ވޭތުވެމިދިޔައީ އާދަޔާ ޚިލާފަށް ހޫނު ދުވަސްވަރެކެވެ. ހޫނުގަދައިރު ކަރަންޓު ބޭނުންކުރާ މިންވަރު އިތުރުވެއެވެ. ރގިނަބައެއްގެ ކަންބޮޑުވުން އޮތް އެއް ކަމެއްގެ ގޮތުގައި ބިލު ބޮޑުވުން ހިމެނޭއިރު ހޫނުގަދަ ދުވަސްވަރު ބިލު ކުޑަކުރުމަށް ވިސްނާ އެކަމަށް މަސައްކަތްކުރަންތޯ އެވެ؟.
ސްޓެލްކޯގެ ތަފާސް ހިސާބުތަކުން ދައްކާގޮތުގައި އެންމެ ހޫނުގަދަ ދުވަސްވަރު 104 މެގަވޮޓާއި ހަމައަށްވެސް ކަރަންޓު ދަނީ ބޭނުންކުރަމުންނެވެ. އެހެންވުމުން ކޮންމެހެން ބޭނުންވާ މިންވަރަށް ކަރަންޓު ބޭނުންކުރުމަށް ޚާއްސަ ސަމާލުކަމެއް ދޭންޖެހެއެވެ.
ކަރަންޓު ޚަރަދުކުޑަކޮށް ދާއިމީ ހައްލެއް ހޯދުމަށް ކުރެވިދާނެ ކަންތައް:
ކަރަންޓު ޚަރަދު ކުޑަ ބްރޭންޑުގެ ތަކެތި ބޭނުންކުރުން: ކަރަންޓު ބިލު އެންމެ ބޮޑުވާ އެކައްޗަކީ އޭސީއެވެ. އެހެންވުމުން ކަރަންޓު ޚަރަދު ކުޑަކުރަން ބޭނުންނަމަ އިންވާޓަރ އޭސީ އަދި އައިސްއަލަމާރިއާއި ދޮންނަމެޝިނާއި ބޮކިވެސް ބޭނުންކުރާށެވެ. ފުރަތަމަ މިފަދަ ތަކެއްޗަށް ބަދަލުކުރުމަށް ހޭދަކުރަން ޖެހުނަސް ދާއިމީ ފައިދާ ލިބިގެންދާނެއެވެ.
ބޭނުންނުކުރާ ތަކެތި ނިއްވާލުން: ގޭގައި އާންމުކޮށް ބޭނުންކުރާ ތަކެތީގެ ތެރޭގައި ޓީވީ ހިމެނޭނެއެވެ. ކޭބަލް ޓީވީ ގުޅާފައި ހުންނަނަމަ ގިނަ ގޭގޭގައި ހުންނަނީ ޑީކޯޑަރ ނުނިއްވައެވެ. ކަރަންޓުގެ ޚަރަދު ކުޑަކުރުމަށް ޑީކޯޑަރ ނިއްވާލާށެވެ. އަދި ކޮމްޕިއުޓަރ ލެޕްޓޮޕްވެސް ބޭނުންނުކުރާނަމަ ނިއްވާލާފައި ބަހައްޓާށެވެ.
އޮޓޯ ލައިޓް ހަރުކުރުން: މިސާލަކަށް އާންމުކޮށް ދިއްލާފައި ނުހުންނަ ތަނެއްނަމަ އޮޓޯއިން މީހަކު އައުމުން ދިއްލޭ ބޮކި ހަރުކުރެވިދާނެއެވެ. ގޭގެ ބޭރުގައި ނުވަތަ ގަރާޖު ފަދަ ތަންތަނުގައިވެސް މިފަދަ ބޮކި ހަރުކުރެވިދާނެއެވެ. އެއިރުން ނިއްވާލަން ހަނދާންނެތިގެން ކަރަންޓުގެ ޚަރަދު ބޭކާރު ނުވާނެއެވެ.
ކުޑަދޮރުގައި ފޮތިދެމުން: އޭސީ ޖައްސާފައި ހުންނައިރު ހޫނުގަދަވުމުން ކަރަންޓު ބޭނުންކުރާ މިންވަރު އިތުރުވެއެވެ. ކޮޓަރި އަދި ސިޓިންގރޫމުގެ ދޮރުގައިވެސް ފޮތި ދަމާފައި ބަހައްޓާށެވެ. އަދި އިރުއިރުކޮޅާ އޭސީ ޖެއްސުމުގެ ބަދަލުގައި އޭސީގެ ޓެމްޕަރޭޗަރ 25 ގައި ބަހައްޓާށެވެ.
