40 މީހުންނާއެކު މާލެއިން ފުރައިގެން ޅ. ނައިފަރަށް ދަތުރުކުރި 'ލައިފްލައިން' ބޯޓު ކާށިދޫގެ އިރުން އިންޖީނު ހުއްޓުމާއި ގުޅިގެން އެބޯޓުގައި ތިބި މީހުން ނައިފަރަށް ގެންދިޔުމުގެ މަސައްކަތް ކުރިއަށްގެންދިޔައީ އެމްއެންޑީއެފްގެ ކޯސްޓްގާޑު ފަސްޓް ސްކޮޑްރަންގެ ދެ ހާބަރަކްރާފްޓް ލޯންޗާއި، ކޯސްޓްގާޑުގެ ގަލްފްކްރާފްޓް ލޯންޗަކުންނެވެ.
މި ބޯޓުގެ އިންޖީނު ހުއްޓުނުކަމުގެ މައުލޫމާތު އެމްއެންޑީއެފްއަށް ލިބުނީ މިއަދު ހެނދުނު 08:15 ހާއިރުގައެވެ.
" ލައިފްލައިން ބޯޓުން ދަތުރުކުރި 9 ކުޑަކުދިންނާއި، 6 އަންހެނުން އަދި 10 ފިރިހެނުން އެމްއެންޑީއެފް ކޯސްޓްގާޑު ފަސްޓް ސްކޮޑްރަންގެ ހާބަރ ކްރާފްޓް ލޯންޗާއި، ކޯސްޓްގާޑުގެ ގަލްފްކްރާފްޓް ލޯންޗުގައި މިއަދު 13:10 ހާއިރު ވަނީ ޅ.ނައިފަރަށް ގެންގޮސްދީފައި". އެމްއެންޑީއެފްއިން މައުލޫމާތުދީފައިވެއެވެ.
އިންޖީނު ހުއްޓުނު ލައިފްލައިން ބޯޓު އެހެން އުޅަނދެއްގައި ކަފުޖަހައިގެން ނައިފަރު ބަނދަރަށް ވެއްދުމަށް ދަނީ ދަތުރުކުރަމުންނެވެ.
