ފަލަސްޠީނުގެ ޣައްޒާގެ ރައްޔިތުން އުޅެންޖެހިފައިވާ ހިތްދަތި ހާލަތުގެ ސަބަބުން އެ ރައްޔިތުންގެ ހައްޤުގައި ރާއްޖޭގައި ބާއްވާ އެންމެ ބޮޑު އެއްވުން 15 އޮގަސްޓް ހުކުރު ދުވަހު ހަވީރު 4:30 ގައި މާލެ މާފަންނު ސްޓޭޑިއަމް ޓަރފް ގްރައުންޑުގައި ކުރިއަށްގެންދިއުމަށް ވަނީ ހަމަޖެހިފައެވެ.
ސުލްހައަށް މަސައްކަތްކުރާ ބައިނަލްއަޤްވާމީ ޖަމާއަތެއްކަމަށްވާ " ގްލޯބަލް ސްމޫދު ފްލޮޓިއްލާ " ހަރަކާތުގެ ދަށުން ކުރިއަށްގެންދިއުމަށް ހަމަޖެހިފައިވާ މިއެއްވުން ރާއްޖޭގައި ކުރިއަށްގެންދިއުމުގައި އިސްކޮށް ހަރަކާތްތެރިވަނީ އިންޓަރނޭޝަނަލް އެއިޑް ކެމްޕެއިން (އައިއޭސީ)އިން އިސްނަގައިގެން ރާއްޖޭގެ މަދަނީ ޖަމްއިއްޔާ ޖަމާއަތްތަކާއި ބައެއް ކުންފުނިތަކާއި އާންމުން ބައިވެރިވާ ސްޓިއަރިންގ ކޮމިޓީއަކުންނެވެ.
މި އެއްވުމުގެ އެންމެ ބޮޑު މަޤްސަދަކީ ޣައްޒާގެ ރައްޔިތުންނާއެކު ދިވެހީން ތިބިކަން ހާމަކޮށްދިނުމެވެ. ބައިވެރިންގެ ޝުޢޫރުތައް ފާޅުކުރުމަށް ވަނީ ހަމަޖެހިފައެވެ. މިހަރަކާތް މާލޭގެ އިތުރުން ބައެއް ރަށްރަށުގައިވެސް ކުރިއަށްގެންދިއުމަށް ވަނީ ހަމަޖެހިފައެވެ.
