ކާމިޔާބީ އާއި ހަމައަށް ވާސިލުވުމަށް ކޮންމެ މުއައްސަސާއަކާއެކުވެސް އެކީގައި މަސައްކަތްކުރާ ބައިވެރިން މުހިންމުކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ މެނޭޖިންގ ޑައިރެކްޓަރ އިބްރާހީމް ޝަރީފު ވިދާޅުވެއްޖެއެވެ.
އެމްއޭސީއެލް އިން ވައިގެ ދަތުރުފަތުރުގެ ސިނާއަތަށް ޚާއްސަކޮށްގެން ބޭއްވި "ވެލާނާ އެވޯޑްސް"ގެ ރަސްމިއްޔާތުގައި ވާހަކަދައްކަވަމުން ޝަރީފު އިތުރަށް ވިދާޅުވީ މި އެވޯޑަކީ މިފަދަ ބައިވެރިން ފާހަގަކުރުމުގެ ގޮތުން ދޭ އެވޯޑެއް ކަމަށެވެ.
އެއާޕޯޓަށް ލިބޭ ކޮންމެ ކުރިއެރުމަކީ ޤައުމަށް ލިބޭ ކުރިއެރުމެއް ކަމަށާއި، ހިންގުމުގެ ހަރުދަނާކަމަކީ ކާމިޔާބީ ވަޒަންކުރުމުގެ އެންމެ އަސާސީ އެއް މިންގަނޑުކަމަށް ވިދާޅުވިއެވެ. މިގޮތުން ޚިދުމަތުގެ ފެންވަރު ރަނގަޅުކުރުމަށް އިތުރު ކުރެވޭ ކޮންމެ ޚިދުމަތަކީ މި ކާމިޔާބީ ދައްކުވައިދޭ ކަމެއްކަމަށް ވިދާޅުވިއެވެ.
އޭވިއޭޝަން ދާއިރާގައި ސަރުކާރުން ކޮންމެ އަހަރަކުވެސް ކަނޑައަޅާ އައު ލަނޑުދަނޑިތައް ހާސިލުކުރުމަށް ބުރަމަސައްކަތެއް ކުރަންޖެހޭކަން ފާހަގަކުރައްވާ އެކީގައި ގުޅިގެން މަސައްކަތްކުރާ ފަރާތްތަކުގެ ގުޅުންތައް ދެމެހެއްޓުމުގެ މުހިންމުކަންވެސް ފާހަގަކުރެއްވިއެވެ.
މިދިޔަ އަހަރު ޖުލައިމަހު 26 ވަނަ ދުވަހު ހުޅުވި އާޓާމިނަލްއާއެކު ލިބުނު ކުރިއެރުންތަކުގެ ހެޔޮ ބަދަލުތައް ފެންނަމުންދާކަންވެސް އެމްޑީ ޝަރީފު ވަނީ ވިދާޅުވެފައެވެ.
ކްރޮސްރޯޑްސް މޯލްޑިވްސް ގައި ކުރިއަށްގެންދިޔަ "ވެލާނާ އެވޯޑްސް" ގެ މިފަހަރުގެ ރަސްމިއްޔާތުގައި 3 ދާއިރާއަކުން 22 އެވޯޑު ވަނީ ދީފައެވެ. މައިގަނޑު ކެޓަގަރީތަކުގެ ތެރޭގައި ހިމެނެނީ ފަސެންޖާ އެވޯޑްސް، ލައުންޖް އެވޯޑްސް، ކާގޯ އެވޯޑްސް އެވެ.
