އުމުރުން އެންމެ 49 އަހަރެވެ. 5 ދަރިންނާއި އަނބިމީހާއާއި އާއިލާއާއި ރައްޓެހިންނާއެކު އުފާވެރި ދިރިއުޅުމެއް ވޭތުކުރަމުންއައި ސ.މީދޫ 'އައިސާދަރުގެ' ހަސަންދީދީގެ ދިރިއުޅުމަށް ހީވެސް ނުކުރާފަދަ ބޮޑު ބަދަލެއް އައީ ކުއްލިއަކަށެވެ.
ވަޒީފާ އަދާކުރުމަށްފަހު ލިބޭ ހުސްވަގުތުގައި ފަރުމަސްވެރިކަން ކުރުމަކީ ހަސަންދީދީގެ ކަށީގައި ހިފާފައިހުރި ކަމެކެވެ. އެގޮތަށް ގޮސް ހިފާމަސް ގިނަފަހަރަށް އާއިލާއާއި އެކުވެރިންނަށް ބަހާލަނީއެވެ. މިދިޔަ ޖެނުއަރީމަހުގެ 23 ވަނަ ދުވަހުގެރޭ ވެސް ހަސަންދީދީ ރައްޓެއްސަކާއެކު ފަރުމަސްވެރިކަން ކުރުމަށް ފަތާފައި ދިޔައީ ރަނގަޅަށް މަސްވެރިކަން ކުރެވޭނެކަމުގެ އުންމީދާއެކުގައެވެ. އެކަމަކު ދިރިއުޅުން ހީވެސް ނުކުރާފަދަ ގޮތަކަށް ބަދަލުވި މިހިތާމަވެރި ހާދިސާގެ މައުލޫމާތު 'ޒީޓައިމްސް' އާއި ހިއްސާކުރީ ހަސަންދީދީގެ އެއްބަނޑު މީހެއްގެ ދަރިފުޅެއްކަމުގައިވާ ފާތިމަތު ނާތިރާ އެވެ.
" ފަރުތޮޅިއެއްޖެހީ.. ކަނައަތްފަރާތު ނޭފަތުން ވަދެގެންގޮސް ވައަތްފަރާތު ނާށިގަނޑު ފޫއަޅުވާލާފައި ގޮސް ސިކުނޑިއަށް ނުވަދެއިނީ ކުޑަތަންކޮޅެއް. އައްޑޫ މީދޫގައި އެއީ. ބޭބެއާއި ބޭބެގެ ރައްޓެއްސެއް ފަތާފައިދިޔައީ ބަނދަރުގެ ބޭރު ތޮށިގަނޑުބޭރަށް. މިހާދިސާ ދިމާވީމަ ބޭބެ ގޮވައިގެން ފަތާފައި ބަނދަރާއި ހަމައަށް ގެންނަންވެސް 30 ވަރަކަށް މިނިޓް ހޭދަވި. އެކީގައި ދިޔަ ކުއްޖާގެ އަޑު މީހަކަށް އިވިގެން ގޮއްސަ ބަލާލީ.. ދެން މީހުން ގެނެސް އެހީތެރިކަމާއެކު ސިއްހީ މަރުކަޒަށް ގެންދިޔައީ. އެތާގައި ނުވާނެ 15 މިނިޓްވެސް ދެން ގެންދިޔައީ އިކުއެޓޯރިއަލް ހޮސްޕިޓަލަށް. ޖެހިގެން އައި ދުވަހު ހެނދުނު މާލެ ގެނައީ އެއާއެމްބިއުލާންސްގައި". ނާތިރާ ކިޔައިދިނެވެ.
ފުރަތަމަ ހަސަންދީދީ އަށް ފަރުވާދިނީ ވެންޓިލޭޓަރުގައެވެ. އެއަށްފަހު 3 ހަފްތާއަށް ވަނީ އައިސީޔޫގައި ބާއްވައިގެން ފަރުވާދީފައެވެ. އެއަށްފަހު އެޗްޑީޔޫގައި ފަރުވާދެމުން އަންނައިރު ހަށިގަނޑުގެ ކަނައަތްފަރާތް ހަރަކާތްކުރަނީ ވަރަށް ކުޑަކޮށެވެ. ވާހަކައެއް ނުދެއްކެއެވެ.
" ބޭބެއަށް ވީގޮތަކީ ފަރުތޮޅި ޖެހީމައި ގަސްތަކާނުލައި އަމިއްލައަށް ނައްޓާލެވުނީ.. ވަރަށްގިނަ ނާރުތަކަށް ގެއްލުންވެ ސިކުނޑިއަށް ލޭ އެޅި ވަރަށް ބޮޑަށް ގެއްލުން ލިބިފައިހުރީ. ސިކުނޑީގެ 2 އޮޕަރޭޝަންވެސް ކޮށްފި. އަދި ސައިނަސްއާއި ގުޅޭ އޮޕަރޭޝަނެއްވެސް ކުރަންޖެހޭ. އެކަމަކު ބޭބެގެ ހާލަތު ހުރިގޮތުން އަދި ނުކުރެވޭ. ގޮވާލީމަ އެނގޭހެނެއްވެސް ހީނުވޭ. އެކަމަކު މިފަހުން ކުޑަކޮށް ލޯހުޅުވާ. ހޭވެރިކަން އެއްކޮށް ނާދޭ. ކާންވެސް ނުދެވޭ. ހޮޅިންވެސް ކާއެއްޗެހި އެޅޭގޮތެއް އަދި ނުވޭ".
އިންޑިއާގެ މީހަކާއި ކައިވެނިކޮށްގެން ރަށުގައި ދިރިއުޅެމުންއައި ހަސަންދީދީގެ 5 ކުދިން ތިބިއިރު ދޮށީ އަންހެން ދަރިފުޅަށް 20 އަހަރެވެ. ވަޒީފާއަށް ދާންފެށިތާ އަދި މިވީ އެންމެ 2 މަސްދުވަހެވެ. ދެވަނައަށް ހުންނަ އަންހެން ދަރިފުޅަށް 17 އަހަރުވީއިރު ހިތަދޫ ކެމްޕަސްއިން ދަނީ ނާސިންއަށް ކިޔަވަމުންނެވެ. 3 ވަނަ ދަރިފުޅު ގުރޭޑު 10 ގައި އޯލެވެލް ހަދަމުން އަންނައިރު 4 ވަނަ ދަރިފުޅު ކިޔަވަމުންދަނީ ގުރޭޑު 5 ގައެވެ. ކުޑަދަރިފުޅަށް އަދި މިވީ އެންމެ 2 އަހަރެވެ. އާއިލާ ދިރިއުޅެމުން އައީ ހަސަންދީދީ އަށް ލިބުނު އާމްދަނީއިންނެވެ. މިހާދިސާގެ ސަބަބުން ހިތްދަތިކަމެއް ލިބިފައިވާ މި އާއިލާއަށް މާލީގޮތުންވެސް މިއީ ލިބުނު ވަރަށް ބޮޑު ދެރައެކެވެ.
" އިންޑިއާއަށް ދާން އާސަންދައިގެ ދަށުން ހަމަޖެހުނީ ނިއުރޯ ރިހެބިލިޓޭޝަން އަށް. ކިމްސް އަށް ދާން ހަމަޖެހުނު ކަމުގައިވިއަސް މައުލޫމާތު ލިބޭގޮތުގައި އަމްރިތާ ހޮސްޕިޓަލުން އެފަރުވާ މާރަނގަޅަށް ލިބެން ހުރޭ. އާސަންދައިން ބުނެފައިއޮތީ ބަދަލުކޮށްދެވިދާނެ ކަމަށް. އާސަންދަ ހަމަޖެހުނަސް އަޅުގަނޑުމެންނަށް ނުފުރި މިމަޑުކުރަނީ އިތުރަށް ބޭނުންވާ ކަންތައްތަކަށް ފައިސާ ނެތުމުން. އަޅުގަނޑުމެން އާއިލާއަކީ އެވަރުގެ ތަނަވަސްކަމެއް ހުރިބައެއް ނޫން. ބޭބެގެ އަންހެނުންނަކީވެސް އިންޑިއާ މީހަކަށްވިއަސް އެކޮޅުގައި ތިބީ އުމުރުން ދުވަސްވީ ދެމަފިރިން. ބޭބެގެ އަންހެނުންގެ އެއްބަނޑު ހުންނަ ހަމައެކަނި އަންހެން ކޮއްކޮވެސް އުޅެނީ އައްޑޫގައި މީހަކާ އިނދެގެން". ހާލަތު ކިޔައިދެމުން ނާތިރާ ބުންޏެވެ.
ހަސަންދީދީ އަށް އާސަންދަ ހަމަޖެހުނީވެސް 2 ހަފްތާގެ މުއްދަތަށެވެ.
" އުސޫލު އޮންނަ ގޮތުން ނިއުރޯ ރިހެބިލިޓޭޝަން އަށް އާސަންދައިގެ ދަށުން ފޮނުވަނީވެސް 2 ހަފްތާއަށް. އެކަމަކު ޑޮކްޓަރ އަޅުގަނޑުމެންނަށް މައުލޫމާތުދިން ބޭބެގެ ހާލަތު އަމިއްލައަށް އުޅެވޭވަރު ކުރުމަށް 9 މަސްދުވަސްވެސް ނަގާފާނޭ ފަރުވާއަށް. ސީދާ ރަނގަޅުވާނީ ކިހާ ދުވަހަކަށް ފަރުވާދީގެންކަން އެހެން ބުނަން ޑޮކްޓަރަށްވެސް ނޭނގޭކަމަށް. ނަރުހަކާއެކީގައި ފޮނުވާނީ. އެއީ އޮކްސިޖަން ބޭނުންވާތީ. ބޭބެ ގޮވައިގެން ދާއިރު ބޭބެގެ އަންހެނުންނާއި ކުޑަދަރިފުޅު އަދި އަޅުގަނޑު ނޫނީ އެހެން އާއިލާ މީހަކު ދާނެ. ބޭބެގެ އަންހެނުންނަކީ އިންޑިއާ މީހަކަށްވުމުން އެކައުންޓެއް ނުހުރޭ".
ނާތިރާ ފާހަގަކުރިގޮތުގައި ވޭތުވެދިޔަ 1 މަސްދުވަހުވެސް ހަސަންދީދީގެ އެހީތެރިއެއްގެ ގޮތުގައި މާލޭގައި މަޑުކުރެވުނީ އާއިލާއާއި ރައްޓެހިންނާއި ހަސަންދީދީ ވަޒީފާ އަދާކުރި އޮފީސް މީހުންނާއި ވަރަށްގިނަ ބައެއްގެ އެހީތެރިކަމާއެކުގައެވެ. ވެދިން އެހީތެރިކަމަށް ވަނީ ވަރަށް ބޮޑަށް ޝުކުރު އަދާކޮށްފައެވެ. އަދި އެދެނީ ހަސަންދީދީގެ ފަރުވާ ފުރިހަމަކުރުމަށް އިންޑިއާގައި ހޭދަވާދުވަސްތަކުގައި ހިނގާނެ ޚަރަދަށް އެހީތެރިކަން ފޯރުކޮށްދިނުމަށެވެ.
ނޯޓް: މިއީ އާންމުންގެ އެހީތެރިކަމާއެކު 'ޒީޓައިމްސް' އިން ބޭސްފަރުވާއަށް އެހީވެދޭ 64 ވަނަ އާއިލާއެވެ. އިންސާނިއްޔަތަށްޓަކައި ކުރާ މިމަސައްކަތުގައި ކިޔުންތެރިން ދެއްވާ އެއްބާރުލުމަށް ޝުކުރު އަދާކުރަމެވެ. މިގޮތަށް ލިބޭ އެހީ ޖަމާވާނީ ބަލިމީހާގެ އެކައުންޓަށެވެ. މި ޢާއިލާ އަށް 3 ދުވަސްތެރޭ އާންމުންގެ ފަރާތުން ވަރަށް ބޮޑު އެހީތެރިކަމެއް ލިބިފައިވާތީ، ކުރިން ހިމަނަައިފައިވާ އެކައުންޓުު ނަންބަރު ވާނީ އުނިކޮށްފައެވެ. ޝުކުރިއްޔާ!
ކިޔުންތެރިންގެ ހިޔާލު
Ekee huree kuhjje noon. Ekee huree fahuru veri dhivehi fuluhe. Eyaa ah libifa huri trainning ge beynun hifaa resuce mission e jehsee. Short cut nunagaa kong route negee reygandu andhirj vefa meehe govaigen ahnna undhagoo vaane thee. Eyna ah adhevunu iru varubali vegen police soru vehtunee mpl bus parking area ah. Ethaa tibi mtcc staff ah adu ivunee.govaali. joali jahaafa hureemq ethaa staff tibey mtcc.longey akee amill ah mas hifan dhaa meehe. Eyna nei nama salaamai vumuge change kuda.