މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ ބިލު މިއަދު ރައްޔިތުންގެ މަޖިލީހަށް ހުށަހަޅުއްވައިދެއްވީ ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރު އެވެ.
ބިލު ހުށަހަޅާ ސަބަބު:
މި ބިލު ހުށަހެޅުމުގެ ބޭނުމަކީ ދިވެހިރާއްޖޭގެ ނޫސްވެރިކަމުގެ މިނިވަންކަން ކުރިއަރުވައި ތަރައްޤީކޮށް ދިވެހިރާއްޖޭގައި ނޫސްވެރިކަމުގެ މިނިވަންކަން ދެމެހެއްޓުމާއެކު ދޮގު ޚަބަރު ފެތުރުން ހުއްޓުވުމާއި ނޫސްވެރިންނަށް ޤާނޫނުއަސާސީން ލިބިދޭ ހައްޤުތައް ޒިންމާދާރުކަމާއެކު ބޭނުންކުރާކަން ކަށަވަރުކުރުމުގެ ގޮތުން މީޑިއާތަކާއި މީޑިއާތަކުގައި މަސައްކަތްކުރާ ނޫސްވެރިންނާއި އެހެނިހެން ފަރާތްތަކުން އަމަލުކުރާނެ ހަމަތަކާއި އުސޫލުތައް ކަނޑައަޅައި އެއުސޫލުތައް ހިންގުމަށާއި ޒަމާނާ އެއްގޮތަށް ނޫސްވެރިކަމުގެ މިނިވަންކަން ކުރިއެރުވުން ކަމުގައި ވަނީ ބަޔާންކޮށްފައެވެ.
މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން އުފެއްދުން
- ކޮމިޝަން އެކުލެވިގެން ވަނީ 7 މެންބަރުންގެ މައްޗަށެވެ. އެއީ ރައްޔިތުންގެ މަޖިލީހުން ރުހުން ލިބިގެން ރައީސުލްޖުމްހޫރިއްޔާ އައްޔަންކުރާ 3 މެންބަރުން އަދި މީޑިއާތަކުން އިންތިޚާބުކުރާ 4 މެންބަރުންނެވެ.
- މި ޤާނޫނަށް އަމަލު ކުރަން ފެށުމާއެކު މޯލްޑިވްސް މީޑިއާ ކައުންސިލުގެ ޤާނޫނު އުވޭނެއެވެ.
- ބްރޯޑްކާސްޓްކުރުމުގެ ޤާނޫނުގެ 3 ވަނަ މާއްދާއިން ފެށިގެން 18ވަނަ މާއްދާގެ ނިޔަލަށް ހުރި މާއްދާތަކާއި އެ ޤާނޫނުގެ 20 ވަނަ މާއްދާއާއި 37 ވަނަ މާއްދާ އަދި 42 ވަނަ މާއްދާއިން ފެށިގެން 45 ވަނަ މާއްދާގެ ނިޔަލަށް ހުރި މާއްދާތައް އުވޭނެއެވެ.
- މި ޤާނޫނަށް އަމަލު ކުރަން ފެށުމާއެކު މޯލްޑިވްސް މީޑިއާ ކައުންސިލާއި ބްރޯޑްކާސްޓިންގ ކޮމިޝަންގެ މެންބަރުންގެ މަޤާމުގެ މުއްދަތު ނިމުމަކަށް އަންނާނެއެވެ.
ނޫސްމަޖައްލާ ރަޖިސްޓްރީ ކުރުން
- އެއްވެސް ވަސީލަތެއް މެދުވެރިކޮށް ދިވެހިރާއްޖޭގައި އެއްވެސް ނޫހެއް ނުވަތަ މަޖައްލާއެއް ޝާއިޢުކުރަންވާނީ ކޮމިޝަނުގައި ރަޖިސްޓްރީ ކުރުމަށްފަހުގައެވެ.
ޒިންމާ އުފުލުން:
ނޫހެއްގައި ނުވަތަ މަޖައްލާއެއްގައި ވަކި ފަރާތެއް ނޭނގޭ ގޮތަށް ޝާއިޢުކުރާ ޚަބަރެއް ނުވަތަ ލިޔުމެއް، ނުވަތަ ފޮޓޯއެއް ނުވަތަ ކުރެހުމަކާ ގުޅޭގޮތުން އެއްވެސް މައްސަލައެއް ދިމާވެއްޖެނަމަ އެކަމުގެ މަސްއޫލިއްޔަތު އުފުލަންޖެހޭނީ އެނޫހެއްގެ ނުވަތަ އެ މަޖައްލާއެއްގެ އެޑިޓަރެވެ. ވަކި ފަރާތެއް އެނގޭ ގޮތަށް ޝާއިޢުކުރާ އެއްޗެހީގެ ޒިންމާ އުފުލަންޖެހޭނީ އެ ފޮޓޯއެއް ނެގިމީހާއާއި އެ ނޫހެއްގެ ނުވަތަ އެ މަޖައްލާއެއްގެ އެޑިޓަރެވެ.
ނޫސްވެރިންގެ ދަފްތަރު
ދިވެހިރާއްޖޭގެ ނޫސްވެރިކަން ކުރާ މީހުންނާއި އެޑިޓަރުކަން ކުރާ މީހުންގެ ދަފްތަރު ބަލަހައްޓާނީ ކޮމިޝަނުންނެވެ.
މައްސަލަ ބެލުމުގެ ބާރު:
ކޮމިޝަނުން ބަލަމުންދާ މައްސަލައަކާ ގުޅިގެން އަންނަނިވި ކަންކަން ކުރުމުގެ ބާރު ކޮމިޝަނަށް ލިބިގެންވެއެވެ.
- ހެކިންގެ ގޮތުގައި ހާޒިރު ކުރަންޖެހޭ ފަރާތްތައް ކޮމިޝަނަށް ހާޒިރު ކުރުމާއި ހެކިބަސް ހޯދުން
- މައްސަލަ ބަލާއިރު ލިޔުމުން އަންގާ ޖަވާބުދާރީވުމަށް އެކަށީގެންވާ މުއްދަތެއް ދޭންވާނެކަމަށް ވަނީ ބަޔާންކޮށްފައި
ބްރޯޑްކާސްޓްކުރުމުގެ ޚިދުމަތްދިނުމުގެ ލައިސަންސް އޮތް ފަރާތާމެދު ފިޔަވަޅު އެޅުން
ލައިސަންސް ދިނުމުގެ ޝަރުތަކާ ޚިލާފުވެއްޖެނަމަ ފިޔަވަޅު އެޅުމުގެ ބާރު ކޮމިޝަނަށް ލިބިގެންވެއެވެ.
- ކޮމިޝަނުން ކަނޑައަޅާ ސުލޫކީ މިންގަނޑާ ނުވަތަ ބްރޯޑްކާސްޓްކުރުމުގެ ޤާނޫނުގެ ދަށުން ކަނޑައަޅާފައިވާ ލައިސަންސް ދިނުމުގެ ޝަރުތަކާ ތަކުރާރުކޮށް ޚިލާފުވެއްޖެނަމަ ވޭތުވެދިޔަ އަހަރު އެފަރާތަށް ލިބުނު އާމްދަނީގެ 10 އިންސައްތައަށްވުރެ ބޮޑު ނޫން އަދަދަކުން ޖޫރިމަނާކުރެވޭނެ
- ބްރޯޑްކާސްޓް ކުރުމުގެ ލައިސަންސް އަދި ނޫސްމަޖައްލާގެ ރަޖިސްޓްރީ ލިބިފައިވާ ފަރާތަކުން ތަކުރާރުކޮށް ޤާނޫނާއި ޤަވާއިދާ ޚިލާފްވަމުންދާނަމަ އެ ފަރާތަކަށް ދޫކޮށްފައިވާ ލައިސަންސް ބާޠިލުކުރުމަށް ކޯޓަށް ހުށަހެޅުމަށްފަހު ކޯޓުން ނިންމާ ގޮތެއްގެ މަތިން ލައިސަންސް ބާޠިލް ކުރެވިދާނެ
މީޑިއާގައި މަސައްކަތްކުރާ ފަރާތްތަކާއި ނޫސްވެރިންނާމެދު ފިޔަވަޅު އެޅުން
- ކޮމިޝަނުން ރަނގަޅު ކުރުމަށް އަންގާ ކަމެއް އިސްލާހުކުރުމަށް އަންގާފައިވާ މުއްދަތުގެ ތެރޭގައި އިސްލާހު ނުކޮށްފިނަމަ 5000 ރުފިޔާއާއި 25،000 ރުފިޔާއާ ދެމެދުގެ އަދަދަކުން ޖޫރިމަނާކުރުން
ކޮމިޝަނުން ނިންމާ ނިންމުންތަކާ ދެކޮޅަށް ދަޢުވާކުރުމުގެ ހައްޤު
- ކޮމިޝަނުން ނިންމާ ނިންމުމަކާ ގުޅިގެން އެއްވެސް ފަރާތެއްގެ ހައްޤަކަށް އުނިކަން ލިބިފައިވާނަމަ އެނިންމުމެއް ނިންމާތާ 6 މަސްދުވަހުގެ ތެރޭގައި އެމައްސަލައެއް ކޯޓަށް ހުށަހަޅަންވާނެ
- ކޮމިޝަނުން މައްސަލަ ބެލޭނީ އެމައްސަލަ ބިނާވެފައިވާ ކަންކަން ހިނގި ތާރީޚާއި އެމައްސަލައެއް ކޮމިޝަނަށް ހުށަހެޅި ތާރީޚާއި ދެމެދު މީލާދީގޮތުން 1 އަހަރު ދުވަސް ފުރިހަމަ ނުވާނަމަ
ކޮންޓެންޓާއި ގުޅިގެން ހުށަހެޅޭ މައްސަލަތައް ބެލުން:
- މީޑިއާ ކޮންޓެންޓް އެޖުޑިކޭޝަން ކޮމިޓީއަށް މީޑިއާ ތަމްސީލްކުރާ 4 ފަރާތް ހޮވާނީ މީޑިއާގެ ޚިދުމަތްދޭ ފަރާތްތަކުގެ މެދުގައި ކޮމިޝަނުން ބާއްވާ އިންތިޚާބަކުން
ރައްޔިތުންގެ މަޖިލީހުގައި ކުރިއަށްދިޔަ ބަހުސް:
މި ބިލުގެ ބަހުސް މަޖިލީހުގެ ތަޅުމުގައި މިއަދު ކުރިއަށްގެންދިޔައިރު އިދިކޮޅު އެމްޑީޕީގެ މެންބަރުން ވަނީ ބިލާއި ދެކޮޅަށް ވާހަކަ ދައްކަވާފައެވެ. އެކަމަކު ސަރުކާރަށް ނިސްބަތްވާ މެންބަރުން ވަނީ ބިލުގެ ދިފާޢުގައި ވަރަށް ބޮޑަށް ވަކާލާތު ކުރައްވާފައެވެ.
މޯލްޑިވްސް މީޑިއާ ކައުންސިލްގެ ކަންބޮޑުވުން:
މީޑިއާ ކައުންސިލުން މިއަދު ނެރުނު ބަޔާނުގައި ވަނީ މި ބިލު ފަރުމާކޮށްފައިވަނީ ޤާނޫނު އަސާސީއިން ލިބިދީފައިވާ ނޫސްވެރިކަމުގެ ހައްގަށް ވަރަށް ބޮޑަށް ހުރަސްއެޅޭ ގޮތަށް ކަމަށް ފާހަގަކޮށްފައެވެ.
" މީޑިއާތައް ރެގިއުލޭޓް ކުރުމަށް އޮތް މިނިވަން ސެލްފް ރެގިއުލޭޓަރީ ނިޒާމް އެއްކޮށް ބަދަލުކޮށް އެއިރެއްގައި އޮންނަ ސަރުކާރަކަށް އަދި ރައްޔިތުންގެ މަޖިލީހުގެ މެޖޯރިޓީ އޮތް ޕާޓީއަކަށް މުޅި މީޑިއާގެ ކޮންޓްރޯލް ލިބޭގޮތަށް ބިލު ފަރުމާކޮށްފައިވަނީ. ބިލުން އުފައްދާ ކޮމިޝަން އެކުލެވިގެންވާ ގޮތުން އަދި މެންބަރުން ވަކިކުރުމުގެ ބާރު ދީފައިވާގޮތުން މީޑިއާތައް މިނިވަންކަމާ އެކު މަސައްކަތްކުރުމަށް ހުރަސްއެޅި ވަރަށް ބޮޑަށް ހުރިހާ ބާރެއް ރައީސުލްޖުމްހޫރިއްޔާ އާއި ރައްޔިތުންގެ މަޖިލީހަށް ލިބިދޭނެ ކަމަށް ކައުންސިލުން ދެކެން". މީޑިއާ ކައުންސިލްގެ ބަޔާނުގައި ވެއެވެ.
ރާއްޖޭގެ ނޫސްވެރިކަމާއި މީޑިއާގެ މިނިވަންކަން އެއްކޮށް ގެއްލިދާނެ ކަމަށް ބުނެ މީޑިއާގައި ހަރަކާތްތެރިވާ 13 މީހަކު މިއަދު ވަނީ ރައްޔިތުންގެ މަޖިލިސް އިދާރާ ކައިރީގައި އިހުތިޖާޖުވެސް ކޮށްފައެވެ. އަދި ބައެއް ނޫސްވެރިން ވަނީ ސޯޝަލް މީޑިއާގައި ކަންބޮޑުވުން ފާޅުކޮށްފައެވެ.
ފާޑުކިޔުންތަކަށް ރައްދު ދެމުން ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް ވިދާޅުވީ މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ ބިލު ދިރާސާ ކުރާ ކޮމިޓީ މަރުހަލާގައި ނޫސްވެރިންގެ ކަންބޮޑުވުންތައް އަޑުއަހައި އެއްބަސްވެވޭ ހައްލެއް ގެނެވޭނެ ކަމަށެވެ.
