އަބުރު ގެއްލިއްޖެނަމަ އަލުން ހޯދުމަކީ ފަސޭހަކަމެއް ނޫނެވެ. މިޒަމާނުގައި ސޯޝަލް މީޑިއާގެ ޒަރީޢާއިން މީހުންގެ އަބުރު ގެއްލުވާލުމަށް މިނިޓެއްވެސް ހޭދަނުވެއެވެ. ޚާއްސަކޮށް އިންތިޚާބުތަކުގެ ދުވަސްވަރު މިމަންޒަރު ފެންނަލެއް ގިނައެވެ. ތަފާތުގޮތްގޮތަށް އޭއައި ބޭނުންކޮށްގެން މީހުންގެ ފޮޓޯއާއި ވީޑިއޯހަދައި ހިއްސާކުރާ މީހުންވެސް އުޅެއެވެ.
ފާސިޤަކު ޚަބަރަކާއިގެން އަތުވެއްޖެނަމަ އޭގެ ތެދު ދޮގު ބަލައި ހަޤީޤަތް ހޯދުމަށް އިސްލާމްދީންވެސް ބާރުއަޅާއިރު އަޑުއިވޭ ކޮންމެ ވާހަކައެއް އޭގެ ތެދު ހަޤީޤަތް ބެލުމެއްނެތި ސޯޝަލް މީޑިއާގައި ފަތުރާބަޔަކުވެސް އުޅޭކަމީ ހިތާމައެކެވެ. މީގެ ސަބަބުން ގެއްލެނީ އެތައް ބައެއްގެ އަބުރެވެ. އަނބުރައި އަރައި ނުގަނެވޭނެފަދަ ފުން ކަނޑަކަށް ބައެއް މީހުންގެ ހާލަތު ބަދަލުވަމުން އަންނައިރު މިފަދަ ކަންކަމާއިމެދު ވިސްނާލަނީ ކިތައް މީހުންހެއްޔެވެ؟
ކުރިއަށް އޮތް ލޯކަލް ކައުންސިލް އިންތިޚާބަށް ގިނަބަޔަކު ތައްޔާރުވަމުން އަންނައިރު ފެންނަނީ ހިތާމަވެރި މަންޒަރެކެވެ. ވައްކަމާއި ތަފާތު އެކިކަންކަމުގެ ތުހުމަތު އަޅުވައި ކެންޑިޑޭޓުންނާއި އާއިލާގެ އަބުރު ކަތިލަމުން އަންނައިރު މިކަންކަމަށް ޒިންމާވާނެ ނުވަތަ ޒިންމާކުރާނެ ބަޔަކު ނެތެވެ. މީހަކު ގޯސްކޮށް ކަމެއްކޮށް އެކަން ސާބިތުވެއްޖެނަމަ އެވާހަކަ ދެއްކިކަމުގައިވިއަސް، ސާބިތު ނުހިފޭ ދޮގު ވާހަކަތަކާއި ދުރުވާންޖެހެއެވެ.
މުޅި އުމުރު ކުރި މަސައްކަތް ވިއްސިވިހާލިވެގެން ދާން ބޭނުންވަނީ ކާކުހެއްޔެވެ. އެކަމަކު ސޯޝަލް މީޑިއާގައި ފަތުރާ އެންމެ ދޮގު ވާހަކައަކުން ކަޅު ލައްގަނޑެއްޖެހި އެކަމުގެ ހިތާމައިގައި އުޅޭ މީހުން މަދެއް ނޫނެވެ. އަދި ވަޒީފާއާއި ކުރިއެރުމަށް ހުރަސްއެޅި މުޅިއުމުރު ހިތްދަތިކަމެއްގައި އުޅެން ޖެހޭ މީހުންވެސް އުޅެއެވެ.
ތެދު ދޮގު ނުބަލައި ފަތުރާ ވާހަކަތަކަށް ހިތްވަރު ލިބޭގޮތަށް އެވާހަކަތައް އެކި މަންސަތަކުގައި ހިއްސާކުރާ މީހުންވެސް ވިސްނަން އެބަޖެހެއެވެ. ތިމާގެ އަމިއްލަ އާއިލާގެ މީހަކާއިމެދު އެފަދަ ވާހަކައެއް ފަތުރާނަމަ ހަމައެގޮތަށް ހިތްވަރުދޭން ކެރޭނެތޯ އަމިއްލަ ނަފްސާއި ސުވާލުކުރަންޖެހެއެވެ.
ކެމްޕެއިންވެސް ކުރަންވީ ރަނގަޅު ގޮތުގައެވެ. އެއްބަޔަކު އަނެއްބަޔަކާއި ޒާތީވެ ދޮގު ފަތުރައިގެންނެއް ނޫނެވެ. އެއްބަޔަކު އަނެއްބަޔަކަށް ހަޑިހުތުރު ބަސްތަކުން މުޚާތަބު ނުކުރިއަސް ކެމްޕެއިން ކުރެވިދާނެއެވެ.
ކެމްޕެއިންގައި އިސްކަންދޭންވީ އަމިއްލައަށް ކުރެވޭނެ ކަންތަކާއި ހޮވިއްޖެނަމަ ވާނެ ފައިދާ ބުނެދިނުމަށެވެ. އެހެންމީހުންގެ އަބުރު ކަތިލައިގެން ވާނެ ފައިދާއެއް ނޯންނާނެއެވެ.
