ސައިންސްގެ ރޮނގުން، މުޅި ދުނިޔެއަށް ފައިދާކުރަނިވި މާހައުލެއް ބިނާކުރުމުގެ އެންމެ މުހިންމު ބިންގަލަކީ އަންހެނުންނާއި އަންހެން ކުދިންގެ ހަމަހަމަ ބައިވެރިވުން ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. ރައީސް މިގޮތަށް ވިދާޅުވީ، ބައިނަލްއަޤުވާމީ ފެންވަރުގައި މިއަދު ފާހަގަކުރަމުންދާ ސައިންސްގެ ދާއިރާގައި ހަރަކާތްތެރިވާ އަންހެނުންނާއި އަންހެން ކުދީންގެ ދުވަހުގެ މުނާސަބަތުގައި ފޮނުއްވި ޚާއްޞަ މެސެޖުގައެވެ.
ރައީސްގެ މެސެޖުގައި ރާއްޖޭގެ ތަރައްޤީގެ ދަތުރު ބިނާވެފައިވަނީ ފަންނީ ދާއިރާތަކުން އަންހެނުން ބާރުވެރިކުރުވުމުގެ މައްޗަށްކަމުގައި ވަނީ ވިދާޅުވެފައެވެ. އަދި މޫސުމީ ބަދަލުތަކުން ރައްކާތެރިވުމާއި، އާޓިފިޝަލް އިންޓެލިޖެންސް ފަދަ ޒަމާނީ ގޮންޖެހުންތަކުން އަރައިގަތުމުގައި އަންހެނުންގެ އިސްނެގުމަކީ ކޮންމެހެން ބޭނުންތެރި ކަމެއްކަން ފާހަގަކުރެއްވިއެވެ. މަތީ ތަޢުލީމާއި، ސްކޮލަރޝިޕް އަދި ފަންނީ ތަމްރީނުތަކަށް އަދުގެ ސަރުކާރުން ދެއްވާ އިސްކަމުގެ ނަތީޖާއެއްގެ ގޮތުން، ސައިންސް، ޓެކްނޯލޮޖީ، އިންޖިނިއަރިންގ އަދި މެތަމެޓިކްސް (ސްޓެމް)، އައި.ސީ.ޓީ އަދި މެރިން ސައިންސް ފަދަ ދާއިރާތަކަށް ދިވެހި އަންހެނުން ޝައުޤުވެރިވެ، މިދާއިރާއަށް ވަންނަ މިންވަރު އިތުރުވަމުންދާތީ އެކަން ފާހަގަކުރައްވައި، އެކަމަށްވެސް ވަނީ ތަޢުރީފުކުރައްވައިފައެވެ.
ސައިންސްގެ ދާއިރާގައި ހުރި ހުރަސްތައް ނައްތާލައި، ސައިންސްގެ ދާއިރާއިން ތައުލީމު އުނގެނުމާއި، ވަޞީލަތްތައް ފަހިކޮށްދެއްވައި އެކަމަށް ފަހި މާޙައުލެއް ޤާއިމުކޮށްދިނުމަށް ސަރުކާރުން އިސްކަންދެއްވާނެ ކަމުގެ ޔަޤީންކަން ރައީސް ދެއްވިއެވެ.
"މަޤްޞަދަކީ، ސައިންސްގެ ދާއިރާއަށް ޝައުޤުވެރިކަން ހުންނަ ކޮންމެ ދިވެހި އަންހެން ކުއްޖަކަށްމެ، އެ ރޮނގުން ތަޢުލީމު އުނގެނި، ބާރުވެރިކުރުވައި، ކުރިއަށްދެވޭނެ މަގު ތަނަވަސްކޮށްދެއްވުން. ދިރާސާކުރުމުގެ ޤާބިލުކަން އިތުރުކުރުމަށާއި، ޑިޖިޓަލް ހުނަރުތައް ތަރައްޤީކުރުމަށް ސަރުކާރުން ދޭ އިސްކަމުގެ ތެރެއިން، ރާއްޖޭގެ ހުރިހާ ކަންކޮޅުތަކެއްގައި ދިރިއުޅޭ ޒުވާން އަންހެނުންނަށް އައު ފުރުޞަތުތަކެއް ފަހިވެގެންދާނެ".
މި ދުވަހުގެ މުނާސަބަތުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އެކްސްގައި ކުރެއްވި ސައިންސްގެ ދާއިރާއިން ޕޯސްޓުގައި ވަނީ ކުރިއަށް ދިއުމުގައި ހުރި ޒަމާންވީ އިޖުތިމާޢީ ހުރަސްތައް ގިރާކުރައްވައި ކާމިޔާބީ ހޯއްދަވާފައިވާ އަންހެން ބޭފުޅުންގެ ޚިދުމަތްތަކުގެ އަގު ވަޒަންކުރައްވާފައިވެއެވެ. ޚާއްޞަކޮށް ޞިއްޙީ އަދި ޓެކްނޮލޮޖީގެ ދާއިރާއިން ޤައުމުގެ ޢިލްމީ ޚަޒާނާ މުއްސަނދިކޮށް، ޤައުމު ތަރައްޤީކުރުމުގައި އެ ކަނބަލުން އަދާކުރައްވާ ދައުރަކީ އަގުނުކުރެވޭ ފަދަ މުހިންމު މަސައްކަތްތަކެއްގެ ގޮތުގައި ފާހަގަކުރެއްވިއެވެ.
