއެކު ކުރިމަތިވާ ގޮންޖެހުންތަކާ ކުރިމަތިލުމަށް މަސައްކަތްކުރަމާ ހިންގަވާށެވެ.
އެޑިޓަރުގެ ނޯޓް: މިއީ ސޯޝަލް އިމޯޝަނަލް އިންޓެލިޖެންސް ކޯޗެއް އަދި ގައިޑަންސް އެންޑް ކައުންސެލަރ އެއްގެ ގޮތުގައި މަސައްކަތްކުރައްވާ ސަމާ އިބްރާހީމް ދީދީ "ޒީޓައިމްސް" އަށް ހަދިޔާ ކޮށްފައިވާ ލިޔުމެކެވެ. މި ލިޔުމުގެ ބޭނުމަކީ ކިޔުންތެރިންނަށް ދިރިއުޅުމުގެ ހުނަރުތަކާއި ހަރުދަނާ ބަދަހި ގުޅުންތަކެއް ދެމެހެއްޓުމަށް ކުރެވިދާނެ ކަންތައްތަކުގެ މަޢުލޫމާތު ހިއްސާކުރުމެވެ.
