އއ. މާޅޮހަށް އިރުއަރައިގެން އައީ ބިރުވެރި ދުވަހެއްގެ ގޮތުގައެވެ. އެރަށު ރައްޔިތުން ދުވަހަކުވެސް އުންމީދު ނުކުރާފަދަ ގޮތަކަށް އުމުރުން ދުވަސްވީ މީހަކަށް ބޮޑެތި ޒަޚަމްތަކެއްދީ މަރާލުމާއެކު ރަށުގެ ރައްޔިތުންނަށް ލިބުނީ ބޮޑު ސިހުމެކެވެ.
މިއަދު ހެނދުނު 08:15 ހާއިރު ފުލުހުން މީޑިއާއަށް އާންމު ކުރި މެސެޖުގައި ބުނެފައިވެއެވެ. "އއ. މާޅޮހުގެ ގެއެއްގައި ނިދާފައި އޮތް މީހަކަށް ބޮޑެތި ޒަޚަމްތަކެއް ދިނުމުގެ ސަބަބުން ސިއްހީ މަރުކަޒަށް ގެންދެވި ފަރުވާ ދެމުންދާކަމުގެ މައުލޫމާތު ރޭ ދަންވަރު 01:50 ހާއިރު ފުލުހުންނަށް ލިބިފައިވޭ. ފަރުވާދެމުންދަނިކޮށް މިމީހާ ވަނީ ފަތިހުގެ ވަގުތެއްގައި ނިޔާވެފައި".
ނިޔާވެފައިވަނީ އެރަށު އޯކިޑްމާގޭ އަބްދުލްރަހުމާން އާދަމް 65 އަހަރު އެވެ. މިމައްސަލަ ތަހުގީގު ކުރުމަށް ފުލުހުންގެ ތަހުގީގު ޓީމެއް މާލެއިން އުކުޅަހަށް ވަނީ ގޮސްފައެވެ. އަބްދުއްރަހުމާން ދިރިއުޅުނު ގެ ހުރި ސަރަހައްދު އެކީގައި ބަންދުކޮށް މާޅޮހަށް އަރައި ފައިބާ މީހުން ދަނީ މޮނީޓަރ ކުރަމުންނެވެ.
" ތަހުގީގަށް ބޭނުންވާ ތަހުލީލުތައް ހެދުމަށް އަބްދުއްރަހުމާން އާދަމްގެ ހަށިގަނޑު މާލެ ގެނައުމުގެ މަސައްކަތް ދަނީ ކުރަމުން. އަދި ހަށިގަނޑު ޕޯސްޓްމޯޓަމް ހެދުމަށް ވަނީ ނިންމާފައި". ފުލުހުންގެ މުއައްސަސާއިން ހާމަކޮށްފައިވެއެވެ.
މާޅޮހުން މައުލޫމާތު ލިބުނުގޮތުގައި އަބްދުއްރަހުމާން ޒަޚަމްވިކަން އެންމެ ފުރަތަމަ އެނގުނީ އޭނާ އާއި އެއްގެއެއްގައި ދިރިއުޅޭ އަންހެނުންނަށެވެ. އަދި އެމައުލޫމާތު އެހެން މީހުންނާއި ހިއްސާކޮށް ސިއްޙީ މަރުކަޒަށް ގެންދިޔައީ އިތުރު ބައެއްގެ އެހީތެރިކަމާއެކުގައެވެ.
މަންޒަރު ދުށް މީހުން މައުލޫމާތު ދިންގޮތުގައި އަބްދުއްރަހުމާންގެ ބޮލަށް އަމާޒުކޮށް ވަނީ ވަރަށް ބޮޑަށް ހަމަލާދީފައެވެ. މުޅި މީހާ ލެއިން ތައްތެޅިފައި އޮތްއިރު ސިކުނޑީގެ ބައެއްވެސް ފެންނަން ހުރިކަމަށް މަންޒަރުދުށް މީހުން ވަނީ ބުނެފައެވެ.
އަބްދުއްރަހްމާން އަކީ ކަންނެލި މަސްވެރިކަމުގައި ގިނައިން ރަށުން ބޭރުގައި ދިރިއުޅޭ މީހެކެވެ. މި ހިތާމަވެރި ހާދިސާ ކުރިމަތިވިއިރު ދަރިންވެސް ތިބީ ރަށުން ބޭރުގައި ކަމަށްވެއެވެ.
މާޅޮހުގެ ރައްޔިތުންގެ ކަންބޮޑުވުމަކީ ޤާތިލު މިހާތަނަށް އައިއިރު ހޯދިފައި ނުވުމެވެ. މަދު އާބާދީއެއް އޮންނަ މިރަށުގައި އެފަދަ ތުހުމަތެއް ކުރެވޭނެވަރު މީހެއްވެސް ނުވިސްނެއެވެ. ރައްޔިތުން ތިބީ ބިރުވެރިކަމެއްގެ ތެރޭގައެވެ. ރަށު ރައްޔިތުންގެ އުންމީދަކީ އަބްދުއްރަހުމާންގެ އާއިލާއަށް އިންސާފު ލިބި ޤާތިލަށް ހައްޤު އަދަބު ލިބުމެވެ.
