ޅ. އަތޮޅަށް ދަތުރު ކުރަމުންދަނިކޮށް ކާށިދޫ ކަނޑަށް ސިވެކްގެ ލޭންޑިންގ ކްރާފްޓެއް ބަންޑުންޖަހާލީ މިއަދު ހެނދުނު 10:30 ހާއިރުގައެވެ. 3 ސިފައިންނާއި 3 ބިދޭސީން ދަތުރުކުރިއިރު ގެއްލިގެން 2 މީހަކު ދިޔައީ ހޯދަމުންނެވެ.
ގެއްލުނު 2 މީހުންގެ ތެރެއިން އެމްއެންޑީއެފްގެ ނޮދަން އޭރިއާ ކޮމާންޑް ކޯސްޓްގާޑު ފަސްޓް ސްކޮޑަރުންގެ ޑައިވަރުންގެ ޓީމުން ކުރި މަސައްކަތުން ފެނުނު ސިފައިންގެ ވޮރަންޓް އޮފިސަރ 2 އަލީ ހާމިދު ޅ. ނައިފަރު ހޮސްޕިޓަލަށް ގެންދިޔައިރުވެސް ނިޔާވެފައިވާކަމަށް އެމްއެންޑީއެފްއިން ވަނީ މައުލޫމާތު ދީފައެވެ.
މިހާދިސާގައި ގެއްލުނު ބަންގްލަދޭޝް މީހާ ހޯދުމުގެ މަސައްކަތް އަންނަނީ ކުރަމުންނެވެ.
މާލެއިން ފުރައިގެން ދަތުރުކުރަމުންދިޔަ ސިވެކްގެ 'އެލްސީ 308' ލޭންޑިންގ ކްރާފްޓުން ކާށިދޫ ކަނޑަށް ބަންޑުންވި ބައެއް ސާމާނު އޮޔާދާތީ ސަމާލުވުމަށް އެމްއެންޑީއެފްއިން ވަނީ އިލްތިމާސްކޮށްފައެވެ. މި އުޅަނދު ޅ. ކުރެންދޫގެ ހުޅަނގު ދެކުނުން 4 މޭލު ބޭރުން ބަންޑުންވިއިރު ހުރި ސާމާނުތައް އޮޔާދަނީ އިރުމައްޗަށް ވާގޮތަށެވެ.
" ވީމާ މިސަރަހައްދުން ދަތުރުކުރާ ފަރާތްތަކުން މިކަމަށް ސަމާލުކަން ދެއްވުމަށް އިލްތިމާސްކުރަން. އަދި ރޭގަނޑު މިސަރަހައްދުން ދަތުރުކުރާ ފަރާތްތަކުން ދަތުރުކުރުމުގައި ޚާއްސަ ސަމާލުކަމެއް ދިނުމަށްވެސް އިލްތިމާސްކުރަން". އެމްއެންޑީއެފް
ކަނޑުމަތީގައި ހިނގި ހިތާމަވެރި މިހާދިސާގައި ނިޔާވި ސިފައިންގެ ވޮރަންޓް އޮފިސަރ 2 އަލީ ހާމިދު މި ދުނިޔެއާއި ވަކިވެގެންދިޔުމަކީ ވަރަށް ފުން ހިތާމައެއް ކުރުވިކަމެއްކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ ވިދާޅުވެފައެވެ.
" ވޮރަންޓް އޮފިސަރ 2 އަލީ ހާމިދު ވަނީ ދިވެހި އަސްކަރިއްޔާ އަށް ޝަރަފުވެރިކަމާއެކު 27 އަހަރު ޚިދުމަތް ކުރައްވާފައި. ދެމިއޮތުމުގެ ޢާލަމަށް ދަތުރު ކުރެއްވީވެސް ޤައުމީ ޚިދުމަތަށްޓަކައި ސިފައިންގެ ޑިއުޓީގައި އުޅުއްވަނިކޮށް. މި ހިތާމަވެރި ދަނޑިވަޅުގައި އާއިލާއާއި މުއައްސަސާއާއިއެކު މި ފުން ހިތާމައިގައި ބައިވެރިވެ، މަރުހޫމްގެ ފުރާނަފުޅަށް ހެޔޮ ރަޚުމަތް ލެއްވުމަށާއި އާއިލާއަށް ކެތްތެރިކަން އިތުރުކޮށްދެއްވުން އެދި ދުޢާ ކުރަން". ރައީސުލްޖުމްހޫރިއްޔާ ހިއްސާ ކުރެއްވި ޕޯސްޓްގައި ވިދާޅުވިއެވެ.
