އުމުރުން 55 އަހަރުގެ ރަޝާދު ސައީދު އާއި 51 އަހަރުގެ ނަޖުމާ އަލީގެ ދެމަފިރިންނަށް ލިބުނީ އަންހެންކުއްޖަކާއި ފިރިހެންކުއްޖެކެވެ. އަންހެންދަރިފުޅަކީ ލޭއަޅާ ކުއްޖެކެވެ. އުމުރުން އެންމެ 9 އަހަރުގައި 2006 ވަނަ އަހަރު ލޯބިވާ އަންހެން ދަރިފުޅު މަރުވުން މިއީ މިއާއިލާއަށް ލިބުނު ފުންހިތާމައެކެވެ. މި ދެމަފިރިންގެ ހިތުގެ ވިންދު ކަމުގައިވާ ށ. ފޭދޫ، ނާރެސް އުމުރުން 33 އަހަރުގެ އަހުމަދު ސާމީ އަށްވެސް ދިމާވީ ސިއްހީގޮތުން ކަންބޮޑުވާ ހާލަތެކެވެ.
ދެމަފިރިންގެ އުންމީދާއި ގުޅިފައިވާ ސާމީއަށް ފުރިހަމަ ފަރުވާއެއް ލިބޭތޯ ރާއްޖެއާއި ރާއްޖެއިން ބޭރުން އެތައްފަހަރަކު ފަރުވާ ހޯދައިފިއެވެ. ސާމީ ވަނީ ވަރަށް ތަފްސީލުކޮށް 'ޒީޓައިމްސް' އަށް އޭނާގެ ބަލިހާލަތު ކިޔައިދީފައެވެ.
އެންމެ ފުރަތަމަ ކިޑްނީ މައްސަލައެއް އުޅޭކަން އެނގުނީ ބަނޑަށްތަދުވާތީ 2018 ވަނަ އަހަރު ހެދި ޓެސްޓުތަކުންނެވެ. އެއިރު ކިޑްނީ މަސައްކަތް ކުރަމުންދިޔައީ 50 ވަރަކަށް ޕަސެންޓެވެ.
" އިންޑިއާއިން އައިސް ރާއްޖެއިން ފަރުވާ ހޯދަމުންދަނިކޮށް ކޮވިޑްތެރޭގައި ކިޑްނީ ބަދަލުކުރަންޖެހުނީ. 2021 ވަނަ އަހަރު ޖެނުއަރީގައި އިންޑިއާއަށް ގޮއްސަ މާރިޗްމަހު ކިޑްނީ ޓްރާންސްޕްލާންޓު ކުރެވުނީ... ވަރަށްގިނަ ދުވަހު އިންޑިއާގައި ހޭދަވި ފަރުވާއަށް.. ބެންގަލޫރުގެ އެންޔޫ ހޮސްޕިޓަލުން ފަރުވާހޯދީ.. ބައްޕަ ކިޑްނީ ހަދިޔާކުރީ" ސާމީ ކިޔައިދިނެވެ.
2021 ވަނަ އަހަރު ލޯބިވާ ބައްޕަގެ ކިޑްނީއާއެކު ސާމީ އަދި އާއިލާއިން ވެސް އުންމީދުކުރީ އާންމު ދިރިއުޅުމެއްގައި ހެޔޮހާލުގައި ދުވަސްތައް ވޭތުކުރެވިދާނެކަމަށެވެ. އެކަމަކު ކަންދިމާކުރީ އެއަށްވުރެ ހިތްދަތި ގޮތަކަށެވެ.
" 2024 ވަނަ އަހަރު ޖުލައިމަހު އަލަށް ލެއްވި ކިޑްނީ ރިޖެކްޓްކުރަން ފެށީ. މަންމައާއި ބައްޕަގެ އަޅުގަނޑު އެކަނި ހުންނަނީ. ފުރަތަމަ ފަހަރުވެސް މަސައްކަތްކުރީ މަންމަގެ ކިޑްނީ ހަދިޔާކުރުމަށް. އެކަމަކު ޑޮކްޓަރުން އިރުޝާދު ދިނީ މަންމައަށް ދެވެން ނެތްކަމަށް. މިދިޔައަހަރުވެސް ބެލިން މަންމަގެ ކިޑްނީ ހަދިޔާކުރެވޭތޯ އަޅުގަނޑަށް. ބެލިއިރު ކުރިން ހަކުރު ނުހުރޭ އެކަމަކު ހަކުރު މަތިވުމުން އަމިއްލައަށް ކަސްރަތުކޮށް ވަރަށް މަސައްކަތުން ބޯޑަރލައިންއަށް މަންމަ ހަކުރު ތިރިކުރި. އެކަމަކު ޑޮކްޓަރ ރިކޮމެންޑު ނުކުރޭ ނަގާކަށް. އަނެއްކާ އިންޑިއާއަށް ގޮއްސަ ޓެސްޓުތައް ހެދީ މަންމަ ކިޑްނީ ދޭން ބޭނުންވާތީ. އެކަމަކު އިންޑިއާއިންވެސް ބުނީ މަންމައަށް ކިޑްނީ ހަދިޔާކުރެވެން ނެތްކަމަށް ސިއްހީ ސަބަބުތަކަށްޓަކައި".
ދެވަނަ ފަހަރަށް ކިޑްނީ ބަދަލުކުރަންޖެހި ކިޑްނީއެއް ލިބޭތޯ ސާމީ ހުރީ އިންތިޒާރުގައެވެ. ކިޑްނީއެއް ނުލިބިއްޖެނަމަ ކިޑްނީއެއް ގަނެގެންނަމަވެސް ފަރުވާ ފުރިހަމަކުރެވޭތޯ މިއީ ސާމީގެ އާއިލާއިން ކުރާ އުންމީދެވެ. 2024 ވަނަ އަހަރުގެ ނޮވެންބަރުން ފެށިގެން ހަފްތާއަކު 3 ދުވަހު ދަނީ ޑައިލިސިސް ހަދަމުންނެވެ.
" ފުރަތަމަ ކުޅުދުއްފުށިން ޑައިލިސިސް ފެށީ. އެކަމަކު އެކޮޅުގައި އެއްވެސް އާއިލާމީހެއް ނުއުޅޭ. އެހެންވެ މާލެއިން ޑައިލިސިސް ހަދަންފެށީ.. 2025 ނޮވެންބަރުން ފެށިގެން ނައިފަރުގައި ދިރިއުޅެން ފެށީ މަންމަގެ އާއިލާގެ މެންބަރުންނާއެކީ.. ނައިފަރުން ޑައިލިސިސް ހެދޭތީ.." ސާމީ
ނިއުމޯނިއާ ޖެހި ހާލުދެރަވުމާއި ގުޅިގެން 1 މަސްދުވަސް ވަންދެން އައިޖީއެމްއެޗްގައި އެޑްމިޓްކޮށްގެން ވެސް ސާމީއަށް ވަނީ މިދިޔަ އަހަރު ފަރުވާދީފައެވެ. ލޭ ވަރަށްބޮޑަށް ދަށަށްގޮސް ތަކުރާރުކޮށް ލޭއަޅަންޖެހުނުއިރު ސާމީގެ އުންމީދަކީ ކިޑްނީބައްޔަށް ދާއިމީ ހައްލެއް ލިބުމެވެ. މިއީ ސާމީގެ ލޯބިވާ މައިންބަފައިންގެ ވެސް އެންމެ ބޮޑު އުންމީދެވެ.
ތަކުރާރުކޮށް އެތައްފަހަރަކު އިންޑިއާއިން ސާމީ ފަރުވާ ހޯދާފައިވާއިރު ސާމީ އެދެނީ ފަރުވާ އަށް އެހީތެރިކަމަށެވެ. ށ. ފޭދޫ ފެނަކައިގައި ވަޒީފާ އަދާކުރަމުންދިޔަ ސާމީ މިވަގުތު ހުރީ 'މެޑިކަލް ލީވް' ގައި ފަރުވާ ހޯދުމަށް ޅ. ނައިފަރުގައެވެ. ރަށުގެ އިޖުތިމާއީ އަދި ކުޅިވަރުގެ މައިދާނުގައިވެސް ހަރަކާތްތެރިވި މިޒުވާނާ އަށް ބޭނުންވަނީ އާންމުންގެ އެހީތެރިކަމެވެ.
ސާމީ އާއި ގުޅޭގޮތުން އިތުރު މައުލޫމާތު ހޯދުމަށް ގުޅާނީ: 9143010
ދިވެހި ރުފިޔާ އެކައުންޓު ނަންބަރު އަހުމަދު ސާމީ: 7724533055001
ޑޮލަރު އެކައުންޓު ނަންބަރު އަހުމަދު ސާމީ: 7730000204472
ނޯޓް: މިއީ އާންމުންގެ އެހީތެރިކަމާއެކު 'ޒީޓައިމްސް' އިން ބޭސްފަރުވާއަށް އެހީވެދޭ 65 ވަނަ އާއިލާއެވެ. އިންސާނިއްޔަތަށްޓަކައި ކުރާ މިމަސައްކަތުގައި ކިޔުންތެރިން ދެއްވާ އެއްބާރުލުމަށް ޝުކުރު އަދާކުރަމެވެ. މިގޮތަށް ލިބޭ އެހީ ޖަމާވާނީ ބަލިމީހާގެ އެކައުންޓަށެވެ.
