ހަނިމާދޫ އިންޓަނޭޝަނަލް އެއާޕޯޓު ކުލަގަދަ ހަފްލާއަކާއެކު މިރޭ ވަނީ ހުޅުވައިފައެވެ. މި ރަސްމިއްޔާތު ޝަރަފުވެރި ކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އެވެ. މި ރަސްމިއްޔާތުގައި އިންޑިއާގެ ބޮޑުވަޒީރު ނަރެންދުރަ މޯދީގެ ޚާއްސަ މަންދޫބެއްގެ ގޮތުގައި އެ ޤައުމުގެ ސިވިލް އޭވިއޭޝަން މިނިސްޓަރ ކިންޖަރަފޫ ރާފް މޯހަން ނައިޑޫ ވަނީ ބައިވެރިވެވަޑައިގެންފައެވެ.
ހަނިމާދޫ އިންޓަނޭޝަނަލް އެއާޕޯޓުގައި އާޓާމިނަލެއް ހަދައި ތަރައްގީކުރުމުގެ މަސައްކަތް ކުރިއަށްގެންދިޔައީ އިންޑިއާގެ އެގްޒިމް ބޭންކުގެ ލޯނު އެހީގައި 2022 ވަނަ އަހަރުގެ ފަހުކޮޅުން ފެށިގެންނެވެ. މި އެއާޕޯޓު ތަރައްގީކޮށްފައިވަނީ އެންމެ ބޮޑެތި މަތިންދާބޯޓުވެސް ޖެއްސޭނެ ގޮތަށެވެ.
މިއީ ޒަމާނީ ފެންވަރުގައި ތަރައްގީކޮށްފައިވާ ޖާގައިގެ ގޮތުން ތަނަވަސް ޓާމިނަލެކެވެ. ދިވެހި ފަރުމާތަކުން ޒީނަތްތެރިކޮށްފައިވާ ޓާމިނަލް ފަރުމާކޮށްފައިވަނީ ދުވާލުގަޑީގައި އިރުގެ އަލި ލިބޭގޮތަށް ތިމާވެއްޓާއި ރައްޓެހި ގޮތަކަށެވެ. ޑޮމެސްޓިކް އަދި އިންޓަނޭޝަނަލް ޚިދުމަތްތައް ދިނުމަށް ގިނަ ކައުންޓަރުތައް ވަނީ ބަހައްޓާފައެވެ.
އެއާޕޯޓުގެ ފުރަތަމަ ފަންގިފިލާގައި ވަނީ ޑިއުޓީފްރީ އާއި ކެފެޓޭރިއާ ފަދަ ޚިދުމަތް ލިބޭގޮތަށެވެ. އަދި ބީއެމްއެލްގެ ޑޮލަރު ލިބޭނެ ގޮތަށް ޚާއްސަ ކައުންޓަރެއްވެސް ވަނީ ޤާއިމްކޮށްފައެވެ. މަތީ ފަންގިފިލާގައި ނަމާދު ކުރެވޭނެ ސަރަހައްދަކާއި ވީއައިޕީ އަށް ޚާއްސަ ސަރަހައްދެއް ވަނީ ޤާއިމްކޮށްފައެވެ.
ހަނިމާދޫ ޓާމިނަލްގެ ފަރުމާ ވަރަށް ފުރިހަމައެވެ. މިއީ އުތުރުގެ ސަރަހައްދުގައި މިހާތަނަށް ކުރިއަށްގެންދެވުނު ތަރައްޤީގެ އެންމެ ބޮޑު ޕްރޮޖެކްޓެވެ.
ހަނިމާދޫ އެއާޕޯޓަށް ފުރަތަމަ ފަހަރަށް މިރޭ ވަނީ އޭ 320 މަރުކާގެ މަތިންދާބޯޓެއް ޖައްސާފައެވެ. އެމްއޭސީއެލް އިން ހިންގާ ހަނިމާދޫ އެއާޕޯޓުގެ އާޓާމިނަލްގައި ބޭއްވި ޚާއްސަ ރަސްމިއްޔާތުގައި ހަވާ އަރުވާފައިވާއިރު ގިނަ އަދަދެެއްގެ އާންމުންވެސް ވަނީ މި ރަސްމިއްޔާތުގައި ބައިވެރިވެފައެވެ.
