ސުކޫކާ ގުޅޭ މައުލޫމާތު ނޫސްވެރިންނާ ހިއްސާކުރައްވަމުން ރައީސުލްޖުމްހޫރިއްޔާ ޑރ. މުހައްމަދު މުޢިއްމު މިއަދު ވިދާޅުވީ 500 މިލިއަން ޑޮލަރުގެ ސުކޫކު، 8 އޭޕްރިލް 2026 ގައި ދެއްކުމަށް ސަރުކާރުން ނިންމަވާފައިވާކަމަށެވެ.
މި ފައިސާ ދެއްކުމަށްޓަކައި 650 މިލިއަން ޑޮލަރަށްވުރެ ބޮޑުއަދަދެއް ރައްކާކުރެވިފައި އެބަހުރިކަމުގައި ރައީސް ވަނީ ވިދާޅުވެފައެވެ. މިގޮތުން 500 މިލިއަން ޑޮލަރުގެ ސުކޫކު ދެއްކުމުންވެސް، 150 މިލިއަން ޑޮލަރަށްވުރެ ބޮޑުއަދަދެއް ބާކީ ހުންނާނެ ކަމުގައި ފާހަގަކުރެއްވިއެވެ. ސޮވްރިން ޑިވެލޮޕްމަންޓް ފަންޑް (އެސް.ޑީ.އެފް) ގައި، 320 މިލިއަން ޑޮލަރަށްވުރެ ގިނައިން އެބަހުރިކަމަށާއި، ޔޫޒަބަލް ރިޒާވްގެ ގޮތުގައި 330 މިލިއަން ޑޮލަރަށްވުރެ ބޮޑުއަދަދެއް އެބަހުރިކަމުގައި ވިދާޅުވިއެވެ.
ދިވެހިރާއްޖޭގެ ތާރީޚުގައިވެސް ގްރޮސް ރިޒާވް ގޮސްފައިނުވާހާ މަތީ މިންވަރަކަށް އެ ޢަދަދު ގެންދެވިފައިވާކަމުގައި ރައީސް ވަނީ ވިދާޅުވެފައެވެ. ރިޔާސީ ބަޔާނުގައި ދެންނެވި ގްރޮސް ރިވާޒްގެ މިންވަރަކީވެސް ރެކޯޑެއްކަން ފާހަގަކުރައްވަމުން ވިދާޅުވީ، ދިވެހިރާއްޖޭގެ ގްރޮސް ރިޒާވް އެ ރެކޯޑަށްވުރެވެސް މައްޗަށް ގެންދެވިފައިވާކަމުގައެވެ. އެގޮތުން 1.27 ބިލިއަން ޑޮލަރަށް މި ޢަދަދު އަރާފައިވާކަން ފާހަގަކުރެއްވިއެވެ. މިކަންމިހެން އޮތުމީ، މެދުއިރުމަތީގައި މިހާރު ހިނގަމުންދާ ކަންކަމާ ގުޅިގެން ކުރާ އަސަރުތައް މެނޭޖުކުރުމަށް ލިބޭ ލުޔެއްކަމުގައިވެސް ރައީސް ވިދާޅުވިއެވެ.
އިތުރު ފައިސާ ހޯދުމުގެ ކާމިޔާބު މަސައްކަތްތަކެއް، ކަމާބަހާ ފަރާތްތަކާއެކު މަޝްވަރާކުރެވިގެން ކުރިއަށްގެންދެވޭ ކަމުގައި ވިދާޅުވިއެވެ. ބޭރުގެ ދަރަނި ދެއްކުމުގައި ދިވެހިރާއްޖެއަށް އެއްވެސް ވަރެއްގެ ކަންބޮޑުވުމެއް ނެތްކަމުގައި ރައީސް ވަނީ ތަކުރާރުކޮށް ވިދާޅުވެފައެވެ.
ސަރުކާރުން ދިވެހިރާއްޖޭގެ އިޤްތިޞާދީ ކަންކަން މެނޭޖުކުރަނީ ރާއްޖެއިން ބޭރަށް ދައްކަންޖެހޭ ދަރަނި ދެއްކޭނެ ގޮތައް ކަންކަން ކުރަމުން، ރާއްޖޭގެ އެތެރޭގެ ފަރާތްތަކަށްވެސް ދޭން ހުރި ފައިސާއެއް ދައްކަމުން ކަމުގައި ރައީސް ވިދާޅުވިއެވެ. އެގޮތުން، ކުރިއަށް އޮތް ހަފުތާއަކީވެސް ރާއްޖޭގައި މަސައްކަތްކުރާ ކުދި ވިޔަފާރިތައް މެދުވެރިކޮށް ސަރުކާރުން ކުރުވާފައިވާ މަސައްކަތްތަކަށް، މަދުވެގެން 200 މިލިއަނެއްހާ ރުފިޔާ ދެވޭނެ ހަފުތާއެއްކަމުގައި ވިދާޅުވިއެވެ.
ބޭރު ފައިސާއާ ބެހޭ ޤާނޫނުގެ ދަށުން ފައިސާ މާރުކުރެވިފައިވާ ގޮތުގެ ތަފާސް ހިސާބުތައް ހިއްސާކުރައްވަމުން ރައީސް އިތުރަށް ވިދާޅުވީ، ދިވެހިރާއްޖޭގެ އިޤްތިޞާދީ ކަންކަން އޮތީ ވަރަށް ރަނގަޅަށް ކަމުގައެވެ. ހަމަމިއާއެކު، އެއްވެސް ވަރެއްގެ ކަންބޮޑުވުމެއް ނެތް ކަމަށާ، ދިވެހިރާއްޖޭގައި އޮތީ ވަރަށް ވަރުގަދަ، ބާރު ދުވެލީގައި ފުޅާވެ، ކުރިއަރަމުންދާ އިޤްތިޞާދެއް ކަމުގައިވެސް ރައީސް ވަނީ މިއަދު ބޭއްވި ނޫސްވެރިންގެ ބައްދަލުވުމުގައި ފާހަގަކުރައްވައިފައެވެ.
